1, 2. Сар сикавела о Јехова кај тано дарежливо?

О ЈЕХОВА тано дарежливо Девел. Са со иси амен авела лестар. Лескоро тано са о злато, о сребро хем о природна ресурсија ки Пхув кола со користинела лен те одржинел о живото (Пс. 104:13-15; Агеј 2:8). Тари Библија дикхаја кај о Јехова понекогаш користинѓа акала скапоцена буќа те керел чудија те шај те поможинел пле слугенге.

² На пример, о Јехова 40 берш денѓа мана хем пани е Израелцонге џикоте живинена сине ки пустина (2. Мој. 16:35). Адалеске, сине лен са со ваљани ленге (Неем. 9:20, 21). Пало несаво време, о Јехова денѓа сила е пророкоске е Елисејеске те керел чудо аѓаар со керѓа те овел повише зејтини јекхе удовица. Акава поклон таро Девел поможинѓа лаке те платинел пле борчија хем те ачховен ла доволно паре те шај те живинен ој хем лакере чхаве (2. Цар. 4:1-7). Исто аѓаар, о Јехова поможинѓа е Исусеске те керел чудо те шај те овел хајбаске, па чак паре кеда ваљани сине (Мат. 15:35-38; 17:27).

3. Со ка дикха ки акаја статија?

 ³ О Јехова шај те користинел са со мангела те шај те поддржинел адава со створинѓа. Ама, ов охрабринела пле слуген те користинен пумаре материјална средствија те шај те поддржинен о чачутно обожавање. (2. Мој. 36:3-7; читин Изреки 3:9.) Соске о Јехова аџикерела амендар те да ле таро амаре материјална средствија? Сар о верна слуге е Јеховаскере таро пурано време поддржинена сине финансиски о чачутно обожавање? Сар е Девлескири организација користинела о доброволна прилогија ко амаро време? О одговорија башо акала пучиба ка дикха лен ки акаја статија.

4. Со сикаваја е Јеховаске кеда поддржинаја о чачутно обожавање?

⁴ Амен даја е Јеховаске адалеске со мангаја ле хем ценинаја ле. Кеда размислинаја башо са со керела аменге о Јехова, пхерѓола амаро вило. О Давид да осетинѓа пе аѓаар кеда објаснинѓа кола буќа ка ваљанен те шај те градинел пе о храми. Ов вакерѓа кај са со иси амен авела таро Јехова хем кај са со даја е Јеховаске ов више англедер денѓа аменге. (Читин 1. Летописи 29:11-14.)

5. Сар и Библија сикавела кај о несебично дејбе тано важно дело таро чачутно обожавање?

⁵ Исто аѓаар, даја е Јеховаске соске адава тано јекх начин сар обожавинаја ле. Ки јекх визија, о апостол Јован шунѓа сар е Јеховаскере слуге ко небо вакерена: „Моќно Јехова, ту сиан амаро Девел хем заслужинеа сарине те славинен тут хем те сикавен туке чест, соске ту керѓан са о буќа, хем ола постојнена соске ту аѓаар мангљан“ (Отк. 4:11). Сигурно, о Јехова заслужинела са и слава хем и чест, адалеске мангаја те да леске амаро најшукар. Преку о Мојсеј, о Јехова денѓа заповед е Израелцонге те икерен трин празникија ко берш. Јекх начин сар славинена сине е Јехова ко акала прилике сине аѓаар со анена сине материјална буќа. Ко акала празникија о Израелција на ваљани сине те авен „англо Јехова чуче вастенцар“ (5. Мој. 16:16). Слично тано авдиве да, важно дело таро обожавање тано кеда даја несебично е Јеховаске таро амаре материјална средствија. Аѓаар ка сикава кај сием благодарна хем кај поддржинаја адава со керела лескири организација.

6. Соске тано амаре шукарипаске те да? (Дикх и слика ко почеток тари статија.)

⁶ Амаре шукарипаске тано дарежливо те да, а на само те добина. (Читин Изреки 29:21.) Замислин туке сар јекх тикно чхаво кова со добинела паре таро пле родителија користинела дело таро адала паре те кинел поклон пле родителенге. Сар ка осетинен пе о родителија башо акава поклон? Или, замислин сар јекх терно пионери со живинела пле родителенцар дела лен паре те шај те платинен и кирија или те кинен хајбаске. Шај о родителија на очекујнена лестар акава, ама прифатинена о поклон. Соске? Соске аѓаар сикавела кај тано благодарно башо са со керена леске. Слично, о Јехова џанела  кај амаре шукарипаске тано те да ле таро амаре материјална средствија.

7, 8. Сар е Јеховаскоро народо ко библиско време денѓа шукар пример адалеа со денѓа прилогија а) баши посебно цел? б) те шај те поддржинен о чачутно обожавање?

⁷ Тари Библија џанаја кај е Јеховаскере слуге дена сине прилогија те шај те поддржинен о чачутно обожавање. Понекогаш дена сине баши посебно цел. На пример, о Мојсеј охрабринѓа е Израелцон те ден прилог те шај те градинел пе о свето шатори. Пало несаво време, о Давид керѓа о исто те шај те градинел пе о храми (2. Мој. 35:5; 1. Лет. 29:5-9). Џикоте владинела сине о цари о Јоас, о свештеникија поправинѓе о храми аѓаар со користинѓе о паре кола со о мануша денѓе лен (2. Цар. 12:4, 5). Ко прво веко, о христијања шунѓе кај ки Јудеја иси бокхалипе хем кај е пхраленге адари ваљани помош. Адалеске, секова христијани спрема пле околностија одлучинѓа те бичхалел помош е пхраленге (Дела 11:27-30).

⁸ Е Јеховаскере слуге исто аѓаар дена сине материјално помош околенге со предводинена сине ко чачутно обожавање. На пример, спрема е Мојсејескоро закони, о левитија на добинѓе наследство сар о јавера племија. Адалеске о Израелција ваљани сине редовно те ден прилогија, хем аѓаар о левитија шај сине те концентриринен пе ки служба ко свето шатори (4. Мој. 18:21). Ко слично начин, несаве дарежлива џувља користинена сине адава со сине лен те шај те поддржинен е Исусе хем лескере апостолен (Лука 8:1-3).

9. Сар е Девлескере слуге ко пурано време дена сине прилогија?

⁹ Е Девлескере слуге ко пурано време дена сине прилогија ко различна начинија. О Израелција со денѓе прилог те шај те градинел пе о свето шатори шај денѓе о скапоцена буќа со анѓе лен таро Египет (2. Мој. 3:21, 22; 35:22-24). Ко прво веко, несаве христијања бикинѓе пумаре буќа, сар на пример ниве или кхера, хем денѓе о паре е апостоленге. А пало адава о апостолија користинѓе акала паре те шај те поможинен е пхраленге хем е пхењенге каске со ваљани сине помош (Дела 4:34, 35). Јавера христијања редовно чхивена сине паре ки страна те шај те поддржинен о чачутно обожавање (1. Кор. 16:2). Аѓаар, сарине шај сине те ден нешто — хем окола со сине бут барвале хем окола со сине бут чороле (Лука 21:1-4).

10, 11. а) Сар шај те џа пало пример е Јеховаскере слугенгоро таро библиско време? б) Сар дикхеа ки прилика те поддржине адава со керела е Јеховаскири организација?

¹⁰ Авдиве да шај ка ваљани те да прилогија баши несави посебно цел. Шај тло собрание планиринела те реновиринел и дворана или те градинел неви. Шај ваљани те реновиринел пе и подружница ки тли пхув, те платинел пе  о тхан коте со икерела пе о конгрес, или те поможинел пе е пхраленге со доживинѓе природно катастрофа. Исто аѓаар, амаре доброволна прилогонцар поддржинаја е мисионерен, е специјална пионерен, е покраинско надгледникон хем околен со керена бути ко главно седиште хем ко подружнице ко цело свето. Тло собрание шај редовно бичхалела прилогија те шај те градинен пе конгресна сале хем дворане амаре пхраленге ко јавера тхана ко свето.

¹¹ Секој амендар шај те дел нешто те шај те поддржинел адава со керела е Јеховаскири организација ко акала последна диве. Повише прилогија тане анонимна. Кеда чхиваја паре ко кутие башо прилогија ки дворана или даја прилог преку интернет-страница jw.org, на вакераја е јаверенге кобор денѓем. Ама, шај мислинаја аменге кај амаре прилогија тане бут тикне хем кај на врединена. Побаро дело таро материјална средствија со добинела лен и организација авена таро тикне прилогија, а на таро некобор побаре прилогија. Чак амаре пхрален со иси лен бут хари паре џана пало пример со денѓе о христијања ко прво веко тари Македонија. Ола сине бут чороле, ама молинѓе те мукхен лен те ден прилог хем пало адава денѓе дарежливо (2. Кор. 8:1-4).

12. Со керела амари организација те шај те користинен пе о прилогија ко најшукар начин?

¹² О Водечко тело тано верно хем разборито кеда одлучинела сар те користинен пе о прилогија (Мат. 24:45). О пхраља сој ко Водечко тело молинена пе те анен шукар одлуке хем пало адава шукар планиринена сар те користинен о паре (Лука 14:28). Ко библиско време, о верна мурша со грижинена пе сине башо прилогија пазинена сине те користинен лен само башо чачутно обожавање. На пример, о Езра иранѓа пе ко Ерусалим скапоцена буќенцар со добинѓа лен сар прилог таро персиско цари — злато, сребро хем јавера вредна буќа со авдиве би врединена сине повише таро 80 милионија еврија. О Езра ко акала прилогија дикхела сине сар поклон башо Јехова. Адалеске денѓа конкретна упатствија те шај те заштитинен лен џикоте накхавена лен сине таро опасна тхана (Езра 8:24-34). Бут берша пало адава, о апостол Павле кхединѓа паре те поможинел е чороле пхраленге ки Јудеја. Ов организиринѓа окола со ингарена сине о паре те керен са „чесно, на само англо Јехова него англо мануша да“. (Читин 2. Коринќаните 8:18-21.) Авдиве, амари организација џала пало пример со денѓе о Езра хем о Павле аѓаар со бут пазинела сар користинела о прилогија.

13. Соске ко последно време и организација керѓа несаве промене?

¹³ Јекх фамилија шај ка менинел о начин сар користинела о паре те шај те на трошинел повише таро адава со заработинела. Или шај те размислинел сар те керел поедноставно пло живото те шај те служинел ки побари мера е Јеховаске. Исто акава важинела е Јеховаскере организацијаке. О последна берша почминѓе пе бут неве проектија хем несаво време сине повише трошако него прилогија. Адалеске, и организација, исто сар јекх фамилија, родела начинија сар шај те штединен пе паре хем те завршинел пе и бути поедноставно, те шај о прилогија те користинен пе ко најшукар начин.

14-16. а) Башо со користинена пе тле прилогија? б) Сар користинѓе туке акала духовна поклонија?

¹⁴ Бут џене со бершенцар служинена е Јеховаске вакерена кај авдиве тари организација добинаја повише поклонија таро било кеда англедер. Акана иси амен и интернет-страница jw.org хем и интернет-телевизија JW Broadcasting. Иси амен о Превод Нов свет ко бут чхибја. Ко 2014/2015 берш, о меѓународно конгрес „Роден најангле е Девлескоро Царство!“ икерѓа пе ко несаве таро најбаре стадионија ко 14 дизја ко цело свето. Сарине со сине присутна сине бут бахтале!

¹⁵ Бут пхраља хем пхења тане благодарна башо акала поклонија тари е Јеховаскири организација. На пример, јекх брачно пари со служинела ки Азија пишинѓа: „Амен служинаја ки тикни диз. Адалеске, понекогаш осетинаја амен изолириме хем бистраја кај о чачутно обожавање керела пе ко цело свето. Ама, кеда дикхаја о емисие таро JW Broadcasting, сетинаја амен кај сием дело таро пхралипе сој ко цело свето. О пхраља хем о пхења таро амаро тхан тане бут бахтале со иси амен о JW Broadcasting. Бут пути откеда ка дикхен е масекоскири емисија шунаја лен сар вакерена кај осетинена пе попаше е пхраленцар таро Водечко тело. Акана, таро било кеда англедер, ола дичинена пе сој тане дело тари е Девлескири организација“.

¹⁶ Авдиве, ко цело свето градинена пе или реновиринена пе паше 2.500 дворане. О пхраља таро јекх собрание ко Хондурас вакерѓе кај поангле сонинена сине те овел лен ленгири дворана, ама акана ленгоро суно уло чаче. Ола пишинѓе: „Бут сием бахтале со сием дело тари е Јеховаскири фамилија хем со иси амен пхралипе сој ко цело свето“. Бут џене осетинѓе пе слично кеда добинѓе и Библија или јавера публикацие ки пли чхиб, кеда о пхраља хем о пхења поможинѓе ленге пали  несави природно катастрофа, или кеда дикхле о шукар резултатија таро проповедибе ко прометна тхана ко ленгоро подрачје.

17. Котар џанаја кај о Јехова поддржинела пли организација авдиве?

¹⁷ Бут џене со нане е Јеховаскере сведокија нашти те хаљовен сар шај те кера са акала буќа само таро доброволна прилогија. Откеда јекх директори тари јекх бари фирма посетинѓа јекх таро амаре печатнице, ов сине воодушевимо кеда дикхља кај доброволција керена са и бути хем са адава керела пе доброволно прилогонцар хем бизо те организиринел пе несаво настан те шај те кхедел пе паре. Ов вакерѓа кај адава со кераја тано чаче чудо. Амен да мислинаја аѓаар! Џанаја кај са акава шај те кера адалеске со о Јехова поможинела аменге (Јов 42:2).

18. а) Кола берекетија иси амен кеда поддржинаја адава со керела е Јеховаскири организација? б) Сар шај те сикава амаре чхавен хем е невен те керен адава?

¹⁸ О Јехова сикавела аменге чест адалеа со дела аменге прилика те поддржина адава со керела лескири организација. Ов уверинела амен кај ка дел амен берекетија ако кераја адава (Мал. 3:10). О Јехова ветинела кај ако сием дарежлива, секогаш ка овел амен адава со ваљани аменге. (Читин Изреки 11:24, 25.) Исто аѓаар, таро е Девлескоро лафи џанаја кај „повише иси бахталипе кеда дела пе него кеда лела пе“ (Дела 20:35). Амаре лафенцар хем адалеа со кераја шај те сикава амаре чхавенге хем е невенге ки организација сар шај те поддржинен о чачутно обожавање хем те овен лен бут берекетија.

19. Ко со поттикнинѓа тут акаја статија?

¹⁹ Са со иси амен денѓа амен о Јехова. Кеда амен да даја ле нешто, сикаваја кај мангаја ле хем ценинаја са адава со керѓа аменге (1. Лет. 29:17). Кеда о Израелција денѓе прилогија те градинел пе о храми ола сине бахтале башо адава со денѓе е Јеховаске доброволно хем таро вило (1. Лет. 29:9). Понадари да те ова бахтале џикоте даја е Јеховаске таро адава со денѓа аменге ов.