1. Со пророкујнѓа о Јехова башо амаро време?

БАШО амаро време о Јехова пророкујнѓа: „Деш мануша таро са о чхибја со керена лафи о народија ка астарен таро шеј јекхе Еврее, ка астарен ле хем ка вакерен: ’Ка џа туменцар, соске шунѓем кај о Девел тано туменцар‘“ (Зах. 8:23). О „Евреи“ претставинела околен со о Девел помазинѓа лен свети духоја. Баши ленде исто аѓаар вакерела пе кај тане „е Девлескоро Израел“ (Гал. 6:16). „О деш мануша“ претставинена околен со иси лен надеж башо вечно живото ки Пхув. Ола џанена кај о Јехова дела берекети е помазаниконге, хем адалеске ленге тани чест со служинена заедно ленцар.

2. Ко саво начин о деш мануша „џана“ е помазаниконцар?

² Авдиве, окола со иси лен надеж те живинен вечно ки Пхув на џанена ко анав са е помазиме христијанен. * Сепак, шај те „џан“ ленцар. Ко саво начин? Поврзимо е деше симболично манушенцар, и Библија вакерела: „[Ола] ка астарен таро шеј јекхе Еврее, ка астарен ле хем ка вакерен: ’Ка џа туменцар, соске шунѓем кај о Девел тано туменцар‘“. Иако ко акава стихо тано спомнимо само јекх Евреи, и заменка „туменцар“ ко солдуј случаија сикавела кај керела пе лафи башо повише таро јекх мануш. Акава значинела кај о Евреи нане само јекх  мануш, него цело група помазаникија. О христијања со нане помазиме служинена е Јеховаске заедно е помазаниконцар. Ама, ола на дикхена ко помазиме христијања сар пле водачија, адалеске со јасно ленге кај о Водачи тано о Исус (Мат. 23:10).

3. Кола пучиба ка овен одговориме ки акаја статија?

³ Адалеске со авдиве ки Пхув панда иси помазиме христијања, несаве шај пучена пе: 1) Сар ваљани те дикхен ки песте о помазаникија? 2) Сар ваљани те понашина амен околенцар со лена таро симболија ки Спомен-свеченост? 3) Дали ваљани те секирина амен ако понадари да бајрола ленгоро број? Ки акаја статија ка дикха о одговор таро акала пучиба.

4. Спрема 1. Коринќаните 11:27-29, башо кова предупредување ваљани те размислинен о помазаникија, хем соске?

⁴ О помазиме христијања ваљани шукар те размислинен башо предупредување сој пишимо ко 1. Коринќаните 11:27-29. (Читин.) Сар шај јекх помазимо христијани те на овел достојно те лел таро симболија? Ов нане те овел достојно те хал таро маро хем те пиел тари мол ако на живинела спрема е  Јеховаскере праведна мерилија (Евр. 6:4-6; 10:26-29). О помазаникија џанена кај мора те ачховен верна е Јеховаске ако мангена те добинен „и награда таро Девел, која сој живото ко небо преку о Христос Исус“ (Фил. 3:13-16).

5. Сар ваљани о помазиме христијања те дикхен ки песте?

⁵ Е Јеховаскоро свети дух поможинела лескере слугенге те овен понизна, а на горда (Еф. 4:1-3; Кол. 3:10, 12). Адалеске, о помазиме христијања на мислинена кај тане пошукар таро јавера. Ола џанена кај адава сој тане помазиме на значинела кај автоматски о Јехова ленге дела повише свети дух него е јавере пле слугенге. О помазаникија на мислинена кај похор хаљовена о библиско чачипе таро са о јавера. Освен адава, ко нисаво случај нане те вакерен некаске кај ов да тано помазимо хем кај ваљани ов да те почминел те лел таро симболија. Наместо адава, ола понизно признајнена кај само о Јехова тано адава со викинела некас те живинел ко небо.

6. Спрема 1. Коринќаните 4:7, 8, сар ваљани те понашинен пе о помазиме христијања?

⁶ Иако џанена кај тани бари чест те овен викиме те живинен ко небо, о помазиме христијања на аџикерена таро јавера те понашинен пе ленцар ко несаво посебно начин (Фил. 2:2, 3). Исто аѓаар, ола џанена кај, кеда о Јехова помазинѓа лен, на ширинѓа адава сариненге. Адалеске нане изненадиме ако некој на верујнела ленге одма кај сине помазиме свети духоја. Уствари, ола коркори тане свесна кај и Библија предупрединела амен те на верујна бут сигате ако некој вакерела кај о Девел биринѓа ле баши несави посебно служба (Отк. 2:2). Адалеске со на мангена те привлечинен внимание ки песте, ола на вакерена секаске со ка запознајнен ле кај тане помазиме. Хем ко нисаво случај на фалинена пе е јаверенге башо адава! (Читин 1. Коринќаните 4:7, 8.)

7. Со на керена о помазиме христијања, хем соске?

⁷ О помазиме христијања на мислинена кај ваљани те дружинен пе само јавере помазаниконцар, сар те пхене тане дело таро несаво елитно клуби. Ола на пробинена те овен ко контакт е јавере помазаниконцар те шај те керен ленцар лафи башо адава сој помазиме или те керен песке приватна групе башо проучибе и Библија (Гал. 1:15-17). Асавко понашибе шај те керел поделбе ко собрание. Исто аѓаар, ко асавко начин ка противинен пе ко влијание со авела таро свети дух, кова со керела те овел мир хем јекхипе машкар е Девлескоро народо (Рим. 16:17, 18).

8. Соске ваљани те пазина сар понашинаја амен околенцар со лена таро симболија ки Спомен-свеченост? (Дикх хем и фуснота.)

⁸ Сар ваљани те понашина амен е помазиме пхраленцар хем пхењенцар? Ка овел погрешно те вазда некас, чак те овел е Христосескоро помазимо пхрал (Мат. 23:8-12). Кеда керела лафи башо старешине, и Библија поттикнинела амен те овел амен сар „ленгири вера“, ама нигде ки лате на пишинела кај ваљани те џа пало несаво мануш сар амаро водачи (Евр. 13:7). Точно, ој вакерела кај несаве тане „достојна баши дупло чест“. Ама, ола нане достојна баши асавки чест адалеске сој тане помазиме, него адалеске со „предводинена ко шукар начин“ хем бут трудинена пе шукар те сикавен е јаверен башо е Девлескоро Лафи (1. Тим. 5:17). Околен со иси лен небесно повик ка овел ленге бут непријатно ако сикавела пе ленге претерано чест или внимание. * Сој панда полошно, ако о јавера понашинена пе ленцар ко посебно начин, о помазаникија шај те почминен те овен горда (Рим. 12:3). Сигурно никој амендар на мангела те анел џи ко адава некој таро е Христосескере пхраља те керел асавки сериозно грешка! (Лука 17:2).

9. Сар шај те сикава поштовање спрема о помазаникија?

⁹ Сар шај те сикава поштовање спрема окола со помазинѓа лен о Јехова свети духоја? На ваљани те пуча лен сар уле помазаникија. Адаја тани лично бути која со на ваљани те интересинел амен (1. Сол. 4:11; 2. Сол. 3:11). Освен адава, на ваљани те претпоставина кај о брачно партнери, о родителија или јавера џене тари фамилија е помазаникоскири исто аѓаар тане помазиме. И небесно надеж на добинела пе тари фамилија. Адаја надеж дела ла о Девел (1. Сол. 2:12). На ваљани те пуча нешто со шај те поврединел е јаверен. На пример, на ваљани те пуча јекхе помазаникоскере ромња сар осетинела пе кеда мислинела кај ка живинел вечно ки Пхув бизо пло ром. Уствари, шај сарине те ова целосно увериме кај, ко нево свето о Јехова ка дел са е манушенге адава со мангена (Пс. 145:16).

10. Сар шај те пазина амен тари замка те да превише внимание несаве манушенге?

¹⁰ Ако на понашинаја амен е помазаниконцар сар поважна е јаверендар, ка заштитина аменде да. Сар? И Библија вакерела кај несаве помазиме христијања нане те ачховен верна е Девлеске (Мат. 25:10-12; 2. Пет. 2:20, 21). Ако пазинаја амен тари замка те да претерано внимание хем важност несаве манушенге, тегани нане те ова следбеникија е манушенгере, па чак те овен помазаникија, пенџарде или те служинен е Јеховаске бут берша. Ако некој лендар на ачховела верно или мукхела о собрание, адава нане те керел амари вера послабо или те чхинавел амен те служина е Јеховаске.

11. Сави промена иси ко број околенгоро со лена таро симболија ки Спомен-свеченост?

¹¹ Бершенцар, о број околенгоро со лена сине таро симболија ки Спомен-свеченост хари по хари тикњола сине. Ама, ко последно време акава број почминѓа таро берш ко берш те бајрол. Дали акава ваљани те секиринел амен? На. Те дикха соске.

12. Соске на ваљани те секиринел амен о број околенгоро со лена таро симболија ки Спомен-свеченост?

¹² „О Јехова пенџарела околен сој лескере“ (2. Тим. 2:19). Различно таро Јехова,  о пхраља со гејнена околен со лена таро симболија ки Спомен-свеченост нашти те проценинен кој тано чаче помазимо. Адалеске, ко акава број тане вклучиме окола да со мислинена кај тане помазиме, а нане. На пример, несаве со јекх време лена сине таро симболија, покасно чхинавѓе те керен адава. Јавера шај иси лен психичка или емоционална проблемија, хем адалеске мислинена кај ка владинен заедно е Христосеа таро небо. Тари адаја причина, на џанаја точно панда кобор помазаникија иси ки Пхув.

13. Дали и Библија вакерела кобор помазаникија ка овен ки Пхув кеда ка почминел и бари неволја?

¹³ Ка овен помазаникија ко разна делија тари Пхув кеда о Исус ка авел те лел лен ко небо (Мат. 24:31). Иако и Библија вакерела кај ко последна диве ка овел тикно број помазаникија ки Пхув, ој на вакерела кобор џене ка овен акате кеда ка почминел и бари неволја (Отк. 12:17).

14. Сар со дикхјола таро Римјаните 9:11, 16, со ваљани те хаљова башо бирибе е помазаниконгоро?

¹⁴ О Јехова одлучинела кеда те биринел помазаникија (Рим. 8:28-30). Ов почминѓа те биринел помазаникија откеда воскреснинѓа о Исус. Најверојатно, са о чачутне христијања ко прво веко сине помазиме. Ко наредна векија, најбаро дело таро окола со вакерена сине кај тане христијања, уствари, на сине следбеникија е Христосескере. Сепак, џикоте трајнена сине адала берша, о Јехова продолжинѓа те помазинел е хари манушен со сине чачутне христијања. Ола сине сар „гив“ башо кова со вакерѓа о Исус кај бајрола машкар „и диво чар“ (Мат. 13:24-30). Ко последна диве о Јехова продолжинѓа те биринел околен со ка овен  дело таро 144.000. * Адалеске, ако ов одлучинѓа те биринел некас кратко англедер о крајо, кој сием амен те сумнина ки лескири мудрост? (Читина Римјаните 9:11б, 16.) * Мора те пазина те на реагирина сар о работникија со на сине задоволна, колен со о Исус спомнинѓа ки јекх споредба. Ола жалинѓе пе башо адава сар постапинѓа ленгоро господари околенцар со але те керен бути ко последно саати (Мат. 20:8-15).

15. Дали са о помазиме христијања тане дело таро „верно хем разборито робо“ колеске со пишинела ко Матеј 24:45-47? Објаснин.

¹⁵ Сарине со иси лен небесно надеж нане дело таро „верно хем разборито робо“. (Читин Матеј 24:45-47.) Исто сар ко прво веко, о Јехова хем о Исус авдиве да користинена само некоборе џенен те шај те ден „храна“, јавере лафенцар те сикавен буте џенен. Ко прво веко, о Девел користинѓа само некобор помазиме христијанен те пишинен о Христијанска грчка списија. Авдиве само некоборе помазаникон иси лен одговорност те ден „храна ко право време“ е Девлескере народоске.

16. Со сиклиљан тари акаја статија?

¹⁶ Со сиклилем тари акаја статија? О Јехова одлучинѓа те дел вечно живото ки Пхув башо побаро дело таро пле слуге, хем те дел живото ко небо башо тикно број пле слуге со ка е владинен е Исусеа. О Јехова наградинела са пле слуген — сар е „Еврее“, аѓаар хем е симболична деше манушен. Ов аџикерела таро солдуј групе те овен послушна е иста законенге хем те ачховен леске верна. Сарине мора те ачховен понизна. Сарине мора те служинен заедно хем те овен ко јекхипе. Хем сарине ваљани те ден пестар са те шај те икерен о мир ко собрание. Џикоте авела о крајо са попаше, понадари да те служина е Девлеске хем те џа пало е Христосескоро пример сар „јекх стадо“ (Јован 10:16).