1, 2. Со шај пучена пе сине о апостолија кеда о Исус гело ко небо?

О АПОСТОЛИЈА е Исусескере бешена сине ки Маслинско Гора хем дикхена сине сар ленгоро господари хем амал, о Исус, џала упре ко небо са џикоте јекх облако на учхарѓа ле хем нашти сине те дикхен ле (Дела 1:9, 10). Дуј берш, о Исус сикавѓа лен, охрабринѓа лен хем водинѓа лен. Ама, акана ов гело. Со ка керен ола?

² Англедер те џал ко небо, о Исус вакерѓа пле учениконге: „Ка овен мле сведокија ко Ерусалим, ки цело Јудеја, ки Самарија хем ко најдур тхана ки пхув“ (Дела 1:8). Сар шај сине те керен адава? О Исус ветинѓа ленге кај е Девлескоро свети дух ка поможинел лен (Дела 1:5). Ама, кој ка дел лен упатствија хем кој ка организиринел о проповедибе ки цело Пхув? О апостолија џанле кај о Јехова користинѓа манушен те водинел е Израелцон. Адалеске, шај пучена пе сине дали о Јехова ка биринел ленге нево водачи.

3. а) Сави важно одлука анѓе о верна апостолија кеда о Исус гело ко небо? б) Кола пучиба ка овен одговориме ки акаја статија?

 ³ Кеда о Исус иранѓа пе ко небо, пало адава о ученикија истражинѓе е Девлескоро Лафи, молинѓе е Девле те поможинел лен хем биринѓе наместо о Јуда Искариот, о Матиј те овел о дешудујто апостоли (Дела 1:15-26). Соске сине важно ленге хем е Јеховаске те керен акава? О ученикија халиле кај ваљани те овен дешудуј апостолија. * (Дикх и фуснота.) О Исус биринѓа е апостолен хем обучинѓа лен те керен јекх важно бути машкар е Девлескоро народо. Сави сине адаја бути, хем сар о Јехова хем о Исус спреминге лен башо адава? Сави слично подготовка иси авдиве? Хем сар шај те сетина амен околенде со предводинена амен, посебно ко „верно хем разборито робо“? (Евр. 13:7; Мат. 24:45).

4. Сави улога сине е апостолен хем јавере старешинен ко Ерусалим?

⁴ О апостолија почминѓе те предводинен ко христијанско собрание тари Педесетница 33 берш. И Библија вакерела кај о Петар хем о дешујекх апостолија уштиле хем тегани о Петар почминѓа те сикавел е манушен башо чачипа со шај сине те спасинен ленгоро живото (Дела 2:14, 15). Бут џене таро адала со шунѓе ле уле христијања. Пало адава, акала неве христијања понадари да сикљона сине таро апостолија (Дела 2:42). О апостолија сине одговорна башо прилогија ко собрание (Дела 4:34, 35). Исто аѓаар, ола сикавена сине е Девлескере народо хем молинена пе сине баши ленде, хем вакерѓе: „Амен понадари да ка молина е Девле хем ка сикава башо лескоро Лафи“ (Дела 6:4). Ола исто аѓаар, бичхалѓе искусна христијања те проповединен ко неве тхана (Дела 8:14, 15). Пало адава, јавера да помазаникија кола со сине старешине заедно е апостоленцар предводинена сине ко собрание. Сар водечко тело, ола дена сине упатствија са е собраниенге (Дела 15:2).

5, 6. а) Сар о свети дух поможинела сине е водечко тело? (Дикх и слика ко почеток тари статија.) б) Сар о ангелија поможинѓе е водечко тело? в) Сар о водечко тело сине водимо таро е Девлескоро Лафи?

⁵ О христијања таро прво веко џанена сине кај о Јехова водинела е водечко тело преку о Исус. Соске шај сине те овен сигурна ко адава? Прво, о свети дух поможинела сине е водечко тело (Јован 16:13). Са о помазаникија добинѓе свети дух, ама о духо посебно поможинела сине е апостолен хем е старешинен ко Ерусалим те шај те керен пли задача сар надгледникија. На пример, ко 49 берш, о свети дух  поможинѓа е водечко тело те анел одлука башо обрежување. О собранија спремно прифатинѓе и одлука. Адалеске „овена сине позорале ки вера хем таро диве ко диве бајровена сине“ (Дела 16:4, 5). Таро писмо башо обрежување со сине бичхалдо џи ко собранија, шај те дикха кај о водечко тело сине ле свети дух хем сикавѓа мангипа хем вера (Дела 15:11, 25-29; Гал. 5:22, 23).

⁶ Дујто, о ангелија поможинѓе е водечко тело. На пример, јекх ангели вакерѓа е Корнелијаске те родел е Петаре. Кеда о Петар гело ко Корнелиј хем проповединѓа леске хем лескере фамилијаке, тегани ола добинѓе о свети дух, иако о мурша на сине обрежиме. О Корнелиј уло прво христијани кова со на сине Евреи хем на сине обрежимо. Кеда шунѓе башо акава о апостолија хем о јавера пхраља, халиле кај адава тано е Јеховаскири волја хем прифатинѓе адален со нане Евреија хем со нане обрежиме, те овен дело таро христијанско собрание (Дела 11:13-18). Таро акава шај те дикха кај о ангелија поддржинена сине о проповедиба кова со надглединела сине о водечко тело (Дела 5:19, 20). Трито, о водечко тело сине водимо таро е Девлескоро Лафи. Акала мурша користинена сине е Девлескоро Лафи те анен важна одлуке поврзиме е христијанско верујбаја хем те ден водство е собраниенге (Дела 1:20-22; 15:15-20).

7. Соске шај те вакера кај о Исус водинела сине е прво христијанен?

⁷ Иако о водечко тело сине ле авторитети ко собрание, сариненге со сине ко водечко тело сине јасно кај ленгоро водачи тано о Исус Христос. Котар џанаја адава? О Павле вакерѓа кај коркори о Исус биринѓа „несаве те овен апостолија“. Исто аѓаар, ов вакерѓа кај о Исус тано „о шеро“, или Водачи е собраниескоро (Еф. 4:11, 15). Адалеске о ученикија на сине пенџарде пало несаво анав таро апостолија, него е Девлескири волја сине те викинен пе христијања хем аѓаар те овен пенџарде (Дела 11:26). О Павле џанела сине кај тано важно те икерен пе ко библиска сикљојба таро апостолија хем таро јавера мурша кола со предводинена сине. Ама, о Павле вакерѓа: „Мангава те џанен кај поглавари секоле муршеске тано о Христос“. Акала лафија исто аѓаар важинена секоле јекхеске таро водечко тело. Пало адава, о Павле вакерѓа: „А поглавари е Христосеске тано о Девел“ (1. Кор. 11:2, 3). Јасно тано кај о Јехова биринѓа лескоро Чхаво, о Исус Христос, те водинел о собрание.

8, 9. Сави важно улога сине ле о пхрал Расел?

⁸ Таро 1870 берш, о Чарлс Тејз Расел хем несаве лескере амала, трудинѓе пе те служинен е Девлеске сар со вакерела и Библија, хем те поможинен е јаверенге те керен адава. Адава значинела сине кај ка ваљани те поможинен околенге да со керена ко јавера чхибја лафи. Адалеске ко 1884 берш, сине законско регистриримо о правно тело Zion’s Watch Tower Tract Society, коте со уло претседатели о пхрал Расел. * (Дикх и фуснота.) Ов истражинела  сине шукар и Библија хем бизи дар вакерела сине кај адава со сикавела и црква, сар на пример о тројство хем о сикљојбе кај и душа на мерела, нане тари Библија. Халило кај, кеда о Исус ка иранел пе адава ка овел невидливо хем кај „о време сој одредимо башо незнабошција“ ка завршинел ко 1914 берш (Лука 21:24). О Расел користинѓа пло време, сила хем паре те шај те сикавел е јаверен башо акала чачипа. Јасно тано кај о Јехова хем о Исус користинѓе ле те предводинел ко адава важно периоди.

⁹ О Расел на мангља нисаво посебно внимание таро мануша. Ко 1896 берш пишинѓа кај ов хем о јавера мурша сој ки одговорно положба, на мангена те дел пе ленге нисави посебно чест. Ола на мангле те овен ленге денде несаве посебна титуле, хем на мангена сине нисави група те пхиравел ленгоро анав. Пало несаво време, ов вакерѓа: „Акава нане манушикано дело“.

10. а) Кеда о Исус поставинѓа е „верно хем разборито робо“? б) Објаснин сар уло јасно кај иси разлика машкар о Водечко тело хем о правно тело Watch Tower Society.

¹⁰ О Расел муло ко 1916 берш. Трин берш пало адава, ко 1919 берш, о Исус поставинѓа е „верно хем разборито робо“. Сави сине е Исусескири цел? О робо ваљанѓа те дел лескере учениконге „храна ко право време“ (Мат. 24:45). Ко адала берша, јекх тикни група пхраља со сине помазаникија ко главно седиште ко Бруклин (Њујорк), дела сине духовно храна е учениконге. О анав „водечко тело“ почминѓа те појавинел пе ко амаре публикацие пало 1940 берш. Ко адава време, о Водечко тело сине паше поврзимо е правно телоја Watch Tower Bible and Tract Society. Ама, ко 1971 берш, сине јасно кај иси разлика машкар о Водечко тело хем о Watch Tower Society, соске акава правно тело сине одговорно само башо правна буќа. Таро адава берш, о пхраља сој помазаникија шај те овен дело таро Водечко тело иако нане управителија ко правно тело. Ко последно време, сар управителија ко акава правно тело хем ко јавера со користинела лен е Девлескоро народо, почминѓе те служинен одговорна пхраља таро „јавера бакхре“. Адалеске, о Водечко тело шај те концентриринел пе те дел библиска поуке хем водство (Јован 10:16; Дела 6:4). Ки Стражарско кула таро 15 јули 2013 берш, сине објаснимо кај „о верно хем разборито робо“ тано тикни група помазаникија кола сој тане о Водечко тело.

11. Сар о Водечко тело анела одлуке?

¹¹ О Водечко тело анела о важна одлуке сар група кеда кхедена пе сарине секова курко. Акала состанокија поможинена ленге те овел лен шукар комуникација хем те ачховен обединета (Изр. 20:18). Нијекх таро Водечко тело нане поважно таро јавера, адалеске секова берш различно пхрал водинела о состанокија со иси лен (1. Пет. 5:1). Аѓаар исто керена ко секола шов  одборија таро Водечко тело. Нијекх таро Водечко тело на мислинела кај ов тано водачи пле пхраленгоро. Секова лендар исто аѓаар тано јекх таро слуге хем ов да добинела духовно храна таро верно робо хем шунела лескоро водство.

12. Кола пучиба ка дикха?

¹² О Водечко тело на добинела визие таро Девел хем нане совршено. Шај те случинел пе те објаснинел нешто погрешно тари Библија или те анел погрешна одлуке поврзиме е организацијаја. На пример, ко Прирачникот за истражување шај те аракха статие коте со пишинела башо несаве промене сар ваљани те хајљова и Библија. * О Исус на вакерѓа кај лескоро верно робо ка дел амен совршено духовно храна. Тегани сар шај те одговорина  ко пучибе е Исусескоро: „Кој тано о верно хем разборито робо?“ (Мат. 24:45). Саве доказија иси кај о Водечко тело тано о верно робо? Те дикха о иста трин буќа со поможинѓе е водечко тело ко време е апостоленгоро.

13. Сар о свети дух поможинѓа е Водечко тело?

¹³ О свети дух поможинела е Водечко тело. О свети дух поможинѓа е Водечко тело те хаљовел чачипа тари Библија кола со англедер на сине јасна. На пример, размислин башо несаве објасниме промене сој денде ко Прирачникот за истражување.  Нијекх мануш нашти коркори те хаљовел хем те објаснинел „е Девлескере хор буќа“! (Читин 1. Коринќаните 2:10.) О Водечко тело мислинела исто сар о апостол Павле, кова со вакерѓа: „Башо акала буќа исто аѓаар кераја лафи, на лафенцар со сикавела и манушикани мудрост, него лафенцар со сикавела о духо“ (1. Кор. 2:13). Соске пало бут берша ховавно сикљојба хем бизо јасно водство, таро 1919 берш почминѓа бут појасно те хаљовел пе и Библија? Иси само јекх причина — о Девел поможинѓа пле свети духоја!

14. Спрема о Откровение 14:6, 7 сар о ангелија поможинена е Водечко тело хем е Девлескере народо?

¹⁴ О ангелија поможинена е Водечко тело. О Водечко тело иси ле бари одговорност те организиринел о проповедибе со керена ле повише таро офто милионија објавителија ко цело свето. Соске о проповедибе тано добором бут успешно? Јекх причина тани адаја со поможинена о ангелија. (Читин Откровение 14:6, 7.) Бут пути, о ангелија водинѓе е објавителен те џан ко несаво мануш со молинѓа пе е Девлеске те поможинел леске! * (Дикх и фуснота.) Исто аѓаар, о проповедибе бајрола ко пхувја коте со иси баро противење, хем са повише мануша сикљона башо Девел. Акава тано аѓаар адалеске со поможинена о ангелија.

15. Сар разликујнела пе о Водечко тело таро христијанска водачија ко свето? Вакер пример.

¹⁵ Е Девлескоро Лафи водинела е Водечко тело. (Читин Јован 17:17.) Те ла сар пример јекх ситуација таро 1973 берш. Ки Стражарско кула таро 1 јуни сине јекх пучибе „дали шај те крстинел пе некој со панда на чхинавѓа е пушибаја“. О одговор сине кај о библиска начелија сикавена кај нашти те крстинел пе! Ки акаја Стражарско кула сине цитириме несаве стихија хем сине објаснимо соске секој со на чхинавела е пушибаја ваљани те овел исклучимо (1. Кор. 5:7; 2. Кор. 7:1). Адатхе сине вакердо кај акава строго правило на авела таро мануш, него „таро Девел, кова со вакерѓа аменге пле мерилија преку пло пишимо Лафи“. Нијекх јавер религиозно организација на сине спремно добором целосно те икерел пе ко е Девлескоро Лафи чак кеда некаске таро лакере членија тано бут пхаро те поштујнел о одлуке со анена пе. Јекх лил башо религие со иклило англедер несаво време ки Америка, пхенела кај „о христијанска верска водачија стално менинена пумаре сикљојба те шај те одговоринен ко ставија хем мислибе со иси машкар ленгере членија или ко народо“. О Водечко тело на водинела пе спрема адава со мангена о  мануша. Наместо адава, о членија таро Водечко тело тане водиме таро е Девлескоро Лафи, со сикавела кај о Јехова тано чачутно водачи пле народоскоро авдиве.

16. Кова тано јекх начин те сетина амен ко Водечко тело?

¹⁶ Читин Евреите 13:7. И Библија вакерела те сетина амен ко адала со предводинена амен. Јекх начин сар шај те кера адава тано те молина амен башо Водечко тело (Еф. 6:18). Акале пхрален иси лен бут одговорностија, сар на пример, те ден амен духовно храна, те организиринен о проповедибе хем те распорединен о доброволна прилогија. Адалеске тано бут важно редовно те молина амен баши ленде!

17, 18. а) Сар сикаваја кај соработинаја е Водечко телоја? б) Сар адалеа со проповединаја поддржинаја е Водечко тело хем е Исусе?

¹⁷ Исто аѓаар, шај те сетина амен ко Водечко тело адалеа со ка шуна о упатствија со дела амен. О Водечко тело дела амен упатствија преку о публикацие, состанокија хем конгресија. Ов исто аѓаар именујнела покраинска надгледникија, кола со понадари именујнена старешине. О покраинска надгледникија хем о старешине сикавена кај сетинена пе ко Водечко тело адалеа со икерена пе паше ко лескере упатствија. Хем секој амендар сикаваја кај поштујнаја амаре Водаче, е Исусе, адалеа со сием послушна е пхраленге со користинела лен авдиве (Евр. 13:17).

¹⁸ Јавер начин сар шај те сетина амен ко Водечко тело тано аѓаар со ка да амаро најшукар ки служба. Ко Евреите 13:7 сием охрабриме те имитирина и вера околенгири со предводинена. О Водечко тело сикавела бари вера адалеа со ревно проповединела хем ширинела о шукар хабери. Дали поддржинаја акале пхрален ко акава важно дело? Ако кераја адава, тегани ка ова бахтале кеда ка шуна сар вакерела аменге о Исус: „Са со керѓен јекхеске таро мле најтикне пхраља, керѓен ле манге“ (Мат. 25:34-40).

19. Соске сиан решимо те шуне амаре Водаче, е Исусе?

¹⁹ Кеда о Исус иранѓа пе ко небо, ов на мукхља пле ученикон коркори (Мат. 28:20). О Исус џанела сине кај о свети дух, о ангелија хем е Девлескоро Лафи поможинѓе леске џикоте предводинела сине ки Пхув. Адалеске, ов поможинела ко исто начин е верно робо авдиве. О Водечко тело понадари да џала пало Бакхро, о Исус, „било коте те џал“ (Отк. 14:4). Адалеске, кеда шунаја о водство таро Водечко тело, тегани џаја пало амаро Водачи, о Исус. Панда хари, ов ка водинел амен ко вечно живото (Отк. 7:14-17). Нане нијекх водачи машкар о мануша со шај те ветинел нешто асавко!