1-2. Кова необично настан случинѓа пе ко празнико Педесетница 33 берш а.е.?

НЕДЕЛА сабајле, ко празнико Педесетница 33 берш а.е., ки јекх упруни соба ко Ерусалим сине кхедиме околу 120 ученикија (Дела 1:13-15; 2:1). Некобор диве англедер адава, о Исус вакерѓа ленге те ачховен ко Ерусалим адалеске со ваљани сине те добинен јекх посебно поклон (Дела 1:4, 5). Со случинѓа пе тегани?

² И Библија вакерела: „Таро јекх пути шундило јекх звуко таро небо, сар кеда пхудела силно бавлал“. Адава звуко шај сине те шунел пе ко цело кхер. Пало адава, о ученикија дикхле нешто сар „јага со личинена сар чхибја“ кола со хулиле упро ленгере шере хем сарине пхердиле „свети духоја“ (Дела 2:2-4). Ко асавко впечатливо начин, о Јехова денѓа пло свети дух адале учениконге (Дела 1:8). Ола тане о прва со сине помазиме свети духоја. * Адалеа сине ленге денди надеж кај ка владинен е Исусеа таро небо.

3. Соске о ученикија ки Педесетница ни хари на сумнинѓе пе кај тане помазиме свети духоја?

³ Те ове сине машкар о ученикија со сине кхедиме ки упруни соба, никогаш нане сине те бистре  адава диве. Замислин туке сар упро тло шеро авела нешто сар јаг со личинела сар чхиб, хем сар почминеа те кере лафи ки јавер чхиб! (Дела 2:5-12). Дали барем хари ка сумнине тут кај сиан помазимо свети духоја? Ни хари! Ама, дали сарине сој тане помазиме свети духоја овена помазиме ко несаво впечатливо начин, хем дали тане помазиме ко исто моменти ко живото? На. Котар џанаја?

4. Дали са о помазиме христијања ко исто моменти таро живото добинѓе пло небесно повик? Објаснин.

⁴ Најангле те дикха кеда некој шај те овел помазимо. Адаја група таро околу 120 ученикија на сине о единствена со сине помазиме свети духоја ки Педесетница 33 берш а.е. Покасно о исто диве, панда околу 3.000 јавера добинѓе о ветимо свети дух. Ола сине помазиме кеда крстинѓе пе (Дела 2:37, 38, 41). Ама, ко берша пало адава, на сине сарине помазиме одма кеда крстинѓе пе. О Самарјања сине помазиме пало несаво време откеда крстинѓе пе (Дела 8:14-17). А ко јекх посебно случај, о Корнелиј хем сарине таро лескоро кхер сине помазиме свети духоја панда англедер те крстинен пе (Дела 10:44-48).

5. Спрема 2. Коринќаните 1:21, 22, со случинела пе кеда некој тано помазимо свети духоја?

⁵ Акана те дикха со случинела пе кеда некој тано помазимо свети духоја. Несаве сој помазиме, ко почеток пхаро ленге те хаљовен соске о Јехова биринѓа ленде. Шај пучена пе: „Соске о Девел биринѓа баш манде?“ Јавера шај на осетинена пе аѓаар. Бизи разлика сар осетинена пе, о апостол Павле објаснинѓа со случинела пе сариненцар сој тане помазиме. Ов вакерѓа: „Откеда верујнѓен, сиен сине запечатиме * е ветиме свети духоја, кова тано гаранција башо амаро наследство“ (Еф. 1:13, 14). Спрема адава, о Јехова користинела пло свети дух те шај бут јасно те сикавел ленге кај ов биринѓа лен те џан ко небо. Ко адава  начин, о свети дух служинела сар „гаранција“, или јекх врста капара која со о Девел дела ленге те шај те уверинел лен кај ки иднина ка живинен ко небо, а на ки Пхув. (Читин 2. Коринќаните 1:21, 22).

6. Со мора те керел секова помазимо христијани те шај те добинел пли награда ко небо?

⁶ Кеда несаво христијани тано помазимо, дали адава значинела кај сигурно ка добинел награда ко небо? На. Ов тано сигурно кај тано биримо те џал ко небо. Ама, мора те овел ле ки годи акава совет: „Пхраљален, панда повише ден тумендар са те шај те потврдинен адава со сиен викиме хем бириме, соске ако керена адава никогаш нане те перен“ (2. Пет. 1:10). Значи, иако јекх помазимо христијани тано биримо, јавере лафенцар викимо те живинел ко небо, ов ка добинел пли награда само ако ачховела верно џи ко крајо (Фил. 3:12-14; Евр. 3:1; Отк. 2:10).

7. Сар о помазиме христијања џанена кај тане викиме те живинен ко небо?

⁷ Ама, сар некој џанела дали иси ле небесно повик? О одговор јасно дикхјола пе таро лафија со пишинѓа лен о апостол Павле е христијаненге ко Рим, кола со сине „викиме те овен света“. Ов вакерѓа ленге: „Тумен на добинѓен духо со керела тумен робија те шај палем те даран, него добинѓен духо е посвојбаскоро, кова со поттикнинела амен те викина: ’Ава, мо Дад!‘ Адава духо сведочинела амаре духоја кај сием е Девлескере чхаве“ (Рим. 1:7; 8:15, 16). Значи, преку пло свети дух, о Девел керела те овел јасно е помазиме христијаненге кај тане викиме те живинен ко небо (1. Сол. 2:12).

8. Сар о 1. Јованово 2:20, 27 сикавела кај е помазаниконге на ваљани никој јавер те потврдинел кај тане викиме те живинен ко небо?

⁸ О Јехова на мукхела нисави сумња ки годи хем ко вило околенге со добинена повик те живинен ко небо. (Читин 1. Јованово 2:20, 27.) Џанѓола пе, е помазиме христијаненге — исто сар са е јаверенге — ваљанена о духовна поуке со дела лен о Јехова преку о собрание. Ама, на ваљани никој јавер те потврдинел ленге кај тане помазиме. О Јехова уверинела лен преку пло свети дух — и најмоќно сила ко универзум!

9. Спрема Ефешаните 1:18, сави промена овела некасте кеда тано помазимо свети духоја?

⁹ Авдиве, буте Девлескере слугенге тано пхаро те хаљовен со овела кеда некој тано помазимо таро Девел. Акава тано нормално соске коркори ола на доживинѓе адава. Уствари, о Девел керѓа е манушен те живинен вечно ки Пхув, а на ко небо (1. Мој. 1:28; Пс. 37:29). Сепак, о Јехова одлучинѓа несавенге те дел живото ко небо. Адалеске, кеда помазинела лен, ов целосно менинела ленгири надеж хем о начин сар размислинена — ола тане бахтале со шај те живинен ко небо. (Читин Ефешаните 1:18.)

10. Со значинела некој те овел „палем бијамо“? (Дикх и фуснота)

¹⁰ Е христијаненге сој помазиме свети духоја о Исус вакерѓа кај тане „палем бијаме“. * Ов исто аѓаар мангља те вакерел кај нашти те објаснинел пе некаске со нане помазимо сар осетинена пе адала сој „палем бијаме“, јавере лафенцар „бијаме таро духо“ (Јован 3:3-8).

11. Сар менинела пе о размислибе околескоро сој помазимо свети духоја?

 ¹¹ Кеда несаве тане помазиме свети духоја, сар менинела пе ленгоро размислибе? Англедер те помазинел лен о Јехова, акале христијанен сине лен надеж кај ка живинен вечно ки Пхув. Ола едвај аџикерена сине о време кеда о Јехова ка цидел о лошнипе хем кеда и Пхув ка керел ла рај. Шај чак замислинена песке сине сар аџикерена пле најманглен со муле. Ама, откеда овена помазиме, ола почминена те размислинен ко појавер начин. Соске? Дали менинѓе пло мислење адалеске со осетинена пе сине обесхрабриме или адалеске со доживинѓе бут неволје? Дали таро јекх пути халиле кај ка овел досадно те живинен вечно ки Пхув, хем кај нане те овен бахтале акате? На. О Јехова користинѓа пло свети дух те шај те променинел ленгири надеж хем о начин сар размислинена.

12. Спрема 1. Петрово 1:3, 4, сар осетинена пе о помазиме христијања кеда размислинена баши пли надеж?

¹² Некој сој тано помазимо шај мислинела кај нане достојно баши адаја посебно чест. Сепак, ни хари на сумнинела пе кај о Јехова биринѓа ле. Ов тано бут бахтало хем благодарно кеда размислинела башо адава кај ка живинел ко небо. (Читин 1. Петрово 1:3, 4.)

13. Сар дикхена о помазиме христијања ко пло живото ки Пхув?

¹³ Дали акава значинела кај о помазаникија мангена те мерен? О апостол Павле одговоринѓа ко акава пучибе. Ов спорединѓа ленгоро манушикано тело шатореа, хем вакерѓа: „Уствари, амен, кола сием ко акава шатори, иси амен пхарипе хем офкинаја, соске амари желба нане те хуљава амендар акава, него те урава јавер те шај о живото те глтинел адава со мерела“ (2. Кор. 5:4). Акала христијања на мангена те мерен со посигате адалеске со досадинѓе пе таро живото ки Пхув. Наместо адава, ола уживинена ко живото хем мангена те користинен секова диве те служинен е Јеховаске пле фамилијаја хем пле амаленцар. Сепак, бизи разлика со керена, ола на чхинавена те мислинен ки бари надеж која со ветинѓа ленге о Девел баши иднина (1. Кор. 15:53; 2. Пет. 1:4; 1. Јов. 3:2, 3; Отк. 20:6).

14. Со нане доказ кај некој тано помазимо свети духоја?

¹⁴ Пучеа тут ли дали сиан помазимо свети духоја? Ако оја, размислин башо акала пучиба: Дали иси тут силно желба те кере е Јеховаскири волја? Дали осетинеа бари ревност ки служба? Дали хор проучинеа и Библија, хем дали уживинеа те истражине „е Девлескере хор буќа“? (1. Кор. 2:10). Дали осетинеа кај о Јехова дела тут бут берекети ки служба? Дали хор ки туте осетинеа одговорност те поможине е јаверенге ко духовно поглед? Дали дикхљан доказија кај о Јехова бут пути поможинѓа тут ко конкретна начинија? Ако тло одговор ко са акала пучиба тано оја, дали акава тано доказ кај сиан викимо те живине ко небо? На. Соске? Адалеске со асавке чувствија шај те овен секоле јекхе Девлескере слуга, а на само адален сој помазиме. Преку пло свети дух о Јехова шај те дел и исто сила са пле слугенге, бизи разлика сави надеж иси лен. Уствари, ако пучеа тут дали сиан помазимо свети духоја, адава со на сиан сигурно сикавела кај на сиан помазимо. Окола со викинѓа лен о Јехова те живинен ко небо на пучена пе дали тане помазиме или на. Ола џанена адава!

15. Котар џанаја кај несаве таро адала со добинѓе е Јеховаскоро духо нане викиме те живинен ко небо?

 ¹⁵ Ки Библија иси бут примерија таро верна мануша коленге со о Јехова денѓа пло свети дух. Сепак, лен на сине лен надеж те живинен ко небо. На пример, о Давид сине водимо таро е Девлескоро духо (1. Сам. 16:13). О свети дух поможинѓа леске те хаљовел о хор буќа башо Јехова хем те пишинел делија тари Библија (Мар. 12:36). Сепак, о апостол Петар вакерѓа кај о  Давид на гело ко небо (Дела 2:34). О Јован Крстител сине „пхердо свети духоја“ (Лука 1:13-16). О Исус вакерѓа кај никој таро мануша на сине побаро таро Јован. Ама исто аѓаар, вакерѓа кај о Јован нане те владинел сар цари таро небо (Мат. 11:10, 11). О Јехова користинѓа пло свети дух те шај те дел сила акале слугенге те керен баре буќа, ама на користинѓа ле те шај те викинел лен те живинен ко небо. Дали акава значинела кај ола на сине добором верна сар адала сој бириме те владинен таро небо? На. Адава едноставно значинела кај о Јехова ка воскреснинел лен те живинен ко рај ки Пхув (Јован 5:28, 29; Дела 24:15).

16. Сави награда аџикерена повише Девлескере слуге авдиве?

¹⁶ Побаро дело таро е Девлескере слуге авдиве нане лен надеж те живинен ко небо. Исто сар о Авраам, и Сара, о Давид, о Јован Крстител хем бут јавера мурша хем џувља таро библиско време, ола тане бахтале со иси лен и надеж те живинен ки Пхув коте со ка владинел е Девлескоро Царство (Евр. 11:10).

17. Башо кола пучиба ка кера лафи ки јавер статија?

¹⁷ Адалеске со авдиве машкар е Девлескоро народо панда иси помазиме христијања, шај те овен амен несаве пучиба (Отк. 12:17). На пример, сар ваљани те дикхен ки песте о помазаникија? Ако некој таро тло собрание почминела те лел таро симболија ки Спомен-свеченост, сар ваљани те понашине тут леа? Хем, со ако бајрола о број околенгоро со вакерена кај тане помазиме? Дали ваљани те секирине тут? Акала пучиба ка овен одговориме ки јавер статија.