1. Саве способностија денѓа о Јехова е манушен?

КЕДА о Јехова керѓа е манушен, денѓа лен посебна способностија. Денѓа амен способност те размислина, а адава поможинела амен те решина о проблемија хем те кера планија баши иднина (Изр. 2:11). Денѓа амен сила, те шај те кера адава со планиринѓем хем те исполнина амаре целија (Фил. 2:13). Исто аѓаар денѓа амен совест, адава тано чувство андре ки аменде кова со поможинела аменге те разликујна сој тано исправно а сој погрешно. И совест поможинела амен те на грешина хем те попрајна амаре грешке (Рим. 2:15).

2. Сар мангела о Јехова те користина амаре способностија?

² О Јехова мангела те користина амаре способностија ко шукар начин. Соске? Адалеске со мангела амен хем  џанела кај ка ова бахтале кеда ка користина о поклонија со денѓа амен. На пример, ко Хебрејска списија, пишинела: „О планија е буќарне манушескере сигурно анена корист“ хем „са со ка авел туке ко вас те кере, кер ле цело силаја“ (Изр. 21:5; Проп. 9:10). Ко Грчка списија, пишинела: „Са џикоте иси амен прилика, те кера шукарипе сариненге“ хем „служинен јекх јекхеске секој е поклонеа со добинѓа ле“ (Гал. 6:10; 1. Пет. 4:10). Акава сикавела кај о Јехова мангела те користина о способностија башо амаро хем е јаверенгоро шукарипе.

3. Саве ограничувања иси е манушен?

³ О Јехова мангела те користина амаре способностија, ама џанела кај сием ограничиме. На пример, нашти те цида и несовршеност, о грево хем о мерибе (1. Цар. 8:46). Исто аѓаар, нашти те контролирина јавере манушен, соске секас иси право коркори те одлучинел со ка керел Хем бизи разлика кобор џанаја или кобор искуство иси амен, никогаш нане те џана повише таро Јехова или те ова поискусна лестар (Иса. 55:9).

4. Башо со ка кера лафи ки акаја статија?

⁴ Ваљани секогаш те мукха о Јехова те водинел амен, те овел амен доверба кај ка поможинел амен хем кај ка керел адава со амен нашти те кера. Ама, о Јехова исто аѓаар аџикерела амендар те размислина сар шај те решина о проблемија хем сар те поможина е јаверенге. (Читин Псалм 37:3.) Ваљани те овел амен доверба ко Јехова хем те кера адава сој шукар. Исто аѓаар, ваљани те постапина верно.  Сар шај те кера акава? Те дикха о пример е Ноескоро, е Давидескоро хем јавере верна слугенгоро кола со сине лен доверба ко Јехова. Ка дикха кај несаве буќа нашти сине те керен лен, ама ола концентриринѓе пе ко буќа со шај сине те керен лен.

5. Ки сави ситуација сине о Ное?

⁵ О Ное живинѓа ко свето кова со сине „пхердо насилство“ хем неморал (1. Мој. 6:4, 9-13). Иако џанела сине кај о Јехова ка уништинел о лошно свето, о Ное сигурно сине вознемиримо таро адава со керена сине о мануша. Ов халило кај несаве буќа нашти сине те керел лен, ама исто аѓаар халило кај несаве буќа шај те керел лен.

6, 7. а) Со нашти сине те керел о Ное? б) Сар амен да сием ки слично ситуација сар о Ное?

⁶ Со нашти сине те керел о Ное: О Ное верно проповединела сине, вакерела сине е манушенге со ка керел о Јехова. Ама ов нашти сине те чхивел силаја е манушен те шунен ле хем те керел о Потоп те авел посигате. Е Ное ваљанѓа те овел ле доверба кај о Јехова ка исполнинел пло ветување те чхинавел о лошнипа, хем кај адава ка керел ле ко право време (1. Мој. 6:17).

⁷ Амен да живинаја ко свето кова сој пхердо лошнипаја, хем џанаја кај о Јехова ка уништинел ле (1. Јов. 2:17). Исто аѓаар, нашти силаја те чхива е манушен те прифатинен „о шукар хабери башо Царство“. Хем нашти те кера посигате те авел и „бари неволја“  (Мат. 24:14, 21). Исто сар о Ное, ваљани те овел амен силно вера хем доверба кај о Јехова панда хари ка чхивел крајо е лошнипаске (Пс. 37:10, 11). Амен сием увериме кај о Јехова нане те мукхел акава лошно свето те продолжинел чак нијекх диве повише таро адава кобор со ваљани (Авак. 2:3).

8. Ко со концентриринѓа пе о Ное? (Дикх и слика ко почеток тари статија.)

⁸ Со шај сине те керел о Ное: Наместо те откажинел пе адалеске со нашти сине те керел несаве буќа, ов концентриринѓа пе ко буќа со шај те керел лен. О Ное верно проповединела сине кај о Јехова ка уништинел адава свето (2. Пет. 2:5). Аѓаар, лескири вера ачхили зорали. Ов исто аѓаар шунела сине о упатствија со денѓа ле о Јехова сар те градинел и арка. (Читин Евреите 11:7.)

9. Сар шај те ова сар о Ное?

⁹ Исто сар о Ное, амен сием зафатиме „ки бути е Господареске“ (1. Кор. 15:58). На пример, шај поможинаја кеда градинена пе хем одржинена пе амаре дворане хем о Конгресна сале, поможинаја ко конгресија, ки подружница или ки канцеларија преведибаске. Сој најважно, сием зафатиме е проповедибаја, кова со керела амари надеж баши иднина позорали. Јекх верно пхен вакерѓа кај кеда керела лафи е јаверенцар башо берекетија таро е Девлескоро Царство, ој дикхела кај е манушен нане лен нисави надеж хем мислинена кај ленгере проблемија никогаш нане те решинен пе. Тари јавер страна, амен иси амен надеж хем ој овела позорали кеда кераја лафи е јаверенцар баши лате. Акаја надеж поможинела амен те ачхова ки трка башо живото! (1. Кор. 9:24).

10. Објаснин е Давидескири ситуација.

¹⁰ О Давид сине верно мануш хем о Јехова мангела ле сине бут (Дела 13:22). Ама, о Давид керѓа неморал е Витсавеаја, адава сине баро грево. Сој панда полошно, ов мангља те гаравел пло грево адалеа со керѓа плани е Витсавеакоро ром о Урија те овел мудардо ки војна. О Давид чак денѓа е Уријаске те ингарел о писмо коте со пишинела сине сар ваљани те мерел! (2. Сам. 11:1-21). Пало несаво време, е Давидескере гревија сине откријме (Мар. 4:22). Сар реагиринѓа о Давид кеда случинѓа пе адава?

11, 12. а) Откеда грешинѓа, со нашти сине те керел о Давид? б) Со ка керел о Јехова аменге ако кајнаја амен?

¹¹ Со нашти сине те керел о Давид: О Давид нашти сине те иранел о време палал. Ов трпинѓа о последице таро грево со керѓа ле са џи ко крајо таро пло живото (2. Сам. 12:10-12, 14). Адалеске, ваљанѓа леске вера. Ваљани сине те овел ле доверба кај ако чаче кајнѓа пе, тегани о Јехова ка простинел леске хем ка поможинел ле те издржинел о последице таро пле постапке.

 ¹² Сарине амен грешинаја, адалеске со сием несовршена. Несаве грешке тане побаре таро јавера хем иси грешке со нашти те поправина лен. Амен да шај ка ваљани те трпина о последице таро амаре постапке (Гал. 6:7). Ама, иси амен доверба ко е Девлескере лафија кај ако кајнаја амен, ов ка поможинел аменге ко пхаре ситуацие, чак кеда башо адава сием коркори крива. (Читин Исаија 1:18, 19; Дела 3:19.)

13. Сар о Давид палем уло паше е Јеховаја?

¹³ Со шај сине те керел о Давид: О Давид мангља палем те овел паше е Девлеа. Адалеске ов мукхља о Јехова те поможинел ле. На пример, прифатинѓа о укор таро пророко о Натан (2. Сам. 12:13). О Давид исто аѓаар молинѓа пе е Јеховаске хем признајнѓа пле гревија, а адалеа сикавѓа кај чаче мангела палем те овел одобримо таро Јехова (Пс. 51:1-17). Иако сине леске бут пхаро со грешинѓа, ов на дозволинѓа адава те перавел ле него сиклило таро пле грешке. Ов никогаш палем на керѓа асавке баре грешке. Пало бут берша, муло сар верно мануш хем о Јехова сар асавко памтинела ле (Евр. 11:32-34).

14. Со шај те сикљова таро пример е Давидескоро?

¹⁴ Со шај те сикљова таро пример е Давидескоро? Ако керѓем баро грево, ваљани искрено те кајна амен, те признајна амаро грево е Јеховаске, хем те рода лестар те простинел аменге (1. Јов. 1:9). Исто аѓаар, ваљани те вакера е старешиненге, соске ола шај те поможинен амен палем те ова паше е Јеховаја. (Читин Јаков 5:14-16.) Кеда прифатинаја помош таро Јехова, сикаваја кај иси амен доверба ко лескоро ветување кај ка простинел аменге. Исто аѓаар, ваљани те сикљова таро амаре грешке хем понадари да те овел амен доверба џикоте служинаја е Јеховаске (Евр. 12:12, 13).

15. Со сикљоваја таро пример е Анакоро?

¹⁵ Шај сетинеа тут ко јавера да верна слуге тари Библија кола со сине лен доверба ко Јехова џикоте керѓе са со шај кеда сине ко пхаре ситуацие. На пример, несаво време е Ана нашти сине те овен ла чхаве. Ој нашти сине те менинел и ситуација. Ама, сине ла доверба кај о Јехова ка утешинел ла. Адалеске, ој понадари да џала сине ко свето шатори хем ки молитва вакерела сине е Јеховаске сар осетинела пе (1. Сам. 1:9-11). Кобор шукар пример тани ој аменге! Кеда иси амен проблемија е састипаја или сием ки јавер ситуација со нашти те менина ла, амен мукхаја амаре гриже е Јеховаске хем иси амен доверба кај ов грижинела пе аменге (1. Пет. 5:6, 7). Исто аѓаар, кераја са со шај те овел амен побари корист таро состанокија хем таро са јавер со дела амен е Јеховаскири организација (Евр. 10:24, 25).

16. Со шај те сикљовен о родителија таро Самоил?

 ¹⁶ Сар тано е родителенцар кола со ленгере чхаве чхинавѓе те служинен е Јеховаске? О пророко о Самоил нашти сине силаја те теринел пле возрасна чхавен те ачховен верна е Јеховаске (1. Сам. 8:1-3). Ов ваљани сине те мукхел о буќа е Јеховаске ко васта. Ама, о Самоил керѓа са со шај те ачховел верно е Девлеске хем те керел лескири волја (Изр. 27:11). Авдиве, бут родителија со служинена е Јеховаске тане ки слично ситуација. Исто сар о дад тари споредба е Исусескири башо непослушно чхаво, лен иси лен доверба кај о Јехова тано секогаш спремно те приминел адален со кајнена пе (Лука 15:20). Са џи тегани, о родителија шај те концентриринен пе те ачховен верна е Јеховаске хем те надинен пе кај ленгоро пример ка поттикнинел е чхавен палем те иранен пе ко Јехова.

17. Соске о пример е чороле удовицакоро охрабринела амен?

¹⁷ Јавер шукар пример тани и чороли удовица таро е Исусескоро време. (Читин Лука 21:1-4.) Ој нашти сине те менинел адава со ко храми сине корупција, хем нашти сине те менинел адава сој чороли (Мат. 21:12, 13). Ама, лакири доверба ко Јехова поттикнинѓа ла те поддржинел о чачутно обожавање. Ој сине дарежливо хем денѓа „дуј тикне паре“, а адава сине са со сине ла. Адаја верно џувли сикавѓа целосно доверба ко Јехова. Ој џанља кај ако чхивела и служба е Јеховаске ко прво тхан, ов ка грижинел пе те овел ла са со ваљани лаке. Слично сар лате, амен да иси амен доверба кај ако чхиваја е Девлескоро Царство ко прво тхан, о Јехова ка грижинел пе те овел амен са со ваљани аменге (Мат. 6:33).

18. Вакер пример таро јекх пхрал кова со сине ле исправно стави.

¹⁸ Бут амаре пхраља хем пхења авдиве сикавена слично доверба ко Јехова адалеа со концентриринена пе ко адава со шај те керен, а на ко адава со нашти. Размислин башо јекх пхрал со викинела пе Малколм, кова со ачхило верно са џикоте на муло ко 2015 берш. Бут берша ов хем лескири ромни служинѓе е Јеховаске. Ко адала берша сине лен хем шукар хем пхаре моментија ко живото. Ов вакерѓа: „Некогаш, о живото тано непредвидливо, несигурно хем чак пхаро те икљове леа ко крајо. Ама о Јехова дела берекети адален со иси лен доверба ки лесте“. Саво совет денѓа о Малколм? Ов пхенѓа: „Молин е Јехова те поможинел тут те де о најшукар ки служба. Концентририн тут ко адава со шај те кере, а на ко адава со нашти“. * (Дикх и фуснота.)

19. а) Соске бут шукар одговоринела акале бершескоро стихо? б) Сар ка применине е бершескоро стихо ко тло живото?

¹⁹ Акава лошно свето џала „таро лошно ко полошно“ хем адалеске шај те аџикера кај ка овел аменге са попхаро хем попхаро (2. Тим. 3:1, 13). Акана тано најважно те на дозволина те перавен амен амаре проблемија. Наместо адава, ваљани те овел амен бари доверба ко Јехова хем те концентририна амен ко адава со шај те кера. Адалеске, акале бершескоро стихо бут шукар одговоринела: „Нека овел тут доверба ко Јехова хем кер адава сој шукар“ (Пс. 37:3).