1. Саве стресна ситуациенцар соочинена пе бут верна слуге е Јеховаскере?

КО ЦЕЛО свето бут Јеховаскере слуге соочинена пе стресна хем пхаре ситуациенцар. Дали приметинѓан акава ко тло собрание? Несаве христијања боринена пе пхаре насвалипаја или муло некој таро ленгере најмангле. Јавера осетинена бари дукх кеда дикхена кај некој тари фамилија или несаво паше амал чхинавела те служинел е Јеховаске. А несаве цидена муке соске сине погодиме таро природна катастрофе. Са адале пхраленге хем пхењенге ваљани помош хем утеха. Сар шај те поможина ленге?

2. Соске понекогаш е Павле да сине ле потреба таро охрабрување?

² О апостол Павле бут пути сине ко ситуацие коте со лескоро живото сине ки опасност (2. Кор. 11:23-28). Освен адава, мора сине те боринел пе против о „каро ко тело“, веројатно несаво проблеми е састипаја (2. Кор. 12:7). Исто аѓаар, сине разочаримо кеда о Димас, кова со јекх време служинела сине заедно леа, мукхља ле адалеске со замангља о свето (2. Тим. 4:10). Иако о Павле сине храбро помазимо христијани кова со спремно поможинела сине е јаверенге, понекогаш ов да сине обесхрабримо (Рим. 9:1, 2).

3. Кој утешинѓа хем поможинѓа е Павле?

³ О Павле добинѓа и утеха хем и помош со ваљанена сине леске. Сар? О Јехова денѓа ле сила преку пло свети дух (2. Кор. 4:7; Фил. 4:13). Освен адава, о Јехова охрабринѓа ле преку о пхраља хем о пхења. О Павле  пишинѓа кај несаве лендар бут поможинѓе леске хем утешинѓе ле (Кол. 4:11). Машкар адала соработникија со спомнинѓа лен о Павле ко анав сине о Аристарх, о Тихик хем о Марко. Ола ачхиле узо Павле хем поможинѓе леске те истрајнел. Кола особине поможинѓе акале трине христијаненге те ден асавки помош? Сар шај те џа пало ленгоро пример џикоте утешинаја хем охрабринаја е јаверен?

4. Сар сикавѓа о Аристарх кај тано верно амал е Павлеске?

⁴ О Аристарх, јекх христијани таро Солун, сине верно амал е Павлеске. Баши лесте прво пути читинаја ки Библија ко извештај башо е Павлескоро трито мисионерско патујбе. Џикоте сине заедно ко Ефес, е Аристархе астарѓе ле јекх група мануша (Дела 19:29). Кеда конечно мукхле ле, ов на нашља те шај те спасинел пе него ачхило е Павлеа. Некобор масекија пало адава, ки Грција, палем сине заедно. Иако о противникија пробинена сине те мударен е Павле, о Аристарх панда сине узи лесте (Дела 20:2-4). Ко 58 берш а.е., кеда о Павле сине бичхалдо сар затворенико ко Рим, о Аристарх сине леа ко адава баро патујбе хем заедно доживинѓе бродолом џикоте сине ко дром (Дела 27:1, 2, 41). А кеда ресле ко Рим, најверојатно ачхило несаво време ко затвор заедно е Павлеа (Кол. 4:10). Нане чудно со о Павле сине добором охрабримо хем утешимо таро јекх асавко верно амал!

5. Спрема Изреки 17:17, сар шај те сикава кај сием верна амала?

⁵ Исто сар о Аристарх, амен да шај те ова верна амала амаре пхраленге хем пхењенге на само кеда ленге са шукар него хем кеда тане ко „пхаре диве“. (Читин Изреки 17:17.) Чак откеда ка накхел несаво пхарипа, шај е пхралеске или е пхењаке понадари да ка ваљанел утеха. И Френсис, * колатар со муле солдуј родителија ко периоди таро трин масек соске сине лен рако, вакерела: „Несаве пхаре ситуацие нашти те накхава лен добором локхе. Бут сиум благодарно со иси ман  верна амала кола со на бистрена кај панда осетинава дукх, иако накхља више несаво време откеда муле мле родителија“.

6. Ко со ка поттикнинел амен и верност?

⁶ О верна амала керена жртве те шај те поможинен пле пхраленге хем пхењенге. На пример, о доктори вакерѓа јекхе пхралеске со викинела пе Питер кај иси ле насвалипе кова со сигате напредујнела хем ко крајо ка мерел. Лескири ромни и Кетрин вакерела: „Кеда дознајнѓем и дијагноза ко доктори, аменцар сине јекх брачно пари таро амаро собрание кова со ингарѓа амен адари. Ола одма одлучинѓе те на мукхен амен коркори те накха тари акаја пхари ситуација, хем таро адава моменти секогаш тане аменцар кеда ваљани аменге“. Кобор тано утешно те овен амен чачутне амала кола со ка поможинен аменге те истрајна кеда иси амен неволје!

7-8. Спрема Колошаните 4:7-9, сар сикавѓа о Тихик кај тано одговорно мануш?

⁷ О Тихик, јекх христијани тари римско провинција Азија, исто аѓаар сине верно амал е Павлеске (Дела 20:4). Околу 55 берш а.е., о Павле организиринѓа те кхеден пе прилогија башо христијања ки Јудеја, хем шај леља Тихико те поможинел ле ки адаја одговорно задача (2. Кор. 8:18-20). Покасно, кеда о Павле прво пути сине пханло ко Рим, о Тихик пренесинела сине лескере писмија хем охрабрувачка пораке е собраниенге ки Азија (Кол. 4:7-9).

⁸ О Тихик ачхило верно амал е Павлеске (Тит 3:12). Ко адава време на сине са о христијања доверлива сар со сине о Тихик. Околу 65 берш а.е., кеда дујто пути сине пханло ко Рим, о Павле пишинѓа кај бут христијања ки провинција Азија на мангле те дружинен пе леа соске веројатно дарана сине таро противникија (2. Тим. 1:15). Спротивно лендар, е Павле шај сине те овел ле доверба ко Тихик, хем адалеске денѓа ле панда јекх задача (2. Тим. 4:12). Сигурно бут ценинела сине адава со сине ле јекх шукар амал сар о Тихик.

9. Сар шај те џа пало пример е Тихикескоро?

⁹ Шај те џа пало пример е Тихикескоро аѓаар со ка ова одговорна амала. На пример,  нане доволно само те ветина е пхраленге хем е пхењенге кај ка поможина ленге, него ваљани чаче те кера адава ко практична начинија (Мат. 5:37; Лука 16:10). Уствари, кеда окола со ваљани ленге помош џанена кај шај те овел лен доверба ки аменде тегани осетинена пе полокхе. Јекх пхен вакерела: „На секиринеа тут бут соске џанеа кај адава со нудинѓа туке помош чаче ка авел ко време те шај те керел адава со ветинѓа“.

10. Спрема Изреки 18:24, кој шај те утешинел адален со соочинена пе несаве проблемеа или тане разочариме?

¹⁰ Адала со иси лен проблемија или тане разочариме, бут пути осетинена пе пошукар кеда доверинена пе несаве шукар амалеске. (Читин Изреки 18:24.) На пример, о Бадрак сине бут разочаримо откеда лескоро чхаво сине исклучимо. Ов вакерела: „Сине ман потреба те керав лафи некасаја касте со шај те овел ман доверба“. О Карлос, кова со керѓа сериозно грешка, нашти сине повише те овел ле и одговорност која со порано сине ле ко собрание хем која со бут значинела сине леске. Ов вакерела: „Ваљани сине манге некој касаја со ка шај искрено те керав лафи бизо те дарав кај ка осудинел ман“. О Карлос керѓа лафи е старешиненцар кола со поможинѓе леске те икљовел ко крајо пле проблемеа. Леске сине утешно адава да со џанела сине кај тане доверлива, хем кај нане те керен лафи е јаверенцар башо адава со вакерѓа ленге.

11. Сар шај те сикава кај сием верна хем доверлива амала?

¹¹ Те шај те ова верна хем доверлива амала, мора те ова стрплива. Кеда мукхља ла о ром, и Жана шај сине те керел лафи несаве паше амаленцар башо адава сар осетинела пе, хем адава керела сине те овел лаке бут полокхо. Ој вакерела: „Ола стрпливо шунена ман сине, иако бут пути повторинава сине о иста буќа“. Ту да шај овеа шукар амал ако спремно шунеа е јаверен.

12. Кој сине о Марко, хем сар сикавѓа кај тано спремно те служинел е јаверенге?

¹² О Марко сине христијани таро Ерусалим. Лескоро братучети о Варнава сине пенџардо проповеднико (Кол. 4:10). Најверојатно, о Марко авела сине тари барвали фамилија. Сепак, о материјална буќа на сине леске најважна. Ко цело пло живото, ов сине спремно те служинел е јаверенге хем адава керела ле сине бахтало. На пример, освен со соработинѓа е Павлеа, несаво време сине е Петареа да. Веројатно, поможинела сине ленге ко практична начинија џикоте ола керена сине пле одговорностија (Дела 13:2-5; 1. Пет. 5:13). О Павле вакерѓа кај о Марко тано лескоро соработнико „ки служба башо е Девлескоро царство“, кова со поможинѓа ле хем утешинѓа ле (Кол. 4:10, 11).

13. Сар о 2. Тимотеј 4:11 сикавела кај о Павле ценинела сине и верно служба е Маркоскири?

¹³ О Марко уло паше амал е Павлеа. Ко 65 берш а.е., кеда сине пханло последно пути ко Рим, о Павле пишинѓа пло дујто лил џи ко Тимотеј, ко кова со замолинѓа ле те авел ки лесте хем те лел е Марко пеа (2. Тим. 4:11). О Павле сигурно бут ценинела сине и верно служба е Маркоскири, хем адалеске мангља ов те овел леа ко најважно периоди таро лескоро живото. О Марко поможинѓа леске ко практична начинија, шај аѓаар со анела сине леске хајбаске или со анела сине леске свитокија хем мастило. Асавки поддршка хем охрабрување сигурно бут поможинѓе е Павлеске те истрајнел ко последна диве англедер те овел мудардо.

14-15. Спрема Матеј 7:12, сар шај те поможина е јаверенге ко практично начин?

¹⁴ Читин Матеј 7:12. Кеда накхаја таро  пхаро периоди бут сием благодарна со о јавера поможинена аменге ко практична начинија. О Рајан, колескоро дад муло ки јекх несреќа, вакерела: „Кеда доживинеа неволје, чак о најобична буќа со керена пе секова диве дикхјона туке сар бут баро товари. Тегани бут значинела кеда некој ка керел туке несави шукар бути, чак ако тани бут тикни“.

¹⁵ Ако внимателно дикхаја, веројатно ка аракха практична начинија сар те поможина е јаверенге. Сетин тут ко Питер хем ки Кетрин, колен со спомнинѓем лен англедер. Адалеске со о солдуј нашти сине те возинен, јекх пхен керѓа распоред секогаш те овел несаво објавители те ингарел лен ко доктори те шај те на мукхен нијекх термини. Дали акава поможинѓа ленге? И Кетрин вакерела: „Сар ка пхене баро пхарипа пело амендар таро пиќе“. Никогаш ма бистре кај шај бут те поможине е јаверенге, чак ако кереа ленге тикне буќа.

16. Која важно бути сикљоваја таро Марко башо адава сар ваљани те поможина е јаверенге?

¹⁶ Со јавер сикљоваја таро пример е Маркоскоро? Ле сине ле разна одговорна задаче, хем сине бут зафатимо ки служба башо Девел. Исто аѓаар, пишинѓа о евангелие кова со пхиравела лескоро анав. Ама иако керела сине са адава, ов аракхља време те охрабринел е Павле, хем о Павле џанела сине кај шај те родел лестар помош. А сар тано авдиве? И Анџела, колакири баба сине мударди, бут ценинѓа и помош хем и утеха со добинѓа е јаверендар. Ој вакерела: „Бут тано локхо те роде помош некастар со чаче мангела те поможинел. Асавко амал тано спремно те поможинел туке секогаш, хем ни хари на мислинела пе те керел са со ваљани“. Шукар тано те пуча амен: „Сар дикхена о пхраља хем о пхења ки манде? Дали џанена кај сиум спремно те поможинав ленге ко практична начинија?“

17. Сар о лафија таро 2. Коринќаните 1:3, 4 шај те поттикнинен амен те утешина е јаверен?

¹⁷ Нане пхаро те аракха пхраља хем пхења коленге со ваљани охрабрување хем помош.  Шај те вакера ленге о иста охрабрувачка мисле со о јавера користинѓе лен те шај те утешинен амен. И Нина, јекх пхен колакири баба мули, вакерела: „Ако дозволинаја, о Јехова шај те утешинел е јаверен преку аменде“. (Читин 2. Коринќаните 1:3, 4.) И Френсис, која со сине спомними англедер, вакерела: „Чаче тано точно адава со пишинела ко 2. Коринќаните 1:4. Шај те да е јаверен и исто утеха која со амен добинѓем ла“.

18. а) Соске несавенге нане локхо те утешинен е јаверен? б) Сар шај те да чачутни утеха хем охрабрување? Вакер пример.

¹⁸ Ваљани те рода начинија те поможина е јаверенге чак кеда на сием сигурна сар те постапина. На пример, шај на џанаја со те вакера или со те кера некаске сој тано ки пхари ситуација. Јекх старешина со викинела пе Пол сетинела пе сар трудинѓе пе о јавера те утешинен ле кеда муло лескоро дад. Ов вакерела: „Дикхела пе кај на сине ленге локхо те авен хем те керен манцар лафи. На џанена сине со те вакерен манге. Сепак, бут ценинава со сине спремна те ден ман утеха хем поддршка“. Откеда доживинѓа силно земјотрес, јекх пхрал со викинела пе Таџон вакерѓа: „Те овав искрено, на сетинава ман ки секоја порака со добинѓум ла ко диве пало земјотрес. Ама, сетинава ман кај е јаверенге сине важно те џанен сар сиум“. Шај чаче те утешина е пхрален хем е пхењен ако сикаваја ленге кобор значинена аменге.

19. Соске сиан одлучно те утешине е јаверен?

¹⁹ Џикоте авела са попаше о крајо таро акава свето, о условија ка овен са полошна хем о живото ка овел са попхаро (2. Тим. 3:13). Освен адава, понадари да ка ваљани аменге охрабрување адалеске со сием несовршена хем стално грешинаја. Јекх бути со поможинѓа е Павлеске те ачховел верно е Девлеске џи ко крајо, сине о охрабрување со добинела сине таро пхраља хем пхења. Те ова амен да верна сар о Аристарх, одговорна сар о Тихик хем спремна те служина сар о Марко. Аѓаар ка шај те поможина амаре пхраленге хем пхењенге понадари да верно те служинен е Јеховаске (1. Сол. 3:2, 3).