1. Сави промена ули ко последна берша?

ВЕКОНЦАР англедер, побаро дело таро мануша ко свето сине ки несави религија. Ама, ко последна берша ули јекх бари промена — са повише мануша вакерена кај нане религиозна. * Уствари, ко несаве пхувја побаро дело таро мануша вакерена кај нане дело тари нијекх религија * (Мат. 24:12).

2. Таро кола причине иси са повише мануша кола со нане религиозна?

² Соске иси са повише мануша кола со вакерена кај нане религиозна? Несаве размислинена само башо пле задоволствија или башо пле проблемија (Лука 8:14). Несаве уле атеистија. Јавера верујнена ко Девел, ама мислинена кај и религија тани старомодно хем нане корисно, кај нане ко склад е наукаја хем е логично размислибаја. Упри ленде шај влијајнена о амала, о наставникија или о пенџарде личностија кола со вакерена кај о живото уло преку и еволуција, а тари јавер страна ретко шунена логична причине соске те верујнен ко Девел. Освен адава, иси мануша коленге сој одвратно адава со о свештеникија тане алчна башо паре хем моќ. А ко несаве тхана, о властија анѓе законија коленцар со ограничинена о религиозна активностија.

3. Која тани и цел акале статијакири?

 ³ О Исус заповединѓа аменге те кера „ученикија таро мануша таро са о народија“ (Мат. 28:19). Сар шај те поможина е манушенге со нане религиозна те манген е Девле хем те овен ученикија е Христосескере? Ваљани те ова свесна кај о мануша различно реагиринена ко хабери со вакераја ленге. А сар ка реагиринел некој бут зависинела таро адава коте барило. На пример, о мануша тари Европа на реагиринена исто сар о мануша тари Азија. Соске? Бут мануша ки Европа џанена нешто баши Библија хем шунѓе кај иси Девел кова со керѓа са. Ама, ки Азија хари мануша џанена нешто баши Библија, а побаро дело на џанена ништо баши лате хем на верујнена кај иси Створители. И цел акале статијакири тани те поможинел аменге те реса џи ко сариненгоро вило коленге со проповединаја, бизи разлика котар тане или ко со верујнена.

4. Соске ваљани те ова позитивна?

⁴ Ов позитивно. Секова берш, мануша кола со на сине религиозна овена е Јеховаскере сведокија. Буте џенен лендар сине лен више уче морална мерилија хем сине ленге одвратно о лицемерство ки религија. А јаверен, на сине лен уче морална вредностија хем сине лен лошна навике кола со ваљани сине те мукхен лен. Шај те ова увериме кај о Јехова ка поможинел аменге те аракха околен со исправно дикхена ко вечно живото (Дела 13:48; 1. Тим. 2:3, 4).

5. Со најчесто поттикнинела е манушен шукар те реагиринен ко хабери со вакераја ленге?

⁵ Ов љубезно хем тактично. Бут пути о мануша шукар реагиринена ко амаро хабери, на башо адава со вакераја ленге него башо начин сар вакераја ленге о хабери. Ола бут ценинена кеда сием љубезна, тактична хем кеда сикаваја кај искрено интересинаја амен ленге. Амен на чхиваја лен силаја те шунен адава со мангаја те вакера. Наместо адава, трудинаја амен те хаљова ленгоро стави баши религија. На пример, несаве на мангена те керен лафи башо религиозна теме манушенцар со на џанена лен. А несаве мислинена кај нане културно те пуче некас со мислинела башо Девел. А јавера палем лаџана ако некој дикхела лен кај читинена и Библија, посебно е Јеховаскере сведоконцар. Сави било те овел и причина, амен трудинаја амен те ова обѕирна спрема е манушенгере чувствија (2. Тим. 2:24, фус.).

6. Сар сикавѓа о Павле кај тано прилагодливо, хем сар шај те џа пало лескоро пример?

⁶ Ама, со те кера ако некој на мангела те користина лафија сар сој „Библија“, „Девел“, или „религија“? Шај те џа пало е Павлескоро пример хем те менина амаро начин сар кераја лафи. Кеда керела сине лафи е Евреенцар, о Павле користинела сине о Писмија. Ама, кеда керела сине лафи е грчка филозофенцар ко Ареопаг, на вакерела сине кај цитиринела тари Библија (Дела 17:2, 3, 22-31). Сар шај те џа пало е Павлескоро пример? Ако кереа лафи некасаја со на прифатинела кај Библија тани е Девлескоро Лафи, шај ка овел пошукар те на спомнине ла џикоте кереа леа лафи. А ако мислинеа кај ка овел леске незгодно те дикхен ле о јавера сар читинела тари Библија, пробин те сикаве леске о стихија ко начин со о јавера нане те приметинен, на пример, ко електронско уред.

7. Спрема 1. Коринќаните 9:20-23, со ваљани те кера те шај те ова сар о Павле?

⁷ Сикав кај хаљовеа лен хем шун. Бут тано важно те трудина амен те хаљова со влијајнѓа упро е манушенгоро размислибе (Изр. 20:5). Те размислина палем башо е Павлескоро пример. Ов барило машкар о Евреија. Сигурно, ов ваљанѓа те прилагодинел пе кеда проповединела сине е манушенге таро јавера народија, соске ола џанена сине хари или на џанена сине ништо башо Јехова хем башо света списија. Те шај пошукар те хаљова е манушен со живинена ко амаро подрачје, шај  ка ваљанел те истражина или те кера лафи несаве поискусна објавителенцар таро амаро собрание. (Читин 1. Коринќаните 9:20-23.)

8. Сар шај те почмина разговор баши Библија?

⁸ Амари цел тани те аракха околен сој достојна (Мат. 10:11). Те шај те успејна ко адава, ваљани те пуча е манушен со мислинена ола, а пало адава шукар те шуна лен. Јекх пхрал тари Англија почминела разговор е манушенцар аѓаар со пучела лен со мислинена башо несаве теме, на пример, сар те овел амен бахтало брако, сар те воспитина е чхавен или сар те издржина о неправде. Откеда ка шунел лен, ов вакерела ленге: „Со мислинена башо акава совет, кова со сине пишимо околу 2.000 берш англедер?“ Пало адава, бизо те вакерел о лафи „Библија“, ов читинела ленге несаве стихија таро пло мобилно кола со англедер шукар биринѓа лен.

9. Сар шај те реса џи ко вило е манушенгоро кола со обично на мангена те керен лафи башо Девел?

⁹ Шај те реса џи ко вило е манушенгоро кола со обично на мангена те керен лафи башо Девел ако кераја лафи башо нешто со лен интересинела. На пример, бут џене тане воодушевиме тари природа. Шај те вакера: „Шај џанеа кај о научникија успејнѓе те керен бут буќа адалеске со копиринѓе нешто со више постојнела ки природа. На пример о инженерија со керена микрофонија проучинена е инсектенгере кана, а о инженерија со керена камере проучинена ленгере јакхја. Спрема туте, сој тани и природа — сила, личност или нешто јавер?“ Откеда шукар ка шуне о одговор, шај те вакере: „Кеда о инженерија керена асавке буќа, каскере идее копиринена? Манге сине бут интересно кеда читинѓум со пишинѓа јекх поети таро пурано време: ’Нашти ли те шунел окова со керѓа о кан? Нашти ли те дикхел окова со керѓа и јакх?.. Ов тано окова со дела е манушенге пенџарибе!‘ Несаве научникија сложинена пе акале лафенцар хем верујнена кај иси Створители“ (Пс. 94:9, 10). Пало адава шај те сикава леске о видеоклипи Со вакерена те врсникија — те верујне ко Девел (Џа ко ПУБЛИКАЦИЕ > ВИДЕОФИЛМИЈА). Или, шај те да ле и брошура Дали животот е Божје дело?

10. Ко саво јавер начин шај те почмина разговор манушенцар со обично на мангена те керен лафи башо Девел?

¹⁰ Повише џене мангена те овел лен пошукар иднина. Ама, бут мануша дарана кај и Пхув ка овел уништими или кај нане више те овен условија те живинел пе ки лате. Јекх пхрал со служинела сар покраинско надгледнико ки Норвешка вакерела кај о мануша со на мангена те керен лафи башо Девел обично  мангена те керен лафи башо адава со случинела пе ко свето. Откеда ка поздравинел лен, ов вакерела: „Со мислинена кој шај те анел пошукар иднина — о политичарија, о научникија или некој јавер?“ Пало адава шукар шунела лен хем тегани читинела или цитиринела библиско стихо кова со сикавела кај аџикерела амен пошукар иднина. Несаве тане позитивно изненадиме таро ветувања сој пишиме ки Библија кај и Пхув ка ачхол засекогаш хем кај о шукар мануша ка живинен ки лате ки цело вечност (Пс. 37:29; Проп. 1:4).

11. а) Соске ваљани те користина различна начинија те шај те почмина разговор е манушенцар? б) Спрема Римјаните 1:14-16, сар шај те џа пало е Павлескоро пример?

¹¹ Шукар тано те почмина разговор ко различна начинија е манушенцар со аракхаја лен. Соске? Адалеске со секова мануш тано различно. Адава со јекхе манушеске тано интересно, шај е јавереске нане. Некаске на сметинела ако керела лафи башо Девел или баши Библија, ама јавера шај ка овен поспремна те шунен амен ако прво кераја лафи башо нешто јавер. Било сар те овел, важно тано те користина секоја прилика те шај те кера лафи са е манушенцар. (Читин Римјаните 1:14-16.) Џанѓола пе, на смејнаја те бистра кај о Јехова тано адава со керела те бајрол о чачипе ко вило адаленге со мангена и правда (1. Кор. 3:6, 7).

12. Сар шај те вакера о чачипе е манушенге таро азиска пхувја кола со никогаш на размислинѓе башо адава дали чаче иси Створители?

¹² Ко цело свето бут објавителија аракхена манушен тари Азија, машкар коленде сој мануша со авена таро пхувја коте со о властија ограничинѓе о религиозна активностија. Ко бут азиска пхувја, бут џене никогаш на размислинѓе башо адава дали чаче иси Створители. Несаве лендар мангена те џанен нешто повише башо акава хем одма прифатинена библиско курси, а јаверен палем ко почеток на интересинела лен. Сар шај те поможина акале манушенге? Несаве искусна објавителија иси лен шукар резултатија аѓаар со почминена сар амала те керен лафи е манушенцар хем сикавена ленге интерес, а пало адава ки соодветно прилика вакерена сар поможинѓа ленге несаво библиско начело ко живото.

13. Со шај те поможинел е манушенге те интересинен пе баши Библија? (Дикх и слика тари насловно страна.)

¹³ Буте манушен привлекујнена лен о мудра советија со аракхљовена ки Библија (Проп. 7:12). Јекх пхен таро Њујорк која со проповединела е манушенге со керена лафи ки кинеско чхиб вакерела: „Трудинава ман те сикавав ленге интерес хем те шунав лен. Ако дознајнава кај сигенде але тари јавер пхув, пучава: ’Прилагодинена тумен ли ко живото акате? Аракхлен ли бути? Сар понашинена пе о мануша туменцар?‘“ Понекогаш акава поможинела е пхењаке те вакерел нешто тари Библија. Ки соодветно прилика и пхен вакерела: „Со мислинеа, која тани и најважно бути те шај шукар те накха е јаверенцар? Шај ли те сикавав туке јекх изрека тари Библија? Ки лате пишинела: ’Кеда ка почминел акошибе, сар те пхене пхравдили брана пањеа. Адалеске, англедер те овел акошибе, циде тут‘. Мислинеа ли кај акава совет тано корисно?“ (Изр. 17:14). Асавке разговорија шај те поможинен аменге те дикха кола мануша мангена те џанен нешто повише.

14. Сар постапинела јекх пхрал ки Источно Азија е манушенцар со вакерена кај на верујнена ко Девел?

¹⁴ А со шај те пхена кеда некој вакерела аменге кај на верујнела ко Девел? Јекх пхрал кова со бершенцар проповединела е манушенге со нане религиозна ки Источно Азија вакерела: „Обично, кеда некој ка вакерел: ’На верујнава ко Девел‘, ов, уствари, мангела те вакерел кај на обожавинела е девлен колен со обожавинена повише мануша таро адава тхан. Адалеске, обично согласинава ман кај  скоро са о девела тане измислиме таро мануша хем кај нане чачутне. Бут пути читинава о стихо таро Еремија 16:20 коте со пишинела: ’Шај ли о мануш те керел песке девела, кеда адала нане чаче девела?‘ Пало адава пучава: ’Сар шај те џана дали несаво Девел тано чачутно или измислимо?’ Шукар шунава хем тегани читинава Исаија 41:23 коте со пишинела: ’Вакерен аменге со ка овел ки иднина, хем аѓаар ка џана кај тумен сиен девела‘. Пало адава вакерава несаво пример сар о Јехова точно пророкујнѓа со ка овел ки иднина“.

15. Со шај те сикљова таро пример е пхралескоро тари Источно Азија?

¹⁵ Јекх јавер пхрал тари Источно Азија башо пле повторна посете вакерела: „Вакерава е манушенге примерија башо адава кај ко универзум иси природна законија, кај ки Библија иси мудра советија хем кај о библиска пророштвија исполнинена пе. Пало адава поможинава ленге те хаљовен сар са адава сикавела кај иси чачутно хем мудро Створители. Кеда некој прифатинела кај шај чаче иси Девел, тегани сикавава леске со вакерела и Библија башо Јехова“.

16. Спрема Евреите 11:6, соске е манушен ваљани те овел лен вера ко Девел хем ки Библија, хем сар шај те поможина ленге ко адава?

¹⁶ Кеда водинаја библиско курси е манушенцар кола со нане религиозна, мора стално те трудина амен те поможина ленге те уверинен пе кај иси Девел. (Читин Евреите 11:6.) Освен адава, ваљани те поможина ленге те овел лен доверба кај адава со пишинела ки Библија тано чаче. Те шај те успејна ко адава, шај ка ваљанел повише пути те кера лафи баши исто бути. Шај ка ваљанел секова пути кеда ка проучина ленцар те сикава ленге доказија кај и Библија тани е Девлескоро Лафи. На пример, шај ка ваљанел кратко те кера лафи башо пророштвија со исполнинѓе пе, баши научно хем историско точност е Библијакири или башо мудра советија со дела амен башо живото.

17. Сар шај те влијајнел упро мануша амаро искрено мангипе?

¹⁷ Амен поможинаја е манушенге те овен е Христосескере ученикија аѓаар со сикаваја ленге кај мангаја лен, бизи разлика дали тане религиозна или на (1. Кор. 13:1). Џикоте сикаваја лен, амари цел тани те поможина ленге те хаљовен кај о Девел мангела амен хем кај ваљани амен да те манга ле. Секова берш крстинена пе милје мануша кола со англедер на сине лен нисаво интерес баши религија. Ола керѓе адава соске пенџарѓе е Девле хем замангле ле. Адалеске ов позитивно хем сикав е манушенге кај чаче интересинеа тут ленге. Шун лен шукар, пробин те хаљове лен хем тле примереа поможин ленге те овен е Христосескере ученикија.