1. Која тани јекх бути со керела амен бут бахтале?

БУТ сием бахтале кеда шунаја сар е Девлескере слуге мукхена ленгири светлина те светинел! О берш со накхља, е Јеховаскоро народо водинѓа повише таро 10.000.000 библиска курсија. Исто аѓаар, милионија интересентија але ки Спомен-свеченост хем шунѓе башо мангипе со сикавѓа о Јехова аменге адалеа со денѓа и откупнина (1. Јов. 4:9).

2, 3. а) Со на чхинавела амен те светина сар светло ко акава свето? б) Со ка дикха ки акаја статија?

² Ко цело свето, е Јеховаскере сведокија керена лафи ко различна чхибја. Ама акава на чхинавела амен те славина е Јехова сар јекх фамилија сој ко јекхипе (Отк. 7:9). Бизи разлика ки која чхиб кераја лафи или коте живинаја, амен шај те светина сар светло ко акава свето (Фил. 2:15).

³ Амари служба, амаро јекхипе хем адава со сием духовно џангавде славинела е Јехова. Ки акаја статија ка  дикха сар шај те мукха амари светлина те светинел ко акала трин подрачја. (Читин Матеј 5:14-16.)

4, 5. а) Освен преку и служба, сар шај те мукха те светинел амари светлина? б) Кола шукар резултатија шај те овен амен ако понашинаја амен љубезно? (Дикх и слика ко почеток тари статија.)

⁴ Јекх важно начин сар мукхаја амари светлина те светинел тано кеда проповединаја хем кераја ученикија (Мат. 28:19, 20). Ки Стражарско кула таро 1 јуни 1925 берш, ки статија „Светлина ко мрако“ пишинела сине кај џикоте трајнена о последна диве никој ка нашти те овел верно е Господареске ако на користинѓа „и прилика те мукхел лескири светлина те светинел“. Ки статија пишинела сине: „Ов мора те керел акава аѓаар со ка вакерел о шукар хабери са е манушенге ки пхув, хем аѓаар со ка живинел спрема и светлина [таро е Девлескоро Лафи]“. Освен преку и служба, славинаја е Јехова адалеа сар понашинаја амен да. Бут мануша дикхена амен џикоте проповединаја. Кеда асаја ленцар хем поздравинаја лен адава шај те керел те овел лен шукар мислење баши аменде хем башо Девел колеске со служинаја.

⁵ О Исус вакерѓа пле учениконге: „Кеда ка кхувен ко кхер, поздравинен е кхерутнен“ (Мат. 10:12). Ко подрачје коте со проповединела сине о Исус сине обичај о мануша те канинен јабанџиен песте кхере. Ко бут тхана авдиве, адава више нане обичај. О мануша бут пути тане нервозна или хољанена кеда дикхена јабанџија англо удар. Ама ако сием љубезна хем пријатна, ола шај ка осетинен пе послободна. Кеда сведочинеа количкенцар ко прометна тхана, шај приметинѓан кај о мануша бут пути реагиринена позитивно ако асаја ленцар хем љубезно поздравинеа лен. Ако сием ленцар љубезна ка манген шај чак те почминен те керен аменцар лафи.

6. Со керела јекх попхуро брачно пари те шај те ачховел активно ки служба?

⁶ Јекх попхуро брачно пари ки Англија нашти више те проповединел таро кхер ко кхер сар со керена сине адава англедер, соске иси лен проблемија састипаја. Адалеске со живинена паше узи јекх школа, икалѓе јекх астали хем ки лесте чхивѓе публикацие кола со шај те интересинен е родителен со авена те лен пумаре чхавен. Несаве родителија леле публикацие, машкар ко кола сине хем о лила Младите прашуваат — делотворни одговори, том 1 хем 2. Јекх пионерка таро ленгоро собрание бут пути придружинела пе ленге ки служба. О родителија приметинѓе кај ој тани љубезно хем кај о брачно пари чаче грижинела пе е јаверенге. Јекх родители чак почминѓа те проучинел и Библија.

7. Сар шај те поможине е избеглиценге ко тхан коте со живинеа?

⁷ Ко последна берша, бут џене мора сине те нашен тари пумари пхув хем те живинен ко јавера државе сар избеглице. Сар шај те поможине ленге те сикљовен башо Јехова? Прво, шај те сикљове  сар те поздравине лен ки ленгири чхиб. Исто аѓаар, шај те користине и апликација JW Language те сикљове некобор лафија кола со шај те поттикнинен лен те ачховен хем те керен туја лафи. Пало адава, шај те сикаве ленге видеоклипија хем публикацие ки ленгири чхиб тари jw.org (5. Мој. 10:19).

8, 9. а) Сар поможинела аменге о состанок Амаро живото хем служба? б) Сар шај о родителија те поможинен пумаре чхавенге пошукар те коментаринен ко состанокија?

⁸ О Јехова дела амен баш адава со ваљани аменге те шај пошукар те проповедина. На пример, адава со сикљоваја ко состанок Амаро живото хем служба поможинела аменге те ова панда поспремна те кера повторна посете хем те почмина библиска курсија.

⁹ Кеда о неве авена ко амаре состанокија, ола тане воодушевиме таро коментарија со дена амаре чхаве. Адалеске, поможинен тумаре чхавенге те коментаринен пумаре лафенцар. Несаве мануша сине поттикниме те прифатинен о чачипе кеда шунѓе сар о чхаве керена лафи баши пли вера ко јекх едноставно хем искрено начин (1. Кор. 14:25).

10. Сар шај те кера те овел позорало о јекхипе ки фамилија?

¹⁰ Славинаја е Јехова кеда трудинаја амен те овел амен јекхипе хем мир ки амари фамилија. На пример, ако сиан родители, трудин тут редовно те икерен и Фамилијарно рат. Бут фамилие заедно дикхена е масекоскири емисија ко JW Broadcasting, хем пало адава  керена лафи сар шај те керен адава со сиклиле. Ваљани те на бистра кај јекх тикно чхаво иси ле појавера потребе таро јекх тинејџери. Те да амендар са те поможина секоле јекхеске ки фамилија те овел ле целосно корист тари Фамилијарно рат (Пс. 148:12, 13).

11-13. Сар шај те кера позорало о јекхипе ко собрание?

¹¹ Ако сиан терно, сар шај те поможине те овел позорало о јекхипе ко собрание? Поможин е јаверенге те осетинен пе мангле. Јекх начин сар шај те кере адава тано те ове амал е попхуре пхраленцар хем пхењенцар. Пуч лен со поможинѓа ленге добором бут берша те служинен е Јеховаске. Шај те сикљове лендар бут корисна буќа. Адава бут ка охрабринел хем тут хем лен! Сарине амен, бизи разлика дали сием терне или пхуре, шај те поможина о неве со авена ки дворана те осетинен пе шукар. Шај те поздравина лен, те поможина ленге те аракхен тхан бешибаске хем те запознајна лен е јаверенцар. Аѓаар ка поможина ленге те осетинен пе шукар.

¹² Ако туке денди задача те водине состанок баши служба, шај те поможине е попхуренге силно те светинел ленгири светлина. Поможин ленге те овел лен подрачје кова со ка одговоринел ленге. Шај те договорине некој таро терне те поможинел ленге ки служба. О попхуре пхраља хем пхења хем окола со иси лен проблемија састипаја, бут пути тане обесхрабриме соске нашти те проповединен добором кобор со мангена. Ама ка осетинен пе бут шукар кеда ка дикхен кај грижинеа тут ленге хем кај хаљовеа ленгири ситуација. Бизи разлика кобор тане пхуре или кобор време тане ко чачипе, тло мангипе ка охрабринел лен ревно те проповединен (3. Мој. 19:32).

¹³ О Израелција сине бахтале со шај сине заедно те служинен е Јеховаске. О псалмисти пишинѓа: „Кобор тано шукар хем пријатно кеда о пхраља живинена заедно ко јекхипе!“ (Читин Псалм 133:1, 2.) Ов спорединѓа о јекхипе сар масло помазибаске, кова со освежинела и кожа хем сине ле шужо мирис. Слично, амен шај те освежина амаре пхрален хем пхењен аѓаар со ка ова љубезна хем пријатна ленцар. Аѓаар кераја позорало о јекхипе ко собрание. Шај ли панда пошукар те пенџаре е пхрален хем е пхењен таро тло собрание? (2. Кор. 6:11-13).

14. Сар шај те мукха амари светлина те светинел ко тхан коте со живинаја?

¹⁴ Тли светлина шај те светинел бизи разлика коте аракхљовеа. На пример, адава со ка ове љубезно шај те керел тле комшие те манген те сикљовен повише башо Јехова. Пуч тут: „Со мислинена мле комшие баши манде? Дали мло кхер хем о дворо тане чиста хем уредна? Дали сиум пенџардо сар некој со мангела те поможинел е комшиенге?“ Шај те пуче јавере пхрален хем пхењен сар влијајнѓа ленгири љубезност хем шукар пример упри ленгири фамилија, комшие, колеге или соученикија (Еф. 5:9).

15. Соске ваљани те ачхова духовно џангавде?

¹⁵ Ако мангаја понадари да силно те светинел амари светлина, ваљани те ова свесна ко кова време живинаја. О Исус некобор пути вакерѓа пле учениконге: „Ачховен џангавде“ (Мат. 24:42; 25:13; 26:41). Ако мислинаја кај и „бари неволја“ тани панда дур, нане те ова внимателна те користина секоја прилика те поможина е јаверенге те сикљовен башо Јехова (Мат. 24:21). Тегани, наместо силно те светинел амари светлина, ој хари похари ка овел послабо хем шај чак те ачховел.

16, 17. Сар шај те ачхове духовно џангавдо?

¹⁶ Авдиве, повише таро било кеда англедер, ваљани те пазина те ачхова духовно џангавде. О условија ко свето овена са полошна. Ама, увериме сием кај о крајо ка авел точно ко време со одлучинѓа о Јехова (Мат. 24:42-44). Џикоте на авела адава време, ваљани те ова стрплива хем те мислина ки амари надеж. Секова диве читин и Библија хем никогаш ма чхинав те молине тут е Јеховаске (1. Пет. 4:7). Сикљов таро пхраља хем пхења кола со бершенцар служинена е Јеховаске. На пример, шај те читине искуствија, сар сој и статија  „Седумдесет години се држам за скутот на Евреинот“, која со иклили ки Стражарско кула таро 15 април 2012 берш, 18-21 страна.

¹⁷ Ачхов зафатимо ки служба башо Јехова. Кер шукарипе е јаверенге хем дружин тут е пхраленцар хем е пхењенцар. Тегани ка ове бахтало хем о време сигате ка накхел (Еф. 5:16). Е Јеховаскере слуге керѓе бут бути ко акала шел берша со накхле. Хем авдиве сием зафатиме сар никогаш англедер. Нашти сине ни те замислина аменге кај о чачутно обожавање добором бут ка напредујнел. Амари светлина силно светинела!

18, 19. Сар шај те поможинен аменге о старешине ревно те служина е Јеховаске? Вакер пример.

¹⁸ Иако кераја бут грешке, о Јехова дозволинела те служина леске. Те шај те поможинел аменге, ов чхивѓа ко собрание те овен „мануша денде сар поклон“ — о старешине. (Читин Ефешаните 4:8, 11, 12.) Адалеске, кеда ка посетинен тут о старешине, користин и прилика те сикљове тари ленгири мудрост хем таро советија со ка ден тут.

¹⁹ На пример, јекх брачно пари ки Англија сине лен проблемија ко брако хем адалеске родинѓе помош таро дуј старешине. И ромни мислинела сине кај о ром на грижинела пе доволно башо духовна потребе е фамилијакере. О ром признајнѓа кај на сине баш шукар учители хем кај на трудинела пе сине редовно те икерен и Фамилијарно рат. О старешине поможинѓе ленге те размислинен башо пример е Исусескоро. Охрабринѓе е роме те овел сар о Исус кова со шукар грижинела пе сине башо пле ученикија. Охрабринѓе е ромња те овел стрпливо пле ромеа. Денѓе лен несаве предлогија башо адава сар шај те икерен и Фамилијарно рат пле дује чхавенцар (Еф. 5:21-29). О ром трудинѓа пе бут те шај те овел пошукар поглавари. О старешине охрабринѓе ле те на откажинел пе хем понадари да те овел ле доверба кај о Јехова ка поможинел леске пле духоја. О мангипе хем и грижа со сикавѓе акала старешине бут поможинѓа акале фамилијаке!

20. Саве резултатија шај те овен ако мукхеа те светинел тли светлина?

²⁰ „Бахтало тано секој со дарала таро Јехова хем џала пало лескере друмија“ (Пс. 128:1). Ка ове бахтало ако мукхеа те светинел тли светлина. Адалеске, сикав е јаверен башо Девел, кер са со шај те поможине ки фамилија хем ко собрание те овел јекхипе хем ачхов духовно џангавдо. О јавера ка дикхен тло шукар пример хем ка манген ола да те славинен амаре Даде, е Јехова (Мат. 5:16).