1-2. а) Сар влијајнѓе о лафија таро Исаија 41:10 упри јекх пхен со викинела пе Јошико? б) Каске шај те користинен о лафија таро акава стихо?

И ДОКТОРКА вакерѓа јекх лошно хабери јекхе верно пхењаке со викинела пе Јошико. Ој вакерѓа лаке кај ачхило ла само панда некобор масекија живото. Сар реагиринѓа и Јошико? Ој сетинѓа пе ко јекх омилено библиско стихо, Исаија 41:10. (Читин.) А пало адава ко јекх смиримо начин вакерѓа е докторкаке кај на дарала соске о Јехова астарела ла таро вас. * О утешна лафија таро акава стихо поможинѓе амаре мангле пхењаке те сикавел целосно доверба ко Јехова. Акава стихо шај аменге да те поможинел те ачхова смириме кеда аракхљоваја ко пхаре ситуацие. Те шај те хаљова сар шај те поможинел аменге, најангле те дикха соске о Девел вакерѓа акала лафија е Исаијаске.

² О Јехова поттикнинѓа е Исаија те пишинел акала лафија те шај те утешинел е Евреен кола со пало несаво време сине ингарде ко ропство ко Вавилон. Ама, о Девел керѓа акала лафија те ачховен те шај лендар те овел лен корист на само о Евреија него исто аѓаар са лескере слуге со живинѓе оттегани па са џи авдиве (Иса. 40:8; Рим. 15:4). Адалеске со живинаја ко „бут пхаро време“, авдиве — повише таро било кеда англедер — ваљанена аменге о охрабрувачка  лафија сој пишиме ко лил Исаија (2. Тим. 3:1).

3. а) Кола ветувања тане пишиме ко Исаија 41:10, кова сој биримо те овел е бершескоро стихо башо 2019 берш? б) Соске ваљанена аменге акала ветувања?

³ Ки акаја статија ка дикха трин ветувања со денѓа лен о Јехова кола со шај те керен амари вера те овел позорали, а пишиме тане ко Исаија 41:10: 1) о Јехова ка овел аменцар, 2) ов тано амаро Девел хем 3) ов ка поможинел аменге. Акала ветувања * ваљанена аменге соске слично сар и Јошико, секова јекх амендар аракхљовела ко пхаре ситуацие. Освен адава, осетинаја пхарипе адалеске со овена лошна буќа ко свето. А несаве трпинена прогонство таро моќна владе. Те дикха акала трин ветувања јекх по јекх.

4. а) Кова тано о прво ветување башо со ка кера лафи? (Дикх хем и фуснота.) б) Коле лафенцар о Јехова вакерѓа пле чувствија спрема аменде? в) Сар влијајнела упри туте адава со вакерѓа о Девел?

⁴ О Јехова најангле утешинела амен е лафенцар: „Ма дара, соске ме сиум туја!“ * Ов сикавела кај тано аменцар адалеа со сикавела аменге целосно внимание хем баро мангипе. Приметин коле лафенцар о Девел вакерѓа пле нежна хем хор чувствија спрема аменде. О Јехова вакерѓа: „Ту сиан манге скапоцено, сикавди туке чест хем ме мангава тут“ (Иса. 43:4). На постојнела ништо ко универзум со шај те керел о Јехова те чхинавел те мангел пле слуген; ов никогаш нане те мукхел лен (Иса. 54:10). Лескоро мангипе хем амалипе дена амен бари храброст. Ов ка аракхел амен авдиве, исто сар со аракхља пле амале е Авраме (Аврааме). О Јехова вакерѓа леске: „Ма дара, Аврам. Ме ка аракхав тут“ (1. Мој. 15:1).

5-6. а) Соске сием увериме кај о Јехова мангела те поможинел аменге те икљова ко крајо е проблеменцар? б) Со шај те сикљова тари Јошико?

⁵ Увериме сием кај о Јехова мангела те поможинел аменге те икљова ко крајо е проблеменцар, соске ов ветинѓа пле народоске акава: „Ако накхеа таро пања, ме ка  овав туја. Ако накхеа таро реке, ола нане те поплавинен тут. Ако накхеа тари јаг, нане те тхабљове хем пламено нане те тхарел тут“ (Иса. 43:2). Со значинена акала лафија?

⁶ О Јехова на ветинела аменге кај ка цидел о неволје со керена амаро живото попхаро, ама ов нане те мукхел о „реке“ таро проблемија те поплавинен амен, или о „пламено“ таро испитија те керел аменге трајно штета. Ов уверинела амен кај ка овел аменцар хем ка дел аменге сила те накха таро пхарипа со ка овен амен. Со ка керел о Јехова? Ов ка поможинел аменге те победина и дар те шај те ачхова леске верна, чак ако џанаја кај шај те мера (Иса. 41:13). И Јошико, која со сине спомними ко почеток тари статија, уверинѓа пе ко адава. И чхај лакири вакерела: „Сием сине воодушевиме таро адава кобор ми дај сине смирими. Чаче дикхлем сар о Јехова дела ла андруно мир. Џи ко последно диве таро пло живото керела сине лафи е медицинско сестраја хем е пациентенцар башо Јехова хем башо лескере ветувања“. Со сикљоваја тари Јошико? Ако иси амен доверба ко е Девлескоро ветување кај ка овел аменцар, амен да шај те ова силна хем храбра џикоте трпинаја неволје.

7-8. а) Кова тано о дујто ветување со денѓа о Јехова, хем со значинела? б) Соске о Јехова вакерѓа е Евреенге те на овен секириме? в) Кола лафија таро Исаија 46:3, 4 сигурно охрабринѓе е Девлескере народо?

⁷ Дикх о дујто ветување со пишинѓа о Исаија: „Ма ов секиримо, соске ме сиум тло Девел“. Со значинена акала лафија? Ки оригинално чхиб, е лафенцар сој преведиме сар „ов секиримо“ мислинела пе ки некасте со дикхела пле стране адалеске со дарала некастар или тари несави опасност.

⁸ Соске о Јехова вакерѓа е Евреенге кола со пало несаво време геле ко ропство ко Вавилон те на овен секириме? Адалеске со ов џанља кај о мануша тари адаја пхув ка даран. Таро со? Ко крајо таро е Евреенгоро ропство кова со трајнѓа 70 берша, о Вавилон ка овел сине нападимо тари силно медо-персиско војска. О Јехова мангља те користинел акале војска те шај те ослободинел пле народо таро Вавилон (Иса. 41:2-4). Кеда о Вавилонција хем о јавера народија ко адава време шунѓе кај о душмани авела попаше, ола пробинѓе те охрабринен јекх јекхе е лафенцар: „Ов силно“. Исто аѓаар, почминѓе те керен панда повише идолија соске надинена пе сине кај ола ка аракхен лен (Иса. 41:5-7). Џи тегани, о Јехова утешинѓа е Евреен акале лафенцар: „А ту Израел [а на о јавера народија] сиан мло слуга... Ма ов секиримо, соске ме сиум тло Девел“ (Иса. 41:8-10). Приметин кај о Јехова вакерѓа: „Ме сиум тло Девел“. Акале лафенцар ов уверинѓа пле верна слуген кај на бистерѓа лен — ов панда сине ленгоро Девел, а ола панда сине лескоро народо. Ов вакерѓа ленге: „Ка ингарав тумен... хем ка спасинав тумен“. Акала утешна лафија сигурно бут охрабринѓе е Евреен. (Читин Исаија 46:3, 4.)

9-10. Соске на ваљани те дара? Вакер споредба.

⁹ Авдиве, повише таро било кеда англедер, о мануша тане секириме соске о условија ко свето овена са полошна. Џанѓола пе, амен да доживинаја иста проблемија. Ама, на ваљани те дара. О Јехова вакерела аменге: „Ме сиум тло Девел“. Соске акала лафија тане силно причина те ачхова смириме?

¹⁰ Размислин баши акаја споредба: Дуј џене, о Дениси хем о Роберти, тане ко авиони кова со тинанела тари силно бавлал. Џикоте о авиони џала упре-теле, о пилоти вакерела сариненге ко авиони: „Молинаја  тумен, ма пхравен о појасија. Несаво време ка овен турбуленцие“. О Дениси бут тано вознемиримо. Ама, тегани о пилоти вакерела: „Керела туменцар лафи о пилоти. Иси ман контрола упро авиони, адалеске ма секиринен тумен“. О Дениси вакерела: „Е, акана ептен утешинѓан амен!“ Ама, ов приметинела кај о Роберти на секиринела пе. Адалеске пучела ле: „Сар шај те ове добором смиримо?“ О Роберти асала хем вакерела леске: „Пенџарава е пилоте бут шукар. Ов тано мо дад. Ако џанеа кобор шукар пилоти тано ов, ту да нане те дара. Те вакерав туке нешто баши лесте...“

11. Со сикљоваја тари споредба башо дуј мануша сој ко авиони?

¹¹ Со сикљоваја тари акаја споредба? Исто сар о Роберти, амен да сием смириме соске бут шукар пенџараја амаре Даде сој ко небо, е Јехова. Џанаја кај ов безбедно ка водинел амен преку о проблемија сој сар буре ко последна диве акале светоскере (Иса. 35:4). Иси амен доверба ко Јехова, адалеске шај те ова смириме џикоте о мануша ко свето живинена ки дар (Иса. 30:15). Постапинаја слично сар о Роберти хем кеда вакераја е јаверенге соске иси амен доверба ко Јехова. Аѓаар ола да ка шај те овен сигурна кај бизи разлика саве проблемија ка овен лен, о Јехова ка поможинел лен.

12. а) Кова тано о трито ветување со денѓа о Јехова? б) Ко со сетинкерена амен о лафија е Јеховаскоро „вас“?

¹² Те дикха о трито ветување со пишинѓа ле о Исаија: „Ме ка керав тут зорало хем ка поможинав туке“. О Исаија више објаснинѓа сар о Девел ка керел пле народо те овел зорало, кеда вакерѓа: „О Јехова ка авел. Ов тано силно хем лескоро вас ка владинел“ (Иса. 40:10). Ки Библија, о лафи „вас“ бут пути значинела моќ. Адалеске, о лафија кај е Јеховаскоро „вас ка владинел“,  сетинкерена амен кај о Јехова тано моќно Цари. Ов користинѓа пли бут бари сила те поддржинел хем те бранинел пле слуген ко пурано време, хем понадари да керела позорале хем аракхела околен со иси лен доверба ки лесте (5. Мој. 1:30, 31; Иса. 43:10).

13. а) Посебно ки која ситуација о Јехова икерела пе ко пле лафија кај ка керел амен зорале? б) Кова ветување дела амен сила хем доверба?

¹³ Посебно кеда прогонинена амен о душмања, о Јехова икерела пе ко пле лафија: „Ме ка керав тут зорало“. Авдиве, ко несаве делија таро свето амаре душмања са пле силенцар пробинена те чхинавен амаро проповедибе или те забранинен амари организација. Ама, амен на сием превише секириме башо асавке нападија. О Јехова денѓа јекх ветување кова со дела амен сила хем доверба. Ов ветинѓа: „Нисаво оружје сој кердо против туте нане те успејнел“ (Иса. 54:17). Акала лафија сетинкерена амен ко трин важна буќа.

14. Соске на сием изненадиме со нападинена амен е Девлескере душмања?

¹⁴ Прво, сар следбеникија е Христосескере, амен џанаја кај о јавера ка мрзинен амен (Мат. 10:22). О Исус пророкујнѓа кај лескере ученикија ка овен бут прогониме ко последна диве (Мат. 24:9; Јован 15:20). Дујто, е Исаијаскоро пророштво предупрединела амен кај амаре душмања нане само те мрзинен амен, него исто аѓаар ка користинен различно оружје против аменде. Ко акава оружје тано вклучимо ширибе информацие со нане целосно точна или чиста ховајба баши аменде, хем сурово прогонство (Мат. 5:11). О Јехова нане те чхинавел амаре душманен те користинен асавко оружје џикоте боринена пе против аменде (Еф. 6:12; Отк. 12:17). Ама, на ваљани те дара. Соске?

15-16. а) Која тани и трито бути со ваљани те памтина ла хем сар о Исаија 25:4, 5 потврдинела адава? б) Сар ко Исаија 41:11, 12 тано објаснимо со ка овел околенцар со боринена пе против аменде?

¹⁵ Те дикха и трито бути со ваљани те  памтина ла. О Јехова вакерѓа кај „нисаво оружје“ со ка користинел пе против аменде „нане те успејнел“. Исто сар јекх ѕидо со шај те заштитинел амен тари силно бура, аѓаар о Јехова шај те заштитинел амен таро нападија е душманенгере, кола сој сар „бура со кхувела ко ѕидо“. (Читин Исаија 25:4, 5.) Амаре душмања никогаш нане те успејнен те керен аменге трајно штета (Иса. 65:17).

¹⁶ О Јехова исто аѓаар керела позорали амари доверба ки лесте аѓаар со ко деталија објаснинела аменге со ка овел околенцар сој гневна против аменде (Читин Исаија 41:11, 12.) Бизи разлика кобор силно ка боринен пе амаре душмања против аменде или кобор поопасно ка овел и војна, о крајо ка овел секогаш исто — сарине сој душмања е Девлескере народоске ка овен уништиме.

17-18. а) Сар адава со читинаја и Библија шај те бајрарел амари доверба ко Девел? Вакер пример. б) Сар шај те поможинел аменге адава со ка размислина хор башо е бершескоро стихо башо 2019 берш?

¹⁷ Амари доверба ко Јехова кераја ла позорали кеда пенџараја ле панда пошукар. А единствено начин сар шај пошукар те пенџара ле тано аѓаар со шукар ка читина и Библија хем хор ка размислина баши лате. Ки лате иси точно извештај башо адава сар о Јехова аракхела сине пле народо ко пурано време. Акава керела те овел амен доверба кај авдиве да ка грижинел пе аменге.

¹⁸ Те дикха јекх бут шужо пример со користинѓа о Исаија те шај те поможинел аменге те хаљова сар о Јехова аракхела амен. Ов спорединѓа е Јехова пастиреа, а е Девлескере слуген бакхренцар. О Исаија вакерѓа: „Вастеа ка кхедел е бакхрен, ки ангали ка ингарел лен“ (Иса. 40:11). Кеда сием свесна кај о Јехова цврсто икерела амен ки пли ангали, осетинаја амен заштитиме хем смириме. Те шај те ачхова смириме чак кеда иси амен проблемија, о верно хем разборито робо биринѓа о Исаија 41:10 сар бершескоро стихо башо 2019 берш: „Ма ов секиримо, соске ме сиум тло Девел“. Размислин хор башо акала утешна лафија. Ола ка ден туке сила те издржине о пхарипа со ка овен тут.