1. Сар о трин Јеховаскере сведокија таро акава пасус ачхиле верна?

ЗАМИСЛИН туке акала трин ситуацие: 1) Џикоте јекх пхен тани ки школа, о професори вакерела са е учениконге ко класи те учествујнен ко јекх празнико. И пхен џанела кај о Јехова на мангела адава празнико, хем адалеске љубезно одбинела те учествујнел. 2) Јекх лаџутно терно пхрал проповединела таро кхер ко кхер. Ов џанела кај ко јавер кхер живинела јекх лескоро соученико кова со некобор пути асандило е Јеховаскере сведоконге. Сепак, о терно пхрал џала ко адава да кхер хем кхувела ко удар. 3) Јекх пхрал бут трудинела пе те шај те грижинел пе башо материјална потребе пле фамилијакере. Јекх диве, о шефи родела лестар те керел нешто со нане чесно хем те пхагел о закони. Иако шај те нашавел пли бути, о пхрал објаснинела кај ваљани те овел чесно хем те поштујнел о закони соске адава аџикерела о Девел пле слугендар (Рим. 13:1-4; Евр. 13:18).

2. Башо кола пучиба ка кера лафи хем соске?

² Која особина приметинѓан ко акала трин слуге е Девлескере? Шај приметинѓан кај тане храбра хем чесна. Ама јекх особина посебно истакнинела пе — и беспрекорност. Секова јекх лендар ачхило верно е Девлеске хем одбинѓа те пхагел е Јеховаскере мерилија. И беспрекорност поттикнинѓа лен те постапинен аѓаар. О Јехова сигурно дичинела пе секоле пле слугаја со сикавела акаја особина. Амен да мангаја те кера амаро Дад сој ко небо те дичинел пе аменцар. Адалеске, те кера лафи башо акала пучиба: Сој тани и беспрекорност? Соске ваљани аменге акаја особина? Хем сар шај те ова панда поодлучна те ачхова верна е Девлеске ко акава пхаро време?

3. а) Сар е Девлескере слуге сикавена беспрекорност? б) Кола примерија поможинена аменге те хаљова со значинела и беспрекорност?

³ Ко саво начин сар слуге е Девлескере сикаваја беспрекорност? Аѓаар со цело вилеа хем бизо услов мангаја е Јехова, а адава поттикнинела амен секогаш те кера адава со мангела ов. Те дикха сар акава лафи тано користимо ки Библија. Јекх основно значење е лафескоро „беспрекорност“ тано „бизи маана“, „састо“ или „цело“. На пример, спрема е Мојсеескоро закони, о Израелција ваљани сине те ден сар жртве е Јеховаске животне кола со сине бизи несави маана * (3. Мој. 22:21, 22). Е Девлескере слугенге на сине дозволимо те ден животне коленге со фалинела сине кан, јакх, про или палем сине насвале. Е Јеховаске сине важно о животне те овен бизи маана хем састе (Мал. 1:6-9). Шај те хаљова соске сине важно акава е Јеховаске. Кеда кинаја нешто, бизи разлика дали адава тано овошје, лил или алати, мангаја те овел ки шукар состојба хем ништо те на фалинел леске. Ко слично начин о Јехова дикхела ко амаро мангипе хем ки амари верност. Ола мора те овен целосна хем бизи маана.

4. а) Соске шај те вакера кај јекх несовршено мануш шај те овел беспрекорно? б) Спрема Псалм 103:12-14, со аџикерела амендар о Јехова?

⁴ Шај мислинеа туке кај иси тут бут маане хем кај кереа бут грешке. Дали адалеске ваљани те мислине кај нашти те ове беспрекорно? На. Те дикха дуј причине кола со сикавена кај на ваљани те ова совршена те шај те сикава акаја особина. Прво, о Јехова на концентриринела пе ко амаре грешке. Ко лескоро Лафи пишинела: „Ако дикхеа ко грешке, о Јах, о Јехова, кој ка ачхол?“ (Пс. 130:3). Ов џанела кај сием несовршена, грешна мануша, хем адалеске спремно простинела аменге (Пс. 86:5). Дујто, о Јехова џанела амаре ограничувања, хем на аџикерела амендар повише таро адава со шај те кера. (Читин Псалм 103:12-14.) Тегани, ки сави смисла англо лескере јакхја шај те ова беспрекорна или бизи маана?

5. Соске е Јеховаскере слуген мора те овел лен мангипе те шај те овен беспрекорна?

⁵ Те шај те овен беспрекорна, е Јеховаскере слуген мора те овел лен мангипе. Амен ваљани те манга амаре Даде сој ко небо цело вилеа хем те ова леске послушна ко са. Кеда сикаваја асавко мангипе чак кеда иси амен искушенија, тегани сием беспрекорна (1. Лет. 28:9; Мат. 22:37). Те размислина палем башо трин Сведокија кола сој спомниме поупре. Дали и пхен на мангља те накхел песке шукар ки школа? Дали о терно пхрал мангела те асан леске кеда проповединела? Дали о пхрал со иси ле фамилија мангела те палден ле тари бути? Сигурно на. Секова диве, е Девлескере слуге ко цело свето аракхљовена ко слична ситуацие хем ачховена верна е Јеховаске. Соске? Адалеске со џанена кај е Јехова иси ле праведна мерилија хем одлучна тане те керен адава со мангела ов. О мангипе спрема о Девел поттикнинела лен ов те овел ленге секогаш ко прво тхан кеда ваљани те анен несави одлука. Адалеа сикавена кај тане беспрекорна.

6. а) Соске ваљани те ова беспрекорна? б) Сар о Адам хем и Ева на сикавѓе беспрекорност?

⁶ Важно тано секова јекх амендар те овел беспрекорно соске о Сатана кривинѓа е Јехова хем амен. Адава бунтовно ангели уло Сатана, или „Противнико“, панда ки рајско градина. Ов каљарѓа е Јеховаскоро анав адалеа со вакерѓа кај о Девел тано лошно,  себично хем нане чесно Владетели. Жално тано адава со о Адам хем и Ева уле тари е Сатанаскири страна хем бунинѓе пе против о Јехова (1. Мој. 3:1-6). Ки градина Еден сине лен бут прилике те бајрарен пло мангипе башо Јехова. Ама ко време кеда о Сатана противинѓа пе, ола на мангена сине е Јехова цело вилеа. Адалеске појавинѓа пе панда јекх пучибе: Дали несаво мануш ка ачховел верно е Јеховаске адалеске со мангела ле? Јавере лафенцар, дали о мануша шај те овен беспрекорна? Акава пучибе сине истакнимо ко случај е Јовескоро.

7. Спрема Јов 1:8-11, сар дикхела сине о Јехова, а сар о Сатана ки е Јовескири беспрекорност?

⁷ О Јов живинѓа ко периоди кеда о Израелција сине ко Египет. Ко адава време на постојнела сине беспрекорно мануш сар лесте. Ов да сине несовршено сар аменде хем грешинела сине. Ама, о Јехова мангела ле сине баши лескири беспрекорност. Изгледа о Сатана панда англедер асала сине е Јеховаске адалеа со вакерела сине кај о мануша нане те ачховен леске верна. Адалеске, о Јехова вакерѓа е Сатанаске те дикхел е Јове. Акава мануш пле животоја сикавела сине кај о Сатана ховавела! О Сатана родинѓа таро Јехова те мукхел ле те испитинел е Јовескири беспрекорност. Е Јехова сине ле доверба ко Јов хем адалеске мукхља е Сатанаске те испитинел ле. (Читин Јов 1:8-11.)

8. Сар нападинѓа о Сатана е Јове?

⁸ О Сатана тано сурово хем мударела. Ов леља са со сине е Јове, мударѓа лескере слуген хем руминѓа лескоро углед. Ов нападинѓа лескере фамилија адалеа со мударѓа лескере деше чхавен. Пало адава насвакерѓа ле аѓаар со керѓа ко цело тело те овен ле чирија со бут дукхана. Е Јовескири ромни сине пхаги тари дукх хем адалеске вакерела леске  сине те откажинел пе таро са, те дел арман е Девле хем те мерел. Коркори о Јов мангља те мерел, ама понадари да ачхило беспрекорно. Тегани о Сатана пробинѓа јавер тактика. Ов користинѓа е Јовескере трине амален. Ола геле ко Јов хем дивенцар ачхиле ки лесте, ама ни најхари на утешинѓе ле. Наместо адава, ола бизи жал нападинѓе ле хем сурово критикујнѓе ле. Ола вакерена сине кај о Девел керѓа леске адала неволје хем кај ни најхари на ценинела лескири беспрекорност. Ола чак вакерѓе кај о Јов тано лошно мануш кова со заслужинѓа те случинен пе леске са адала страшна буќа! (Јов 1:13-22; 2:7-11; 15:4, 5; 22:3-6; 25:4-6).

9. Иако сине ле неволје, со на мангља те керел о Јов?

⁹ Сар реагиринѓа о Јов? Ов на сине совршено. Хољаме укоринѓа пле ховавне утешителен, хем вакерѓа буќа коленге со пало адава признајнѓа кај вакерѓа лен бизо те размислинел. Поважно сине леске те докажинел пли праведност, а на е Девлескири (Јов 6:3; 13:4, 5; 32:2; 34:5). Ама, чак ко најпхаре моментија, о Јов на мангља те иранел думо е Јеховаске. Ов на верујнѓа ко ховајба со вакерѓе лескере ховавне амала. О Јов вакерѓа: „Нашти те замислинав манге те вакерав кај тумен сиен праведна! Са џикоте на мерава, нане те откажинав ман тари мли беспрекорност!“ (Јов 27:5). Акала лафија тане бут важна аменге. Соске? Ако о Јов ачхило беспрекорно, тегани амен да шај.

10. Ко саво начин ту да сиан вклучимо ко спорно пучибе со ало таро Сатана башо Јов?

¹⁰ Амен да сием вклучиме ко спорно пучибе со ало таро Сатана башо Јов. Сар? О Сатана вакерела кај ту на мангеа чаче е Јехова, кај ка чхинаве те служине леске те шај те спасине тут, хем кај нане те ачхове беспрекорно (Јов 2:4, 5; Отк. 12:10). Сар керела акава те осетине тут? Бут дукхала, нели? Ама размислин башо акава: о Јехова мукхела о Сатана те испитинел тли беспрекорност. Иси ле бари доверба кај ту шај те ачхове беспрекорно хем адалеа те сикаве кај о Сатана тано ховавно. Освен адава, о Јехова ветинела кај ка поможинел туке (Евр. 13:6). Чаче тани бари чест о Владетели ко цело универзум те овел ле асавки доверба ки туте! Дали хаљовеа соске тани добором важно и беспрекорност? Ој поможинела аменге те сикава кај адава со вакерела о Сатана тано ховајбе, те бранина о шукар анав амаре Дадескоро хем те поддржина лескоро начин сар владинела. Тегани, сар шај те ачхова беспрекорна?

11. Со шај те сикљова таро Јов?

¹¹ Ко акала последна диве, о Сатана са повише нападинела е Девлескере слуген (2. Тим. 3:1). Адалеске со живинаја ко добором пхаро време, сар шај те ова панда поодлучна те ачхова беспрекорна? Башо акава да шај бут те сикљова таро е Јовескоро пример. Бут време англедер те почминен лескере неволје, о Јов бут пути сикавѓа кај тано верно е Јеховаске. Те дикха кола трин поуке шај те сикљова таро лескоро пример те шај понадари да те ачхова беспрекорна.

12. а) Спрема Јов 26:7, 8, 14, со поможинѓа е Јовеске те овел ле исправно дар таро Јехова хем хор те поштујнел ле? б) Сар шај амен да те овел амен исправно дар таро Јехова хем хор те поштујна ле?

¹² Е Јове сине ле исправно дар таро Јехова хем хор поштујнела ле сине, а адава керѓа лескоро мангипе башо Девел те бајрол. О Јов одвојнела сине време те размислинел башо буќа со створинѓа лен о Девел. (Читин Јов 26:7, 8, 14.) Кеда размислинела сине баши Пхув, башо небо, башо облакија хем башо громија, адава керела сине те овел ле исправно дар таро Јехова хем хор те поштујнел ле. Ама, сине свесно кај бут хари џанела башо са адава со створинѓа  о Јехова. Исто аѓаар, бут ценинела сине е Девлескере лафија. Адалеске вакерѓа: „Лескере лафија сине манге бут вредна“ (Јов 23:12). Ов сине воодушевимо таро Јехова хем хор поштујнела ле сине. Ов мангела сине пле Даде сој ко небо хем сине одлучно те керел ле бахтало. Аѓаар, о Јов сине са поодлучно те ачховел беспрекорно. Амен да ваљани те постапина сар о Јов. Авдиве џанаја бут повише башо буќа со створинѓа о Јехова него о мануша со живинена сине ко е Јовескоро време. Исто аѓаар, иси амен цело Библија која со поможинела аменге шукар те пенџара е Јехова. Са со сикљоваја шај те керел ко амаро вило те овел амен исправно дар таро Јехова хем хор те поштујна ле. А адава ка поттикнинел амен те манга ле, те шуна ле хем те ова панда поодлучна те ачхова беспрекорна (Јов 28:28).

13-14. а) Спрема Јов 31:1, сар о Јов сикавѓа кај тано послушно е Јеховаске? б) Сар шај те џа пало е Јовескоро пример?

¹³ О Јов сине послушно е Јеховаске ко са, а адава поможинѓа леске те ачховел беспрекорно. О Јов џанља кај ако мангела те ачховел беспрекорно ваљани те овел послушно. Уствари, секогаш кеда сием послушна е Јеховаске, адава керела амен те ова панда поодлучна те ачхова верна. О Јов дела сине пестар са те овел послушно е Јеховаске секова диве. На пример, пазинела сине сар понашинела пе џувленцар. (Читин Јов 31:1.) Сар прандимо мануш, ов џанела сине кај нане шукар те овен ле романтична чувствија јавере џувљаке. Авдиве живинаја ко свето кова со бомбардиринела амен буќенцар кола со шај те чхивен амен те кера неморал. Дали исто сар о Јов амен да сием одлучна те на сикава внимание со нане соодветно некаске со нане амаро брачно партнери? Исто аѓаар, дали ка отфрлина о искушение те дикха непристојна или порнографска слике? (Мат. 5:28). Ако секова диве сикаваја асавки самоконтрола, ка ова панда поодлучна те ачхова беспрекорна.

¹⁴ О Јов исто аѓаар сине послушно е Јеховаске ко адава сар дикхела сине ко материјална буќа. Ов сине свесно кај ако иси ле  доверба ко материјална буќа, ка керел сериозно грешка со заслужинела казна (Јов 31:24, 25, 28). Авдиве, живинаја ко свето коте со о материјално барвалипе тано бут важно. Ако развинаја урамнотежено стави башо паре хем башо материјална буќа, сар со поттикнинела амен и Библија, ка ова панда поодлучна те ачхова беспрекорна (Изр. 30:8, 9; Мат. 6:19-21).

15. а) Со панда поможинѓа е Јовеске те ачхол беспрекорно? б) Соске тано шукар секогаш те размислина баши награда со ветинѓа ла аменге о Јехова?

¹⁵ О Јов ачхило беспрекорно адалеске со сине сигурно кај о Јехова ка наградинел ле. Ов верујнела сине кај е Девлеске тани важно лескири беспрекорност (Јов 31:6). Иако сине ле бут неволје, о Јов сине уверимо кај о Јехова ко крајо ка наградинел ле. Адава поможинѓа леске те ачхол беспрекорно. О Јехова сине бут бахтало со о Јов сине беспрекорно, адалеске бут наградинѓа ле панда џикоте сине несовршено! (Јов 42:12-17; Јак. 5:11). А ки иднина о Јов ка добинел панда побаре берекетија. Дали сиан сигурно кај о Јехова ка наградинел тли беспрекорност? Амаро Девел на менинела пе (Мал. 3:6). Ако мислинаја секогаш ко адава кај о Јехова ценинела амари беспрекорност, тегани ко амаро вило и надеж баши шужи иднина понадари да ка овел зорали (1. Сол. 5:8, 9).

16. Со ваљани те ова одлучна те кера?

¹⁶ Ов одлучно секогаш те ачхове беспрекорно! Понекогаш, шај ка мислине кај само ту ко тхан коте со живинеа трудинеа тут те ачхове беспрекорно. Ама, ма бистре кај на сиан коркори. Туја тане милионија јавера верна слуге е Девлескере. Исто аѓаар, ту да ка ове машкар бут мурша хем џувља кола со ачхиле беспрекорна, чак кеда ленгоро живото сине ки опасност (Евр. 11:36-38; 12:1). Ов одлучно те живине спрема е Јовескере лафија: „Нане те откажинав ман тари мли беспрекорност!“ Амари беспрекорност нека фалинел вечно е Јехова!