КИ БИБЛИЈА читинаја башо верна слуге е Девлескере колен со сине лен „иста чувствија сар амен“ (Јак. 5:17, фус.). На пример, локхе шај те хаљова со мангља те вакерел о Павле кеда ко Римјаните 7:21-24 пишинѓа: „Кеда мангава те керав адава сој шукар, о лошно тано ки манде... Жалибаске сиум ме!“ Бут охрабринела амен адава со о Павле вакерѓа пле чувствија ко асавко начин, соске адалеа хаљоваја кај на сием само амен адала со боринаја амен против амари несовршеност.

О Павле исто аѓаар керела сине лафи башо јавера да чувствија со сине ле. Ов вакерѓа: „О Чхаво е Девлескоро... мангља ман хем денѓа пло живото баши манде“ (Гал. 2:20). О Павле сине целосно уверимо ко адава. Дали ту да осетинеа тут аѓаар? Шај на секогаш.

Ако осетинеа тут лошно баши несаве гревија со керѓан лен англедер, шај нане туке локхо те прифатине кај о Јехова мангела тут хем кај простинѓа туке. Исто аѓаар, шај туке пхаро те дикхе ки откупнина сар поклон сој дендо туке лично. Ама, дали о Исус мангела те дикха ки откупнина сар јекх асавко поклон? Ако оја, тегани со шај те поможинел амен те кера адава? Те дикха акала дуј пучиба.

О Исус мангела те дикха ки лескири жртва сар поклон кова сој дендо лично аменге. Соске шај те ова сигурна ко адава? Пробин те замислине туке адава сој пишимо ко Лука 23:39-43. Јекх мануш сој ковимо узо Исус ко стубо, признајнела кај керѓа нешто бут лошно. Сигурно керела пе сине лафи башо нешто сериозно, соске ко асавко сурово мерибе сине осудиме само мануша кола со керѓе бут лошна буќа. Адалеске сој тано ки асавки пхари ситуација, акава мануш тано бут вознемиримо хем молинела е Исусе: „Сетин тут ки манде кеда ка ове Цари“.

Со керѓа о Исус? Иако сине ле баре дукха, иранѓа пло шеро ки лесте те шај те дикхел ле ко јакхја. Кхединѓа сила, љубезно асандило хем утешно гласоја вакерѓа леске: „Чаче вакерава туке авдиве, ту ка ове манцар ко рај“. О Исус шај сине те вакерел е манушеске кај о манушикано Чхаво ало „те дел пло живото сар откупнина буте џененге“ (Мат. 20:28). Ама, о Исус на керѓа адава. Приметинѓан ли сар о Исус сикавѓа кај лескири жртва тани поклон кова сој дендо башо адава мануш? Адалеа со љубезно вакерѓа леске „ту ка ове манцар“. Освен адава, о Исус истакнинѓа кај акале криминалцо ка овел ле лично корист тари лескири жртва — ка шај те живинел ко рај ки Пхув.

О Исус мангља акава мануш те прифатинел лескири жртва сар поклон кова со ка овел дендо леске лично. Ако е Исусе сине ле асавко стави спрема јекх криминалцо кова со ни на почминѓа те служинел е Девлеске, кобор повише адава важинела башо јекх крстимо христијани кова со више служинела е Девлеске. Ама, со шај те поможинел аменге те дикха ко асавко начин ки е Христосескири жртва иако керѓем гревија англедер?

Адалеске со о Исус денѓа задача е Павлеске те проповединел, ов сине уверимо кај о Исус муло леске да. О Павле објаснинѓа: „Благодарно сиум е Христос Исусеске, амаро Господари, кова со денѓа ман сила, соске дикхља ки манде сар верно хем денѓа ман служба, иако англедер сиум сине хулители, прогонинава сине лескере народо хем сиум сине дрско мануш“ (1. Тим. 1:12-14). Адалеске со о Павле добинѓа асавки задача иако англедер керела сине бут лошна буќа, ов сине уверимо кај о Исус мангела ле, сикавела леске милост хем иси ле доверба ки лесте. Слично, о Исус секаске амендар денѓа задача те проповедина (Мат. 28:19, 20). Дали адава шај те уверинел амен кај ов муло лично аменге да?

О Алберти, кова со сигенде иранѓа пе ко Јехова откеда сине исклучимо скоро 34 берш вакерела: „Нашти те бистрав о гревија кола со керѓум лен англедер. Ама, кеда сиум ки служба, исто сар о апостол Павле манде да иси ман чувство кај адаја задача добинѓум ла таро Исус. Адава охрабринела ман хем поможинела манге те дикхав позитивно ки манде, ко мло живото хем ки мли иднина“ (Пс. 51:3).

О Алени кова со англедер те шунел башо чачипе сине насилно криминалцо, вакерела: „Нашти те бистрав о лошна буќа со керава сине е манушенге. Адалеске, понекогаш осетинава ман разочаримо. Ама, благодарно сиум е Јеховаске со дозволинела јекх грешнико сар манде те вакерел о шукар хабери е јаверенге. Кеда дикхава сар реагиринена о мануша ко шукар хабери, мислинава ко адава кобор тано шукар о Јехова хем кобор мангела амен. Осетинава кај користинела ман те шај те поможинав е манушенге кола со иси лен слично живото сар со сине ман“.

Кеда сием ки служба, иси амен позитивна мисле соске џанаја кај кераја нешто сој шукар. Адава уверинела амен кај о Исус сикавела аменге мангипе, милост хем доверба.

Са џикоте трајнела акава лошно свето, амаро вило шај те осудинел амен башо гревија со керѓем лен англедер. Со шај те поможинел аменге те борина амен асавке чувствонцар?

И Џин која со бут пути осетинела пе криво башо адава со живинела сине дволично живото кеда сине потерни, вакерела: „Охрабринела ман адава со ’о Девел тано побаро таро амаро вило‘“ (1. Јов. 3:19, 20). Исто сар и Џин, амен да шај те утешинел амен адава со џанаја кај о Јехова хем о Исус хаљовена кај сием грешна. Ма те бистра кај ола мангипаја денѓе откупнина на башо совршена мануша, него башо грешникија кола со каинена пе (1. Тим. 1:15).

Уверинаја амен кај и откупнина тани поклон сој дендо лично аменге кеда хор размислинаја башо адава сар о Исус постапинѓа е несовршена манушенцар хем кеда даја са амендар те кера и служба сој аменге денди. Тегани амен да, исто сар о Павле, шај те вакера: О Исус „мангља ман хем денѓа пло живото баши манде“.