1, 2. Сар дикхена бут мануша ки пумари бути?

БУТ мануша мислинена кај ленгири вредност зависинела таро адава сави бути керена. Ко несаве културе кеда запознајнаја некас, нормално тано те пуча ле: „Коте кереа бути?“

² Ки Библија, кеда керела пе лафи башо несаве мануша, некогаш пишинела сави бути керена сине. На пример, башо Матеј вакерела кај сине даночнико, башо Симон кај сине кожари, а о Лука доктори (Мат. 10:3; Дела 10:6; Кол. 4:14). Исто аѓаар, ки Библија читинаја саве задаче керена сине несаве мануша ки служба башо Јехова. На пример, пишинела кај о Давид сине цари, о Илија пророко, а о Павле апостоли. Акала мануша ценинена сине о задаче со денѓа лен о Јехова. Амен да исто ваљани те ценина са о задаче со добинаја лен таро Јехова.

3. Соске о попхуре ваљани те обучинен е потернен? (Дикх и слика ко почеток тари статија.)

³ Амен мангаја те служина е Јеховаске хем ценинаја  амаре задаче. Бут џене амендар уживинаја ко задаче со иси амен хем мангаја те кера лен кобор со шај повише време. Ама жалосно тано адава кеда о мануша пхујровена хем нашти више те керен адава со керена сине сар потерне (Проп. 1:4). Адава анела бут предизвикија е Јеховаскере слугенге. Авдиве, са повише проповединела пе хем е Јеховаскири организација користинела и современо технологија те шај повише мануша те шунен о шукар хабери. Ама понекогаш шај те овел пхаро е попхуренге те сикљон те керен о буќа ко јавер начин (Лука 5:39). Исто аѓаар, сар со пхујрона о мануша, иси лен са похари сила (Изр. 20:29). Адалеске, бут тано корисно кеда о попхуре обучинена е потернен те шај те лен повише одговорностија ки организација. (Читин Псалм 71:18.)

4. Соске несаве пхраленге нане локхо те ден пумаре одговорностија е потерненге? (Дикх и рамка „ Соске некаске тано пхаро те дел пле одговорностија“.)

⁴ Нане секогаш локхо е пхраленге со иси лен одговорностија те обучинен е потернен хем те ден лен пумаре одговорностија. Шај ленге пхаро кеда размислинена кај ка нашавен несави задача со бут мангена ла хем уживинена ки лате. Или шај дарана кај, ако ола на керена и задача, нане те овел шукар завршими. Исто аѓаар, шај мислинена кај нане лен време те обучинен е јаверен. Ама, тари јавер страна, о потерне пхраља ваљани те овен стрплива ако панда на добинѓе побаре одговорностија.

5. Башо кола пучиба ка кера лафи ки акаја статија?

⁵ Ки акаја статија ка кера лафи башо акала пучиба: Соске тано важно о попхуре пхраља те поможинен е потерненге те лен повише одговорностија? Сар шај те керен адава? (2. Тим. 2:2). Соске о потерне пхраља ваљани те овел лен исправно стави џикоте соработинена хем сикљовена е попхуре пхралендар сој поискусна? Најангле те дикха сар о цари о Давид спреминѓа пле чхаве баши јекх бут важно задача.

6. Со мангља те керел о Давид? Со вакерѓа леске о Јехова?

⁶ О Давид бершенцар сине прогонимо хем ваљани сине те нашел таро јекх тхан ко јавер. Кеда уло цари, ов живинела сине ки царско палата. Адалеске вакерѓа е Натанеске: „Ме живинава ки палата керди таро кедрово каш, а о ковчего е Јеховаскере сојузеа аракхљола тело шатори“. О Давид бут мангља те керел јекх шужо храми е Јеховаске. О Натан вакерѓа леске: „Кер са со пашљола туке ко вило, соске о чачутно Девел тано туја“. Ама, адава на сине е Јеховаскири волја. Адалеске вакерѓа е Натанеске те вакерел е Давидеске акала лафија: „Ту нане те кере манге кхер те живинав ки лесте“. Иако о Јехова вакерѓа е Давидеске кај понадари да ка овел леа, ов пхенѓа леске кај о храми ка керел ле лескоро чхаво, о Соломон. Сар реагиринѓа о Давид? (1. Лет. 17:1-4, 8, 11, 12; 29:1).

7. Сар реагиринѓа о Давид ко адава со вакерѓа леске о Јехова?

⁷ О Давид чаче мангела сине те керел храми е Јеховаске, адалеске шај сине бут разочаримо со нашти ов те керел адава. Ама, целосно поддржинѓа е Соломоне те шај те градинел о храми. Ов поможинѓа те организиринен пе о работникија хем те кхедел пе састрн,  бакари, сребро, злато хем каш. Е Давидеске на сине важно кој ка керел о храми. Кеда сине завршимо, о храми сине пенџардо сар е Соломонескоро храми. О Давид, исто аѓаар, охрабринѓа е Соломоне акале лафенцар: „А акана мо чхаво, о Јехова нека овел туја те шај те успејне ко са хем те кере кхер е Јеховаске, тле Девлеске, сар со вакерѓа ов баши туте“ (1. Лет. 22:11, 14-16).

8. Соске о Давид шај мислинѓа кај о Соломон нане спремно те керел о храми? Ама, со керѓа о Давид?

⁸ (Читин 1. Летописи 22:5.) О Давид шај мислинѓа кај о Соломон нане спремно башо адава важно проекти. О храми ваљани сине те овел величествено кердо, а о Соломон сине терно хем неискусно. Ама, о Давид џанља кај о Јехова ка поможинел лескере чхавеске те завршинел акаја важно бути. Адалеске, ов керѓа са со шај те поможинел е Соломоне те овел спремно башо адава баро проекти.

9. Со шај те поможинел е попхуре пхраленге спремно те ден одговорностија е јаверенге? Вакер пример.

⁹ О попхуре пхраља на ваљани те осетинен пе обесхрабриме кеда дена несаве пле одговорностија е потерненге. Соске? Адалеске со, кеда обучинена е потернен, о попхуре пхраља поможинена те напредујнел и бути башо Царство. Те вакера јекх пример. Јекх чхаво, џикоте тано тикно, дикхела сар лескоро дад возинела о врда. Ама, кеда ка овел побаро, о дад шај те објаснинел леске сар возинела пе. Пало несаво време, кеда ка овел е чхаве возачко дозвола, ов коркори ка почминел те возинел о врда. Ама, о дад понадари да ка дел ле совет сар те возинел. Понекогаш ка менине пе — некогаш ка возинел о дад, а некогаш о чхаво. Кеда о дад ка пхујрол, о чхаво ка возинел повише. Дали о дад ка хољанел  башо адава? На, веројатно ка овел радосно соске шај о чхаво те возинел ле. Исто аѓаар, о попхуре пхраља тане радосна кеда дикхена сар о потерне кола со сине обучиме лендар, прифатинена одговорностија ки организација.

10. Сар реагиринѓа о Мојсеј кеда о јавера почминѓе те понашинен пе сар пророкија?

¹⁰ Мора те пазина те на ова љубоморна кеда о јавера добинена несаве задаче. Шај те сикљова таро адава сар реагиринѓа о Мојсеј кеда несаве Израелција почминѓе те понашинен пе сар пророкија. (Читин 4. Мојсеева 11:24-29.) О Исус Навин мангља о Мојсеј те забранинел ленге те керен адава, ама ов вакерѓа: „Зарем сиан љубоморно баши манде? Ма ов! Мангава сарине таро е Јеховаскоро народо те овен пророкија, соске тегани о Јехова ка чхивел пло духо упри ленде!“ О Мојсеј џанља кај о Јехова керѓа те понашинен пе аѓаар. Ов на мангља лесте те фалинен ле, него мангља са е Јеховаскере слуге те овен лен задаче. Сар тано аменцар? Дали радујнаја амен кеда о јавера добинена задаче ки организација?

11. Со вакерѓа јекх пхрал со денѓа пле одговорностија јекхе потерне пхралеске?

¹¹ Авдиве, иси бут пхраља кола со бершенцар денѓе пестар са ки служба е Јеховаске хем обучинѓе е потерне пхрален те шај лена повише одговорностија. Те дикха о пример јекхе пхралескоро, о Питер. Ов накхља 74 берша ки полновремено служба хем скоро екваш таро адала берша служинѓа ки јекх подружница ки Европа. Бут време сине надгледнико ко Одделение баши служба. Пало адава, акаја задача сине денди јекхе потерне пхралеске касте со о Питер обучинѓа ле. Ов викинела пе сине Пол. Дали о Питер хољанѓа баши акаја промена? На. Ов вакерѓа: „Бут сиум радосно со иси пхраља кола со шај те овен обучиме те шај овела лен побаре одговорностија хем кола со бут шукар керена пле задаче“.

12. Со сикљоваја таро Ровоам?

¹² Кеда е Соломонескоро чхаво о Ровоам уло цари, пучља е попхурен башо совет сар те керел пли неви задача. Ама, на шунѓа ленгоро совет. Ов шунѓа о совет таро потерне коленцар со барило. О последице сине катастрофална (2. Лет. 10:6-11, 19). Со сикљоваја таро акава? Мудро тано те  рода совет таро попхуре хем поискусна пхраља амендар. О потерне на ваљани те осетинен притисок кај мора те керен о буќа исто сар со керена пе сине поангле. Ама, ола ваљани понадари да те лен ко предвид о советија е попхуренгере хем на ваљани те мислинен кај о начин сар о попхуре пхраља керена о буќа на функциониринела.

13. Сар ваљани о потерне пхраља те соработинен е попхуренцар?

¹³ Понекогаш, о потерне пхраља добинена одговорност те надглединен о задаче со керена лен о попхуре хем поискусна пхраља. Мудро тано о потерне те сикљовен таро акала попхуре пхраља. О Пол, кова со заменинѓа е Питере сар надгледнико ко јекх одделение ко Бетел, вакерѓа: „Пучава сине е Питере башо совет хем охрабринава сине е јаверен да таро одделение те керен адава“.

14. Со шај те сикљова таро адава сар соработинѓе о Тимотеј хем о Павле?

¹⁴ О Тимотеј сине бут потерно таро Павле, ама ола заедно соработинѓе бут берша. (Читин Филипјаните 2:20-22.) О Павле вакерѓа е пхраленге таро Коринт: „Бичхалава туменге е Тимотеје, соске ов тано мло мангло хем верно чхаво ко Господари. Ов ка сетинкерел тумен ко начелија коленде со икерава ма џикоте служинава е Исусеске, хем башо кола со сикавава сегде ко секова собрание“ (1. Кор. 4:17). Таро акава јасно дикхаја кај о Павле хем о Тимотеј бут шукар соработинена сине хем поможинена пе сине јекх јекхеа. О Павле одвојнела сине време те сикавел е Тимотеје башо начелија кола со икерела лен сине џикоте служинела сине е Исусеске. О Тимотеј применинѓа адава со сикљола сине. Адалеске, о Павле замангља е Тимотеје хем сине сигурно кај шукар ка грижинел пе башо духовна потребе е пхраленгере хем е пхењенгере ко Коринт. О старешине шај те сикљон таро пример е Павлескоро џикоте обучинена јавере пхрален те шај јекх диве ола да те грижинен пе башо собрание.

15. Сар шај о лафија таро Римјаните 12:3-5 те поможинен амен те прифатина о промене?

¹⁵ Живинаја ко бут важно време. Е Јеховаскири организација ки пхув бајрола ко бут начинија. Акава значинела кај стално ка овен промене. Несаве таро акала промене влијајнена упри аменде хем шај нане аменге локхо те прифатина лен. Адалеске ваљани те ова понизна хем те овел аменге најважно адава со мангела о Јехова, а на со мангаја амен. Адава ка поможинел амен те ачхова обединета. О Павле пишинѓа е пхраленге ко Рим: „Вакерава секаске тумендар те на мислинел баши песте повише таро адава со ваљани те мислинел“. Пало адава објаснинѓа кај секова јекх ко собрание иси ле различно  улога, исто сар секова дело таро тело со иси ле различно улога (Рим. 12:3-5).

16. Со шај те керел секој амендар те шај те задржинел о мир хем о единство ки е Јеховаскири организација?

¹⁶ Е Јеховаскоро народо мангела те поддржинел о Царство хем те керел са со родела пе лестар. О попхуре пхраља шај те обучинен е потернен. О потерне пхраља шај те лен повише одговорностија хем те сикавен скромност хем поштовање. О жениме пхраља ценинена кеда ленгере ромња поддржинена лен чак кеда о околностија менинена пе. Акала ромња шај те сикљон тари Прискила, која со верно поддржинѓа пле роме, е Акила (Дела 18:2).

17. Башо со обучинѓа о Исус пле ученикон?

¹⁷ О Исус денѓа амен најшукар пример башо адава со значинела спремно те обучина е јаверен. Ов џанља кај јавера ка ваљани те керен и бути со ов почминѓа ла. Ов исто аѓаар џанља кај лескере ученикија тане несовршена. Ама, сине ле доверба кај ола ка проповединен о шукар хабери ки побари мера лестар (Јован 14:12). Ов шукар обучинѓа лен сар те проповединен, хем адалеске шај сине те проповединен ки секоја пхув коте со геле (Кол. 1:23).

18. Саве задаче аџикерена амен ки иднина? Сави важно задача иси амен акана?

¹⁸ Пало е Исусескоро мерибе, о Јехова воскреснинѓа ле ко небо хем денѓа ле побаре задаче. Чхивѓа ле ки посебно положба која сој побари тари „секоја влада хем власт хем сила хем управа“ (Еф. 1:19-21). Чак ако мераја сар верна слуге е Јеховаскере англедер о Армагедон, палем ка живина ко нево свето хем ка овен амен бут задаче коленде со ка шај те уживина. Авдиве да, саринен иси амен важно задача — те проповедина о шукар хабери хем те поможина е манушенге те овен ученикија е Исусескере. Адалеске, бизи разлика дали сием терне или пхуре, секој амендар те овел зафатимо ки бути е Господареске (1. Кор. 15:58).