1, 2. а) Сар е Јеховаскере сведокија разликујнена пе таро јавера религие? б) Со ка дикха ки акаја хем ки јавер статија?

О МАНУША бут пути пучена е Јеховаскере сведокон: „Кој водинела тумен?“ Ола пучена акава соске бут религие иси лен несаво мануш со водинела лен. Амен сием горда со шај те вакера кај амаро водачи нане несаво несовршено мануш, него о Исус Христос. А ов шунела пле Даде хем Водаче, е Јехова (Мат. 23:10).

² Исто аѓаар, иси јекх група мурша, о „верно хем разборито робо“, која со предводинела е Девлескере народо ки Пхув авдиве (Мат. 24:45). Ама, котар џанаја кај о Јехова тано адава со водинела амен преку пло Чхаво? Ки акаја хем ки јавер статија ка дикха трин причине соске шај те ова сигурна ко адава. Исто аѓаар ка дикха кај, иако о Јехова користинела сине манушен те водинел пле народо, ов секогаш сине хем панда тано о чачутно Водачи пле народоскоро (Иса. 58:11).

3. Со поможинѓа е Мојсеје те водинел е Израелцон?

³ О Девел денѓа пло свети дух адаленге со претставинена ле сине. О Девел биринѓа о Мојсеј те водинел  е Израелцон. Со поможинѓа е Мојсејеске те керел акаја важно задача? О Јехова денѓа ле „пло свети дух“. (Читин Исаија 63:11-14.) Акава значинела кај о Јехова водинела сине е народо, соске лескоро духо поможинела сине е Мојсеје.

4. Со сикавела кај о свети дух водинела сине е Мојсеје? (Дикх и слика ко почеток тари статија.)

⁴ Дали шај сине о јавера те дикхен кај е Девлескоро духо водинела сине е Мојсеје? Оја! Е Јеховаскоро свети дух денѓа сила е Мојсеје те керел чудија те шај те објавинел е Девлескоро анав е египетско фараонеске (2. Мој. 7:1-3). Исто аѓаар, о свети дух поможинѓа леске те овел шукар хем стрпливо водачи. Ов сине бут појавер таро лошна хем себична водачија со сине ко јавера пхувја (2. Мој. 5:2, 6-9). Сине јасна доказија кај о Јехова биринѓа е Мојсеје те водинел лескере народо.

5. Каске панда о Јехова денѓа пло свети дух те шај те водинен лескере народо?

⁵ Каске панда о Јехова денѓа пло свети дух те шај те водинен лескере народо? Ки Библија пишинела: „О Исус, е Навинескоро чхаво, сине пхердо мудрост со дела е Девлескоро духо“ (5. Мој. 34:9). „Е Јеховаскоро духо ало упро Гедеон“ (Суд. 6:34). Хем „о духо е Јеховаскоро почминѓа те дел сила е Давиде“ (1. Сам. 16:13). Са акала мануша мукхле е Јеховаскоро духо те поможинел ленге те керен буќа со нашти сине те керен лен пле силаја (Ис. Нав. 11:16, 17; Суд. 7:7, 22; 1. Сам. 17:37, 50). Бут тано јасно кај о Јехова сине адава со денѓа лен сила те керен баре буќа, адалеске само ле ваљани сине те фалинен ле.

6. Соске о Девел мангља лескоро народо те поштујнел е манушен со водинена ле сине?

⁶ Со ваљани сине те керен о Израелција кеда дикхле кај е Девлескоро духо водинела сине е Мојсеје, е Исус Навине, е Гедеоне хем е Давиде? Ваљани сине те поштујнен лен. Кеда о народо жалинела пе сине таро Мојсеј, о Јехова вакерѓа: „Џи кеда акава народо нане те поштујнел ман?“ (4. Мој. 14:2, 11). О Јехова сине адава со биринѓа акале манушен те водинен лескере народо. Кеда о народо шунела лен сине, адалеа сине послушна е Јеховаске сар ленгоро Водачи.

7. Сар о ангелија поможинена сине е Мојсејеске?

⁷ О ангелија поможинена сине адаленге со претставинена сине е Девле. (Читин Евреите 1:7, 14.) О Девел користинѓа ангелија те водинел е Мојсеје. Прво, појавинѓа пе леске јекх ангели хем денѓа ле задача те ослободинел е Израелцон хем те водинел лен (Дела 7:35). Дујто, о Девел преку о ангелија денѓа ле о Закони кова со ваљани сине те икерен ле о Израелција (Гал. 3:19). Трито, о Јехова вакерѓа леске: „Ингар е народо коте со пхенѓум туке! Аке, мло ангели ка џал англи туте“ (2. Мој. 32:34). Ки Библија на пишинела  кај о Израелција дикхена сине сар о ангелија керена акала буќа. Ама, таро начин сар о Мојсеј сикавѓа хем водинѓа е народо, јасно сине кај поможинѓе ле о ангелија.

8. Сар о ангелија поможинѓе е Исус Навине хем е Езекија?

⁸ Каске панда поможинена сине о ангелија? И Библија вакерела кај јекх ангели поможинѓа е Исус Навинеске те побединел е Ханаанцон (Ис. Нав. 5:13-15; 6:2, 21). Ки јавер ситуација, кеда о цари о Езекија водинела сине е Девлескере народо, бари асирско војска али те уништинел о Ерусалим. Ама, ало јекх ангели хем јекхе раќаќе мударѓа 185.000 манушен (2. Цар. 19:35).

9. Иако сине несовршена о мануша со претставинена сине е Јехова, со ваљанѓе те керен о Израелција?

⁹ О ангелија тане совршена. Ама, о мануша каске со поможинѓе на сине совршена. На пример, о Мојсеј ки јекх прилика на денѓа и слава е Јеховаске (4. Мој. 20:12). О Исус Навин на пучља е Јехова со те керел кеда о Гаваонција родинѓе те керен сојуз леа (Ис. Нав. 9:14, 15). Јекх периоди таро пло живото о Езекија сине гордо (2. Лет. 32:25, 26). Иако акала мануша сине несовршена, о Израелција ваљани сине те овен ленге послушна. О Израелција шај сине те дикхен кај о Јехова користинѓа ангелија те поможинел акале манушен. Дикхјола сине кај о Јехова тано адава со водинела пле народо.

10. Сар е Девлескоро Лафи водинела сине е Мојсеје?

¹⁰ О Девел преку пло Лафи водинела сине адален со претставинена ле. Ки Библија, о Закони со сине дендо е Израелцонге тано пенџардо сар „е Мојсејескоро закони“ (1. Цар. 2:3). Ама, тари Библија дикхаја кај о Закони на авела таро Мојсеј, него таро Јехова. Исто аѓаар, о Мојсеј да мора сине те овел послушно адале законеске (2. Лет. 34:14). На пример, кеда о Јехова вакерѓа леске сар те керел о шатори башо обожавање, и Библија вакерела: „О Мојсеј керѓа са сар со заповединѓа леске о Јехова“ (2. Мој. 40:1-16).

11, 12. а) Со родела пе сине таро Исус Навин хем таро царија кола со водинена сине е Девлескере народо? б) Сар е Девлескоро Лафи водинѓа е манушен со водинена сине лескере народо?

¹¹ Кеда уло водачи о Исус Навин, сине ле само јекх дело таро е Девлескоро Лафи хем о Јехова вакерѓа леске: „Мора те читине хем те размислине баши лесте диве хем рат, те шај шукар те икере са адава сој пишимо ки лесте“ (Ис. Нав. 1:8). Са о царија кола со владинена сине е Девлескере народоја исто аѓаар мора сине те читинен секова диве о Закони, те препишинен ле, те икерен са о лафија хем о наредбе таро адава Закони хем те живинен спрема ленде. (Читин 5. Мојсеева 17:18-20.)

¹² Сар е Девлескоро Лафи водинѓа е манушен со водинена сине лескере народо? Размислин башо цари о Јосија. Кеда владинела сине, аракхле е Мојсејескоро закони хем тегани о царско писари почминѓа те читинел ле ко гласо англо Јосија. * (Дикх и фуснота.) Сар реагиринѓа о цари? Ки Библија читинаја: „Кеда шунѓа о лафија со сине пишиме ко лил е законескоро, о цари пхаравѓа пле шеја“. Ама, о Јосија керѓа панда нешто. Охрабримо таро е Девлескоро Лафи, уништинѓа са о идолија со сине ки адаја пхув хем организиринѓа  и најбари Пасха со славинѓа пе џи тегани (2. Цар. 22:11; 23:1-23). Адалеске со о Јосија хем о јавера верна водачија сине послушна е Девлескере Лафеске, сине спремна те керен промене ко начин сар водинена сине е Девлескере народо. Адала промене поможинѓе е народоске те овел послушно е Девлеске.

13. Сави разлика сине машкар о водачија таро е Девлескоро народо хем е јавере народонгере?

¹³ О водачија таро јавера народија сине водиме тари манушикани мудрост која сој ограничими. О ханаанска водачија хем ленгоро народо керена сине бут лошна буќа сар на пример хомосексуалност, сине лен сексуална односија паше фамилијаја, животненцар, жртвујнена сине пумаре чхавен хем керена сине идолопоклонство (3. Мој. 18:6, 21-25). Исто аѓаар, о вавилонска хем о египетска водачија на сине лен иста правилија баши хигиена сар со сине е Девлескере народо (4. Мој. 19:13). Е Девлескоро народо шај сине те дикхел кај ленгере верна водачија охрабринена лен те обожавинен е Јехова ко исправно начин, те одржинен шукар хигиена хем те овен морално чиста. Дикхјола пе сине кај о Јехова водинела лен.

14. Соске о Јехова укоринѓа несаве водачен?

¹⁴ Несаве царија со водинена сине е Девлескере народо, на шунена сине е Девлескере упатствија. Адала царија со на сине послушна е Јеховаске на мангле те џан пало водство со авела сине таро свети дух, таро ангелија хем таро е Девлескоро Лафи. Ко несаве ситуацие, о Јехова укоринѓа акале водачен или ко ленгоро тхан чхивѓа јаверен (1. Сам. 13:13, 14). Пало несаво време, о Јехова биринѓа јекхе совршено водаче.

15. а) Сар о пророкија сикавѓе кај ка авел јекх совршено водачи? б) Кој сине о совршено водачи?

¹⁵ Бут берша англедер, о Јехова денѓа лафи кај ка дел пле народоске совршено водачи. На пример, о Мојсеј вакерѓа е Израелцонге: „О Јехова, тумаро Девел, ка ваздел туменге пророко таро тумаре пхраља, пророко сар со сиум ме. Лесте шунен ле!“ (5. Мој. 18:15). Башо акава пророко, о Исаија вакерѓа кај ка овел „водачи хем заповеднико“ (Иса. 55:4). О Даниел пишинѓа кај о Месија ка овел Водачи (Дан. 9:25). Исто аѓаар, коркори о Исус Христос пхенѓа кај ов тано о Водачи е Девлескере народоскоро. (Читин Матеј 23:10.) Е Исусескере ученикија спремно шунена ле сине хем верујнена сине кај ов тано биримо таро Јехова (Јован 6:68, 69). Со уверинѓа лен кај о Исус Христос тано адава со биринѓа ле о Јехова те водинел лескере народо?

16. Со сикавѓа кај е Исусе сине ле о свети дух?

¹⁶ О свети дух водинела сине е Исусе. Кеда крстинѓа пе о Исус, о Јован дикхља „сар о духо хулела таро небо сар гулуби, хем ачхило ки лесте“. Пало адава „о духо теринѓа ле те џал ки пустина“ (Јован 1:32; Мар. 1:10-12). Џикоте сине о Исус ки Пхув, е Девлескоро духо водинела ле сине те сикавел е манушен хем те керел чудија (Дела 10:38). Исто аѓаар, о свети дух поможинѓа е Исусеске те сикавел особине сар сој мангипа,  радост хем бари вера (Јован 15:9; Евр. 12:2). Ко нијекх јавер водачи на дикхјола сине добором јасно кај иси ле о свети дух. Дикхела пе сине кај о Јехова биринѓа е Исусе те овел Водачи.

17. Сар о ангелија поможинѓе е Исусеске?

¹⁷ О ангелија поможинена сине е Исусеске. Несаво време пало е Исусескоро крстибе „але ангелија хем почминѓе те служинен леске“ (Мат. 4:11). Некобор саатија англедер те мерел, ало јекх ангели таро небо хем охрабринѓа ле (Лука 22:43). О Исус џанља кај о Јехова секогаш ка бичхалел ангелија те поможинен ле кеда ка ваљани леске (Мат. 26:53).

18, 19. Сар е Девлескоро Лафи водинела сине е Исусе ко живото хем ки служба?

¹⁸ Е Девлескоро Лафи водинѓа е Исусе. Ки цело пли служба ки Пхув, о Исус мукхља е Девлескоро Лафи те водинел ле. Чак англедер те мерел, ко пле последна лафија ов цитиринѓа пророштвија со сине пишиме башо Месија (Мат. 4:4; 27:46; Лука 23:46). Ама, о верска водачија таро адава време бут разликујнена пе сине таро Исус. Ола на мангена сине те шунен е Девлескоро Лафи секогаш кеда ки лесте пишинела сине појавер таро адава со сикавена сине. О Исус цитиринѓа е Девлескоро Лафи кеда вакерѓа баши ленде: „Акава народо поштујнела ман мујеа, ама лескоро вило тано дур мандар. Џабе тано со обожавинена ман, соске адава со сикавена тано само манушикане заповедија“ (Мат. 15:7-9). О Јехова никогаш нане те биринел лескере народо те водинен ле мануша кола со на поштујнена лескоро Лафи.

¹⁹ О Исус исто аѓаар користинела сине е Девлескоро Лафи кеда сикавела сине е јаверен. Кеда о религиозна водачија  противинена пе сине леске, на користинѓа пли мудрост или искуство те одговоринел ленге. Наместо адава, ов сикавела сине е манушен таро е Девлескоро Лафи (Мат. 22:33-40). Исто аѓаар, о Исус шај сине те воодушевинел е јаверен аѓаар со ка вакерел ленге башо пло живото ко небо или башо адава сар сине кердо о универзум. Ама, ов бут ценинела сине е Девлескоро Лафи, адалеске мангела сине те керел лафи е манушенцар баши лесте хем те поможинел ленге те хаљовен ле (Лука 24:32, 45).

20. а) Сар о Исус дела сине секогаш и слава е Јеховаске? б) Сави разлика сине машкар о Исус хем о Ирод Агрипа I?

²⁰ Иако окола со шунена сине е Исусе сине воодушевиме таро начин сар керела сине лафи, ов секогаш дела сине и слава пле Учителеске, е Јеховаске (Лука 4:22). Кеда јекх барвало мануш мангља те сикавел кај поштујнела е Исусе хем вакерѓа леске кај тано шукар учители, о Исус понизно пхенѓа леске: „Соске вакереа манге кај сиум шукар? Никој нане шукар, само јекх, о Девел“ (Мар. 10:17, 18). Кобор појавер таро Исус сине о Ирод Агрипа I, кова со пало офто берш уло водачи ки Јудеја. Ки јекх прилика, о Ирод уравѓа бут скупа царска шеја. Кеда о мануша дикхле ле хем шунѓе ле сар керела лафи, почминѓе те викинен: „Акава тано гласо е девлескоро, а на манушескоро!“ О Ирод мангела сине о мануша те фалинен ле. Адалеске, со уло пало адава? И Библија вакерела: „Одма кхувѓа ле е Јеховаскоро ангели, соске на денѓа и слава е Девлеске, пало адава пело насвало, хале ле о кирме хем муло“ (Дела 12:21-23). Акатар дикхаја кај о Јехова на биринѓа е Ироде те овел водачи. Ама тари јавер страна, о Исус сикавѓа кај тано биримо таро Девел, ов секогаш поштујнела сине е Јехова — о Најбаро Водачи пле народоскоро.

21. Со ка дикха ки јавер статија?

²¹ О Јехова мангља о Исус те овел водачи повише време а на само некобор берша. Кеда воскреснинѓа о Исус, пало адава вакерѓа пле учениконге: „Денди манге са и власт ко небо хем ки пхув“. Исто аѓаар, вакерѓа: „Аке, ме сиум туменцар ко са о диве џи ко крајо акале светоскоро“ (Мат. 28:18-20). Ама, сар шај о Исус те водинел е Девлескере народо ки Пхув, кеда ов тано невидливо личност ко небо? Касте користинѓа о Јехова те шај те претставинел е Исусе ки Пхув? Сар шај сине о христијања те пенџарен околен со претставинена сине е Девле? Ки јавер статија ка дикха о одговорија башо акала пучиба.