1, 2. Сар утешинела амен о Јехова ко секова амаро проблеми, хем ко со шај те ова сигурна?

ЈЕКХ терно пхрал со нане женимо размислинела сине башо стихо таро 1. Коринќаните 7:28, коте со вакерела кај окола со ка кхувен ко брако ка овел лен проблемија. О пхрал пучља јекхе попхуре жениме пхрале сој старешина: „Саве тане акала проблемија хем сар шај те икљовав ленцар ко крајо ако женинѓум ма?“ Англедер те одговоринел, о старешина вакерѓа акале терне пхралеске те размислинел башо е Павлескере лафија кај о Јехова тано „о Девел секоле утехакоро, кова со утешинела амен ки секоја амари неволја“ (2. Кор. 1:3, 4).

² Џанаја кај о Јехова, амаро Дад, мангела амен хем ов утешинела амен кеда иси амен проблемија. Шај ту да сетинеа тут ко несаве ситуацие кеда о Јехова поддржинѓа тут хем водинѓа тут преку пло Лафи. Шај те ова сигурна кај о Јехова мислинела аменге о  најшукар, исто сар пле слугенге таро пурано време. (Читин Еремија 29:11, 12.)

3. Башо кола пучиба ка кера лафи?

³ Полокхо тано те икљова ко крајо е проблеменцар кеда џанаја котар авена. Тегани, котар авена о проблемија ко брако хем ки фамилија? Кола примерија тари Библија хем таро амаро време шај те поможинен амен те аракха утеха? О одговор таро акала пучиба ка поможинел амен те икљова ко крајо е проблеменцар.

4, 5. Саве проблемија шај те овен е роме хем е ромња?

⁴ Кеда о Јехова керѓа е прво џувља, анѓа ла англо Адам хем ој ули лескири ромни. Тегани о Јехова вакерѓа: „Адалеске о мануш ка мукхел пе даја хем пе даде хем ка спојнел пе пле ромњаја, хем ола ка овен јекх тело“ (1. Мој. 2:24). Ама, авдиве сарине амен сием несовршена (Рим. 3:23). Адалеске, кеда јекх мурш хем јекх џувли ка лен пе, шај те очекујнен те овел лен проблемија. На пример, англедер те кхувел ко брако, и ромни ваљани сине те шунел пле родителен. Ама, е Девлескоро Лафи вакерела кеда дуј џене лена пе, о ром овела поглавари е ромњаке (1. Кор. 11:3). Ко почеток, е ромеске шај те овел пхаро те овел поглавари пле ромњаке, а лаке шај те овел пхаро те прифатинел о поглаварство таро пло ром. Исто аѓаар, кеда дуј џене ка лен пе, шај нане те накхен шукар пле ромескере или ромњакере родителенцар, а акава шај те керел ленге проблемија ко брако.

⁵ Исто аѓаар, размислин сар осетинена пе о ром хем и ромни кеда дознајнена кај ка овел лен чхаво. Иако тане бут бахтале башо акава, ама исто аѓаар тане секириме. Шај секиринена пе дали ка накхел шукар о кхамнипе хем дали о бебе ка овел шукар. Исто аѓаар џанена кај ка овен лен побаре трошакија. Кеда ка бијанѓовел о чхаво, о родителија ка ваљани те керен јавера да промене. И дај ка ваљани те накхавел повише време е бебеа. Адалеске, о ром хем и ромни шај нане те накхен више добором време заедно сар со накхена сине англедер. Исто аѓаар, е даде да ка овел ле повише одговорностија, адалеске со акана иси ле чхаво.

6-8. Сар шај те осетинен пе о ром хем и ромни ако нашти те овен лен чхаве?

⁶ Несаве сој ко брако иси лен јавера проблемија. Ола бут мангена те овен лен чхаве, ама нашти овена лен. Кеда јекхе ромња нашти те овен ла чхаве, адава шај те керел лаке бари емоционално дукх (Изр. 13:12). Ко пурано време, е ромњенге сине бут важно те кхувен ко брако хем те овел лен чхаве. И Рахела, е Јаковескири ромни, осетинела сине бари дукх, соске лакере пхења сине ла чхаве, а ла нашти сине те овен ла (1. Мој. 30:1, 2). Авдиве да, ко несаве пхувја бут тано важно ки фамилија те овен бут чхаве. О мануша бут пути пучена е мисионерен со живинена ко асавке пхувја соске нане лен чхаве. Чак кеда о мисионерија ка пробинен те објаснинен ленге најшукар со шај, ола палем вакерена: „Ајде, ка дел о Девел“.

 ⁷ Јекх пхен тари Англија бут мангела сине те овен ла чхаве. Кеда халили кај нашти те овен ла чхаве, бут разочаринѓа пе. Тегани ој хем лакоро ром одлучинѓе те посвојнен чхаво. Ама, понадари да осетинела сине дукх несаво време. Ој вакерела: „Џанава сине кај нане те овел исто те посвојне чхаве хем те бијане чхаве“.

⁸ И Библија вакерела кај „е ромњен ка заштитинел о бијаниба“ (1. Тим. 2:15). Ама, акава на значинела кај јекх ромни ка добинел вечно живото само адалеске со бијанѓа. Тегани, сар ваљани те хаљова акава стихо? Јекх дај тани бут зафатими адалеа со грижинела пе пле чхавенге хем кхереске. Адава сој зафатими поможинела лаке те на оговоринел хем те на мешинел пе ко е јаверенгере буќа (1. Тим. 5:13). Ама, акава на значинела кај нане те овен ла проблемија ко брако или ки фамилија.

9. Која јавер неволја шај те овел околен сој ко брако?

⁹ Панда јекх неволја ко брако шај те овел ако јекх брачно партнери мерела. Бут џене ни на мислинена сине кај ка случинел пе ленге асавко нешто, ама мора сине те накхен тари акаја пхари ситуација. Е Девлескере слуге тане увериме кај иси воскресение хем акава дела лен бари утеха (Јован 5:28, 29). Ко пло Лафи, амаро Дад о Јехова ветинѓа аменге бут буќа кола со дена амен утеха кеда аменге пхаро. Те дикха сар утешинѓа о Јехова несаве пле слуген хем сар адава поможинѓа лен.

10. Сар аракхља утеха и Ана? (Дикх и слика ко почеток тари статија.)

¹⁰ Размислин со случинѓа пе е Анаке, е Елканаскири ромни. Ој мангела сине те овен ла чхаве, ама нашти сине те овен ла. А и Фенина, и јавер ромни е Елканаскири, сине ла бут чхаве. (Читин 1. Самоилова 1:4-7.) А сој панда полошно, и Фенина секогаш асала сине е Анаке со нашти те овен ла чхаве. Адава бут дукхавела сине е Ана. Со керѓа ој те шај те аракхел утеха? Ој родинѓа помош таро Јехова. И Ана чак гели ко е Јеховаскоро кхер хем адари бут време молинѓа пе. Родинѓа таро Јехова те дел ла мурш чхаво хем сине ла доверба кај ов ка поможинел ла. Пало адава, осетинѓа пе пошукар хем на сине више тажно (1. Сам. 1:12, 17, 18). Ој џанела сине кај о Јехова или ка дел ла чхаво или ка утешинел ла ко јавер начин.

11. Сави помош иси амен?

¹¹ Адалеске со сием несовршена хем живинаја ко свето е Сатанаскоро, ка овен амен проблемија (1. Јов. 5:19). Ама, иси амен помош. Шај те молина амен е Јеховаске, „о Девел  секоле утехакоро“. И Ана керѓа акава. Ој вакерѓа е Јеховаске пле најхор чувствија хем молинѓа ле те поможинел ла. Адалеске, кеда иси амен проблемија, на ваљани само те вакера амаре проблемија е Јеховаске. Ваљани таро вило те молина ле те поможинел амен хем те вакера леске амаре најхор чувствија (Фил. 4:6, 7).

12. Со поможинѓа е Анаке те овел бахтали?

¹² Шај осетинаја бари дукх соске нашти те овен амен чхаве или муло некој со мангаја ле. Ама, шај те аракха утеха. Размислин башо пример е Анакоро со живинѓа ко време е Исусескоро. Пало ефта берш брако, лакоро ром муло. И Библија на вакерела дали сине ла чхаве. Со поможинѓа ла? „Ој секогаш џала сине ко храми.“ Иако е Ана сине ла 84 берш, ој понадари да џала сине ко храми те молинел пе хем те обожавинел е Јехова (Лука 2:37). Адава утешинѓа ла хем поможинѓа ла те ачховел бахтали иако сине ла проблемија.

13. Сар шај те охрабринен амен о чачутне амала ако сием разочариме тари амари фамилија?

¹³ Шај исто аѓаар те утешинен амен амаре амала таро собрание (Изр. 18:24). Е Пола сине ла 5 берш кеда лакири дај чхинавѓа те служинел е Јеховаске хем адалеске сине лаке пхаро. Пало несаво време, и Ен, јекх пхен со сине пионерка, охрабринела ла сине хем грижинела пе сине лаке. И Пола вакерела: „Иако на сине манге фамилија, лакоро мангипе поможинѓа ман понадари да те служинав е Јеховаске“. И Пола сине бахтали со пало несаво време лакири дај почминѓа палем те служинел е Јеховаске. И Ен, исто аѓаар тани бахтали со шај сине те поможинел е Полаке понадари да те служинел е Јеховаске.

14. Саве берекетија ка овен амен ако утешинаја е јаверен?

¹⁴ Кеда поможинаја е јаверен, тегани бистраја ко амаре проблемија.  На пример, бут пхења, бизи разлика дали тане ко брако или на, проповединена о шукар хабери е јаверенге хем адава керела лен бахтале соске џанена кај соработинена е Јеховаја хем керена лескири волја. Сарине амен шај те поможина е манушенге аѓаар со ка вакера ленге о шукар хабери. Исто аѓаар, оваја попаше е пхраленцар хем е пхењенцар кеда кераја шукар буќа баши ленде (Фил. 2:4). О Павле денѓа амен шукар пример башо акава. Ов грижинела пе сине е јаверенге „исто сар јекх дај која со дела хајбе пле чхавенге хем мангела лен“. О Павле исто аѓаар утешинѓа хем охрабринѓа пле пхрален „исто сар јекх дад пле  чхавен“. (Читин 1. Солуњаните 2:7, 11, 12.)

15. Кас иси одговорност те сикавен е чхавен башо Јехова?

¹⁵ Сар шај те поможина е фамилиенге ко собрание? Понекогаш, о неве сој ко собрание ка роден амендар помош те сикавен пумаре чхавен башо Јехова, или шај чак ка роден те проучина и Библија ленгере чхавенцар. Ки Библија пишинела кај о Јехова денѓа е родителенге и одговорност те сикавен пумаре чхавен (Изр. 23:22; Еф. 6:1-4). Ко несаве ситуацие, о јавера шај те поможинен лен, ама акава на ослободинела е родителен тари ленгири одговорност. Ола ваљани редовно те керен лафи пумаре чхавенцар.

16. Ко со ваљани те пазина ако поможинаја јаверенгере чхавен?

¹⁶ Ако јекх родители мангела те проучина и Библија лескере чхавеа, ваљани те пазина те на ла о тхан е родителескоро. Понекогаш, шај ка проучина несаве чхавеа каскере родителија нане е Јеховаскере сведокија. Кеда проучинаја јаверенгере чхавенцар, ка овел шукар те проучина ленцар кеда о родителија тане кхере или англо јавер зрело христијани, или ко тхан коте со шај о јавера те дикхен амен. Аѓаар нане те мукха е јаверенге погрешно впечаток. Хем сар ка накхел о време, о родителија шај ка почминен те сикавен пумаре чхавен башо Јехова.

17. Сар шај о терне те овен утеха е јаверенге ки фамилија?

¹⁷ О терне со мангена е Јехова шај те овен утеха пле фамилијаке. Сар? Аѓаар со ка поштујнен пле родителен хем ка поможинен лен. Исто аѓаар, кеда о чхаве ачховена верна е Јеховаске, адава охрабринела цело фамилија. Англедер о Потоп, о Ламех служинела сине е Јеховаске. Ов башо пло чхаво о Ное вакерѓа: „Ка анел аменге одмор тари амари бути хем тари дукх ко амаре васта со анела аменге и пхув која со денѓа ла арман о Јехова“. Акава пророштво исполнинѓа пе пало Потоп, кеда о Јехова цидинѓа и арман тари Пхув (1. Мој. 5:29; 8:21). Авдиве да, о терне со служинена е Јеховаске шај те утешинен пумаре фамилиен. Шај те поможинен секоле јекхеске тари пли фамилија те издржинел о проблемија со иси ле авдиве хем со шај те овен ле понадари.

18. Со шај те поможинел амен те издржина о проблемија?

¹⁸ Е Јеховаскере слуге авдиве аракхена утеха аѓаар со молинена пе, размислинена башо библиска примерија, хем преку о пхраља хем о пхења ки организација. (Читин Псалм 145:18, 19.) Џанаја кај о Јехова секогаш мангела те дел амен утеха хем ов сигурно ка поможинел амен те издржина било саво проблеми со шај те овел амен!