ЖИВИНАЈА ко свето сој пхердо проблеменцар, адалеске шај те овел пхаро те аракха мир. Чак кеда иси амен хари мир, шај локхе те нашава ле. Со вакерела и Библија башо адава сар шај те аракха чачутно мир кова со трајнела вечно? Хем сар шај те поможина е јаверенге те аракхен асавко мир?

Те шај те аракха чачутно мир, ваљани те осетина амен безбедна хем заштитиме. Ваљани те овен амен шукар амала, хем сој најважно, ваљани те ова паше е Девлеа. Сар шај те кера адава?

Е Јеховаскере законија хем начелија секогаш тане башо амаро шукарипе. Кеда шунаја лен, сикаваја кај иси амен доверба ко Јехова хем кај мангаја те ова ко мир леа (Ерем. 17:7, 8; Јак. 2:22, 23). Тегани ов ка овел паше аменцар хем ка дел амен андруно мир. Ко Исаија 32:17 пишинела: „О резултати тари чачутни праведност ка овел о мир, хем о плоди тари чачутни праведност ка овел о вечно мир хем безбедност“. Шај те аракха чачутно мир кеда таро вило шунаја е Јехова (Иса. 48:18, 19).

О Јехова исто аѓаар денѓа амен јекх скапоцено поклон кова со поможинела аменге те овел амен мир со трајнела вечно. Адава поклон тано о свети дух (Дела 9:31).

О апостол Павле вакерѓа кај о мир тано јекх таро особине со авена таро свети дух (Гал. 5:22, 23). Адалеске со о мир авела таро е Девлескоро духо, ваљани те мукха о свети дух те водинел амен ако мангаја те овел амен мир. Сар мукхаја те водинел амен о свети дух?

Прво, ваљани редовно те читина е Девлескоро Лафи (Пс. 1:2, 3). Џикоте хор размислинаја башо адава со читинаја лестар, о свети дух поможинела аменге те хаљова кола буќа мангела о Јехова, а кола мрзинела.  На пример, сикљоваја сар о Јехова ачховела ко мир е јаверенцар хем соске леске добором важно о мир. Кеда кераја адава со сикљоваја тари Библија, ка овел амен побаро мир ко живото (Изр. 3:1, 2).

Дујто, ваљани те молина амен башо свети дух (Лука 11:13). О Јехова ветинела кај, ако родаја лестар помош, „о мир таро Девел, кова сој упредер секоја мисла, ка аракхел [амаре] виле хем [амаре] мисле преку о Исус Христос“ (Фил. 4:6, 7). Кеда ачховаја паше е Јеховаја хем родаја те дел амен свети дух, ка овел амен андруно мир (Рим. 15:13).

И Библија поможинѓа буте манушенге те керен промене ко пло живото, хем акана тане ко мир е Јеховаја, иси лен андруно мир хем тане ко мир е јаверенцар. Сар успејнѓе те керен акала промене?

Англедер те авен ко чачипе, несаве пхраља хем пхења сигате хољанена сине хем чак сине насилна. Ама, ола бут трудинѓе пе те менинен пе хем акана тане љубезна, стрплива хем мангена о мир * (Дикх и фуснота.) (Изр. 29:22). Те дикха сар јекх пхрал хем јекх пхен керѓе промене ки пли личност.

О Дејвид, англедер те овел е Јеховаскоро сведоко, бут пути критикујнела сине е јаверен хем керела сине грубо лафи пле фамилијаја. Ама, ов халило кај ваљани те менинел пе. Со поможинѓа леске ко адава? Ов вакерела: „Почминѓум те применинав о библиска начелија ко мло живото хем акана повише поштујнаја амен мле фамилијаја“.

Упри Рејчел влијајнела сине и околина коте со барили. Ој објаснинела: „Акана да манге пхаро те контролиринав мли холи соске бариљум ки фамилија коте со сарине бут сигате хољанена сине“. Со поможинѓа лаке те аракхел мир? Ој вакерела: „Редовно молинава  ман сине е Јеховаске хем родава сине помош лестар“.

О Дејвид хем и Рејчел тане само дуј примерија кола со сикавена кај, ако применинаја о библиска начелија хем ако молинаја е Девле те поможинел аменге пле духоја, ка овел амен мир. Иако живинаја ко свето коте со иси бут холи, шај те овел амен андруно мир. Акава ка поможинел аменге пошукар те накха амаре фамилијаја хем е јаверенцар ко собрание. Ама, о Јехова вакерела аменге: „Овен ко мир са е манушенцар“ (Рим. 12:18). Дали шај чаче те ова ко мир са е манушенцар хем соске ваљани те трудина амен те ова ко мир е јаверенцар?

Кеда сием ки служба, проповединаја е манушенге о шукар хабери хем поможинаја ленге те аракхен мир (Иса. 9:6, 7; Мат. 24:14). Бут џене мангена хем прифатинена акава хабери. Адалеске, ола нане више бизи надеж хем нане хољаме башо адава со случинела пе ко свето. Акана иси лен чачутни надеж башо време со авела хем акава поттикнинела лен те трудинен пе те овен ко мир е јаверенцар (Пс. 34:14).

Ама, на мангена сарине акава хабери, барем на таро прво пути (Јован 3:19). Бизи разлика сар реагиринена о мануша, о Девел дела амен пло духо те ачхова смириме хем те сикава поштовање џикоте проповединаја. Аѓаар шунаја о совет е Исусескоро: „Кеда ка кхувен ко кхер, поздравинен е кхерутнен. Ако приминена тумен, нека авел ки ленде тумаро мир, ама ако на приминена тумен, тумаро мир нека иранел пе ки туменде“ (Матеј 10:11-13). Ако шунаја о совет е Исусескоро, шај те овел амен мир бизи разлика со керена или вакерена о јавера. Хем нане те бистра кај шај те овел амен прилика те поможина адале манушенге јавер пути.

Исто аѓаар, трудинаја амен те ова ко мир е претставниконцар тари власт аѓаар со сикаваја поштовање кеда кераја ленцар лафи, па чак околенцар со противинена пе аменге. На пример, о властија ки јекх пхув ки Африка на мукхена сине те градинен пе дворане. Амаре пхраља џанле кај ваљани те пробинен те решинен акава проблеми ко мирно начин. Бичхалѓе јекхе пхрале кова со англедер служинела сине сар мисионери ки адаја пхув те керел лафи е амбасадореа тари адаја пхув ко Лондон (Англија). Ов ваљани сине те објаснинел леске кај е Јеховаскере сведокија тане мирно народо кова со проповединела хабери со анела мир.

О пхрал вакерела: „Кеда ресљум ки рецепција ки амбасада, и рецепционерка сине уравди ко шеја таро јекх племе со џанава сине ленгири чхиб. Адалеске поздравинѓум ла ки адаја чхиб. Ој сине изненадими хем пучља ман: ’Која тани и причина со ален?‘ Културно вакерѓум лаке кај мангава те дикхав ман е амбасадореа. Ој јавинѓа пе леске хем ов иклило те дикхел пе манцар хем поздравинѓа ман ки пли чхиб. Пало адава, ов внимателно шунѓа џикоте објаснинѓум леске кај е Јеховаскере сведокија тане мирно народо кова со проповединела хабери со анела мир“.

Откеда о амбасадори шунѓа со вакерѓа о пхрал, ов халило со кераја хем на сине ле више предрасуде сар англедер. Пало несаво време, и влада ки адаја афричко пхув менинѓа пли одлука хем дозволинѓа е Јеховаскере сведокија те градинен дворане. О пхраља сине бут бахтале! Акатар шај те дикха кај кеда сикаваја поштовање е јаверенге, трудинаја амен те ова ко мир.

Авдиве, е Јеховаскере слуге аракхљовена ко духовно рај коте со иси мир. Секова јекх амендар шај те поможинел те аракхел пе адава мир аѓаар со ка трудина амен те овел амен акаја особина ко амаро живото. Тегани шај те ова увериме кај о Јехова ка овел задоволно амендар. Хем ко лескоро нево свето ка дел амен мир кова со ка трајнел вечно (2. Пет. 3:13, 14).