1, 2. Соске о Јехова отфрлинѓа е Сауле? (Дикх и слика ко почеток тари статија.)

КЕДА о Јехова биринѓа е Сауле те овел цари, о Саул сине скромно (1. Сам. 9:1, 2, 21; 10:20-24). Ама, кеда уло цари почминѓа те овел гордо. Ки јекх прилика бут Филистејција але те марен пе е Израелцонцар. О пророко о Самоил вакерѓа е Саулеске кај ка авел хем ка дел жртва е Јеховаске. Англедер те авел о Самоил, о Израелција дарандиле хем бут лендар нашле хем мукхле е Сауле. Ов уло нестрпливо хем наместо те аџикерел е Самоиле, ов денѓа жртва. Е Сауле на сине ле право те керел адава, хем адалеа на керѓа е Јеховаскири волја (1. Сам. 13:5-9).

² Кеда ресља о Самоил, ов укоринѓа е Сауле соске на шунѓа е Јехова. Ама, о Саул мислинела сине кај на керѓа ништо лошно. Ов мангља те оправдинел пе хем чак керѓа криво е јаверен баши пли грешка (1. Сам. 13:10-14). Таро адава време, о Саул почминѓа те керел јавера да буќа со сикавена сине кај тано гордо.  Адалеске, о Јехова отфрлинѓа ле сар цари (1. Сам. 15:22, 23). Е Саулескоро живото почминѓа шукар ама завршинѓа бут лошно (1. Сам. 31:1-6).

3. а) Со мислинена бут мануша баши скромност? б) Кола пучиба ка одговорина?

³ Бут мануша авдиве мислинена кај нашти те овен скромна хем ко исто време те овел лен успешно живото хем кариера. Ола фалинена пе кај тане пошукар е јаверендар. На пример, јекх пенџардо глумцо хем политичари вакерѓа: „О лафи скромност нихари на важинела манге хем надинава ма кај никогаш нане ни те важинел“. Тегани, соске тано важно јекхе христијанеске те овел скромно? Сој тани и скромност, а со на? Ки акаја статија ка одговорина ко акала пучиба. А ки јавер статија ка дикха сар шај те ачхова скромна чак кеда тано пхаро те кера адава.

4. Сар постапинела јекх гордо мануш?

⁴ И Библија сикавела кај и гордост тани спротивно тари скромност. (Читин Изреки 11:2.) О Давид молинѓа е Јехова: „Аракх тле слуга таро горда постапке“ (Пс. 19:13). Кеда некој тано гордо ов обично керела нешто со нане ле право или авторитети те керел, шај соске тано нестрпливо. Сарине амен некогаш постапинѓем гордо соске сием несовршена. Ама сар со дикхлем таро пример е Саулескоро, ако акава овела аменге навика, тегани на кераја адава со мангела о Јехова. Ко Псалм 119:21 вакерела кај о Јехова укоринела адален сој горда. Соске керела адава?

5. Соске тани сериозно грешка те постапина гордо?

⁵ Сар прво, кеда постапинаја гордо, тегани сикаваја кај на поштујнаја е Јехова, амаре Девле хем Владетеле. Дујто, кеда кераја нешто со нане амен авторитети те кера, веројатно ка распрајна амен или ка овел амен несогласување е јаверенцар (Изр. 13:10). Хем трито, кеда о јавера ка дикхен кај керѓем нешто со на сине амен право те кера, шај ка осетина амен лаџакерде (Лука 14:8, 9). Таро акала буќа дикхаја соске о Јехова мангела те ова скромна.

6, 7. Сар тане паше поврзиме и скромност хем и понизност?

⁶ И скромност хем и понизност тане паше поврзиме. Јекх понизно христијани нане гордо хем дикхела е јаверен сар побаре пестар (Фил. 2:3). Некој сој понизно обично тано хем скромно. Ов џанела кај иси ле ограничувања хем понизно признајнела пле грешке. Ов мангела те шунел со мислинена о јавера хем те сикљовел лендар. О Јехова бут мангела е понизно мануше.

⁷ И Библија сикавела кај о скромно мануш реално дикхела ки песте хем хаљовела кај иси несаве буќа со нашти те керел лен или нане леске дозволиме. Акава поможинела ле те поштујнел е јаверен хем те постапинел љубезно.

8. Со сикавела кај некој почминела те овел гордо?

 ⁸ Ама, некогаш шај ка почмина гордо те размислина бизо те ова свесна башо адава. Сар шај те авел џи ко адава? Шај ка почмина те осетина амен поважна таро јавера соске иси амен несаве одговорностија ко собрание, или паше сием некасаја со иси ле одговорностија (Рим. 12:16). Или, шај ка почмина намерно те привлечина е јаверенгоро внимание ки аменде (1. Тим. 2:9, 10). Шај чак ка почмина те вакера е јаверенге со ваљани те керен хем со на ваљани те керен (1. Кор. 4:6).

9. Соске несаве уле горда? Вакер пример тари Библија.

⁹ Шај ка почмина те постапина гордо ако на контролиринаја амаре погрешна желбе. Бут џене уле горда соске мангле те овен славна, сине љубоморна е јаверенге, или на контролиринѓе пли холи. Акава случинѓа пе несаве манушенге сој спомниме ки Библија, сар на пример о Авесалом, о Озија хем о Навуходоносор. О Јехова јасно сикавѓа ленге кај ваљани те овен понизна (2. Сам. 15:1-6; 18:9-17; 2. Лет. 26:16-21; Дан. 5:18-21).

10. Соске на ваљани те осудина е јаверенгере мотивија? Вакер пример тари Библија.

¹⁰ Иси јавера да причине соске понекогаш о мануша нане скромна. Размислин башо Авимелех хем башо Петар (1. Мој. 20:2-7; Мат. 26:31-35). Сине ли ола горда? Или шај на џанена сине са о фактија хем постапинѓе бизо те размислинен? Адалеске со нашти те џана со иси некас ко вило, на ваљани те осудина е јаверенгере мотивија. (Читин Јаков 4:12.)

11. Со ваљани те џана?

¹¹ Јекх скромно мануш џанела кова тано лескоро тхан ки е Девлескири организација. О Јехова тано Девел со иси ле редо. Ов секоле јекхеске ко собрание денѓа те овел ле пло тхан. Секој амендар тано потребно ко собрание. О Јехова денѓа амен различна поклонија, вештине, талентија или способностија, хем мукхела коркори амен те одлучина сар ка користина лен. Ако сием скромна, ка користина лен ко начин сар со мангела о Јехова (Рим. 12:4-8). Амен џанаја кај о Јехова аџикерела амендар те користина лен те шај те фалина ле хем те поможина е јаверен. (Читин 1. Петрово 4:10.)

12, 13. Со на ваљани те бистра кеда доживинаја промене ки амари служба е Јеховаске?

¹² О буќа со кераја лен ки служба е Јеховаске шај те менинен пе сар со накхела о време. На пример, размислин башо бут промене со доживинѓа о Исус. Прво, ов сине коркори пле Дадеа (Изр. 8:22). Тегани, ов поможинѓа е Јеховаске те керел е ангелен, и вселена, хем е манушен (Кол. 1:16). Пало адава, ов сине бичхалдо ки Пхув. Бијандило сар бебе хем барило (Фил. 2:7). Пало лескоро мерибе, ов иранѓа пе ко небо хем ко 1914 берш уло Цари ко е Девлескоро Царство (Евр. 2:9). Хем ки иднина, кеда ка завршинен о илјада берша, о Исус ка иранел о Царство е Јеховаске те шај „о Девел те овел сариненге са“ (1. Кор. 15:28).

¹³ Аменде да шај те овел амен бут промене ко амаро живото. Некогаш  амаре одговорностија шај те менинен пе соске анѓем асавке одлуке. На пример, шај одлучинѓем те женина амен, шај уло амен чхаве, или одлучинѓем те кера несаве промене те шај те служина е Јеховаске полновремено. Некогаш амаре одговорностија шај ка менинен пе соске иси амен јавера околностија. Шај ка ова ки можност те кера повише ки служба, или шај ка ваљани те кера похари. Ама, бизи разлика дали сием терне или пхуре, састе или насвале, о Јехова џанела сар шај секој амендар најшукар те служинел леске. Ов на аџикерела амендар те кера повише таро адава со шај. Хем бут ценинела са со кераја баши лесте (Евр. 6:10).

14. Сар и скромност поможинела амен те ова задоволна амаре задаченцар?

¹⁴ Исто сар о Исус, амен да шај те ова задоволна секоле задачаја со дела амен о Јехова (Изр. 8:30, 31). О скромно мануш тано задоволно таро задаче хем одговорностија со иси ле ко собрание. Ов на концентриринела пе ко адава со керена о јавера. Наместо адава, задоволно тано пле тханеа со иси ле ки е Девлескири организација. Ки пли задача дикхела сар нешто сој леске дендо таро Јехова. О скромно мануш исто аѓаар поштујнела е јаверен хем спремно поддржинела лен. Ов хаљола кај о Јехова ленге да денѓа задача (Рим. 12:10).

15. Со шај те сикљова таро Гедеон?

¹⁵ О Гедеон тано бут шукар пример баши скромност. Кеда о Јехова вакерѓа леске те спасинел е Израелцон таро Мадијамција, о Гедеон пхенѓа: „Мли фамилија тани најтикни ко Манасија,  хем ме сиум најтикно ко кхер ме дадескоро“ (Суд. 6:15). Ама, е Гедеоне сине ле доверба ко Јехова хем прифатинѓа и задача. Тегани о Гедеон уверинѓа пе кај шукар халило со родела лестар о Јехова хем молинѓа пе башо водство (Суд. 6:36-40). Ов сине силно хем храбро мануш, ама исто аѓаар сине мудро хем претпазливо (Суд. 6:11, 27). Пало адава, кеда о мануша мангле те чхивен ле те овел владетели, ов на мангља. Кеда завршинѓа и задача со денѓа ле о Јехова, ов иранѓа пе кхере (Суд. 8:22, 23, 29).

16, 17. Сар шај о скромно мануш те напредујнел?

¹⁶ Ако некој прифатинела несави задача или мангела те керел нешто повише ко собрание, адава на значинела кај нане скромно. И Библија вакерела кај тано шукар кеда јекх слуга е Јеховаскоро мангела ки побари мера те служинел е пхраленге хем те напредујнел (1. Тим. 4:13-15). Ама, дали ваљани те добина неви задача те шај те напредујна? На. Сарине ваљани те трудина амен те подобрина амари личност хем амаре способностија те шај пошукар те служина е Јеховаске хем те поможина е јаверенге.

¹⁷ Англедер те прифатинел несави задача, о скромно мануш ка дикхел со родела пе лестар ки адаја задача. Ов ка молинел пе башо адава хем шукар ка размислинел дали шај те керел ла. Ка размислинел башо акала буќа: „Дали ка овел ман доволно време хем сила те керав јавера да важна буќа? Ако на, дали шај несаве таро мле задаче те дав те керел лен некој јавер?“ Кеда ка размислинел башо акала пучиба, о скромно мануш шај ка одлучинел кај нашти те керел адаја неви задача. Ако сием скромна, шај ка ваљани башо несаве задаче те вакера „на“.

18. а) Со керела о скромно мануш кеда дела пе леске неви задача? б) Сар о стихо таро Римјаните 12:3 поможинела амен те ова скромна?

¹⁸ О Јехова мангела „скромно те џа леа“ (Мих. 6:8). Адалеске, кеда добинаја неви задача, родаја водство хем помош лестар, исто сар со керѓа о Гедеон. Ваљани хор те размислина башо адава со вакерела о Јехова преку и Библија хем лескири организација. Ма те бистра кај са со кераја ки служба е Јеховаске нане адалеске со иси амен несаве способностија, него адалеске со о Јехова тано понизно хем мангела те поможинел амен (Пс. 18:35). О скромно мануш нане „те мислинел баши песте повише таро адава со ваљани те мислинел“. (Читин Римјаните 12:3.)

19. Соске ваљани те ова скромна?

¹⁹ Јекх скромно мануш џанела кај само о Јехова заслужинела са и слава, соске ов тано о Створители хем о Најбаро со постојнела (Отк. 4:11). Ако сием скромна, ка ова задоволна адалеа со шај те кера ки служба е Јеховаске. Ка поштујна о чувствија хем о мислење е пхраленгоро хем е пхењенгоро, а адава ка керел те ова обединета. О скромно мануш шукар мислинела англедер те керел нешто, акава поможинела ле те на керел сериозна грешке. О Јехова мангела околен сој скромна. Адалеске, и скромност тани бут важно е Девлескере народоске. Ки јавер статија ка дикха сар шај те ачхова скромна чак кеда тано пхаро те кера адава.