О ЈЕХОВА охрабринела пле слуген те манген о мир. Ов мангела ола те керен са со шај те овен ко мир јекх јекхеа. Кеда керена аѓаар, тегани ко собрание иси мир. Адалеске о мануша со авена ко амаре собранија осетинена пе шукар.

На пример, јекх мануш таро Мадагаскар со бајнела дикхља кај иси мир машкар е Јеховаскоро народо. Ов мислинѓа песке: „Кеда би мангава некогаш те овав ки несави религија, адаја ка овел акаја религија“. Сар џала сине о време ов чхинавѓа те бајнел, керѓа промене ко пло брако хем уло слуга е Јеховаскоро, о Девел со иси ле хем со дела мир.

Исто сар акава мануш, бут мануша секова берш овена дело тари е Јеховаскири организација коте со аракхена о мир кова со родена ле сине. И Библија вакерела, ако ко собранија иси „бари љубомора хем акошибе“, адава шај те руминел о амалипе хем те анел проблемија (Јак. 3:14-16). Ама, и Библија дела амен шукар советија сар те избегина асавке проблемија хем сар те бајрара о мир амаре пхраленцар хем пхењенцар. Те дикха сар акала советија шај те користинен аменге ко живото.

„Сине манге пхаро те накхав шукар јекхе пхралеа колеа со керава сине бути. Јекх пути, џикоте гласно акошаја амен сине, але дуј мануша хем шунѓе амен“ (КРИС).

„Јекх пхен колаја со џава сине почесто ки служба, таро јекх пути откажинѓа о терминија коленге со сием сине договориме. Пало адава чхинавѓа те керел манцар лафи. На џанава сине соске керѓа адава“ (ЏЕНЕТ).

„Јекх пути керѓем лафи ко телефони трин пхраља ки исто линија. Јекх таро пхраља вакерѓа аменге ’Чао‘ хем ме мислинѓум кај пханља о телефони. Пало адава е јавере пхралеске вакерѓум несаве лошна буќа башо пхрал со мислинѓум кај пханља о телефони, ама ов сине панда ки линија хем шунѓа са“ (МАЈКЛ).

„Ко амаро собрание, машкар дуј пионерке иклиле проблемија. Почминѓе те акошен пе јекх јекхаја. Ленгоро акошибе обесхрабринѓа е јаверен“ (ГАРИ).

Шај акала проблемија на дикхјона туке бут баре. Ама ола шај те анен бари емоционално дукх адаленге со иси лен асавке проблемија хем те нашавен о мир ко собрание. Ама, шукар сине адава со акала пхраља хем пхења шунѓе о библиска начелија хем палем уле ко мир јекх јекхеа. Со мислинеа, кола начелија поможинѓе лен?

„Ма акошен тумен дромалдан!“ (1. Мој. 45:24). О Јосиф вакерѓа акава мудро совет пе пхраленге кеда ваљани сине те иранен пе кхере. Кеда некој на контролиринела пле чувствија хем локхе нервиринела пе, шај те хољанкерел е јаверен хем те керел о буќа те овен панда  полошна. О Крис халило кај понекогаш леске пхаро те овел понизно хем те шунел упатствија јаверендар. Ов мангља те менинел пе, адалеске извининѓа пе е пхралеске касаја со акошља пе. О Крис бут трудинѓа пе те контролиринел пли холи. Кеда о пхрал дикхља кобор о Крис трудинела пе те менинел пе, ов да керѓа промене. Акана ола ко мир заедно служинена е Јеховаске.

„О планија на успејнена кеда на керела пе искрено лафи“ (Изр. 15:22, фус.). И Џенет одлучинѓа те шунел акава библиско совет кеда лакири амалин чхинавѓа те керел лаја лафи. Адалеске, ој гели ки лате хем пучља ла дали керѓа нешто со поврединѓа ла или нервиринѓа ла. Ко почеток, е солдујенге сине хари незгодно. Ама, о буќа уле пошукар соске солдуј сине смириме кеда керена сине лафи. Тегани и пхен извининѓа пе е Џенетаке соске погрешно халили несави ситуација со случинѓа пе хем со мислинѓа кај и Џенет керѓа нешто те поврединел ла. Ола акана палем тане амалинка хем заедно служинена е Јеховаске.

„Ако ингареа тли жртва ко жртвенико хем адари сетинеа тут кај тле пхрале иси ле нешто против туте, мукх тли жртва англо жртвенико, хем џа прво смирин ту тле пхралеа“ (Мат. 5:23, 24). О Исус денѓа акава совет ки јекх ситуација кеда сикавела сине е манушен. О Мајкл одлучинѓа те керел са со ваљани те попрајнел и ситуација, соске сине леске бут пхаро со вакерѓа лошна буќа башо пхрал. Ов гело ко пхрал хем извининѓа пе леске. Со уло тегани? О Мајкл вакерела: „О пхрал простинѓа манге таро вило“. Ола палем уле амала.

„Трпинен тумен јекх јекхеа хем цело вилеа простинен туменге чак кеда некој ка вреџинел тумен“ (Кол. 3:12-14). Со уло е дује пионеркенцар со акошле пе ки служба? Јекх старешина љубезно поможинѓа лен те хаљовен кај адава со керѓе на влијајнѓа шукар упро јавера. Ов сетинѓа лен кај ваљани те овен стрплива јекх јекхаја хем те поможинен те овел мир ко собрание. Ола шунѓе лескоро совет. Акана шукар накхена хем соработинена ки служба.

О совет таро Колошаните 3:12-14 шај те поможинел туке те ове понизно, те простине некаске со поврединѓа тут, хем те на мислине повише ко адава. А со ако пробинѓан те простине, ама на успејнѓан ко адава? Тегани шај те поможинел туке о начело таро Матеј 18:15. Иако о Исус керѓа лафи башо баре гревија, акава начело шај те поможинел аменге те решина било саво проблеми со иси амен несаве пхралеа или пхењаја. Ваљани те џа ко амаро пхрал или пхен хем те пробина љубезно хем понизно те решина о проблеми.

Ки Библија иси јавера да практична советија. Те шај те применина адала советија, ваљани те сикава о „плодија таро духо“. Ола тане „мангипе, радост, мир, стрпливост, љубезност, шукарипе, вера, кроткост хем самоконтрола“  (Гал. 5:22, 23). Размислин башо акава: Те шај о делија тари јекх машина шукар те керен бути, ваљани те овел лен уље. Слично, ако иси амен особине сар е Јеховаскере, тегани полокхе ка прифатина о разлике машкар аменде хем ка накха шукар јекх јекхеа.

Сарине сием различна — иси амен различна особине, јавер чхане дикхаја ко буќа хем различно вакераја адава со мислинаја. Асавке разлике керена амаре амалипа побарвале. Ама, ола шај те керен те на хаљова амен хем те керен проблемија. Јекх искусно старешина вакерѓа јекх пример кова со сикавела сар шај те авел џи ко акава: „Некој сој лаџутно шај нане те осетинел пе шукар ко друштво некасаја сој попхравдо хем лафчија. Акаја разлика шај на дикхјола бари, ама шај те анел џи ко баре проблемија“. Со мислинеа, дали дуј џене сој тане бут различна нашти те накхен шукар? Те дикха о пример дује апостоленгоро. Кеда размислинаја башо Петар, шај мислинаја башо некасте со вакерела са со авела леске ки годи. А кеда керела пе лафи башо Јован, шај замислинаја аменге јекх љубезно пхрал кова со шукар размислинела англедер те пхенел нешто. О Петар хем о Јован сине различна. Ама, ола шукар соработинена сине ки служба е Јеховаске (Дела 8:14; Гал. 2:9). Акава важинела аменге да авдиве. Чак о слуге е Девлескере сој тане бут различна ко карактер шај шукар те соработинен.

Ама, со ако некој таро тло собрание вакерела или керела нешто со џала туке ко живце? Тегани шукар тано ма те бистре кај о Исус муло адале манушеске да хем кај ваљани те сикаве мангипе (Јован 13:34, 35; Рим. 5:6-8). Нане исправно те одлучине ма те ове  амал леа или те избегине ле. Шај те пуче тут: „Дали о пхрал керела нешто сој спротивно таро е Јеховаскере законија? Дали намерно поврединела ман? Или, само иси амен различна карактерија? Дали иси ле шукар особине со ме би мангава те овен ман?“

На пример, ако леске тано локхо те керел лафи јавере манушенцар а ту сиан лаџутно, соске на договоринеа тут леа те џан заедно ки служба? Аѓаар ка шај те сикљове лестар. Или, со ако тано подарежливо тутар? Дали дикхљан кобор тано бахтало адалеске со поможинела е попхуренге, е насваленге, или е чороленге? Дали шај те сикљове лестар сар шај ту да те ове подарежливо? Акава сикавела кај иако ту хем о пхрал сиен различна, шај те трудине тут те дикхе лескере шукар особине. Шај нане те овен најшукар амала, ама шај те овен попаше јекх јекхеа. Акава ка поможинел туменге те керен мир машкар туменде хем ко собрание.

Ко прво веко, сине дуј пхења со викинена пе сине Еводија хем Синтихија, хем изгледа сине лен бут различно карактер. Ама, о апостол Павле охрабринѓа лен „те овен лен иста мисле џикоте служинена е Девлеске“ (Фил. 4:2). Амен да мангаја те служина е Девлеске заедно амаре пхраленцар хем пхењенцар, хем те кера мир.

Соске ваљани сигате те цида амендар о негативна мисле со иси амен башо јавера? Акала мисле шај те споредина лен диво чарјаја која со бајрола ки јекх шужи бавча лулуѓенцар. Ако на икалаја акаја диво чар, ој ка бајрол ки цело бавча. Исто аѓаар, ако амаре негативна мисле башо јавера бајровена, адава шај лошно те влијајнел упро цело собрание. Ама, ако мангаја е Јехова хем амаре пхрален, ка кера са со шај те овел мир ко собрание.

 Кеда трудинаја амен те ова ко мир е јаверенцар, шај ка изненадина амен кобор шукар резултатија ка икљовен таро адава. Јекх пхен која со доживинѓа акава вакерела: „Мислинава сине кај јекх пхен понашинела пе манцар сар те пхене сиум тикно чхаво. Адава бут сметинела ман сине. Адалеске, почминѓум ма те керав лаја бут лафи хем грубо те иранав лаке. Мислинава сине манге: ’Ој на поштујнела ма ман, адалеске ни ме нане те поштујнав ла‘“.

Пало несаво време, акаја пхен почминѓа те размислинел башо пло стави. „Почминѓум те дикхав мле слабостија хем сиум сине разочарими коркори мандар. Халиљум кај ваљани те менинав мло стави. Молинѓум ман е Јеховаске баши акаја бути, кинѓум е пхењаке јекх поклон хем пишинѓум лаке картичка колате со извининѓум ман адалеске со сиум сине лошно лаја. Гушинѓем амен хем одлучинѓем те бистра о проблеми. Оттегани нане амен више нисаве проблемија.“

Секоле манушеске ваљани мир. Кеда некој тано несигурно или гордо, адава шај те керел те понашинел пе ко начин колеа со шај те руминел о мир. Акава тано нормално е манушенге таро свето, ама о Јехова таро пле слуге аџикерела те овен појавер. Машкар е Јеховаскере сведокија ваљани те овел мир хем јекхипе. О Јехова преку пло свети дух охрабринѓа е Павле те пишинел: „Молинава тумен живинен аѓаар сар со сиен викиме, секогаш овен понизна хем блага, стрплива, мангипаја трпинен тумен јекх јекхеа, аѓаар со искрено ка трудинен тумен те икерен о јекхипе е духоскоро, ко мир кова со поврзинела тумен“ (Еф. 4:1-3). О мир кова со поврзинела е Јеховаскере народо тано бут скапоцено. Адалеске, секова јекх амендар те керел са со шај те овел панда побаро о мир хем те решинел са о проблемија со шај иси ле е пхраленцар хем е пхењенцар.