Е Девлескере слуге шунена о начелија тари Библија кеда биринена сар ка заштитинен пе хем сар ка бранинен пе е јаверендар. Акала начелија сикавена кај тано погрешно јекх слуга е Девлескоро те овел ле оружје, сар на пример пиштоли или пушка, те шај те заштитинел пе таро јавера мануша. Размислин башо акала буќа:

О манушикано живото тано свето англо Јехова. О Давид башо Јехова пишинѓа: „Тутар авела о живото“ (Пс. 36:9). Адалеске, ако јекх слуга е Девлескоро биринела те бранинел пес или пло имот, ов ваљани те керел са со шај ма те овел виновно башо рат, или јавере лафенцар, ма те овел криво башо некаскоро мерибе (5. Мој. 22:8; Пс. 51:14).

Точно и адава кај било саво предмети со ка користинел некој те бранинел пе, шај те керел ле те овел виновно башо рат. Ама, ако иси амен оружје полокхо тано те мудара некас, сајекх дали намерно или ненамерно. * (Дикх и фуснота.) Исто аѓаар, некој со нападинела амен обично тано нервозно, хем ако дикхела оружје, и ситуација шај те овел поопасно хем некој шај те мерел.

Кеда о Исус вакерѓа пле учениконге те лен пеа мачија, ов на пхенѓа адава те шај те заштитинен пе (Лука 22:36, 38). Наместо адава, о Исус мангља те сикавел јекх бути: Лескере ученикија на ваљани те овен насилна, чак кеда против ленде авена мануша со иси лен оружје (Лука 22:52). Кеда о Петар користинѓа пло мачи те нападинел е првосвештеникоскере робо, о Исус пхенѓа леске те иранел о мачи ко тхан. Тегани о Исус вакерѓа јекх начело со водинела амен авдиве да: „Сарине со лена мачи против некасте, таро мачи ка мерен“ (Мат. 26:51, 52).

Ко Михеј 4:3 вакерела кај е Девлескоро народо „ка ковинен пумаре мачија ко плугија хем пумаре копја ко луне“. О чачутне христијања тане пенџарде сар мануша со мангена о мир. Ола шунена о заповедија со денѓа о Девел преку о апостол Павле кај на ваљани никаске те иранен лошнипаја хем те овен ко мир са е манушенцар (Рим. 12:17, 18). Иако о Павле сине ко пхаре ситуацие, сар на пример сине „ки опасност таро чора“, ов никогаш на пхагља о начелија тари Библија само кобор те заштитинел пе (2. Кор. 11:26). Наместо адава, сине ле доверба ко Девел хем џанља кај о мудро совет тари Библија тано „пошукар тари воено опрема“ (Проп. 9:18).

Е Девлескере слугенге о живото тано бут повредно таро материјална буќа. Амен џанаја кај е манушескоро живото „на авела таро буќа со иси ле“ (Лука 12:15). Ако пробинаја шукарипаја те кера лафи јекхе чореа со иси ле пиштоли ко вас, ама ов на мангела те шунел амен, тегани ка кера адава со вакерѓа о Исус: „Ма противинен тумен околеске сој лошно“. Акава шај те значинел кај ваљани те да ле са со родела (Мат. 5:39, 40; Лука 6:29). * (Дикх и  фуснота.) Џанѓола пе, најшукар тано те избегина асавке ситуацие. Јекх начин сар шај те кера адава тано ако шунаја о совет тари Библија ма те истакнина амен е буќенцар со иси амен (1. Јов. 2:16). Исто аѓаар шај те овел аменге заштита ако о комшие џанена кај сием е Јеховаскере сведокија (Изр. 18:10).

Е Девлескере слуге поштујнена и совест е јаверенгири (Рим. 14:21). Несаве пхраља хем пхења ка овен изненадиме, чак шај те сметинел лен, ако шунѓе кај јекхе пхрале иси ле оружје те заштитинел пе таро јавера. Иако шај иси амен законско право те овел амен оружје, амен мангаја амаре пхрален, адалеске никогаш нане те кера нешто со ка спотакнинел лен (1. Кор. 10:32, 33; 13:4, 5).

Е Девлескере слуге мангена те овен шукар пример е јаверенге (2. Кор. 4:2; 1. Пет. 5:2, 3). Ако јекхе пхрале иси ле оружје те шај те заштитинел пе таро јавера мануша, о старешине ка ден ле совет тари Библија. Ако одлучинела те задржинел о оружје со иси ле, тегани ов нане те овел шукар пример. Адалеске, ка нашти те овел ле одговорностија или задаче ко собрание. Исто акава важинела јекхе пхралеске со керела бути коте со мора те пхиравел пеа оружје. Ка овел пошукар ако трудинела пе те аракхел јавер бути. * (Дикх и фуснота.)

Секој коркори ваљани те анел одлука сар ка заштитинел пес, пле фамилија, пло имот, хем коте ка керел бути. Ама, кеда анаја одлуке, ваљани те овел амен ки годи о библиска начелија. Амаро мудро Девел денѓа амен акала начелија соске мангела амен. Адалеске, адала сој паше е Јеховаја биринена ма те овел лен оружје колеа со ка заштитинен пе таро јавера мануша. Ола џанена кај, ако иси лен доверба ко Девел хем ако шунена о библиска начелија, ка овен вечно безбедна (Пс. 97:10; Изр. 1:33; 2:6, 7).