1, 2. Со халило јекх пхрал баши песте, хем со керѓа?

О РОБЕРТИ крстинѓа пе кеда сине ле 15 берш, ама о чачипе на сине леске најважно ко живото. Ов вакерела: „Никогаш на керѓум нешто сој погрешно, ама служинава сине механички е Јеховаске. Дикхјовава сине сар духовно зорало, адалеске со сиум сине редовно ко состанокија хем сиум сине помошно пионери некобор пути ко берш. Ама, осетинава сине кај нешто фалинела манге“.

² Сар о Роберти халило со фалинела леске? Откеда женинѓа пе, ов хем лескири ромни понекогаш кхелена сине библиска игре ко кола со пучена пе сине пучиба јекх јекхеа. Лескири ромни бут шукар пенџарела сине и Библија хем шај сине локхе те одговоринел. Ама, о Роберти на џанела сине о одговорија хем адалеске лаџала сине. Ов вакерела: „Сар ка пхене ништо на џанава сине. Мислинѓум манге: ’Ако мангава те овав поглавари со ка дав духовно водство ме ромњаке, ваљани те керав нешто‘“. О Роберти керѓа адава. Ов вакерела: „Са повише хем повише проучинава сине и Библија, хем похари почминава сине те хаљовав о буќа. Халиљум похор и Библија, а сој најважно уљум попаше е Јеховаја“.

3. а) Со шај те сикљова таро Роберти? б) Башо кола важна пучиба ка кера лафи?

 ³ Таро искуство е Робертескоро шај те сикљова важна поуке. Шај пенџараја и Библија хем редовно џаја ко состанокија хем ки служба, ама адава на значинела кај сием духовна мануша. Или, шај напредујнѓем духовно, ама кеда ка испитина амен, дикхаја кај иси тхан коте со шај панда те кера бути (Фил. 3:16). Ки акаја статија ка кера лафи башо трин важна пучиба: 1) Со ка поможинел аменге те дикха дали сием духовна мануша? 2) Со ваљани те кера те шај духовно те напредујна? 3) Сар ка влијајнел ко амаро живото адава со ка ова духовно зорале?

4. Каске важинена о лафија таро Ефешаните 4:23, 24?

⁴ Кеда почминѓем те служина е Девлеске, керѓем промене кола со влијајнѓе ко секова дело таро амаро живото. Ама, акала промене на завршинѓе кеда крстинѓем амен. И Библија поттикнинела амен понадари да те обновина амаро начин сар размислинаја (Еф. 4:23, 24). Адалеске со сием несовршена ваљани понадари да те менина амен. Чак ако бершенцар служинаја е Јеховаске, ваљани те трудина амен те икера амаро амалипе леа зорало (Фил. 3:12, 13).

5. Кола пучиба шај те поможинен аменге те испитина амен?

⁵ Бизи разлика дали сием терне или пхуре, ваљани искрено те испитина амен. Секова јекх амендар ваљани те пучел пе: „Дали дикхава промене ки манде кола со сикавена кај са повише дикхава ко буќа сар о Јехова? Дали овава са послично сар о Исус? Со сикавела баши манде адава сар понашинава ман ко состанокија хем мло стави баши ленде? Со сикавена мле разговорија башо адава сој манге најважно ко живото? Со сикавена баши манде мле навике проучибаске, о начин сар уравава ман, сар изглединава хем о начин сар реагиринава кеда дена ман совет? Сар реагиринава кеда сиум ко искушение? Дали уљум зрело христијани?“ (Еф. 4:13). Акала пучиба шај те поможинен аменге те дикха кобор напредујнѓем духовно.

6. Со јавер шај те поможинел аменге те испитина дали сием духовна мануша?

⁶ Те шај те испитина амари духовност, понекогаш шај ка ваљани аменге помош таро некој јавер. О апостол Павле вакерѓа кај о телесно мануш на хаљовела кај лескоро начин сар живинела на керела бахтало е Девле. Тари јавер страна, о духовно мануш хаљовела сар о Девел дикхела ко буќа. Ов џанела кај о Јехова на одобринела о начин сар живинена о телесна мануша (1. Кор. 2:14-16; 3:1-3). Адалеске со о старешине размислинена сар о Христос, ола бут пути шај сигате те приметинен кеда некој ка почминел те постапинел сар телесно мануш, хем трудинена пе  те поможинен леске. Ако о старешине дикхена асавко нешто аменде да хем пробинена те поможинен аменге, дали ка прифатина ленгири помош хем ка менина амен? Ако кераја адава ка сикава кај чаче мангаја те ова духовно позрела мануша (Проп. 7:5, 9).

7. Котар џанаја кај нане доволно само те пенџара и Библија те шај те ова духовно зрела мануша?

⁷ Те шај те ове духовно зрело, на ваљани само те пенџаре и Библија. О цари о Соломон џанела сине бут башо Јехова, хем несаве таро лескере мудра лафија тане пишиме ки Библија. Ама, сар накхела сине о време, лескоро амалипе е Јеховаја уло послабо хем на ачхило леске верно (1. Цар. 4:29, 30; 11:4-6). Спрема акава, со јавер ваљани аменге освен те пенџара и Библија? Ваљани понадари да те кера зорали амари вера (Кол. 2:6, 7). Сар шај те кера адава?

8, 9. а) Со ка поможинел аменге те кера позорали амари вера? б) Која тани амари цел кеда проучинаја хем хор размислинаја? (Дикх и слика ко почеток тари статија.)

⁸ О апостол Павле поттикнинѓа е христијанен ко прво веко те напредујнен ки зрелост (Евр. 6:1). Сар шај те применина акава совет? Јекх важно начин тано аѓаар со ка проучина о лил Зачувај ја Божјата љубов. Адава ка поможинел аменге те хаљова сар те применина о библиска начелија ко амаро живото. Ако више проучинѓем акава лил, шај те проучина несави јавер публикација која со ка поможинел аменге те кера амари вера позорали (Кол. 1:23). Исто аѓаар, ваљани хор те размислина башо адава со сикљоваја хем те молина е Јехова те поможинел аменге те дикха сар шај те применина ле.

⁹ Џикоте проучинаја хем хор размислинаја, амари цел ваљани те овел те бајрол амари желба те радујна е Јехова хем те ова леске послушна (Пс. 40:8; 119:97). Исто аѓаар, ваљани те отфрлина о буќа кола со шај те чхинавен амен те напредујна духовно (Тит 2:11, 12).

10. Сар шај о терне духовно те напредујнен?

¹⁰ Ако сиан терно, дали иси тут духовна целија? Јекх пхрал со служинела ко Бетел, иси ле навика англедер и програма  ко покраинска конгресија те керел лафи е терненцар со ка крстинен пе хем пучела лен башо ленгере духовна целија. О одговорија со дена лен о терне сикавена кај ола шукар размислинѓе со мангена те керен ки служба е Јеховаске. Несаве мангена те служинен полновремено или те селинен пе ко тхана коте со иси побари потреба таро објавителија. Ама, иси терне со на џанена со те одговоринен ко адава пучибе. Дали акава шај те значинел кај ола мислинена кај на ваљани те овел лен духовна целија? Ако сиан терно, пуч тут: „Дали џава ко состанокија хем ки служба само адалеске со ме родителија мангена адава? Или адалеске со ме сиум амал е Јеховаја?“ Џанѓола пе, бизи разлика дали сием терне или пхуре, саринен ваљани те овел амен духовна целија. Адава ка поможинел аменге те ова духовно позрела (Проп. 12:1, 13).

11. а) Со ваљани те кера те шај те ова духовно зрела? б) Пало кова библиско пример шај те џа?

¹¹ Откеда ка дикха коте шај те менина амен, ваљани те почмина те кера промене. Акава тано бут важно адалеске со амаро живото зависинела таро адава дали ка ова духовно зрела (Рим. 8:6-8). Акава на значинела кај ваљани те ова совршена. Те шај те напредујна духовно, о Јехова поможинела аменге аѓаар со дела амен пло свети дух. Ама, амен да ваљани те трудина амен. Башо стихо таро Лука 13:24, о пхрал Џон Бар кова со служинела сине сар члени ко Водечко тело, ки јекх прилика  вакерѓа: „Бут џене на успејнена те кхувен таро тесно удар адалеске со на трудинена пе доволно те овен духовно зрела“. Ваљани те ова сар о Јаков кова со боринѓа пе јекхе ангелеа хем на откажинѓа пе џикоте на добинѓа берекети (1. Мој. 32:26-28). Иако шај те уживина џикоте проучинаја и Библија, на ваљани те аџикера кај секова дело латар ка овел аменге интересно сар јекх лил парамисенцар. Џикоте читинаја ла ваљани те трудина амен те аракха скапоцена чачипа кола со ка користинен аменге.

12, 13. а) Со ка поможинел аменге те размислина сар о Исус? б) Сар шај те поможинен аменге о пример хем о совет е Петарескоро? в) Со ваљани те кера те шај духовно те напредујна? (Дикх и рамка „ Сар шај духовно те напредујне“.)

¹² Кеда трудинаја амен те напредујна духовно, о свети дух поможинела аменге те менина о начин сар размислинаја. Хари похари, сикљоваја те размислина сар о Исус (Рим. 15:5). О свети дух шај те поможинел аменге те цида амендар о погрешна желбе хем те овен амен особине саве со мангела о Девел (Гал. 5:16, 22, 23). Ако дикхаја кај сием концентририме ко материјална буќа хем ко задоволствија, на ваљани те обесхрабрина амен. Ваљани понадари да те молина е Јехова те дел амен пло свети дух те шај те поможинел аменге те размислина башо исправна буќа (Лука 11:13). Те сетина амен ко апостол Петар. Ов на размислинела сине секогаш сар о Исус (Мат. 16:22, 23; Лука 22:34, 54-62; Гал. 2:11-14). Ама, ов на откажинѓа пе, адалеске о Јехова поможинѓа леске. Хари похари, сиклило те размислинел сар о Исус. Адава шај амен да те кера.

¹³ О Петар керѓа лафи башо некобор особине со шај те поможинен аменге. (Читин 2. Петрово 1:5-8.) Ваљани бут те трудина амен те шај те овел амен самоконтрола, истрајност, пхраликано мангипе хем јавера шукар особине. Шукар тано секова диве те пуча амен: „Ки која особина шај те керав бути авдиве те шај духовно те напредујнав?“

14. Сар и духовност ка влијајнел ко амаро живото?

¹⁴ Ако размислинаја сар о Христос, адава ка влијајнел ко начин сар понашинаја амен ки бути или ки школа, сар кераја лафи хем ко одлуке со анаја лен секова диве. Амаре одлуке ка сикавен кај трудинаја амен те ова сар о Христос. Сар духовна мануша, на мангаја те мукха ништо те руминел амаро амалипе е Јехова. Кеда ка аракхљова ки ситуација те кера нешто сој погрешно, амари духовност ка поможинел аменге те на пера ко искушение. Англедер те ана несави одлука, ка размислина башо акала пучиба: „Кола начелија тари Библија шај те поможинен манге? Со ка керел о Исус ки акаја ситуација? Која одлука ка керел бахтало е Јехова?“ Ваљани те овел амен навика те размислина ко асавко начин. Адалеске, те дикха некобор ситуацие. Баши секоја ситуација ка дикха јекх начело тари Библија со шај те поможинел аменге те ана мудро одлука.

15, 16. Сар адава со ка размислина сар о Христос шај те поможинел аменге а) кеда биринаја брачно партнери? б) кеда биринаја амала?

¹⁵ Кеда биринаја брачно партнери. Јекх библиско начело кова со шај те применина ле ки акаја ситуација тано пишимо ко 2. Коринќаните 6:14, 15. (Читин.) О Павле јасно вакерѓа кај о духовна мануша на дикхена ко буќа ко исто начин сар о телесна мануша. Сар шај акава начело те поможинел туке кеда биринеа брачно партнери?

 ¹⁶ Кеда биринаја амала. Дикх о библиско начело таро 1. Коринќаните 15:33. (Читин.) Окова сој духовно зрело нане те дружинел пе манушенцар со шај те керен послабо лескири вера. Размислин сар шај те применине акава начело ко различна ситуацие. На пример, сар шај те поможинел туке кеда користинеа социјална мреже? Сар шај те поможинел туке те одлучине дали ка кхеле игре ко Интернет манушенцар со на пенџареа лен?

17-19. Сар адава со сием духовна мануша поможинела аменге а) те избегина буќа со нане корисна? б) те овен амен духовна целија? в) те решина о несогласувања?

¹⁷ Буќа со шај те чхинавен амен духовно те напредујна. О апостол Павле вакерѓа јекх важно предупредување ко Евреите 6:1. (Читин.) Ваљани те избегина буќа со нане корисна баши амари духовност. Акава предупредување шај те поможинел аменге те размислина башо пучиба сар сој: „Дали акаја бути тани корисно или нане ла вредност? Дали те прифатинав акава бизнис? Соске те на овав дело тари несави група со мангела те керел промене ко свето?“

¹⁸ Духовна целија. О Исус денѓа аменге шукар совет башо целија (Мат. 6:33). Јекх духовно мануш чхивела о Царство ко прво тхан ко пло живото. Акава начело ка поможинел аменге те добина одговор башо акала пучиба: „Дали ваљани те џав ко факултети откеда ка завршинав е средно школаја? Ваљани ли те прифатинав несави понуда буќаке?“

¹⁹ Несогласувања. О совет со пишинѓа о Павле е христијаненге ко Рим шај те поможинел аменге кеда иси амен несогласувања е јаверенцар (Рим. 12:18). Адалеске со џаја пало е Исусескоро пример трудинаја амен те ова „ко мир са е манушенцар“. Сар реагиринаја кеда иси амен несогласувања некасаја? Дали аменге пхаро те прифатина е јаверенгоро мислење? Дали сием пенџарде сар мануша „со керена мир“? (Јак. 3:18).

20. Соске мангеа понадари да духовно те напредујне?

²⁰ Акала тане само некобор примерија со сикавена сар о начелија тари Библија шај те поможинен аменге те ана одлуке со сикавена кај сием водиме таро е Девлескоро духо. Ако трудинаја амен те ова духовна мануша, ка ова бахтале хем задоволна. О Роберти со спомнинѓем ле ко почеток, вакерела: „Откеда уљум паше е Јеховаја, уљум пошукар ром хем дад. Сиум сине задоволно хем бахтало“. Ако трудинаја амен те напредујна духовно, аменде да ка овен амен бут берекетија. Панда авдиве ка овел амен побахтало живото, а ко време со авела ка добина „о чачутно живото“ (1. Тим. 6:19).