1. Сави природно желба иси саринен?

САР ка осетине тут ако некој со пенџареа ле хем поштујнеа ле бистрела тло анав или, панда полошно, ни на пенџарела тут? Акава шај бут те разочаринел тут. Соске? Адалеске со секоле јекхе амендар иси ле природно желба те овел прифатимо хем ценимо таро јавера. Исто аѓаар, мангаја те џанен саве мануша сием хем те ценинен адава со кераја (4. Мој. 11:16; Јов 31:6).

2, 3. Со шај те случинел пе амаре природно желбаја те ова прифатиме хем цениме таро јавера? (Дикх и слика ко почеток тари статија.)

² Ама, ако на пазинаја, акаја природно желба шај те развијнел пе ко погрешно начин хем те овел амен погрешно желба те манга те ова славна хем важна. Е Сатанаскоро свето мангела те керел те овел амен асавки желба. Ако мукхаја асавки желба те овел ки аменде, нане те да амаре Дадеске сој ко небо, е Јеховаске, и слава хем и чест која со само ов заслужинела ла (Отк. 4:11).

 ³ Ко време е Исусескоро, несаве верска водачија мангена сине те овен пенџарде хем о јавера те сикавен ленге бут бари чест. О Исус предупрединѓа пле ученикон: „Аракхен тумен таро книжникија кола со мангена те пхирен ко дугачка шеја хем кола со мангена те поздравинен лен ко плоштадија хем те бешен ко најшукар тхана ко синагоге хем ко најугледна тхана ко вечере“. Пало адава вакерѓа: „Ола ка овен казниме повише него о јавера“ (Лука 20:46, 47). Ама, ов фалинѓа јекхе чороле удовица која со мукхља дуј тикне паре кеда веројатно никој јавер на дикхља адава (Лука 21:1-4). Акалеа о Исус сикавѓа кова тано о исправно стави башо адава кастар ваљани те овел аменге најважно те добина чест. Акаја статија ка поможинел аменге те овел амен о исправно стави, сар со мангела о Јехова.

4. Која тани и најважно чест хем соске?

⁴ Бут мануша трудинена пе те добинен чест адалеа со ка завршинен бари школа, ка овел лен успешно кариера или адалеа со ка овен славна ко свето е забавакоро. Ама, дали асавки чест тани најважно? О Павле објаснинѓа која чест тани најважно кеда вакерѓа: „Акана кеда пенџарѓен е Девле уствари, акана кеда о Девел пенџарѓа тумен, сар шај палем те иранен тумен ко основна буќа со нане лен нисави корист хем мангена палем те овен ленге робија?“ (Гал. 4:9). Аменге тани бут бари чест те пенџарел амен о Девел, о Најбаро Владетели ко универзум! О Јехова џанела кој сием амен, ов мангела амен хем мангела те ова паше леа. Ов створинѓа амен те ова лескере амала (Проп. 12:13, 14).

5. Со мора те кера те шај те пенџарел амен о Јехова?

⁵ Џанаја кај о Мојсеј сине е Јеховаскоро амал. Кеда молинѓа е Јехова: „Вакер манге, молинава тут, башо тле друмија“, о Јехова одговоринѓа леске: „Акава да ка керав со родинѓан, соске аракхљан милост ко ме јакхја хем пенџарава тут шукар“ (2. Мој. 33:12-17). О Јехова шај амен да лично те пенџарел амен. Ама, со мора те кера те шај те ова лескере амала? Мора те манга ле хем те да лафи кај цело живото ка служина леске. (Читин 1. Коринќаните 8:3.)

6, 7. Со шај те анел џи ко адава те нашава амаро амалипе е Јеховаја?

⁶ Ама, ваљани те аракха амаро скапоцено амалипе амаре Дадеа сој ко небо. Исто сар о христијања таро прво веко ки Галатија, амен да ваљани те чхинава те ова робија е основна буќенге таро акава свето со нане лен нисави корист, коте сој вклучиме о успех хем и слава со дела акава свето (Гал. 4:9). О пхраља тари Галатија пенџарена сине више е Девле, а исто аѓаар о Девел да више пенџарела лен сине. Ама, о Павле вакерѓа кај адала иста пхраља палем иранѓе пе ко буќа со нане лен нисави корист. Јавере лафенцар, ов пучља лен: „Соске иранѓен тумен ко иста глупава буќа со нане лен нисави корист хем почминѓен те овен ленге робија?“

⁷ Дали шај акава те случинел пе аменцар да? Оја. Слично сар о Павле, кеда улем е Јеховаскере сведокија, шај откажинѓем амен тари слава или успех ко свето е Сатанаскоро. (Читин Филипјаните 3:7, 8.) Шај сине амен  прилика те џа ки побари школа, те овел амен шукар бути или те заработина бут паре. Или шај сине амен прилика те ова барвале или славна адалеске со иси амен таленти баши музика или спорт. Ама, амен откажинѓем амен таро са адава (Евр. 11:24-27). Нане те овел мудро ако жалинаја башо адала одлуке со анѓем лен хем те мислина аменге кај ка овел амен сине пошукар живото ако на мукхаја сине адала прилике. Асавко размислување шај те теринел амен те ирана амен ко буќа таро акава свето, буќа кола со англедер више одлучинѓем кај нане лен нисави вредност.

8. Која тани јекх бути со ка поможинел аменге те ова панда поодлучна те добина чест таро Јехова?

⁸ Со ка поможинел аменге те ова панда поодлучна те добина чест таро Јехова, а на таро акава свето? На ваљани те бистра дуј важна чачипа. Прво, о Јехова секогаш ценинела хем наградинела околен со служинена леске верно. (Читин Евреите 6:10; 11:6.) О Јехова ценинела секоле пле слуга хем леске тано неправедно те бистрел околен сој верна. О Јехова секогаш пенџарела „околен сој лескере“ (2. Тим. 2:19). Ов „џанела о друмо е праведниконгоро“ хем џанела сар те спасинел лен (Пс. 1:6; 2. Пет. 2:9).

9. Вакер примерија сар о Јехова сикавѓа кај ценинела пле народо.

⁹ Ко несаве случаија, о Јехова ко посебна начинија сикавѓа кај ценинела пле народо (2. Лет. 20:20, 29). На пример, размислин башо начин сар о Јехова спасинѓа пле народо ко Црвено Море кеда и моќно војска е фараонескири гели пали ленде те астарел лен (2. Мој. 14:21-30; Пс. 106:9-11). Акава настан добором влијајнѓа упро мануша таро адава дело таро свето, со 40 берш пало адава панда керена сине лафи баши лесте (Ис. Нав. 2:9-11). Панда хари, о Гог таро Магог ка нападинел амен. Адалеске тано шукар ако размислинаја сар о Јехова сикавѓа мангипе пле народоске хем сар користинѓа пли сила те спасинел лен (Езек. 38:8-12). Ко адава време, ка ова бут бахтале со сине аменге најважно те ова одобриме таро Девел, а на таро акава свето.

10. Кова тано о дујто чачипе со на ваљани те бистра ле?

¹⁰ О дујто чачипе со на ваљани те бистра тано кај о Јехова шај те сикавел аменге кај ценинела амен ко начин со на аџикераја ле. Ако о мануша керена шукар буќа само те шај о јавера те фалинен лен, нане те добинен награда таро Јехова. Соске? Адалеске со ола више добинѓе пли награда кеда о јавера фалинѓе лен. (Читин Матеј 6:1-5.) Тари јавер страна, о Исус вакерѓа кај о Јехова дикхела околен со нане ленге сикавди чест башо шукарипе со керѓе е јаверенге. Ов дикхела со керена ола хем наградинела лен, или дела лен берекетија. А понекогаш, о Јехова наградинела пле слуген  ко начин со на аџикерена ле. Те дикха несаве примерија.

11. Сар сикавѓа о Јехова чест е Маријаке?

¹¹ О Јехова биринѓа јекхе понизно терне чхаја, е Марија, те овел дај лескере Чхавеске, е Исусеске. И Марија живинела сине ки јекх тикни диз Назарет, дур таро Ерусалим хем таро шужо храми. (Читин Лука 1:26-33.) Соске о Јехова биринѓа е Марија? О ангели о Гавриел вакерѓа лаке: „Аракхљан милост англо Девел“. И Марија сине бут паше е Јеховаја. Адава дикхела пе таро лафија со вакерѓа лен е Елисаветаке, која со сине лаке фамилија (Лука 1:46-55). О Јехова дикхела сине е Марија, хем адалеске со сине леске верно, ов денѓа ла берекети со на аџикерѓа ле.

12, 13. Сар сине сикавди чест е Исусеске кеда бијандило хем саранда диве пало адава кеда и Марија ингарѓа ле ко храми?

¹² Кеда и Марија бијанѓа е Исусе, о Јехова на вакерѓа нијекхе владетелеске башо адава, а ни несаве угледно манушеске. Наместо адава, о Јехова бичхалѓа ангелија ко понизна овчарија, кола со аракхена сине пле бакхрен аври таро Витлеем (Лука 2:8-14). Пало адава, акала овчарија посетинѓе акале бебе (Лука 2:15-17). И Марија хем о Јосиф сигурно сине изненадиме со о Јехова сикавѓа е Исусеске асавки чест. Размислин кобор бут разликујнела пе е Јеховаскоро начин сар керела о буќа таро е Сатанаскоро начин. Кеда о Сатана бичхалѓа астролозен те посетинен е Исусе хем лескере родителен, сарине ко Ерусалим шунѓе кај о Исус бијандило хем адава керѓа бут проблемија (Мат. 2:3). Адалеске, пало адава сине мударде бут тикне чхаве (Мат. 2:16).

¹³ Откеда јекх џувли ка бијанел сине мурш чхаво, спрема е Јеховаскоро закони ој ваљани сине пало саранда диве те дел жртва е Јеховаске. Адалеске и Марија, о Јосиф хем о Исус геле ко храми ко Ерусалим, кова со сине дур отприлика ења километре (Лука 2:22-24). Ко друмо, и Марија шај пучела пе сине дали о свештенико  ка керел нешто посебно те шај те сикавел чест е Исусеске. Е Исусеске сине сикавди чест, ама на аѓаар сар со мислинѓа песке и Марија. О Јехова биринѓа е Симеоне, праведно мануш со дарала сине таро Девел, хем е пророчица е Ана, удовица кола со сине ла 84 берш, те вакерен кај о Исус ка овел о ветимо Месија, или о Христос (Лука 2:25-38).

14. Сар наградинѓа о Јехова е Марија?

¹⁴ Дали о Јехова понадари да сикавѓа чест е Маријаке адалеске со верно грижинела пе сине е Исусеске џикоте ов бајровела сине? Оја. О Девел мукхља те овен пишиме ки Библија несаве буќа со керѓа хем со вакерѓа и Марија. Веројатно ој нашти сине те патујнел е Исусеа џикоте ов проповединела сине трин текваш берш. Шај адалеске со сине удовица, ој ачхили ко Назарет. Адалеске, на доживинѓа бут таро шуже искуствија со о јавера доживинѓе лен. Ама, ој сине узо Исус кеда ов муло (Јован 19:26). Пало адава, ки Педесетница 33 берш а.е., и Марија сине ко Ерусалим заедно е Исусескере учениконцар англедер те добинен о свети дух (Дела 1:13, 14). Ки адаја прилика, веројатно ој да сине помазими свети духоја заедно е јавере учениконцар. Ако сине аѓаар, адава значинела кај ој да добинѓа прилика те овел заедно е Исусеа вечно ко небо. Акаја тани сигурно бут шужи награда баши лакири верно служба!

15. Сар сикавѓа о Јехова чест е Исусеске кеда сине ки Пхув?

¹⁵ О Исус на мангља те добинел чест таро верска или политичка водачија. Ама, сигурно сине бут охрабримо кеда о Јехова трин пути директно керѓа лафи таро небо хем адалеа сикавѓа леске кај мангела ле. Одма откеда о Исус крстинѓа пе ки река Јордан, о Јехова вакерѓа: „Акава тано мло мангло Чхаво, кова со керела ман бахтало“ (Мат. 3:17). Изгледа, освен о Исус, само о Јован Крстител шунѓа акала лафија. Пало адава, отприлика јекх берш англедер те мерел о Исус, трин таро лескере апостолија шунѓе сар  о Јехова вакерела е Исусеске: „Акава тано мло мангло Чхаво, кова со керела ман бахтало! Лесте шунен ле!“ (Мат. 17:5). Хем ко крајо, само некобор диве англедер те мерел, о Јехова палем керѓа лафи таро небо пле Чхавеа (Јован 12:28).

16, 17. Сар о Јехова денѓа чест е Исусеске ко начин со на аџикерѓа ле?

¹⁶ О Исус џанља кај о мануша ка вакерен леске кај ов вреџинѓа е Девле хем кај аџикерела ле мерибе со ка анел лаџ. Ама, ов молинѓа пе те овел е Девлескири волја, а на лескири (Мат. 26:39, 42). О Исус истрајнѓа ко „стубо мучибаске хем на мислинѓа ки лаџ“, соске мангља те добинел чест таро Девел, а на таро свето (Евр. 12:2). Сар наградинѓа о Јехова е Исусе?

¹⁷ Џикоте о Исус сине ки Пхув, ов молинѓа пе те овел ле и слава со сине ле англедер кеда сине ко небо пле Дадеа (Јован 17:5). Ама, ки Библија нигде на пишинела кај о Исус надинела пе сине те добинел нешто повише таро адава. Ов на аџикерѓа несави посебно награда башо адава со керѓа е Јеховаскири волја ки Пхув. Ама со керѓа о Јехова? Ов сикавѓа чест е Исусеске ко начин со на аџикерѓа ле. Кеда воскреснинѓа ле, о Јехова денѓа ле побари положба ко небо него со сине ле англедер. Ов исто аѓаар, денѓа ле нешто со никој јавер џи тегани на добинѓа — бесмртно живото ко небо! * (Дикх и фуснота.) (Фил. 2:9; 1. Тим. 6:16). Адава сине чаче бут шужи награда баши е Исусескири верност!

18. Со ка поможинел аменге те ова панда поодлучна те добина чест таро Јехова, а на таро свето?

¹⁸ Со ка поможинел аменге те ова панда поодлучна те добина чест таро Јехова, а на таро свето? Ваљани те на бистра кај о Јехова секогаш ценинела пле верна слуген хем бут пути наградинела лен ко начин со на аџикерена ле. Нашти ни те замислина аменге ко кола начинија о Јехова ка наградинел амен ко време со авела! Ама џи тегани, џикоте трпинаја о проблемија хем о пхарипа ко акава лошно свето, на ваљани те бистра кај акава свето панда хари ка накхел. Исто аѓаар, секоја чест со авела таро свето ка накхел (1. Јов. 2:17). Тари јавер страна, амаро Дад со грижинела пе аменге, о Јехова, нане те бистрел адава со керѓем хем о мангипе со сикавѓем лескере анавеске, соске „ов нане неправедно“ (Евр. 6:10). Ов сигурно ка наградинел амен — чак шај ко начинија кола со никогаш ни на мислинѓем аменге!