1-3. Со на керѓа о пророко тари Јуда хем кола сине о последице? (Дикх и слика ко почеток тари статија.)

О ЈЕРОВОАМ, со сине цари ко Израел, керѓа жртвенико башо ховавно обожавање ки диз Ветил. О Јехова бичхалѓа јекхе пророко тари Јуда те вакерел е Јеровоамеске јекх осудувачко порака. Акава понизно пророко шунѓа е Јехова хем вакерѓа и порака. О цари бут хољанѓа е пророкоске, ама о Јехова заштитинѓа ле (1. Цар. 13:1-10).

² О Јехова заповединѓа е пророкоске те на хал хем те на пиел ко Израел хем те иранел пе кхере таро јавер друмо. Кеда иранела пе сине кхере, о пророко аракхља јекхе пхуре мануше кова со ховавѓа ле хем вакерѓа леске кај иси ле порака таро Јехова. О пхуро мануш викинѓа е пророко ки песте кхере те хал хем те пиел. О пророко на шунѓа е Јехова хем гело лесте. Ов на керѓа адава со вакерѓа леске о Јехова. Адалеске кеда иранела пе сине кхере, нападинѓа ле јекх лави хем мударѓа ле (1. Цар. 13:11-24).

³ На џанаја соске о пророко одлучинѓа те шунел адале пхуре мануше а на е Јехова. Ама, џанаја кај ов на продолжинѓа „те џал скромно“ е Јеховаја. (Читин Михеј 6:8.)  Кеда ки Библија вакерела пе кај ваљани те џа е Јеховаја, адава значинела кај ваљани те овел амен доверба ки лесте, те мукха ов те водинел амен хем те ова леске послушна. О скромно мануш џанела кај ваљани ко секова време те молинел пе. Те овел сине скромно о пророко, ов ка пучел сине е Јехова дали менинѓа о упатствија со вакерѓа леске. Некогаш амен да ваљани те ана пхаре одлуке, хем шај нане те овел аменге јасно со мангела о Јехова те кера. Ама ако сием скромна, ка рода таро Јехова те водинел амен хем аѓаар нане те кера сериозна грешке.

4. Со ка дикха ки акаја статија?

⁴ Ки англуни статија дикхлем со значинела те ова скромна хем соске тано адава важно аменге авдиве. Ама, сар шај панда повише те ова скромна? Хем кола ситуацие шај те сикавен дали чаче сием скромна или на? Те дикха трин асавке ситуацие (Изр. 11:2).

5, 6. Сар о Варзелај сикавѓа кај сине скромно?

⁵ О начин сар реагиринаја кеда амаре околностија или задаче менинена пе сикавела дали чаче сием скромна. Шај те сикљова таро Варзелај, е Давидескоро верно амал. Кеда сине ле 80 берш, о Давид викинѓа ле те живинел ко царско дворо. Иако акаја сине бари предност, о Варзелај вакерѓа кај ка овел пошукар ко дворо те џал о Химам, кова со шај сине лескоро чхаво (2. Сам. 19:31-37).

⁶ Соске о Варзелај на прифатинѓа акаја покана? Дали на мангља те овел ле одговорностија или мангља те живинел полокхо живото? На, адава керѓа ле соске сине скромно. Ов џанела сине кај лескере околностија менинѓе пе хем прифатинѓа пле ограничувања. (Читин Галатите 6:4, 5.) Исто сар о Варзелај, амен да ваљани те ова скромна. Наместо те овел аменге најважно адава со мангаја амен или те споредина амен јаверенцар, ваљани те концентририна амен те да о најшукар е Јеховаске. Акава тано бут поважно него те овел амен посебна задаче или те ова пенџарде машкар о пхраља хем о пхења (Гал. 5:26). Ако сием скромна, заедно е пхраленцар ка фалина е Јехова хем ка поможина е јаверенге (1. Кор. 10:31).

7, 8. Сар шај и скромност те поможинел амен те на потприна амен ки аменде?

⁷ Шај ка овел аменге пхаро те ачхова скромна кеда аменге денде повише одговорностија или авторитети. Шај бут те сикљова таро Неемија. Кеда ов шунѓа кај о народо ко Ерусалим иси лен бут проблемија, ов молинѓа е Јехова те поможинел лен (Неем. 1:4, 11). О Јехова одговоринѓа ки лескири молитва. О цари о Артаксеркс чхивѓа е Неемија те овел управители ко адава тхан. Иако о Неемија сине моќно хем барвало, ов на потпринела пе сине ко пле способностија хем искуство. Ов секогаш родела сине водство таро Јехова хем редовно читинела сине е Девлескоро закони (Неем. 8:1, 8, 9). Е Неемија сине ле авторитети упро бут мануша. Ама, ов никогаш на употребинѓа пло авторитети баши пли корист или те понашинел пе е јаверенцар грубо (Неем. 5:14-19).

⁸ Исто сар о Неемија, ако добинаја повише одговорностија или менинела пе амари задача, ваљани те трудина амен понадари да те ачхова скромна. На мангаја те потприна амен ко  амаре способностија или искуство. Сар шај некој те почминел те потпринел пе ки песте? На пример, јекх старешина шај керела несаве собраниска буќа бизо англедер те молинел пе. Или, јекх пхрал или пхен прво анела несави одлука, а пало адава молинела е Јехова те благословинел адаја одлука. Ама јекх скромно мануш нане те потпринел пе ки песте чак кеда керела нешто со бут пути англедер керѓа ле. Ов на бистрела кај е Јеховаскере способностија тане бут побаре таро лескере. (Читин Изреки 3:5, 6.) Авдиве ко свето бут мануша тане себична хем мангена те овен англо јавера. Ама е Јеховаскере слуге нане асавке. Амен на мислинаја кај сием пошукар јаверендар ки фамилија или ко собрание само адалеске со иси амен несаве одговорностија. Наместо адава, амен на бистраја кова тано амаро тхан ки е Девлескири организациа хем соработинаја амаре пхраленцар хем е пхењенцар (1. Тим. 3:15).

9, 10. Сар шај и скромност те поможинел аменге кеда некој неправедно критикујнела амен?

⁹ Шај те овел аменге пхаро кеда некој неправедно критикујнела амен. Акава уло е Анаке. Иако о ром лакоро бут мангела ла сине, ој на сине бахтали. И Фенина, и дујто ромни е Елканаскири, асала лаке сине хем понижинела ла сине цело време. И Ана мангела  сине те овен ла чхаве, ама нашти сине. Јекх диве кеда сине лаке бут пхаро, ој гели ко свето шатори те молинел пе. О првосвештенико о Илиј дикхља ла сар ровела хем вакерѓа лаке кај тани мати! И Ана шај сине бут те хољанел леске. Наместо адава, ој шукарипаја одговоринѓа леске, адалеа сикавѓа кај поштујнела ле. Пало несаво време, и Ана вакерѓа јекх молитва која со сикавела лакири вера хем о мангипа кон о Јехова (1. Сам. 1:5-7, 12-16; 2:1-10).

¹⁰ И скромност шај те поможинел амен те победина о лошнипе шукарипаја (Рим. 12:21). Е Сатанаскоро свето тано пхердо лошна буќенцар. Адалеске на ваљани те ова изненадиме кеда аменцар постапинена неправедно. Адава шај те керел амен бут хољаме, ама ваљани те борина амен те цида амендар адава чувство (Пс. 37:1). Панда попхаро шај те овел аменге ако иси амен проблемија некасаја ко собрание. Кеда иси асавке проблемија, тегани ваљани те трудина амен те постапина сар о Исус. И Библија вакерела: „Кеда вреџинена ле сине, ов на иранела сине вреџибаја... него ов мукхља о буќа околеске кова со праведно судинела“ (1. Пет. 2:23). О Исус сине понизно хем џанела сине кај о Јехова ка цидел секоја неправда (Рим. 12:19). Амен да ваљани те ова понизна хем „ма те ирана лошнипаја е лошнипаске“ (1. Пет.3:8, 9).

11, 12. а) Сар шај те ачхова скромна кеда о јавера ка фалинен амен? б) Сар ка сикава скромност амаре урајбаја хем понашибаја?

 ¹¹ Амари скромност шај исто аѓаар те овел испитими кеда некој фалинела амен. И Естира сине јекх таро најшуже џувља ки Персија, хем адалеске сигурно добинела сине бут пофалбе. Цело јекх берш, ој сине негујми посебно третманенцар башо шужипе заедно јавере терне џувленцар хем секоја јекх лендар надинела пе сине кај ка овел е царескири ромни. Тегани, о цари биринѓа е Естира те овел леске ромни хем царица. Ама, са акала буќа на менинѓе е Естира. Ој на ули гордо. Ачхили скромно, љубезно хем поштујнела сине е јаверен (Ест. 2:9, 12, 15, 17).

¹² Ако сием скромна, ка урава амен хем ка понашина амен ко начин кова со сикавела кај поштујнаја е јаверен хем коркори амен. Наместо те фалина амен или те манга те воодушевина е јаверен, трудинаја амен те ова кротка хем љубезна. (Читин 1. Петрово 3:3, 4; Ерем. 9:23, 24.) Таро начин сар кераја лафи хем сар постапинаја ка дикхел пе со мислинаја баши аменде. На пример, шај трудинаја амен те чхива е јаверен те мислинен кај сием нешто посебно адалеске со иси амен несаве предностија, со џанаја несаве информацие или со сием паше некасаја. Или шај местинаја о буќа те дикхјон аѓаар, сар ка пхене амен коркори керѓем несави важно бути, а уствари јавера поможинѓе амен ко адава. Размислин башо Исус. Ов шај сине те воодушевинел е манушен адалеа кобор сине мудро. Наместо адава, о Исус бут пути цитиринела сине таро е Девлескоро Лафи. Ов на мангља о мануша те фалинен ле, него секогаш те фалинен е Јехова (Јован 8:28).

13, 14. Сар шај и скромност те поможинел амен те ана шукар одлуке?

¹³ Ваљани те ова скромна кеда анаја одлуке, или кеда јавера анена одлуке кола со влијајнена упри аменде. Кеда о апостол Павле сине ки Цезареја, мангља те џал ко Ерусалим те завршинел и бути со денѓа ле о Јехова. Ама, о пророко о Агав вакерѓа е Павлеске кај ка пханден ле ако гело. Шај чак те мударен ле. О пхраља молинена сине е Павле ма те џал. Ама ов одлучинѓа те џал. Дали анѓа асавки одлука соске потпринѓа пе ки песте? На, о Павле сине скромно хем сине ле целосно доверба ко Јехова. О пхраља да сине скромна. Адалеске поддржинѓе е Павле ки лескири одлука хем мукхле ле те џал (Дела 21:10-14).

¹⁴ Адава со сием скромна ка поможинел амен те ана шукар одлуке чак кеда на џанаја сар ка икљон о буќа или кеда нашти те влијајна упри ленде. На пример, шај размислинаја те почмина ки полновремено служба. Ама со ако насвалилем? Со ако амаре родителија насвалиле хем ваљани ленге амари помош? Со ка кера кеда ка пхујрова? Нашти те џана са со ка овел, чак ако молинаја амен да или англедер размислинаја башо адава (Проп. 8:16, 17). Ама, ако иси амен доверба ко Јехова, ка џана кола тане амаре ограничувања, хем ка прифатина лен. Шукар ка информирина амен, ка рода совет хем сој најважно, ка молина амен башо водство. Тегани ваљани те кера аѓаар сар со водинела амен е Јеховаскоро духо. (Читин Проповедник 11:4-6.) О Јехова шај те благословинел амаре одлуке или шај те поможинел амен те менина амаре планија (Изр. 16:3, 9).

15. Сар адава со ка размислина башо Јехова ка поможинел аменге те ачхова понизна?

¹⁵ Сар шај те ова повише скромна? Те дикха штар начинија. Прво, амен мора те размислина башо Јехова, хор те размислина башо адава саво Девел тано ов. Кеда спорединаја амен е Јеховаја, хаљоваја кобор сием тикне хем кобор хари џанаја (Иса. 8:13). Ма те бистра кај амен служинаја е Семоќно Девлеске, а на манушеске или ангелеске. Ако размислинаја башо акава, ка поможинел амен те ова понизна „тело силно вас е Девлескоро“ (1. Пет. 5:6).

16. Сар адава со ка размислина башо е Девлескоро мангипе поможинела амен те ова скромна?

¹⁶ Дујто начин сар шај те ова повише скромна тано те размислина башо адава кобор бут мангела амен о Јехова. О Павле спорединѓа о собрание манушикане телоја. О Јехова керѓа секова дело таро тело те овел ле важно улога (1. Кор. 12:23, 24). Исто аѓаар, секова јекх амендар тано важно е Јеховаске. Ов на спорединела амен е јаверенцар хем на чхинавела те мангел амен чак кеда ка грешина. Адава со џанаја кај о Јехова мангела амен керела те осетина амен сигурна.

17. Сави корист ка овел амен кеда родаја те дикха о шукар ко јавера?

¹⁷ Трито, ка ова повише скромна ако дикхаја о шукар ко јавера, сар о Јехова со дикхела. Наместо те трудина амен те привлечина е јаверенгоро внимание ки аменде или те вакера ленге со те керен, амен ваљани те пуча лен башо ленгоро мислење хем те ова спремна те прифатина ленгере предлогија (Изр. 13:10). Ваљани те ова радосна кеда амаре пхраља хем пхења добинена посебна доделбе или задаче. Исто аѓаар, сием бут благодарна е Јеховаске со мукхела сарине те служина леске (1. Пет. 5:9).

18. Сар адава со ка обликујна амари совест поможинела амен те ова повише скромна?

¹⁸ Штарто, ка ова повише скромна кеда користинаја о библиска начелија те обликујна амари совест. Акала начелија сикавена амен сар размислинела хем со осетинела о Јехова. Кеда сикљоваја те дикха ко буќа сар со дикхела о Јехова, шај те ана одлуке коленцар со ка радујна ле. Кеда проучинаја, молинаја амен хем применинаја адава со сикљоваја, амари совест овела пооштро (1. Тим. 1:5). Сикљоваја повише те мислина е јаверенге него аменге. Ако кераја са акава, о Јехова ветинела кај ка поможинел амен те ова повише скромна (1. Пет. 5:10).

19. Со ка поможинел амен те ачхова скромна?

¹⁹ Сетинеа ли тут ко пророко тари Јуда каске со керѓем лафи ко почеток тари акаја статија? Ов нашавѓа пло живото хем пло амалипе е Јеховаја адалеске со на ачхило скромно. Ама, амен шај те ачхова скромна чак кеда тано пхаро те кера адава. О примерија таро бут верна слуге е Јеховаскере сикавена кај шај те кера адава. Кобор повише време служинаја е Јеховаске, добором повише ваљани те потприна амен ки лесте (Изр. 8:13). Бизи разлика саве тане амаре околностија, амен понадари да шај те џа е Јеховаја. Акаја тани најбари предност со шај те овел амен. Адалеске те кера са со шај те ачхова скромна хем те џа е Јеховаја вечно.