1, 2. Ко со ваљани те овел сигурно секова јекх амендар? (Дикх и слика ко почеток тари статија.)

САР со дикхлем ки англуни статија, о Сатана вакерела кај е Јехова нане ле право те владинел упро мануша. Ов исто аѓаар вакерела кај о Јехова на владинела шукар хем кај о мануша ка овен побахтале ако владинена коркори. Дали тано о Сатана ко право? Замислин туке кај о мануша шај те владинен коркори хем те живинен вечно. Дали ка овен побахтале бизо Девел? Дали ту ка ове побахтало ако шај те живине вечно хем ма те зависине таро Девел?

² Секој амендар ваљани коркори те размислинел башо акала пучиба. Тегани, ка ова сигурна кај о Јехова тано о Најшукар Владетели хем кај ов заслужинела те поддржина ле цело вилеа. Ко адава уверинела амен и Библија. Те дикха со пишинела ки лате башо е Јеховаскоро право те владинел упро са.

3. Соске е Јехова иси ле право те владинел упро са?

³ Само е Јехова иси ле право те владинел упро са соске ов тано Семоќно Девел хем Створители (1. Лет. 29:11; Дела 4:24). Ки јекх визија, о 144.000 со ка владинен заедно е Исусеа вакерѓе: „Моќно Јехова, ту сиан амаро Девел хем заслужинеа сарине те славинен тут хем те сикавен туке чест, соске ту керѓан са о буќа, хем ола постојнена соске ту аѓаар мангљан“ (Отк. 4:11). О Јехова керѓа са, адалеске иси ле право те владинел упри сариненде ко небо хем ки Пхув.

4. Соске и слободно волја на дела амен право те бунина амен против о Девел?

⁴ О Сатана на створинѓа ништо. Адалеске, нане ле право те владинел упри никасте. О Сатана хем о прва мануша на сине послушна е Јеховаске хем отфрлинѓе ле сар Владетели (Ерем. 10:23). Точно тано адава кај о Јехова денѓа лен слободно волја. Ама, дали ленгири слободно волја денѓа лен право те бунинен пе против лесте? На. И слободно волја поможинела амен те ана одлуке, ама на дела амен право те бунина амен против амаро Створители, о Јехова. Кеда бунинаја амен против о Девел адава сикавела кај ко погрешно начин користинаја и слободно волја. Са е манушенге ваљани о Девел те владинел упри ленде хем те водинел лен.

5. Соске е Девлескере одлуке секогаш тане праведна?

⁵ Е Јехова иси ле право те владинел панда тари јекх причина — ов користинела пло авторитети ко јекх совршено праведно начин. Ов вакерела аменге: „Ме сиум о Јехова, окова со сикавела верно мангипе хем правда ки пхув, соске адава радујнела ман“ (Ерем. 9:24). Е Јеховаске на ваљанена е манушенгере законија те шај одлучинела сој тано исправно. Наместо адава, ов вакерела сој тано исправно. Хем о законија со дела лен е манушенге темелинена пе ки лескири совршено правда. О псалмисти вакерѓа: „И праведност хем и правда тане о темели ко тло престол“. Значи, са о законија, начелија хем одлуке со авена таро Јехова тане праведна (Пс. 89:14; 119:128). О Сатана вакерела кај о Јехова нане праведно Владетели. Ама, о Сатана тано адава со нашти те анел правда ко свето.

6. Вакер јекх причина соске е Јехова иси ле право те владинел?

⁶ Јавер причина соске е Јехова иси ле право те владинел е светоја тани адаја со ов тано мудро хем џанела сар те грижинел пе башо са со керѓа. Акава дикхела пе таро адава кеда о Девел денѓа сила пле чхавеске те сасљарел о насвалипа кола со нијекх доктори нашти те сасљарен лен (Мат. 4:23, 24; Мар. 5:25-29). Акава тано аменге чудо, ама е Јеховаске нане. Ов џанела сар функциониринела е манушескоро тело хем шај те сасљарел секова насвалипе. Исто аѓаар, О Јехова шај те иранел  е мулен ко живото хем те чхинавел о природна катастрофе.

7. Соске о Јехова тано помудро било кастар таро свето е Сатанаскоро?

⁷ О Сатана нашти те анел мир ко свето колеа со владинела, било ки јекх држава или машкар некобор државе. Само о Јехова тано најмудро хем џанела сар те анел мир ко свето (Иса. 2:3, 4; 54:13). Адалеске амен да осетинаја амен сар о апостол Павле кова со вакерѓа: „О, кобор тане бут баре о берекетија со авена таро Девел хем бут тане хор лескири мудрост хем о џандипе!“ (Рим. 11:33).

8. Сар влијајнела упри туте о начин сар владинела о Јехова?

⁸ Сар со дикхлем, и Библија јасно вакерела кај е Јехова иси ле право те владинел. Исто аѓаар, латар дикхаја соске о Јехова тано најшукар Владетели. Јекх причина тани адалеске со ов владинела мангипаја. Осетинаја амен панда попаше леа кеда размислинаја башо адава кај ов тано „милостиво хем љубезно, на хољанела сигате хем пхердо тано верно мангипе хем чачипе“ (2. Мој. 34:6). О Девел тано аменцар љубезно хем поштујнела амен. Ов грижинела пе аменге пошукар амендар. О Сатана вакерела кај о Јехова гаравела о шукар буќа пле слугендар, ама адава тано ховајбе. О Девел денѓа чак пле мангле Чхаве те шај овела амен надеж те живина вечно. (Читин Псалм 84:11; Римјаните 8:32.)

9. Котар џанаја кај о Девел грижинела пе секоле јекхеске амендар?

⁹ О Јехова мангела пле народо. Ама ов исто аѓаар бут грижинела пе секоле јекхеске. Размислин башо адава со случинѓа пе ко пурано време. Тришел берша о Јехова користинѓа судие те водинел пле народо хем те спасинел ле таро душмања. Чак ко адава време о Јехова на бистерѓа нијекхе верно слуга. Јекх лендар сине и Рут. Ој на сине Израелка хем откажинѓа пе таро бут буќа те шај служинела е Јеховаске. Ов наградинѓа ла ромеа хем чхавеа. Исто аѓаар, и Рут ули дело тари фамилија котар со ало о Месија. О Јехова мукхља те овел пишимо ки Библија о живото е Рутакоро, ко лил кова со пхиравела лакоро анав. Шај ли те замислине туке сар ка осетинел пе и Рут кеда ка воскреснинел хем кеда ка шунел башо акала буќа? (Рут 4:13; Мат. 1:5, 16).

10. Котар џанаја кај о Јехова сар Владетели на постапинела ко грубо начин?

¹⁰ Сар Владетели, о Јехова на постапинела ко грубо начин. Адала сој леске послушна осетинена пе слободна хем бахтале (2. Кор. 3:17). О Давид башо Јехова вакерѓа: „И чест хем о шужипе тане англи лесте, и сила хем о бахталипе тане коте со бешела ов“ (1. Лет. 16:7, 27). А о псалмисти о Етан пишинѓа: „Бахтале тане о народо со фалинена тут радосно гласоја. Ола пхирена ки светлина со авела таро тло муј! Башо тло анав ола тане бахтале цело диве хем тли праведност бајрарела лен“ (Пс. 89:15, 16).

11. Со шај панда повише те уверинел амен кај о Јехова тано о најшукар Владетели?

 ¹¹ Кобор повише размислинаја башо е Јеховаскоро шукарипе, добором повише ка ова увериме кај ов тано о најшукар Владетели. Амен да осетинаја амен сар о псалмисти, кова со вакерѓа е Девлеске: „Јекх диве ко тле авлина тано пошукар таро милја диве ко јавер тхан“ (Пс. 84:10). О Јехова керѓа амен, адалеске ов точно џанела со ваљани аменге те шај те ова чаче бахтале. Ов тано дарежливо хем дела амен повише таро адава со ваљани аменге. Са со родела амендар о Јехова тано башо амаро шукарипе. Чак ако ваљани те кера несаве жртве, секогаш ка ова бахтале ако шунаја ле. (Читин Исаија 48:17.)

12. Која тани и главно причина соске поддржинаја е Јехова сар Владетели?

¹² Тари Библија џанаја кај несаве ка бунинен пе против о Јехова кеда ка завршинен о милја берша со ка владинел о Исус (Отк. 20:7, 8). Соске ка керен адава? О Сатана, сар секогаш, ка пробинел те керел е манушен те овен себична. Ов шај ка пробинел те убединел лен те мислинен кај шај те живинен вечно бизо те овен послушна е Јеховаске. Ама, адава нане чаче. Адалеске, шукар тано те пуча амен: „Дали ме ка верујнав ко асавко ховајбе?“ Ако чаче мангаја е Јехова хем сием увериме кај ов тано шукар хем кај иси ле право те владинел, тегани асавко ховајбе ка овел аменге гадно. Никогаш нане те манга те живина бизо Јехова, кова сој амаро Најбаро Владетели со владинела мангипаја.

13. Сар сикаваја кај поддржинаја е Јехова сар Владетели?

¹³ Сар со дикхлем, е Јехова иси ле право те владинел хем лескоро начин сар владинела тано најшукар. Ов заслужинела те поддржина ле цело вилеа. Адава кераја ле аѓаар со сием леске верна хем трудинаја амен те џа пало лескоро пример. Кеда даја амендар са те постапина сар лесте, сикаваја кај мангаја ле хем поддржинаја ле сар Најбаро Владетели. (Читин Ефешаните 5:1, 2.)

14. Сар шај о старешине хем о поглаварија ки фамилија те џан пало пример е Јеховаскоро?

¹⁴ Тари Библија сикљоваја кај о Јехова секогаш користинела пло авторитети мангипаја. О поглаварија ки фамилија хем о старешине со поддржинена е Јехова сар Владетели ка трудинен пе те џан пало лескоро пример, нане те постапинен е јаверенцар ко грубо начин хем нане те контролиринен лен. О апостол Павле бут трудинела пе сине те постапинел сар о Девел хем лескоро Чхаво (1. Кор. 11:1). Ов на лаџакерела сине е јаверен хем на теринела лен сине силаја те керен адава сој исправно. О Павле љубезно охрабринѓа лен те керен адава сој исправно (Рим. 12:1; Еф. 4:1; Филим. 8-10). Аѓаар, ов постапинѓа сар о Јехова. Кеда е јаверенцар постапинаја мангипаја, поддржинаја е Јехова сар Најбаро Владетели.

15. Сар поддржинаја е Јехова сар Владетели кеда поштујнаја адален со денѓа лен авторитети?

¹⁵ Исто аѓаар, поддржинаја е Јехова сар Владетели кеда поштујнаја адален со денѓа лен авторитети хем соработинаја ленцар. Чак кеда целосно на хаљоваја или на согласинаја амен несаве одлукаја со анѓе, амен понадари да ка поддржина лен. Иако о мануша ко свето на керена акава, амен постапинаја  аѓаар соске прифатинаја е Јехова сар амаро Владетели (Еф. 5:22, 23; 6:1-3; Евр. 13:17). Тегани сием бахтале, соске о Јехова џанела сој најшукар аменге.

16. Сар амаре одлуке шај те сикавен кај поддржинаја е Јехова сар Најбаро Владетели?

¹⁶ Шај те поддржина е Јехова сар Владетели хем е одлукенцар со анаја лен. О Јехова на денѓа амен конкретно заповед баши секоја ситуација ко живото, него ов сикавела аменге сар размислинела. Адава поможинела аменге те хаљова со ваљани те кера. На пример, о Јехова на дела амен списако саве шеја шај те пхирава, а саве на. Ов пхенѓа кај ваљани те изгледина скромно хем примерно сар лескере слуге (1. Тим. 2:9, 10). О Јехова мангела те размислина сар амаре одлуке влијајнена упро јавера (1. Кор. 10:31-33). Кеда анаја одлуке сар со мангела о Јехова, тегани сикаваја кај мангаја хем поддржинаја ле сар Владетели.

17, 18. Сар шај окола сој ко брако те поддржинен е Јехова сар Владетели?

¹⁷ Те дикха јекх начин сар шај окола сој ко брако те поддржинен е Јехова сар Владетели. Шај некаскоро брако нане асавко сар со мислинѓе песке кај ка овел. Шај чак иси лен баре проблемија ко брако. Со шај те поможинел ленге? Шај те размислинен сар  постапинѓа о Јехова е Израелцонцар ко пурано време. О Јехова баши песте вакерѓа кај тано сар ром пле народоске (Иса. 54:5; 62:4). О Израелција бут пути разочаринѓе е Јехова хем адалеске ола сине сар ко јекх лошно брако леа. Ама, о Јехова на откажинѓа пе лендар сигате. Ов бут пути простинела ленге сине хем икерѓа пле ветувања со денѓа лен. (Читин Псалм 106:43-45.)

¹⁸ Адала сој ко брако хем мангена е Јехова трудинена пе те постапинен сар лесте. Чак ако иси лен проблемија ко брако, ола на развединена пе ако нане лен библиско причина башо адава. Ола џанена кај о Јехова дикхела сериозно ко завет башо брако хем кај ов мангела о ром хем и ромни те ачховен заедно. Единствено библиско причина кеда некој шај те развединел пе хем палем те кхувел ко брако тани ако јекх таро брачна партнерија керела неморал (Мат. 19:5, 6, 9). Кеда е Девлескере слуге керена са со шај ленгоро брако те успејнел, ола поддржинена е Јехова сар Владетели.

19. Со ваљани те кера кеда ка грешина?

¹⁹ Сарине сием несовршена хем некогаш кераја буќа коленцар со разочаринаја е Јехова. Ов џанела адава хем денѓа пле Чхаве сар откупнина аменге. Адалеске, кеда ка грешина, шај те молина е Јехова те простинел аменге (1. Јов. 2:1, 2). Наместо само те осетина амен лошно башо амаре грешке, ваљани те трудина амен те сикљова нешто лендар. Ако ачховаја паше е Јеховаја, ов ка простинел аменге хем ка поможинел амен емоционално те сасљова хем понадари да те служина леске (Пс. 103:3).

20. Соске акана ваљани те поддржина е Јехова сар Најбаро Владетели?

²⁰ Ко нево свето секова мануш ка шунел е Јехова сар Владетели хем ка сикљовел башо лескере праведна друмија (Иса. 11:9). Ама, панда акана шај бут те сикљова башо адава сар размислинела о Јехова хем сар мангела те постапина. Панда хари, нијекх нане те пучел пе дали е Јехова иси ле право те владинел. Адалеске, акана ваљани те сикава кај поддржинаја е Јехова сар Најбаро Владетели аѓаар со ка ова послушна, ка служина верно хем са амаре силенцар ка трудина амен те постапина сар лесте.