1, 2. Ки сави опасност тане е Девлескере слуге авдиве? (Дикх о слике ко почеток тари статија.)

БУТ докторија хем медицинска сестре керена бути машкар о мануша со иси лен заразна насвалипа. Ола грижинена пе пумаре пациентенге соске мангена те поможинен ленге. Ама, џикоте керена адава, ваљани те заштитинен пе те на заразинен пе таро насвалипе кова со мангена те сасљарен ле. Амен, е Јеховаскере слуге, аракхљоваја ки слично ситуација. Бут џене амендар живинена хем керена бути манушенцар кола сој „заразиме“ ставенцар хем особиненцар со бут разликујнена пе таро е Девлескере особине. Акава шај те овел аменге опасно.

² Ко акала последна диве, о мануша со на мангена е Девле на поштујнена лескере мерилија башо исправно хем погрешно. О апостол Павле ко пло писмо џи ко Тимотеј пишинѓа ленгере негативна особине. Ов вакерѓа кај о мануша панда повише ка сикавен акала особине сар со ка ава попаше ко крајо акале светоскоро. (Читин 2. Тимотеј 3:1-5, 13.) Иако сием вознемириме таро акала лошна  особине, упри аменде да шај те влијајнел о начин сар о мануша размислинена, керена лафи хем понашинена пе (Изр. 13:20). Ки акаја статија ка дикха кобор бут разликујнена пе акала особине таро особине со сикавена е Девлескере слуге. Исто аѓаар, ка дикха сар шај те заштитина амен те на ова заразиме таро лошна особине џикоте поможинаја е манушенге те пенџарен е Јехова.

3. Коле манушен иси лен о особине сој пишиме ко 2. Тимотеј 3:2-5?

³ О Павле пишинѓа кај „ко последна диве ка овел бут пхаро време“. Одма пало адава, ов вакерѓа 19 негативна особине кола со о мануша ка сикавен лен ко амаро време. Акала особине тане слична е особиненцар со спомнинѓа лен о Павле ко Римјаните 1:29-31. Ама, ко писмо со бичхалѓа ле џи ко Тимотеј користинела лафија кола со нашти те аракхен пе ко нијекх јавер тхан ко Христијанска грчка списија. О Павле почминела е лафенцар: „О мануша ка...“ Ама нане са е манушен о лошна особине со вакерѓа лен о Павле. Е Девлескере слуген иси лен бут појавера особине. (Читин Малахија 3:18.)

4. Со значинела те овел пе гордо?

⁴ О Павле прво вакерѓа кај бут џене ка манген коркори пес хем ка манген о паре, а пало адава кај о мануша ка овен чалмџие, ка икерен пе ко барипе хем ка овен горда. О мануша со иси лен асавке особине бут пути мислинена кај тане пошукар таро јавера адалеске со изглединена шукар, тане способна, барвале или иси лен шукар положба ко општество. Асавке манушенге тано најважно о јавера те фалинен лен. Башо јекх асавко мануш јекх изучувачи пишинѓа: „Ко пло вило иси ле јекх тикно олтари пле сликаја англи која со клајнинела пе“. Несаве мануша вакерѓе кај и гордост тани добором одвратно со чак ни окола сој горда на мангена акаја особина кеда дикхена ла ко јавера.

5. Сар уле горда несаве верна слуге е Девлескере?

⁵ Е Јеховаске тани одвратно и гордост. Ов мрзинела о „јакхја сој горда“ (Изр. 6:16, 17). И гордост на мукхела е манушен те овен паше е Девлеа (Пс. 10:4). Адаја особина иси е Бенге (1. Тим. 3:6). Жално тано адава со чак несаве верна слуге е Јеховаскере уле горда. На пример, о цари о Осија тари Јуда бут берша сине верно слуга е Девлеске. Ама, ки Библија пишинела: „Кеда уло силно, лескоро вило добором уло гордо со коркори песке керѓа лошнипе хем на ачхило верно е Јеховаске, пле Девлеске“. О Осија кхувѓа ко храми хем тхарѓа темјани, а адава на сине ле право те керел. О цари о Езекија исто аѓаар несаво време сине гордо (2. Лет. 26:16; 32:25, 26).

6. Соске шај сине о Давид те овел гордо, ама со поможинѓа леске те ачховел понизно?

⁶ Несаве мануша овена горда соске тане шуже, пенџарде, талентириме баши музика, силна или адалеске со о јавера фалинена лен. Е Давиде сине ле са акала буќа, ама ачхило понизно цело пло живото. На пример, откеда мударѓа е Голијате, о Саул вакерѓа е Давидеске кај ка дел ле пле чхаја ромњаке. Ама, о Давид вакерѓа: „Кој сиум ме хем кој тани мли фамилија, ме дадескоро кхер ко Израел, па ме те овав е царескоро џамутро?“ (1. Сам. 18:18). Со поможинѓа е Давидеске те ачховел понизно? Ов џанља кај секоја особина,  способност или положба иси ле, соске о Девел сине понизно хем сикавѓа леске внимание (Пс. 113:5-8). О Давид џанља кај секоја шукар бути добинѓа ла таро Јехова. (Споредин 1. Коринќаните 4:7.)

7. Со ка поможинел аменге те сикава понизност?

⁷ Слично сар о Давид, е Јеховаскере слуге авдиве трудинена пе те овен понизна. Пхерела амаре виле адава со џанаја кај о Јехова, о Најбаро ко цело универзум, тано понизно (Пс. 18:35). Мангаја те применина акала лафија: „Сикавен сочувство хем мангипе, љубезност, понизност, ачховен смириме хем овен стрплива“ (Кол. 3:12). Исто аѓаар џанаја кај о мангипе „на фалинела пе, на ваздела пе“ (1. Кор. 13:4). Кеда о јавера ка дикхен кај сием понизна, шај ола да ка манген те пенџарен е Јехова. Исто сар со јекх ром шај те овел поттикнимо те служинел е Јеховаске адалеске со лескири ромни понашинела пе шукар, аѓаар о мануша да шај те овен поттикниме те служинен е Девлеске адалеске со лескере слуге тане понизна (1. Пет. 3:1).

8. а) Сар дикхена авдиве несаве мануша ко адава кеда о чхаве на шунена пле родителен? б) Со вакерела и Библија е чхавенге те керен?

⁸ О Павле вакерѓа сар ка понашинен пе о мануша јекх јекхеа ко последна диве. Ов пишинѓа кај о чхаве нане те шунен пле родителен. Авдиве бут лила, филмија хем емисие ки телевизија керена те дикхјол нормално па чак шукар кеда о чхаве нане послушна пле родителенге. Ама, акаја особина керела и фамилија те на овел стабилно хем адава лошно влијајнела упро цело општество. О мануша одамна џанена акава. На пример, ко пурано време ки Грција, окова со ка кхувел сине пле родителен нашавела сине пле правија ко општество. Спрема о римско закони, ако јекх мануш кхувела сине пле даде, овела сине казнимо сар некој со мударѓа некас. Хем о Хебрејска хем о Грчка списија поттикнинена е чхавен те поштујнен пумаре родителен (2. Мој. 20:12; Еф. 6:1-3).

9. Со шај те поможинел е чхавенге те шунен пле родителен?

⁹ Со шај те поможинел е чхавенге те шунен пле родителен иако о јавера сој узи ленде на керена адава? Кеда о чхаве ка размислинен башо са о шукар буќа со керѓе ленге о родителија, ваљани те овен благодарна хем те манген те шунен лен. О чхаве исто аѓаар ваљани те хаљовен кај о Девел, кова сој тано Дад сариненге, аџикерела лендар те шунен пле родителен. Адалеа со ка вакерен шукар буќа башо пле родителија, о чхаве поможинена пумаре амаленге повише те поштујнен пумаре родителен. Џанѓола пе, ако о родителија на мангена пле фамилија, е чхавенге шај те овел попхаро те шунен лен. Тари јавер страна, кеда јекх чхаво ка дикхел кај лескере родителија чаче мангена ле, адава ка поможинел леске те шунел лен чак кеда леске пхаро те  керел адава. Јекх терно пхрал, со викинела пе Остин вакерела: „Иако бут пути мангава сине те керав нешто погрешно, мле родителија чхивена манге сине разумна правилија, објаснинена сине манге соске керена адава хем секогаш сине спремна те керен манцар лафи. Акава поможинѓа манге те шунав лен. Адалеске со дикхава сине кај грижинена пе манге, мангава сине те керав лен бахтале“.

10, 11. а) Кола лошна особине сикавена кај е манушен нане лен мангипе јекх јекхеске? б) Кобор бут мангена о чачутне христијања е јавере манушен?

¹⁰ О Павле вакерѓа јавера да особине кола со сикавена кај е манушен нане лен мангипе јекх јекхеске. Откеда вакерѓа кај о чхаве „нане те шунен пле родителен“, пхенѓа кај о мануша нане те овен благодарна. Акава иси ле смисла соске о мануша со нане благодарна на ценинена о шукар буќа со керена ленге о јавера. О Павле исто аѓаар вакерѓа кај о мануша нане те овен верна. Ола нане те овен спремна башо било саво договор, со значинела кај нане те манген те овен ко мир е јаверенцар. О мануша ка овен хулителија хем предавникија, ка вакерен груба хем лошна лафија башо мануша, па чак башо Девел. Исто аѓаар, ка овен ифтираџие кола со ка вакерен штетна ховајба те шај те мељарен е јаверенгоро анав. * (Дикх и фуснота.)

¹¹ Е Јеховаскере слуге тане појавер таро бут мануша авдиве ко свето, соске ола сикавена чачутно мангипе е јаверенге. Акава секогаш сине аѓаар. О Исус вакерѓа кај ко закони е Мојсејескоро само и заповед те манга е Девле тани поважно тари заповед те манга е јавере манушен (Мат. 22:37-39). Ов исто аѓаар вакерѓа кај о чачутне христијања ка овен пенџарде пало мангипе со ка сикавен јекх јекхеске. (Читин Јован 13:34, 35.) Ола ка манген чак пле душманен (Мат. 5:43, 44).

12. Сар сикавѓа о Исус мангипе е јаверенге?

¹² О Исус сикавѓа кај чаче мангела е манушен. Ов џала сине тари диз ки диз те шај те вакерел е манушенге о шукар хабери башо е Девлескоро Царство. Сасљарѓа околен со сине короле, сакатија, лепрозна хем кашуке. Исто аѓаар воскреснинѓа мулен (Лука 7:22). О Исус чак денѓа пло живото те шај те спасинел е манушен, иако бут џене мрзинена ле сине. Ов совршено сикавѓа о мангипе пле Дадескоро. Авдиве, е Јеховаскере сведокија ко цело свето џана пало пример е Исусескоро хем сикавена мангипе јаверенге.

13. Сар шај о мангипе со сикаваја е јаверенге те поттикнинел лен те манген те овен паше е Јеховаја?

¹³ Ако сикаваја е манушенге кај мангаја лен, адава шај те поттикнинел лен те манген те овен паше амаре Дадеа. На пример, јекх мануш таро Тајланд гело ко јекх регионално конгрес хем сине воодушевимо кеда дикхља кај о пхраља хем о пхења сикавена мангипе јекх јекхеске. Откеда гело песке кхере, родинѓа некој таро е Јеховаскере сведокија те проучинел леа и Библија дуј пути ко курко. Пало адава проповединела сине пле цело фамилијаке. Пало само шов масек, акава мануш прво пути сине ле читибе тари Библија ки дворана. Дали амен да сикаваја мангипе е јаверенге? Пуч тут: „Дали керава са те шај те поможинав е јаверенге ки мли фамилија, ко собрание  хем кеда сиум ки служба? Дали трудинава ман те дикхав ко јавера сар со дикхела о Јехова?“

14, 15. Саве лошна особине сикавена бут џене, ама саве промене керѓе несаве мануша?

¹⁴ Ко последна диве, е манушен иси лен јавера да лошна особине со ваљани те избегина лен. Бут џене на мангена о шукарипе. Ола мрзинена адава сој шукар хем противинена пе леске. Асавке манушен нане лен самоконтрола хем тане сурова. Несаве тане иначие. Ола керена о буќа бизо те размислинен хем на секиринена пе сар ленгере постапке ка влијајнен упро јавера.

¹⁵ Бут џене кола со англедер сине лен особине сар е опасна животненгере менинѓе пли личност. Асавке баре промене сине пророкујме ки Библија. (Читин Исаија 11:6, 7.) Ки лате читинаја башо дива животне, сар сој о рува хем о лавија кола со живинена ко мир кхерутне животненцар, сар сој о бакхре хем о телција. Соске иси лен мир? О пророштво вакерела: „И пхув ка овел пхерди пенџарибаја башо Јехова“ (Иса. 11:9). О животне нашти те сикљовен башо Јехова. Адалеске, ки симболично смисла акава пророштво керела лафи башо промене со ка керен о мануша ки пли личност.

16. Сар и Библија поможинѓа несаве манушенге те менинен пе?

¹⁶ Бут џене таро амаре пхраља хем пхења англедер сине сурова сар рува, ама акана тане кротка. Шај те читине несаве таро ленгере искуствија ки рубрика „И Библија шај те менинел амаро живото“ која со аракхљовела ки jw.org. Окола со пенџарена е Јехова  хем служинена леске нане сар окола со ка сикавен пе сар асавке со дарана таро Девел, ама нане те живинен аѓаар. Асавке мануша керена пе кај служинена е Девлеске, ама пле понашибаја сикавена кај нане аѓаар. Ама, несаве слуге е Јеховаскере, кола со англедер понашинена пе сине грубо, акана уравѓе и „неви личност која сој керди спрема е Девлескири волја ки чачутни праведност хем верност“ (Еф. 4:23, 24). Кеда о мануша сикљовена башо Девел, хаљовена кај ваљани те поштујнен лескере мерилија. Акава поможинела ленге те променинен пле верувања, ставија хем адава со керена. Нане локхо те керен пе асавке промене, ама е Девлескоро духо ка поможинел околенге со мангена те керен лескири волја.

17. Сар шај те пазина те на влијајнен упри аменде е јаверенгере лошна особине?

¹⁷ Са полокхе шај те дикхел пе и разлика машкар окола со служинена е Девлеске хем окола со на служинена леске. Ваљани те пазина те на мукха о лошна особине е јаверенгере те влијајнен упри аменде. Мангаја те шуна о совет со дела амен о Јехова те наша асавкендар со иси лен о особине сој пишиме ко 2. Тимотеј 3:2-5. Џанѓола пе, нашти те наша саринендар со иси лен лошна особине. Шај ваљани те кера бути ленцар, те џа ки школа или те живина ленцар. Ама, на ваљани те размислина или те понашина амен сар ленде. Со шај те поможинел аменге? Ваљани те кера позорало амаро амалипе е Јеховаја аѓаар со ка проучина и Библија хем ка бирина аменге амала со мангена ле.

18. Сар амаре лафенцар хем понашибаја шај те поможина е јаверенге те манген те пенџарен е Јехова?

¹⁸ Амен исто аѓаар мангаја те поможина е јаверенге те сикљовен башо Јехова. Адалеске, роде прилике те проповедине хем молин е Јехова те вакере о исправна лафија ко исправно време. Ваљани о јавера те џанен кај сием е Јеховаскере сведокија. Аѓаар, амаре шукар понашибаја ка фалина е Јехова, а на коркори амен. О Девел преку пло лафи сикавела амен „те откажина амен таро са адава со нане спрема е Девлескири волја хем таро желбе е светоскере хем те живина мудро, праведно хем те ова верна е Девлеске машкар акава авдисутно свето“ (Тит 2:11-14). Ако џаја пало пример е Јеховаскоро хем кераја адава со мангела те кера, о јавера ка дикхен адава. Несаве шај чак те вакерен: „Ка џа туменцар, соске шунѓем кај о Девел тано туменцар“ (Зах. 8:23).