1-3. а) Соске о Јехова мангела сине е Соломоне хем саве берекетија денѓа ле? б) Кола пучиба ка овен одговориме ки акаја статија?

О СОЛОМОН уло цари ко Израел панда сар терно. Кеда почминѓа те владинел, о Јехова ко суно вакерѓа леске: „Роде со мангеа те дав тут!“ О Соломон одговоринѓа: „Ме сиум панда чхаво хем нане ман искуство... Адалеске де тле слугаске послушно вило те шај те судинел тле народоске“ (1. Цар. 3:5-10). „Послушно вило“ — кобор скромно молба! Шај те хаљова соске о Јехова бут мангела сине е Соломоне! (2. Сам. 12:24). Амаро Девел сине бут бахтало со акава терно цари одговоринѓа аѓаар хем адалеске денѓа ле „мудро вило хем способност хаљојбаске“ (1. Цар. 3:12).

² Са џикоте о Соломон сине верно, о Јехова дела ле сине бут берекетија. Сине ле чест те градинел храми „башо анав е Јеховаскоро, о Девел е Израелескоро“ (1. Цар. 8:20). Ов уло пенџардо пали пли мудрост со денѓа ле о Девел. Освен адава, о Девел водинѓа ле преку пло свети дух те вакерел бут буќа кола сој пишиме ко трин лила ки Библија. Јекх лендар тано о Мудри изреки.

³ Ко лил Мудри изреки о лафи „вило“ појавинела пе околу 100 пути. На пример, ко Изреки 4:23 пишинела: „Таро са о буќа со ваљани те аракхе, највише аракх тло вило“. Со значинела о лафи „вило“ ко акава стихо? Акава пучибе ка овел одговоримо ки акаја статија. Исто аѓаар, ка дикха о одговорија башо јавера дуј пучиба: Сар о Сатана пробинела те заразинел, или те руминел  амаро вило? Хем со ка поможинел аменге те аракха амаро вило? Те шај те ачхова верна е Девлеске, мора те хаљова о одговорија башо акала важна пучиба.

4-5. а) Сар о Псалм 51:6 поможинела аменге те хаљова со значинела о лафи „вило“? б) Сар адава со ваљани те грижина амен башо амаро састипе поможинела аменге те хаљова кобор тано важно те аракха амаро симболично вило?

⁴ Ко Изреки 4:23 башо лафи „вило“ мислинела пе ко адава саве сием андралдан, хор ки аменде. (Читин Псалм 51:6.) Јавере лафенцар, ко „вило“ тане вклучиме амаре најхор мисле, чувствија, мотивија хем желбе. Значи, адава тано саве чаче сием андралдан, а на само сар дикхјоваја авријалдан.

⁵ Те дикха сар адава со ваљани те грижина амен башо амаро састипе поможинела аменге те хаљова кобор тано важно те аракха амаро симболично вило. Прво, те шај те ова састе, мора те ха здраво храна хем редовно те вежбина. Слично, те шај те ова духовно састе, мора те ха здраво духовно храна хем секогаш те сикава вера ко Јехова. Амари вера сикаваја аѓаар со икераја амен ко адава со сикљоваја хем кераја лафи е јаверенцар баши лате (Рим. 10:8-10; Јак. 2:26). Дујто, спрема адава сар изглединаја авријалдан, шај те мислина аменге кај сием састе иако ки аменде андре шај иси несаво насвалипе. Слично, адалеске со сием духовно активна, шај те мислина аменге кај иси амен зорали вера, ама шај ки аменде бајровена погрешна желбе (1. Кор. 10:12; Јак. 1:14, 15). На ваљани те бистра кај о Сатана мангела те заразинел амен пле размислибаја. Ко кола начинија шај те пробинел те керел адава? Хем сар шај те аракха амен?

6. Со мангела о Сатана хем сар пробинела те керел адава?

⁶ О Сатана мангела те ова сар лесте — бунтовникија со на шунена е Јеховаскере мерилија хем иси лен себична мотивија. О Сатана нашти те чхивел амен силаја те размислина хем те постапина сар лесте. Адалеске пробинела те керел адава ко јавера начинија. На пример, живинаја машкар о мануша колен со успејнѓа те руминел лен (1. Јов. 5:19). Ов надинела пе кај ка  манга те накхава време ленцар, иако џанаја кај о лошно друштво ка руминел о начин сар размислинаја хем постапинаја (1. Кор. 15:33). Акаја тактика успејнѓа ко цари о Соломон. Ов женинѓа пе буте ромњенцар таро јавера нацие кола со бут влијајнѓе упри лесте. Ко крајо завединѓе лескоро вило хем цидинѓе ле таро Јехова (1. Цар. 11:3).

7. Ко саво јавера начинија о Сатана ширинела пло размислибе хем соске ваљани те аракха амен?

⁷ Авдиве о Сатана ширинела пло размислибе преку разна филмија хем емисие ки телевизија. Ов џанела кај аѓаар на само со ка забавинен пе о мануша, него хем ка сикљовен сар те размислинен, со те осетинен хем сар те постапинен. О Исус бут пути користинела сине споредбе или парамиса те шај те поможинел е јаверенге те сикљовен несави поука. На пример, асавки тани и споредба башо милостиво Самарјани хем и споредба башо чхаво со гело песке кхералдан хем трошинѓа са пло наследство (Мат. 13:34; Лука 10:29-37; 15:11-32). Ама, окола сој тане заразиме е Сатанаскере размислибаја шај те вакерен парамиса те шај те руминен амен. Ваљани те ова разумна. Џанѓола пе кај несаве филмија хем емисие шај те овен интересна хем те сикавен амен нешто бизо те влијајнен лошно упро амаро размислибе. Ама, мора те пазина. Кеда биринаја со ка дикха, шукар тано те пуча амен: „Дали таро акава филми или емисија сикљовава кај тано нормално те задоволинав мле неисправна телесна желбе?“ (Гал. 5:19-21; Еф. 2:1-3). Со ваљани те кере ако приметинеа кај несави емисија ширинела е Сатанаскоро размислибе? Ма дикх ла — аракх тут таро асавке емисие сар со би аракхеа тут сине таро заразно насвалипе!

8. Сар шај о родителија те поможинен пумаре чхавенге те аракхен пумаро вило?

⁸ Тумен о родителија иси тумен посебно одговорност те аракхен тумаре чхавен таро Сатана кова со пробинела те заразинел ленгоро вило. Сигурно керена са со шај те аракхен тумаре чхавен таро дословно насвалипе.  Икерена тумаро кхер чисто хем фрдена са со шај те насвакерел тумен или тумаре чхавен. Слично, ваљани те аракхен тумаре чхавен таро са о филмија, емисие, видеоигре хем интернет-странице кола со веројатно ка заразинен лен е Сатанаскере размислибаја. О Јехова денѓа туменге и одговорност те поможинен тумаре чхавенге те овен духовно састе (Изр. 1:8; Еф. 6:1, 4). Адалеске ма даран те чхивен правилија ки тумари фамилија кола со темелинена пе ко мерилија тари Библија. Вакерен тумаре чхавенге со смејнена, а со на смејнена те дикхен хем поможинен ленге те хаљовен соске одлучинѓен аѓаар (Мат. 5:37). Сар со бајровена тумаре чхаве, сикавен лен коркори те џанен сој шукар, а сој лошно спрема е Јеховаскере мерилија (Евр. 5:14). Хем ма бистрен кај ола бут сикљовена таро адава со вакерена ленге, ама панда повише сикљовена таро адава со тумен керена (5. Мој. 6:6, 7; Рим. 2:21).

9. Кова тано јекх стави со ширинела ле о Сатана хем соске тано опасно?

⁹ О Сатана исто аѓаар пробинела те заразинел амаро вило аѓаар со трудинела пе те керел те овел амен побари доверба ки манушикани мудрост него ко е Јеховаскоро размислибе (Кол. 2:8). Размислин само башо јекх стави со ширинела ле о Сатана — кај најважно ко живото ваљани те овел аменге те барваљова. Окола со размислинена аѓаар шај те барваљовен, а шај на. Бизи разлика дали ка успејнен ко адава или на, ола тане ки опасност. Соске? Адалеске со и желба те барваљовен шај добором бут те бајрол со чак ка овен спремна те жртвујнен пумаро састипе, пумаре фамилија, па чак пумаро амалипе е Девлеа само те шај те исполнинен пумари цел (1. Тим. 6:10). Бут сием благодарна со амаро Дад сој ко небо поможинела те овел амен исправно стави башо паре (Проп. 7:12; Лука 12:15).

10-11. а) Со мора те кера те шај те аракха амен? б) Со керела сине јекх стражари ко пурано време хем сар шај амари совест те овел сар стражари?

¹⁰ Те шај те аракха амаро вило, ваљани те пенџара кола буќа шај те овен аменге опасна хем сигате те кера нешто те шај те аракха амен. О лафи со ко Изреки 4:23 тано преведимо сар „аракх“ сетинкерела амен ки задача со сине јекхе стражаре. Ко време кеда сине цари о Соломон, о стражари терѓовела сине ко ѕидија околу и диз хем предупрединела сине ако дикхела несави опасност. Акава поможинела аменге те хаљова со мора те кера те шај те на мукха о Сатана те руминел амаре мисле.

¹¹ Ко пурано време, о стражари со сине ко ѕидија соработинела сине паше е стражареа со сине ко порте (2. Сам. 18:24-26). Ола заедно поможинена сине те аракхел пе и диз аѓаар со пазинена сине о удара те овен пханле секогаш кеда јекх душмани ка авел паше (Неем. 7:1-3). Амари совест сој обликујми спрема и Библија * шај те овел сар стражари хем те предупрединел амен кеда о Сатана ка пробинел те нападинел амаро вило, јавере лафенцар кеда ка пробинел те влијајнел ко амаре мисле, чувствија, мотивија или желбе. Секогаш кеда амари совест ка предупрединел амен, ваљани те шуна ла хем те пханда „о порте“, јавере лафенцар те кера са со шај те аракха амен тари опасност.

12-13. Ко саво искушение шај те аракхљова, ама со ваљани те кера?

¹² Те дикха јекх пример башо адава сар шај те аракха амен таро е Сатанаскоро размислибе. О Јехова сикавела амен кај  „о блуд хем секова мелалипе“ на ваљани ни те спомнинел пе машкар аменде (Еф. 5:3). Ама, со ка кера ако о колеге или о соученикија почминена те керен лафи башо неморална буќа? Џанаја кај ваљани „те откажина амен таро са адава со нане спрема е Девлескири волја хем таро желбе е светоскере“ (Тит 2:12). О стражари, јавере лафенцар амари совест, шај те предупрединел амен баши опасност (Рим. 2:15). Ама, дали ка шуна ла или ка ова ко искушение те шуна околен околу аменде, па чак те дикха несаве слике со споделинѓе лен? Уствари, тегани тано о време те пханда „о порте е дизјакере“ аѓаар со ка менина и тема ко јавер правцо или ка џа аменге.

¹³ Ваљани аменге храброст те борина амен против о притисок таро окола со мангена те размислина или те постапина погрешно. Шај те ова увериме кај о Јехова дикхела кобор трудинаја амен хем ов ка дел аменге и сила хем и мудрост кола со ваљанена аменге те шај те борина амен против е Сатанаскоро размислибе (2. Лет. 16:9; Иса. 40:29; Јак. 1:5). Со јавер шај те кера те шај те аракха амаро вило?

14-15. а) Башо со ваљани те пхрава амаро вило, хем сар шај те кера адава? б) Сар о лафија таро Изреки 4:20-22 поможинена аменге те овел амен најбари корист кеда читинаја и Библија? (Дикх хем и рамка „ Башо со шај те размислине“.)

¹⁴ Те шај те аракха амаро вило, нане доволно само те аракха амен таро погрешно влијание него исто аѓаар ваљани те мукха упро амаро вило те влијајнен шукар буќа. Те ирана амен палем ко пример е дизјаја. О стражари пхандела о порте те шај те чхинавел е душмане те кхувел андре, ама ко јавера прилике пхравела лен те шај те анел пе хајбаске хем јавера буќа со ваљанена ки диз. Ако о порте никогаш нане пхравде, ки диз ка овел бокхалипе. Слично, амен да ваљани редовно те пхрава амаро вило те шај те чхива е Девлескере мисле ки лесте.

¹⁵ Ки Библија тане пишиме е Јеховаскере мисле, адалеске секова пути кеда читинаја ла, мукхаја ола те влијајнен упро амаро начин сар размислинаја, со осетинаја хем сар постапинаја. Сар шај те овел амен најбари корист кеда читинаја и Библија? Бут важно тано те молина амен. Јекх пхен вакерела: „Англедер те читинав и Библија, молинава ман е Јеховаске хем родава лестар те поможинел ман ’те дикхав о шуже буќа‘ ко лескоро Лафи“ (Пс. 119:18). Исто аѓаар, ваљани хор те размислина башо адава со читинаја. Кеда молинаја амен, кеда читинаја хем хор размислинаја, тегани е Девлескоро Лафи кхувела хор ко амаро вило хем почминаја те манга е Девлескоро размислибе. (Читин Изреки 4:20-22; Пс. 119:97).

16. Саве користија сине буте пхрален хем пхењен тари амари интернет-телевизија?

¹⁶ Јавер начин сар мукхаја е Девлескоро размислибе те влијајнел упри аменде тано аѓаар со ка дикха о емисие тари амари интернет-телевизија JW Broadcasting^®. Јекх брачно пари вакерела: „Е масекоскере емисие чаче тане одговор ко амаре молитве! Ола керена амен позорале хем охрабринена амен кеда сием тажна или осетинаја амен коркори. Кеда сием кхере, бут пути шунаја о гиља сој тане дело таро е масекоскере емисие. Шунаја лен џикоте кераја хајбаске, чистинаја или пијаја чај“. Акала емисие поможинена аменге те аракха амаро вило. Ола сикавена амен те размислина сар о Јехова хем те борина амен те на размислина сар о Сатана.

17-18. а) Спрема 1. Царевите 8:61, саво тано о резултати кеда кераја адава со сикљоваја таро Јехова? б) Со шај те сикљова таро цари о Езекија? в) Спрема е Давидескири молитва сој пишими ко Псалм 139:23, 24, башо со шај те молина амен?

¹⁷ Секогаш кеда дикхаја о шукар резултатија  со авена таро адава со постапинаја исправно, амари вера овела позорали (Јак. 1:2, 3). Осетинаја амен шукар соске о Јехова дичинела пе аменцар хем вакерела кај сием лескере чхаве, адалеске панда повише мангаја те кера ле бахтало (Изр. 27:11). Ко секова испит дикхаја сар прилика те сикава амаре мангле Дадеске кај служинаја леске цело вилеа (Пс. 119:113). Сикаваја кај мангаја ле цело вилеа, хем кај сием одлучна те икера лескере заповедија хем те кера адава со мангела ов. (Читин 1. Царевите 8:61.)

¹⁸ Дали ка кера грешке? Оја, адалеске со сием несовршена. Кеда ка грешина, те сетина амен ко цари о Езекија. Ов да керѓа грешке, ама каинѓа пе хем понадари да служинела сине е Јеховаске „цело вилеа“ (Иса. 38:3-6; 2. Лет. 29:1, 2; 32:25, 26). Адалеске, те борина амен против о Сатана, кова со мангела те заразинел амен пле размислибаја. Те молина амен те овел амен „послушно вило“ (1. Цар. 3:9; читин Псалм 139:23, 24). Ама, ка ачхова верна е Јеховаске ако највише таро са аракхаја амаро вило.