Сар те проучине и Библија пошукар хем повише те уживине ко адава

МУКХ

О ИСУС НАВИН ваљани сине те водинел е Израелцон ки Ветими пхув. Адаја сине бут пхари задача. Ама, о Јехова охрабринѓа ле е лафенцар: „Ов храбро хем бут зорало“. Исто аѓаар вакерѓа леске кај ако читинела хем шунела о Закони, тегани ка анел мудра одлуке хем ка овел успешно ки пли задача (Ис. Нав. 1:7, 8).

Амен живинаја ко „бут пхаро време“ хем амаро да живото шај те овел бут пхаро (2. Тим. 3:1). Ако мангаја те ова успешна сар о Исус Навин, амен да ваљани те шуна о совет со денѓа леске о Јехова. Ваљани редовно те читина и Библија хем те применина адава со сикљоваја те шај те ана мудра одлуке.

Ама, несаве амендар шај на џанена сар те проучинен, или на уживинена ко адава. Ама, те проучинел пе и Библија тано бут важно. Ки рамка „ Пробин акала предлогија“ ка аракхе практична идее со ка поможинен туке те овел тут побари корист таро проучибе хем те уживине ко адава.

О псалмисти пишинѓа: „Водин ман ко друмо тле заповеденгоро, соске уживинава ки лесте“ (Пс. 119:35). Ту да шај те уживине џикоте проучинеа е Девлескоро Лафи. Ка аракхе бут скапоцено духовно барвалипе џикоте проучинеа и Библија.

Иако на ваљани те водине цело народо сар со керѓа о Исус Навин, ама туте да иси тут тло пхарипа. Адалеске, исто сар о Исус Навин, проучин е Девлескоро Лафи хем применин адава со сикљовеа ле. Ако кереа адава, ка ане мудра одлуке хем ка ове успешно ко живото.

ПРОБИН АКАЛА ПРЕДЛОГИЈА

Молин тут англедер те проучине. Ки Библија тане пишиме е Јеховаскере мисле хем ола тане пишиме башо тло шукарипе. Адалеске, кеда читинеа и Библија, молин е Јехова те хаљове, те памтине хем те користине адава те шај те ане мудра одлуке ко тло живото (Езра 7:10).
Пуч тут пучиба. Џикоте читинеа и Библија или о библиска публикацие, пуч тут: „Со сикљовава таро акава башо Јехова? Сар тано акава поврзимо е главно темаја тари Библија? Сар шај те користинав акала мисле те шај те поможинав е јаверенге?“
Размислин башо адава со проучинеа. Ачхов хари хем размислин башо адава со читинѓан. Пуч тут: „Сар керела те осетинав ман акава со читинѓум? Соске осетинава ман аѓаар? Сар шај сине те применинав акала информацие ко несаве ситуацие англедер, хем сар шај те применинав лен акана хем ки иднина? Сар шај те применинав акала библиска начелија или акава совет ко мло живото?“ (Јов 23:5; Пс. 49:3). Трудин тут те хаљове соске о Јехова предупрединѓа пле слуген те на керен несаве буќа. Или, размислин со ка овел сине ако и личност колаке со читинеа постапинела сине појавер ки адаја ситуација (5. Мој. 32:28, 29).
Замислин туке о буќа џикоте читинеа. На пример, шај ли те замислине туке и ситуација кеда е Јосифескере пхраља бикинѓе ле е Исмаелцонге? (1. Мој. 37:18-28). Со дикхеа, со шунеа хем саво мирис осетинеа? Чхив тут ко тхан е манушенгоро башо кола со читинеа. Со размислинена сине хем сар осетинена пе сине? Кеда замислинеа туке о буќа, ка овел тут побари корист таро проучибе.
Користин о алатке проучибаске кола со дела амен амари организација те шај повише те уживина ко проучибе. Сикљов сар те користине акала алатке со иси ки тли чхиб или ки чхиб со хаљовеа ла, хем ко електронско хем ко печатимо облик. Ма лаџа те пуче е јаверен те поможинен туке те сикљове сар пошукар те користине лен. На пример, о Прирачникот за истражување на публикациите на Јеховините сведоци ка поможинел туке те аракхе бут информацие баши разна теме хем објаснинела бут библиска стихија. Користин и брошурка Да ја истражуваме Божјата Реч. Лате иси географска карте, хронолошко редослед сар случинѓе пе о буќа, единице меркаке хем корисна информацие башо јавера теме.
Повторин о главна мисле. Акава ка поможинел туке те памтине адава со проучинѓан. Исто аѓаар, бут ка поможинел туке адава со ка кере лафи некасаја башо адава со сиклиљан. Дали шај те користине нешто таро адава ки служба? Ако кереа са акава, ка памтине о главна мисле, ама е јаверен да ка овел лен корист таро тло проучибе.