1. Соске о време ко кова со живинаја тано посебно?

ЖИВИНАЈА ко јекх чаче посебно време. Сар со сине вакердо ки Библија, о Јехова кхедела буте манушен „таро са о нацие хем племија хем народија хем чхибја“. Ола тане „силно народо“ — повише таро офто милионија бахтале мануша кола со „служинена [е Девлеске] диве хем рат“ (Отк. 7:9, 15; Иса. 60:22). Никогаш англедер на сине добором бут мануша кола со сиклиле те манген е Девле хем пле пашутнен.

2. Саво погрешно мангипе сикавена о мануша со на служинена е Девлеске? (Дикх и слика ко почеток тари статија.)

² Ама, ки Библија пишинела кај ко амаро време е манушен со нане е Девлескере амала ка овел лен погрешно мангипе кова сој тано себично. О апостол Павле пишинѓа кај ко последна диве о мануша „ка манген коркори пес, ка манген о паре“ хем „ка манген о задоволствија, а на е Девле“ (2. Тим. 3:1-4). Акава себично мангипе тано бут појавер таро мангипе башо Девел. Адава со о мануша трудинена пе те исполнинен пле себична целија на керела  лен бахтале, иако ола мислинена кај ка керел лен. Адава керела о свето те овел себично хем пхаро живибаске.

3. Башо со ка кера лафи ки акаја статија, хем соске?

³ О апостол Павле џанља кај са повише мануша ка сикавен себично мангипе хем кај адава ка овел бут опасно е христијаненге. Адалеске ов денѓа ленге совет „те нашен“, или јавере лафенцар те циден пе таро адала со сикавена себично мангипе (2. Тим. 3:5). Ама, нашти целосно те на ава ко контакт асавке манушенцар. Адалеске, сар шај те заштитина амен таро ставија е манушенгере хем те трудина амен те кера е Јеховаскири волја, о Девел е мангипаскоро? Акана ка кера лафи баши разлика со иси машкар о мангипе со о Девел мангела те овел амен хем о мангипе сој пишимо ко 2. Тимотеј 3:2-4. Адава ка поможинел аменге те испитина амен хем те размислина сар шај те сикава о мангипе кова со ка керел амен чаче бахтале хем задоволна.

4. Соске нане погрешно те манга коркори амен?

⁴ О апостол Павле пишинѓа: „О мануша ка манген коркори пес“. Дали акава значинела кај тано погрешно те манга коркори амен? На, адава тано нормално хем ваљани те манга коркори амен. О Јехова керѓа амен аѓаар. О Исус вакерѓа: „Ваљани те манге тле пашутне сар коркори тут“ (Мар. 12:31). Нашти те манга е јавере манушен ако на мангаја коркори амен. И Библија исто аѓаар вакерела аменге: „О рома да ваљани те манген пумаре ромњен сар коркори пес. О ром кова со мангела пле ромња, мангела коркори пес. Соске, никој на мрзинела коркори пес, него аракхела пе хем ценинела пе“ (Еф. 5:28, 29). Таро акава шај те дикха кај ваљани џи негде те манга коркори амен.

5. Сар ка опишине е манушен кола со претерано мангена коркори пес?

⁵ Кеда ко 2. Тимотеј 3:2 керела лафи башо мануша со мангена коркори пес, мислинела пе башо мангипе со нане нормално него себично. Окола со претерано мангена коркори пес, мислинена баши песке повише него со ваљани. (Читин Римјаните 12:3.) Ола повише грижинена пе песке, а на е јаверенге. Кеда о буќа нане те икљон сар со мангле, ола кривинена е јаверен, а на пес. Јекх библиско изучувачи спорединѓа асавке манушен ежоја кова со паќарела пе сар јекх топка, хем адалеа таќарела коркори пес е ковле андруне крзноја, а е јаверенге сикавела само пле оштра боцке. Асавке мануша нане чаче бахтале.

6. Кола шукар резултатија авена таро мангипе башо Девел?

⁶ Несаве библиска изучувачија мислинена кај о Павле најангле спомнинѓа асавко мангипе соске адава мангипе анела џи ко лошна особине со вакерѓа лен пало адава. Спротивно таро адава, о мангипе башо Девел керела те овен амен шукар особине. Асавко мангипе тано поврзимо јавере да особиненцар сар сој и радост, мир, стрпливост,  љубезност, шукарипе, вера, те на хољанел пе сигате хем и самоконтрола (Гал. 5:22, 23). О псалмисти пишинѓа: „Бахтало тано о народо каскоро Девел тано о Јехова!“ (Пс. 144:15). О Јехова тано бахтало Девел, адалеске лескоро народо да тано бахтало. Исто аѓаар, е Јеховаскере слуге тане бахтале соске дена е јаверенге, хем адалеа разликујнена пе таро мануша кола со претерано мангена коркори пес хем мислинена само песке (Дела 20:35).

7. Кола пучиба ка поможинен аменге те проверина кобор мангаја е Девле?

⁷ Сар шај те џана дали почминаја повише те манга коркори амен него е Девле? Размислин башо акава совет: „Ма керен ништо тари холи или тари гордост, него понизно дикхен е јаверен сар побаре тумендар хем ма дикхен само туменге те овел шукар, него исто аѓаар е јаверенге да“ (Фил. 2:3, 4). Шај те пуча амен: „Дали шунава акава совет? Дали трудинава ман те керав адава со мангела о Девел? Дали трудинава ман ко различна начинија те поможинав е јаверенге ко собрание хем ки служба?“ Нане секогаш локхо те трошина амаро време хем сила. Адава ка родел амендар бут те трудина амен хем те жртвујна несаве буќа коленде со уживинаја. Ама, ништо нашти те керел амен побахтале таро адава те џана кај кераја и волја е Најбаре Владетелескири ко универзум!

8. Со керѓе несаве слуге е Девлескере адалеске со мангена ле?

⁸ Адалеске со мангена е Девле хем мангена те служинен леске ки побари мера, несаве слуге е Девлескере откажинѓе пе тари кариера која со шај сине те керел лен бут барвале. Јекх пхен и Ерика, која сој докторка, биринѓа и пионерско служба, а на те напредујнел  ки пли кариера. Ој хем лакоро ром служинѓе ко некобор пхувја. Ој вакерела: „О бут искуствија со сине амен џикоте служинаја сине ки јавер чхиб хем о амалипа со керѓем лен чаче керѓе амаро живото побарвало“. И Ерика панда керела бути сар докторка, ама побаро дело таро време хем сила користинела ле те сикавел е манушен башо Јехова хем те поможинел пле пхраленге хем пхењенге ко собрание. Ој вакерела кај адава анела лаке баро бахталипе хем керела ла задоволно.

9. Соске нане бахтале о мануша со мангена о паре?

⁹ О Павле пишинѓа кај о мануша „ка манген о паре“. Англедер некобор берша, јекх пионери ки Ирска керѓа лафи јекхе манушеа башо Девел. О мануш пхравѓа пло новчанико, икалѓа некобор паре хем вакерѓа: „Акава тано мло девел!“ Иако шај нане те признајнен, бут мануша мислинена аѓаар. Ола мангена о паре хем о буќа со шај те кинен лен. Ама, и Библија предупрединела амен: „Кој мангела о сребро, никогаш нане леске доволно сребро, хем кој мангела о барвалипе, никогаш нане леске доволно о ќари“ (Проп. 5:10). Асавке манушенге никогаш нане доволна о паре. Ола секогаш мангена повише хем цело живото трудинена пе те кхеден кобор со шај повише паре. Адава анела ленге „бут дукха“ (1. Тим. 6:9, 10).

10. Со вакерела и Библија башо барвалипе хем чоролипе?

¹⁰ Точно, сариненге ваљани паре. Ола шај те служинен аменге сар заштита (Проп. 7:12). Ама, шај ли те ова бахтале ако иси амен само о основна буќа? Оја! (Читин Проповедник 5:12.) О Агур, е Јакејескоро чхаво, пишинѓа: „Ма де ман ни чоролипе ни барвалипе. Де ман маро кобор со ваљани манге“. Локхо тано те хаљовел пе соске акава мануш на мангља те овел бут чороло. Ов вакерѓа кај на мангела те овел ко искушение те чорел соске аѓаар ка анел лаџ е Девлеске. Ама, соске на мангља те овел барвало? Ов пишинѓа: „Ако иси ман бут, ка откажинав ман тутар хем ка пхенав: ’Кој тано о Јехова?‘“ (Изр. 30:8, 9). Веројатно пенџареа манушен со иси лен доверба ко ленгоро барвалипе, а на ко Девел.

11. Со вакерѓа о Исус башо паре?

¹¹ Окола со мангена о паре нашти те керен е Девлескири волја. О Исус вакерѓа: „Нијекх нашти те служинел дује господаренге соске или ка мрзинел е јекхе, а ка мангел е јавере, или ка овел пханло е јекхеа, а е јавере нане те мангел. Нашти те служинен е Девлеске хем е барвалипаске“. Исто аѓаар вакерѓа: „Чхинавен те кхеден туменге барвалипе ки пхув, коте со о молцо хем и ’рѓа хана хем коте со чора кхувена хем чорена. Него кхеден туменге барвалипе ко небо, коте со ни о молцо ни и ’рѓа на хана хем коте со ни о чора на кхувена те чорен“ (Мат. 6:19, 20, 24).

12. Сар адава со ка водина едноставно живото ка поможинел аменге те служина е Девлеске? Вакер пример.

¹² Бут слуге е Јеховаскере трудинена пе те водинен едноставно живото. Ола халиле кај аѓаар иси лен повише време те служинен е Јеховаске хем кај тане побахтале. О Џек, кова со живинела ки Америка, бикинѓа пло баро кхер хем пли фирма те шај те служинел сар пионери пле ромњаја. Ов вакерела: „Сине манге пхаро те откажинав ман таро амаро шужо кхер хем таро  бут шужо имот. Ама, тари јавер страна, бершенцар авава манге сине кхере нервиримо таро проблемија со сине ман ки бути. А ми ромни, која сој општо пионери, секогаш сине бут бахтали. Ој вакерела сине: ’Иси ман о најшукар шефи!‘ Акана, ме да сиум општо пионери, хем заедно кераја бути баши исто личност — е Јеховаске“.

13. Со шај те поможинел аменге те испитина амаро стави башо паре?

¹³ Те шај те испитина амаро стави башо паре, ваљани те ова искрена хем те пуча амен: „Дали мло живото сикавела кај чаче верујнава ко адава со вакерела и Библија башо паре? Дали манге најважно те заработинав паре? Дали о материјална буќа манге поважна таро мло амалипе е Јеховаја хем е манушенцар? Дали чаче верујнава кај о Јехова ка дел ман са со ваљани манге?“ Шај те ова сигурна кај ов никогаш нане те разочаринел адален со иси лен доверба ки лесте! (Мат. 6:33).

14. Сар ваљани те дикха ко задоволствија?

¹⁴ И Библија исто аѓаар вакерела кај ко последна диве о мануша „ка манген о задоволствија“. Исто сар со ваљани урамнотежено те дикха ки аменде хем ко паре, исто аѓаар ваљани урамнотежено те дикха хем ко задоволствија. Несаве мануша мислинена кај ваљани те откажина амен таро са о задоволствија, ама о Јехова на мангела адава. И Библија охрабринела е Девлескере верна слуген: „Ха тло маро бахталипаја, хем пи тли мол бахтале вилеа“ (Проп. 9:7).

15. Со значинена о лафија „ка манген о задоволствија“?

¹⁵ Ко 2. Тимотеј 3:4 керела пе лафи манушенге кола со мангена о задоволствија хем о Девел нане ленге важно ко живото. Приметин кај ко акава стихо на вакерела кај о мануша ка манген о задоволствија повише него е Девле. Адава ка значинел кај ола хари мангена е Девле. О стихо вакерела „а на е Девле“. Јекх библиско изучувачи пишинѓа: „Акава [стихо] сигурно на значинела кај ола мангена е Девле џи ки несави мера. Ов значинела кај ола ни најхари на мангена е Девле“. Акава тано сериозно предупредување околенге со мангена о задоволствија. И Библија баши ленде вакерела кај „ленгоро внимание лена... о задоволствија акале животоскере“ (Лука 8:14).

16, 17. Сар дикхела сине о Исус ко задоволствија?

¹⁶ О Исус сикавѓа аменге со значинела урамнотежено те дикха ко задоволствија. Ов сине ко бијав хем ки јекх бари вечера (Јован 2:1-10; Лука 5:29). Ко бијав, на сине лен доволно мол, адалеске о Исус керѓа чудо аѓаар со о пани уло мол. Ки јавер прилика, кеда несаве мануша кривинѓе е Исусе кај превише хала хем пиела, ов бут јасно вакерѓа кај адала мануша на дикхена урамнотежено ко буќа (Лука 7:33-36).

¹⁷ Ама, е Исусеске на сине најважна  о задоволствија. О Јехова сине леске ко прво тхан ко живото хем керела сине са со шај те поможинел е јаверенге. Ов сине спремно те мерел баре дукхенцар ко стубо те шај те спасинел е манушен. О Исус вакерѓа околенге со мангле те џан пали лесте: „Бахтале сиен кеда баши манде вреџинена тумен, прогонинена тумен хем вакерена разна лошна ховавне буќа против туменде. Овен бахтале хем осетинен тумен бут шукар, соске бари тани тумари награда ко небо. Соске аѓаар прогонинена сине е пророкон англедер туменде“ (Мат. 5:11, 12).

18. Кола пучиба ка поможинен аменге те испитина кобор мангаја о задоволствија?

¹⁸ Сар шај те испитина кобор мангаја о задоволствија? Шај те пуча амен: „Дали и забава манге поважно таро состанокија хем тари служба? Дали сиум спремно те жртвујнав несаве буќа коленде со уживинава те шај те служинав е Девлеске? Кеда биринава забава, дали размислинава сар дикхела о Јехова ки адаја забава?“ Адалеске со мангаја е Девле хем мангаја те кера лескири волја, нане доволно само те на кера о буќа со џанаја кај тане погрешна. Исто аѓаар ваљани те пазина те на кера адала буќа со мислинаја кај на мангела лен о Јехова. (Читин Матеј 22:37, 38.)

19. Кола мануша нане чаче бахтале?

¹⁹ Околу 6.000 берша, е Сатанаскоро свето керела о мануша те циден муке. Акана, ко последна диве, и Пхув тани пхерди манушенцар кола со претерано мангена коркори пес, о паре хем о задоволствија. Ола мислинена само ко адава со шај те добинен ле хем ленгере желбе тане најважна ко ленгоро живото. Ама, адала мануша нане чаче бахтале! Тари јавер страна, и Библија вакерела: „Бахтало тано о мануш кас со поможинела о Девел е Јаковескоро, кова со надинела пе ко Јехова, пло Девел“ (Пс. 146:5).

20. Сар о мангипе башо Девел керѓа тут бахтало?

²⁰ Е Јеховаскере слуге чаче мангена ле хем ленгоро број таро берш ко берш бајровела. Акава сикавела кај е Девлескоро Царство владинела хем кај панда хари ка анел берекетија кола со нашти ни те замислина лен аменге! Кеда кераја адава со мангела о Јехова, кераја ле бахтало, а адава керела амен да те ова чаче бахтале. Окола со мангена е Јехова ка овен вечно бахтале! Ки јавер статија ка дикха несаве лошна особине кола со авена таро себично мангипе. Исто аѓаар, ка дикха сар акала особине разликујнена пе таро шукар особине со иси е Јеховаскере слуген.