1. Сави одлука ваљани те анен о терне баши пли иднина? Со шај те поможинел лен те на овен бут секириме? (Дикх и слика ко почеток тари статија.)

ТЕРНАЛЕН, сигурно ка сложинен тумен кај англедер те циден ко друмо, мудро тано те планиринен коте ка џан хем сар ка џан. О живото тано сар те циде ко јекх друмо, хем ко тернипе ваљани те планирине коте ка џа. Нане локхо те керен пе асавке планија. Јекх терни пхен со викинела пе Хедер вакерела: „Ваљани те одлучинав со ка керав џи ко крајо таро мло живото. Адава даравкерела ман“. Ако ту да осетинеа тут аѓаар, ма бистре е Јеховаскере лафија: „Ма секирин тут, соске ме сиум тло Девел. Ме ка керав тут зорало хем ка поможинав тут“ (Иса. 41:10).

2. Котар џанаја кај о Јехова мангела мудро те планирина те шај те овел амен бахтали иднина?

² О Јехова охрабринела тумен мудро те планиринен тумари иднина (Проп. 12:1; Мат. 6:20). Ов мангела те овен бахтале. Адава дикхјола пе таро буќа со створинѓа лен. О Јехова грижинела пе ко јавера да начинија,  сар на пример дела амен советија хем сикавела амен сар најшукар те живина. Адалеске, околенге со на прифатинена лескере советија, ов вакерела: „Биринѓен адава со на радујнела ман... Аке, мле слуге ка радујнен пе, а тумен ка лаџан. Аке, мле слуге ка викинен тари радост соске иси лен шукар вило“ (Иса. 65:12-14). Кеда анаја мудра одлуке ко живото, фалинаја е Јехова (Изр. 27:11).

3. Саве планија мангела о Јехова те кере?

³ Саве планија мангела о Јехова те кера? Те шај те ова бахтале, ваљани те пенџара е Јехова хем те служина леске. Ов аѓаар створинѓа е манушен (Пс. 128:1; Мат. 5:3). О животне само хана, пиена хем множинена пе. Ама, о Јехова мангела о мануша те керен планија кола со ка поможинен лен те овен бахтале хем те овел лен шукар живото. Амаро створители тано „о Девел е мангипаскоро“, „о бахтало Девел“ со керѓа е манушен „спрема пло лико“ (2. Кор. 13:11; 1. Тим. 1:11; 1. Мој. 1:27). Ту да ка ове бахтало кеда ка трудине тут те постапине сар амаро Девел сој пхердо мангипаја. Ки Библија пишинела: „Побаро бахталипе иси кеда дела пе него кеда лела пе“ (Дела 20:35). На осетинѓан ли ту да акава? Акава тано секогаш аѓаар ко живото. О Јехова мангела таро тле планија баши иднина те дикхјол кај мангеа ле хем е јаверен. (Читин Матеј 22:36-39.)

4, 5. Соске сине о Исус бахтало?

⁴ О Исус денѓа совршено пример е терненге. Џикоте сине тикно чхаво, сигурно уживинела сине те кхелел песке. Е Девлескоро Лафи вакерела кај иси „време асајбаске“ хем „време кхелибаске“ (Проп. 3:4). Исто аѓаар, о Исус уло паше е Јеховаја аѓаар со проучинела сине е Девлескоро Лафи. Кеда сине ле 12 берш, о учителија таро храми чудинѓе пе кобор хаљовела сине о буќа хем сар одговоринела сине ленге (Лука 2:42, 46, 47).

⁵ Кеда барило, о Исус керела сине адава со родинѓа лестар о Девел хем адалеске сине бахтало. На пример, о Јехова мангља ов „те вакерел о шукар хабери е чороленге“ хем те вакерел кај „о короле палем ка дикхен“ (Лука 4:18). Ко Псалм 40:8 пишинела сар осетинела пе о Исус: „Задоволство манге Девла те керав тли волја“. О Исус уживинела сине те сикавел е јаверен башо пло Дад. (Читин Лука 10:21.) Јекх пути, кеда керѓа лафи јекхе џувљаја башо адава сар ваљани те обожавинел пе о Девел, о Исус вакерѓа пле учениконге: „Мло хајбе тано те керав и волја околескири со бичхалѓа ман хем целосно те завршинав и бути со денѓа ла манге“ (Јован 4:31-34). О Исус сине бахтало адалеске со сикавѓа кај мангела пле Даде хем е јаверен. Ако кереа адава, ту да ка ове бахтало.

6. Соске тано шукар те кере лафи е јаверенцар башо адава со планиринеа ки иднина?

⁶ Бут слуге е Девлескере почминѓе е пионерско службаја панда сар терне хем адава керѓа лен бахтале. Шај ли те кере ленцар лафи башо тле планија?  Адава ка овел шукар соске и Библија вакерела: „О планија на успејнена кеда на керела пе искрено лафи, а успејнена кеда иси бут советникија“ (Изр. 15:22). Акала пхраља хем пхења шај те вакерен туке кај и пионерско служба ка сикавел тут бут буќа кола со ка користинен туке ко живото. О Исус сиклило бут буќа таро пло Дад кеда сине ко небо. Кеда ало теле ки Пхув, ов понадари да сикљовела сине. Ов сиклило кобор шај те овел некој бахтало кеда вакерела о шукар хабери е јаверенге хем кеда ачховела верно е Девлеске ко пхаре ситуацие. (Читин Исаија 50:4; Евреите 5:8; 12:2.) Те дикха соске и полновремено служба шај те керел тут бахтало.

7. Соске бут терне уживинена џикоте сикавена е јаверен башо Јехова?

⁷ О Исус вакерѓа аменге те кера ученикија хем те сикава е манушен (Мат. 28:19, 20). Ако планиринеа те ове ки полновремено служба, ка овел тут шукар живото колеа со ка фалине е Девле. Исто сар секоле јавере буќаја, ваљани туке време те сикљове шукар те проповедине. Јекх пхрал со викинела пе Тимотеј почминѓа е пионерско службаја панда џикоте сине тинејџери. Ов вакерела: „Мангава и полновремено служба адалеске со поможинела ман те сикавав е Јеховаске кобор мангава ле. Ко почеток, нашти сине те почминав нијекх библиско курси, ама пало несаво време селинѓум ма ко јавер тхан хем башо јекх масек почминѓум некобор библиска курсија. Јекх таро интересентија почминѓа те авел ко состанокија. Пало адава, сиум сине ки Библиско школа башо бижениме пхраља која со икерѓа пе дуј масек, хем бичхалѓе ма ко јавер тхан коте со почминѓум штар библиска курсија. Уживинава кеда сикавава е јаверен, адалеске со дикхава сар о свети дух поможинела ленге те менинен пе“ * (Дикх и фуснота.) (1. Сол. 2:19).

8. Со керѓе несаве терне те шај те проповединен повише манушенге?

⁸ Несаве терне сиклиле јавер чхиб. На пример, о Јаков тари Северно Америка пишинѓа: „Кеда сине ман ефта берш, бут чхаве со учинѓум ленцар сине Виетнамција. Мангава сине те вакерав ленге башо Јехова, адалеске пало несаво време почминѓум те сикљовав ленгири чхиб. Највише сиклиљум аѓаар со спорединава сине и англиско хем и виетнамско Стражарско кула. Исто аѓаар, уљум амал е пхраленцар таро јекх виетнамско собрание со сине манге паше. Кеда сине ман 18 берш, уљум пионери. Пало адава, гељум ки Библиско школа башо бижениме пхраља. Акава поможинѓа ман пошукар те служинав ки пионерско служба хем ки јекх група ки виетнамско чхиб коте со служинава коркори сар старешина. Бут Виетнамција тане изненадиме со сиклиљум ленгири чхиб. Ола викинена ман песте кхере хем бут пути почминѓум те проучинав и Библија ленцар. Несаве лендар уле е Јеховаскере сведокија“. (Споредин Дела 2:7, 8.)

9. Со сикљоваја кеда сикаваја е јаверен башо Јехова?

⁹ Кеда сикавеа е манушен башо чачипе, сикљовеа те ове буќарно, шукар  те кере лафи е јаверенцар, овеа посигурно ки туте хем сикљовеа те ове тактично (Изр. 21:5; 2. Тим. 2:24). А посебно керела тут бахтало адава со сикљовеа сар е Библијаја те сикаве е јаверенге ко со верујнеа. Исто аѓаар, сикљовеа сар пошукар те соработине е Јеховаја (1. Кор. 3:9).

10. Сар шај те радујне тут ки служба чак кеда ко тло подрачје нане бут мануша со мангена те проучинен и Библија?

¹⁰ Шај те ове бахтало кеда проповединеа чак кеда ко подрачје нане бут мануша со мангена те проучинен и Библија. Те шај те керел пе ученикија, цело собрание ваљани те керел бути сар јекх тими. Иако само јекх пхрал или пхен шај ка аракхен несаве мануше со ка овел е Јеховаскоро слуга, радујнаја амен соске сарине учествујнѓем ко подрачје те рода ученикија. На пример, о Брендон, ења берш служинѓа сар пионери ко подрачје коте со бут мануша на мангле те проучинен и Библија хем ов вакерела: „Мангава те вакерав башо шукар хабери соске о Јехова родела амендар адава. Кеда завршинѓум е школаја уљум пионери. Уживинава те охрабринав е тернен таро амаро собрание хем те дикхав сар духовно напредујнена. Кеда гељум ки Библиско школа башо бижениме пхраља, пало адава сиум сине бичхалдо те служинав сар пионери ко јавер тхан. Ме на аракхљум нијекхе ко подрачје со напредујнѓа хем крстинѓа пе, ама јавера аракхле. Радујнава ма со чхивѓум манге цел те овав ки полновремено служба“ (Проп. 11:6).

11. Ки сави служба уживинена бут терне?

¹¹ Шај те служине е Јеховаске ко различна начинија. На пример, бут терне поможинена ко градежна проектија ки амари организација. Ваљани те градинен пе панда бут дворане. Акала тхана фалинена е Јехова, адалеске ка ове бут бахтало ако поможинѓан те градинен пе. Исто аѓаар, ка уживине те кере бути заедно е пхраленцар хем пхењенцар. Ка сикљове бут буќа, на пример сар шај шукар хем безбедно те завршине и бути хем сар те соработине е надгледниконцар.

12. Сар и пионерско служба пхравела аменге јавера прилике служибаске?

¹² Јекх пхрал со викинела пе Кевин вакерела: „Панда таро тикнипа, мангљум полновремено те служинав е Јеховаске. Кеда пхерѓум 19 берш, уљум пионери. Керава сине похари саатија бути ко јекх пхрал со сине градежнико. Сиклиљум сар те местинав кровија, пенџерке хем удара. Пало адава, дуј берш служинѓум ко јекх тими со поможинела кеда иси ураганија аѓаар со попрајнела о дворане хем о кхера е пхраленгере. Кеда шунѓум кај ваљани доброволција градибаске ки Јужноафриканско Република, денѓум молба хем викинѓе ман те џав адари. Акате ки Африка, кеда башо некобор курке ка завршина јекх дворана, селинаја  амен ко јавер тхан коте со иси потреба те градинел пе јавер дворана. И група башо градибе тани сар јекх фамилија. Кераја са заедно, заедно проучинаја и Библија хем кераја бути. Исто аѓаар, уживинава со шај секова курко те проповединав е пхраленцар таро тхан коте со градинаја. О планија со сине ман панда сар тикно, керѓе те овел ман бахтало живото“.

13. Соске бут терне тане бахтале со служинена е Јеховаске ко Бетел?

¹³ Несаве со сине пионерија акана служинена ко Бетел. Окола со служинена ко Бетел тане бут бахтале, соске са со керена адари тано башо Јехова. Ко Бетел керена пе Библие хем публикацие со поможинена е манушенге те сикљовен башо чачипе. О Дастин, кова со служинела ко Бетел, вакерела: „Кеда сине ман ења берш, чхивѓум манге цел те овав ки полновремено служба, хем кеда завршинѓум е школаја, уљум пионери. Пало берш текваш, викинѓе ман ко Бетел, хем адари сиклиљум те керав бути ки машина штампибаске, а пало адава сиклиљум сар те керав компјутерска програме. Уживинава со ко Бетел шај директно те шунав сар напредујнела о проповедибе ко цело свето. Мангава те служинав акате соске адава поможинела е манушенге те овен попаше е Јеховаја“.

14. Сар шај те спремине тут баши полновремено служба?

¹⁴ Сар шај те спремине тут баши полновремено служба? Те служине е Јеховаске најшукар со шај, ваљани туке христијанска особине. Редовно проучин е Девлескоро Лафи, хор размислин башо адава со читинеа хем трудин ту те сикаве тли вера ко состанокија. Џикоте џаја ки школа, шај те сикљове сар пошукар те кере лафи е јаверенцар башо шукар хабери. Сикљов те сикаве искрено интерес е јаверенге аѓаар со тактично ка пуче лен со мислинена хем пало адава шукар ка шуне лен џикоте одговоринена. Исто аѓаар, де тут ко располагање те поможине ко собрание, на пример те чистинел пе или те попрајнел пе нешто ки дворана. О Јехова мангела те користинел околен сој понизна хем спремна те служинен. (Читин Псалм 110:3; Дела 6:1-3.) О апостол Павле викинѓа е Тимотеје те служинел сар мисионери соске о пхраља вакерена сине шукар буќа баши лесте (Дела 16:1-5).

15. Со ка поможинел тут те аракхе бути џикоте служинеа сар пионери?

¹⁵ Бут џене сој ки полновремено служба ваљани те керен бути (Дела 18:2, 3). Шај те џа ко несаво кратко курси со ка поможинел тут те кере бути џикоте служинеа сар пионери. Кер лафи е покраинско надгледникоја хем јавере пионеренцар башо тле планија, хем пуч лен башо несаве предлогија. Пало адава, сар со пишинела ки Библија, „мукх е Јеховаске ко васта са со кереа, хем тле планија ка успејнен“ (Изр. 16:3; 20:18).

16. Сар шај и полновремено служба те спреминел тут башо јавера одговорностија ки иднина?

¹⁶ Шај те ове уверимо кај о Јехова мангела те овел тут бахтали иднина. (Читин 1. Тимотеј 6:18, 19.) И полновремено служба ка поможинел тут те ове зрело христијани џикоте соработинеа е јавере полновремена слугенцар. Исто аѓаар, бут џене халиле кај адава со почминѓе панда сар терне ки полновремено служба, поможинѓа ленге пало адава кеда кхувѓе ко брако. Бут пути, адала со сине пионерија џикоте сине коркори, на чхинавѓе е пионерско службаја кеда кхувѓе ко брако (Рим. 16:3, 4).

17, 18. Сар о планија со кереа тане поврзиме тле вилеа?

¹⁷ Ко Псалм 20:4 башо Јехова пишинела: „Нека дел тут спрема о желбе тле вилескере, хем нека исполнинел са тле планија“. Џикоте планиринеа тли иднина, размислин со чаче мангеа те кере тле животоја. Размислин башо буќа со керела лен о Јехова ко амаро време, хем сар шај те служине леске. Пало адава, планирин те кере адава сој леске ки волја.

¹⁸ Кеда користинеа тло живото те служине е Јеховаске полновремено хем фалинеа ле, ка ове бут бахтало. Ако о Јехова тано тли радост, тегани „ка добине лестар со мангела тло вило“ (Пс. 37:4).