1, 2. а) Кола тане трин скапоцена барвалипа таро Јехова? б) Со ка дикха ки акаја статија?

О ЈЕХОВА тано најбарвало ко цело универзум. Са тано лескоро (1. Лет. 29:11, 12). Ама, ов тано дарежливо спрема сариненде. Сием благодарна со денѓа амен бут духовна барвалипа! Несаве лендар тане: 1) е Девлескоро Царство, 2) амари служба, хем 3) о скапоцена чачипа со аракхаја лен ко лескоро Лафи. Ама, ако на пазинаја, сар со накхела о време шај те бистра кобор врединена о духовна барвалипа. Те на авел џи ко адава, ваљани секогаш те размислина кобор бут врединена хем те бајрара амаро мангипе баши ленде, соске о Исус вакерѓа: „Коте сој тумаро барвалипе, адатхе ка овел тумаро вило да“ (Лука 12:34).

² Те дикха сар шај те икера зорало амаро мангипе хем ценење башо Царство, баши служба, хем башо чачипе. Џикоте кераја адава, размислин сар ту лично шај те бајраре тло мангипе башо акала духовна барвалипа.

3. Со сине спремно те керел о трговцо тари парамис е Исусескири те шај те кинел јекх бисери? (Дикх и слика ко почеток тари статија.)

³ Читин Матеј 13:45, 46. О Исус вакерѓа парамис башо јекх трговцо со кинела хем бикинела бисерија. Јекх диве, ов аракхља јекх бисери со сине бут повредно таро са о јавера бисерија со дикхља лен англедер. Ов бут мангља те овел ле адава бисери, адалеске бикинѓа са со сине ле те шај те кинел ле. Шај ли те замислине туке кобор сине леске скапоцено адава бисери?

4. Со ка кера ако мангаја е Девлескоро Царство исто сар о трговцо со мангља о бисери?

⁴ Со шај те сикљова тари парамис со вакерѓа ла о Исус? О чачипе башо е Девлескоро Царство тано сар адава скапоцено бисери. Ако мангаја о Царство исто сар о мануш со мангља о бисери, тегани ка ова спремна те откажина амен таро са те шај те ова хем те ачхова верна е Царствоске. (Читин Марко 10:28-30.) Те дикха сар дуј џене керѓе акава.

5. Со сине спремно те керел о Закхеј башо Царство?

⁵ О Закхеј кхедела сине данок. Ов барвалило аѓаар со силаја лела сине паре таро мануша (Лука 19:1-9). Ама, јекх диве, о Закхеј шунѓа сар о Исус керела лафи башо Царство. Леске бут свиџинѓа пе адава со шунѓа, адалеске одлучинѓа целосно те менинел пе. Ов вакерѓа: „Аке, Господаре, екваш таро буќа со иси ман ка дав е чороленге, хем са со лељум силаја некастар, ка иранав штар пути повише“. О Закхеј иранѓа о паре со леља таро мануша хем повише на сине алчно.

6. Саве промене керѓа јекх џувли хем соске?

⁶ Кеда јекх џувли шунѓа башо Царство англедер некобор берша, сине ки врска јекхе џувљаја. Ој исто аѓаар, сине претседатели ки јекх организација која со боринела пе башо правија е хомосексуалцонгере. Ама, џикоте проучинела сине и Библија, халили кобор тано скапоцено о чачипе башо е Девлескоро Царство хем кај ваљани те керел баре промене (1. Кор. 6:9, 10). Адалеске со мангела сине е Јехова, иклили тари адаја организација хем чхинавѓа и врска е џувљаја. Крстинѓа пе ко 2009 берш хем јекх берш пало адава ули општо пионери. Ој керѓа акала баре промене соске лакоро мангипе башо Јехова сине позорало таро лакере неисправна желбе (Мар. 12:29, 30).

7. Сар шај те икера зорало амаро мангипе башо Царство?

⁷ Те шај те овен верна е Царствоске, бут џене амендар ваљани сине целосно те менинен пе (Рим. 12:2). Ама, адава на значинела кај на ваљани више те борина амен. На смијнаја те мукха нешто јавер те тикњарел амаро мангипе башо Царство, сар на пример о материјална буќа или о неморална желбе (Изр. 4:23; Мат. 5:27-29). О Јехова  денѓа амен панда јекх скапоцено барвалипе кова со шај те поможинел амен те икера зорало амаро мангипе башо Царство.

8. а) Соске о апостол Павле вакерѓа кај и служба тани сар барвалипе ко пхувјале чаре? б) Сар сикавѓа о Павле кај мангела и служба?

⁸ О Исус денѓа амен задача те проповедина хем те сикава е манушен о шукар хабери башо е Девлескоро Царство (Мат. 28:19, 20). О апостол Павле вакерѓа кај и служба тани сар барвалипе ко пхувјале чаре (2. Кор. 4:7; 1. Тим. 1:12). Адалеске со сием несовршена, амен сием сар адала пхувјале чаре. Ама, о хабери со проповединаја тано сар скапоцено барвалипе соске шај те анел вечно живото аменге хем адаленге со шунена амен. Адалеске о Павле вакерѓа: „Са керава башо шукар хабери, те шај те вакерав ле е јаверенге“ (1. Кор. 9:23). О Павле бут трудинела пе сине те сикавел е јаверен башо е Девлескоро Царство. (Читин Римјаните 1:14, 15; 2. Тимотеј 4:2.) Лескоро мангипе башо шукар хабери поможинѓа ле понадари да те проповединел иако сине ле бут баро прогонство (1. Сол. 2:2). Сар шај амен да те сикава асавко мангипе баши служба?

9. Сар шај те сикава кај мангаја и служба?

⁹ Јекх начин сар сикавѓа о Павле кај мангела и служба тано аѓаар со користинѓа секоја прилика те керел лафи е јаверенцар. Исто сар о Павле хем о христијања таро прво веко, амен да проповединаја о шукар хабери таро кхер ко кхер, ко прометна тхана, хем сегде коте со шај те аракха мануша (Дела 5:42; 20:20). Родаја начинија те проповедина кобор со шај повише манушенге. Ако сием ки можност, шај те служина сар помошна или општа пионерија. Или, шај те сикљова неви чхиб, те селина амен ко јавер тхан ки држава коте со живинаја, или чак те служина ки јавер пхув (Дела 16:9, 10).

10. Саве берекетија добинѓа и Ајрин адалеске со бут трудинѓа пе те проповединел о шукар хабери?

¹⁰ И Ајрин, јекх бипрандими пхен тари Америка, мангља те проповединел о шукар хабери е манушенге со керена лафи ки руско чхиб. Адалеске, ко 1993 берш почминѓа те служинел ки руско група ко Њујорк. Тегани сине околу 20 објавителија ки адаја група. Пало 20 берш, и Ајрин вакерѓа: „Панда на сиклиљум совршено и руско чхиб“. Ама, о Јехова поможинѓа лаке хем јавере објавителенге те проповединен е манушенге со керена лафи ки адаја чхиб. Авдиве ко Њујорк иси шов собранија ки руско чхиб. И Ајрин проучинела сине и Библија буте манушенцар хем 15 лендар крстинѓе пе. Несаве лендар служинена ко Бетел, а јавера тане пионерија хем старешине. И Ајрин вакерела:  „Ко живото шај сине те овен ман јавера да целија. Ама, џанава кај нијекх на сине те керел ман добором бахтали“. И Ајрин чаче мангела хем ценинела и служба!

11. Саве тане о резултатија кеда проповединаја чак кеда иси противење?

¹¹ Ако мангаја хем ценинаја и служба, ка ова сар о апостол Павле хем понадари да ка проповедина иако иси амен прогонство (Дела 14:19-22). Ко периоди таро 1930 берш џи ко 1944 берш, амаре пхрален ки Америка сине лен баро противење. Ама, ола понадари да проповединена сине. Кеда о властија пробинѓе те чхинавен лен, амаре пхраља геле ко судо хем добинѓе бут случаија. Ко 1943 берш, о пхрал Нор вакерѓа баши јекх асавки победа со добинѓе ла ко Врховно судо ки Америка. Ов пхенѓа кај ако о пхраља чхинавена сине те проповединен, на сине те овел потреба таро нијекх случај ко судо. Ов исто аѓаар вакерѓа кај адалеа со о пхраља ко цело свето понадари да проповединена сине, ола сикавѓе кај о прогонство на сине успешно. Е пхрален таро јавера пхувја сине лен слична победе ко судо. Адалеске со мангаја и служба, нане те дозволина о прогонство те чхинавел амен те проповедина.

12. Со сиан одлучно те кере?

¹² Ако ценинаја хем мангаја и служба, тегани нане те мислина само ко адава кобор саатија ка кера. Ка да амендар са темелно те сведочина о шукар хабери (Дела 20:24; 2. Тим. 4:5). Ама, башо со ка сикава е јаверен? Те дикха панда јекх барвалипе со денѓа амен о Девел.

13, 14. Сој тани и „ризница“ баши која со керѓа лафи о Исус ко Матеј 13:52, хем сар шај те пхера ла?

¹³ О трито духовно барвалипе со денѓа амен о Јехова тане о библиска чачипа со сиклилем лен. Таро Јехова  авела о чачипе (2. Сам. 7:28; Пс. 31:5). Ов тано Дад со спремно дела, адалеске на мангела те гаравел амендар акала чачипа. Џи акана, сиклилем бут чачипа таро лескоро Лафи хем таро амаре публикацие, конгресија хем состанокија. Адалеске со сиклилем бут чачипа сар со накхела о време, иси амен јекх „ризница“ колате со иси пуране хем неве чачипа. (Читин Матеј 13:52.) Ризница тано тхан коте со јекх мануш кхедела пло барвалипе хем о скапоцена буќа со иси ле. О Јехова ка поможинел амен те пхера амари духовно ризница ако родаја о библиска чачипа сар гаравдо барвалипа. (Читин Изреки 2:4-7.) Сар кераја адава?

¹⁴ Ваљани редовно те проучина и Библија хем амаре публикацие хем шукар те истражина. Акава ка поможинел амен те сикљова „неве“ чачипа, кола со англедер на џанаја лен сине (Ис. Нав. 1:8, 9; Пс. 1:2, 3). Ко прво број тари Стражарско кула, која со иклили ко јули 1879 берш, о чачипе сине споредимо тикне лулуѓаја сој гаравди машкар бут чарја. Те шај некој аракхела асавки лулуди, ваљани бут шукар те родел. Кеда ка аракхел ла, ов нане те овел задоволно јекхаја него ка родел те аракхел панда лулуѓа. Слично, амен да на ваљани те ова задоволна кеда ка аракха само јекх чачипе. Ваљани таро вило те манга те рода панда повише чачипа.

15. Соске башо несаве чачипа шај те вакера кај тане „пуране“, хем кола лендар ту посебно ценинеа?

¹⁵ Кеда почминѓем те проучина и Библија, сиклилем бут шуже чачипа. Ленге шај те пхена кај тане „пуране“ соске сиклилем лен ко почеток. Кола тане несаве таро адала чачипа? Ко почеток сиклилем кај о Јехова керѓа амен хем која тани лескири намера е манушенцар. Исто аѓаар сиклилем кај о Девел бичхалѓа пле Чхаве ки Пхув те мерел сар откупнина те шај амен те ова ослободиме таро грево хем мерибе. Сиклилем кај е Девлескоро Царство ка анел крајо са е мукенге хем кај шај вечно ко мир хем бахталипе те живина ки Пхув (Јован 3:16; Отк. 4:11; 21:3, 4).

16. Со ваљани те кера кеда ка добина појасно објаснување башо несаво библиско чачипе?

¹⁶ Понекогаш, добинаја појасно објаснување башо несаво библиско пророштво или стихо. Кеда ка добина асавко објаснување, важно тано те одвојна аменге време те проучина ле хем те размислина баши лесте (Дела 17:11; 1. Тим. 4:15). Нане доволно само те хаљова кола тане о главна разлике машкар о пурано хем о нево објаснување, него ваљани шукар те проучина о деталија таро нево објаснување. Ако проучинаја аѓаар, о нево чачипе ка овел дело тари амари духовно ризница. Соске врединела те кера акава?

17, 18. Сар шај о свети дух те поможинел амен?

¹⁷ О Исус вакерѓа кај о свети дух шај те поможинел амен те сетина амен ко буќа со сиклилем (Јован 14:25, 26). Сар шај акава те поможинел аменге ки служба? Те дикха о пример јекхе пхралескоро со викинела пе Питер. Ко 1970 берш, кеда сине ле 19 берш, почминѓа те служинел ко Бетел ки Велика Британија. Џикоте проповединела сине таро кхер ко кхер, аракхља јекхе мануше брадаја со  сине ле отприлика 50 берш. Ов пучља е мануше дали мангела те хаљовел и Библија. О мануш сине еврејско рабини хем изненадинѓа пе таро адава со јекх терно чхаво мислинѓа кај шај те сикавел ле баши Библија. Те шај те дикхел кобор џанела, о рабини пучља е Питере: „Мо чхаво, ки сави чхиб сине пишимо о лил Даниел?“ О Питер вакерѓа леске: „Јекх дело сине пишимо ки арамејско чхиб“. О Питер вакерела: „О рабини изненадинѓа пе со џанљум о одговор, ама ме изненадинѓум ма панда повише! Котар џанава сине о одговор? Кеда гељум манге кхере, проверинѓум ки Стражарско кула хем Разбудете се! таро масекија со накхле, хем аракхљум статија со објаснинела кај о лил Даниел сине пишимо ки арамејско чхиб“. * Таро акава пример дикхаја кај о свети дух шај те поможинел амен те сетина амен ко нешто со читинѓем ле англедер хем чхивѓем ле ки амари ризница (Лука 12:11, 12; 21:13-15).

¹⁸ Ако мангаја хем ценинаја о чачипа со сикљоваја таро Јехова, никогаш нане те чхинава те кхеда чачипа ки амари ризница. Со повише кераја акава, добором поспремна ка осетина амен те сикава е јаверен.

19. Соске ваљани те аракха амаре духовна барвалипа?

¹⁹ Ки акаја статија сиклилем кобор тано важно те ценина о духовна барвалипа. Ама, ваљани бут те пазина о Сатана хем лескоро свето ма те тикњарен амаро мангипе башо акала барвалипа. Ако на пазинаја, шај те лен амаро внимание о буќа сар сој и шукар платими бути, и желба те живина луксузно, или и желба те сикава амен е материјална буќенцар со иси амен. О апостол Јован вакерѓа кај панда хари акава свето хем са со нудинела ов нане те овел више (1. Јов. 2:15-17). Адалеске ваљани те ценина хем те аракха амаре духовна барвалипа.

20. Со сиан одлучно те кере те шај заштитинеа тле духовна барвалипа?

²⁰ Ов спремно те откажине тут таро са со шај те тикњарел тло мангипе башо е Девлескоро Царство. Ов одлучно цело вилеа те проповедине хем никогаш ма нашав тло мангипе баши служба. Понадари да роде о библиска чачипа. Аѓаар ка кхеде туке „барвалипе ко небо, коте со о чор на авела паше хем о молцо на хала ле. Соске коте сој тумаро барвалипе, адатхе ка овел тумаро вило да“ (Лука 12:33, 34).