1. Спрема Колошаните 2:4, 8, сар пробинела о Сатана те завединел амен?

О САТАНА мангела те иранел амен против о Јехова. Те шај те успејнел ко адава, пробинела те влијајнел ки амари годи те шај те размислина сар со мангела ов. Те шај те завединел амен, ов пробинела те користинел амаре желбе. (Читин Колошаните 2:4, 8.)

2-3. а) Соске ваљани те пазина ко лафија сој пишиме ко Колошаните 2:8? б) Со ка дикха ки акаја статија?

² Дали чаче постојнела опасност те ова заведиме таро Сатана? Оја! О лафија со пишинѓа лен о Павле ко Колошаните 2:8 на сине околенге со на служинена е Девлеске, него е христијаненге со сине помазиме свети духоја (Кол. 1:2, 5). О христијања ко адава време сине ки опасност те овен заведиме, а амен авдиве сием ки панда побари опасност (1. Кор. 10:12). Соске? Адалеске со о Сатана тано фрдимо ки Пхув, хем са пле силенцар трудинела пе те завединел е Девлескере верна слуген (Отк. 12:9, 12, 17). Освен адава, амен живинаја ко време кеда о лошна хем о ховавне мануша овена „таро лошна ко полошна“ (2. Тим. 3:1, 13).

³ Ки акаја статија ка дикха сар о Сатана користинела „ховавне хем чуче лафија“ те шај те влијајнел упро амаро размислибе. Ка дикха трин таро лескере тактике (Еф. 6:11). Пало адава, ки наредно статија, ка дикха сар шај те борина амен против о лошно влијание со шај керѓе лескере тактике упро амаро размислибе. Ама, прво ка  дикха со шај те сикљова таро начин сар о Сатана завединѓа е Израелцон откеда кхувѓе ки Ветими пхув.

4-6. Спрема 5. Мојсеева 11:10-15, саве неве земјоделска методе ваљани сине те сикљовен о Израелција кеда кхувѓе ки Ветими пхув?

⁴ О Сатана ко бут лукаво начин искушинѓа е Израелцон те керен идолопоклонство. Сар керѓа адава? Ов користинѓа ленгири потреба хајбаске. Кеда кхувѓе ки Ветими пхув, о Израелција мора сине те сикљовен те одглединен храна ко неве начинија. Џикоте сине ко Египет, о Израелција користинѓе о пани тари река Нил те шај те вадинен о ниве. Ама, ки Ветими пхув на сине бари река, адалеске те шај те бајрол и храна ваљани сине ленге бршим хем роса со перела сине сабајле. (Читин 5. Мојсеева 11:10-15; Иса. 18:4, 5.) Адалеске, о Израелција мора сине те сикљовен те обработинен и пхув ко неве начинија. Адава на сине локхо соске повише џене со сине лен несаво искуство башо земјоделство муле ки пустина.

⁵ О Јехова објаснинѓа пле слугенге кај ленгере околностија менинѓе пе. Пало адава вакерѓа панда јекх предупредување кова со изглединела сине кај нане ле нисави врска земјоделствоја: „Пазинен те на ховавел тумен тумаро вило, те на залутинен хем те почминен те обожавинен јавере девлен хем те клајнинен тумен ленге“ (5. Мој. 11:16, 17). Соске о Јехова предупрединѓа е Израелцон те на обожавинен ховавне девлен џикоте вакерела ленге сине башо неве земјоделска методе?

⁶ О Јехова џанља кај о Израелција ка овен ко искушение те џан ко околна паганска народија те шај те сикљовен несаве начинија сар те одглединен храна. Џанѓола пе, ленгере комшие сине бут поискусна, хем адалеске о Израелција шај сине лендар те сикљовен  несаве корисна вештине. Ама адава сине опасно, соске о ханаанска земјоделција обожавинена сине е Ваале хем упро ленгоро размислибе влијајнена сине адала верувања. Ола верујнена сине кај о небо тано е Ваалескоро хем кај ов дела бршим. О Јехова на мангља лескоро народо те овел заведимо таро асавке ховавне верувања. Ама, о Израелција повише пути биринена сине те служинен е Ваалеске (4. Мој. 25:3, 5; Суд. 2:13; 1. Цар. 18:18). Акана те дикха сар о Сатана успејнѓа те завединел е Израелцон.

7. Сар сине испитими и вера е Израелцонгири кеда кхувѓе ки Ветими пхув?

⁷ И прво тактика со користинѓа о Сатана сине со злоупотребинѓа и нормално желба е Израелцонгири о бршим те сапанкерел и пхув. Ки Ветими пхув дела сине хари бршим ко периоди таро април џи ко септември. Те шај те преживинен хем и пхув те дел бут плоди, ваљанела сине ленге о бршим кова со почминела сине те дел околу октомври. О Сатана завединѓа е Израелцон те верујнен кај, ако мангена те овел лен бут храна, ваљани те прифатинен о обичаија таро паганска народија со сине околу ленде. Адала народија верујнена сине кај ваљани те керен несаве ритуалија те шај те поттикнинен пумаре девлен те ден лен бршим. Окола Израелција со на сине лен вера ко Јехова мислинена сине кај и суша шај те избегинен ла само ако керена паганска обичаија ки чест е ховавне девлескири о Ваал.

8. Која тани и дујто тактика со користинѓа о Сатана? Објаснин.

⁸ О Сатана користинѓа панда јекх тактика те шај те завединел е Израелцон. Ов искушинѓа лен те керен сексуално неморал. О паганска народија служинена сине пумаре девленге аѓаар со учествујнена сине ко одвратна неморална постапке. Ко акава неморално облик башо обожавибе сине вклучими и џувљани хем и муршани проституција ко храмија. О паганска народија на само со дозволинена сине и хомосексуалност хем јавера обликија таро сексуално неморал, него исто аѓаар ола дикхена сине ко акала буќа сар нормална! (5. Мој. 23:17, 18; 1. Цар. 14:24). Ола верујнена сине кај акала ритуалија поттикнинена ленгере девлен те керен и пхув те дел храна. Буте Израелцонге сине привлечна о паганска неморална ритуалија хем адалеске биринѓе те служинен е ховавне девленге. А адалеа, уствари, сине заведиме таро Сатана.

9. Спрема Осија 2:16, 17, сар о Сатана руминѓа е Израелцонгоро начин сар дикхена сине ко Јехова?

⁹ О Сатана користинѓа трито тактика — руминѓа е Израелцонгоро начин сар дикхена сине ко Јехова. Ко време кеда живинела сине о пророко о Еремија, о Јехова вакерѓа кај о ховавне пророкија завединѓе лескере слуген те бистрен лескоро анав адалеске со обожавинена сине е Ваале (Ерем. 23:27). Изгледа кај несаво време е Девлескере слуге чхинавѓе те користинен е Јеховаскоро анав хем менинѓе ле е анавеа Ваал, со значинела „Сопственико“ или „Господари“. Адава керѓа те овел пхаро е Израелцонге јасно те дикхен и разлика машкар о Јехова хем о Ваал. Адалеске почминѓе те мешинен о ритуалија таро обожавибе е Ваалескоро е службаја башо Јехова. (Читин Осија 2:16, 17.) *

10. Саве тактике користинела о Сатана авдиве?

¹⁰ О Сатана користинела иста тактике авдиве да. Ов завединела е манушен адалеа со злоупотребинела ленгере нормална желбе,  искушинела лен те керен сексуално неморал хем руминела ленгоро начин сар дикхена ко Јехова. Најангле те дикха и последно тактика.

11. Со керѓа о Сатана те шај те руминел о начин сар о мануша дикхена ко Јехова?

¹¹ О Сатана руминела о начин сар о мануша дикхена ко Јехова. Откеда муле е Исусескере апостолија, несаве со вакерена сине кај тане христијања почминѓе те ширинен ховавне сикљојба (Дела 20:29, 30; 2. Сол. 2:3). Акала отпадникија почминѓе те превртинен о чачипе башо единствено чачутно Девел. На пример, кеда препишинена сине и Библија, ола чхинавѓе те користинен е Девлескоро анав хем менинѓе ле е титулаја „Господари“ или јавере титуленцар. Адалеа керѓе те овел пхаро е манушенге со читинена ла те хаљовен сави разлика иси машкар о Јехова хем о јавера „господарија“ сој тане спомниме ки Библија (1. Кор. 8:5). Ола користинена сине о исто лафи „Господари“ хем башо Јехова хем башо Исус, адалеа керѓе е манушенге те овел пхаро те хаљовен кај о Јехова хем лескоро Чхаво тане дуј различна личностија хем кај иси лен различна положбе (Јован 17:3). Акава керѓа те почминел те развинел пе о сикљојбе башо тројство — сикљојбе кова со нане ко е Девлескоро Лафи. Адалеске, бут џене мислинена кај тано бут пхаро те пенџарен е Девле. Адава тано баро ховајбе! (Дела 17:27).

12. Со ширинела и ховавни религија хем спрема Римјаните 1:28-31, саве тане о последице таро адава?

¹² О Сатана искушинела е манушен те керен сексуално неморал. Ко пурано Израел, о Сатана користинѓа и ховавни религија те шај те ширинел о неморал. Авдиве ов керела и исто бути. И ховавни религија на само со дозволинела него исто аѓаар ширинела о неморал. Адалеске, бут џене со вакерена кај служинена е Девлеске чхинавѓе те икерен лескере јасна морална мерилија. Ко пло писмо џи ко пхраља таро Рим, о апостол Павле објаснинѓа кола тане о последице таро адава. (Читин Римјаните 1:28-31.) Ко „адава со нане исправно“ тане вклучиме са о обликија таро сексуално неморал, коте сој вклучими хем и хомосексуалност (Рим. 1:24-27, 32; Отк. 2:20). Акава сикавела кобор тано важно амен сар е Девлескере слуге те шуна о јасна библиска сикајба!

13. Која тани панда јекх тактика со користинела о Сатана?

¹³ О Сатана злоупотребинела о нормална желбе е манушенгере. Саринен иси амен  природно желба те сикљова вештине кола со шај те поможинен амен те грижина амен аменге хем амаре фамилијаке (1. Тим. 5:8). Обично, акала вештине добинаја лен аѓаар со џаја ки школа хем сикљоваја. Ама, ваљани те пазина. Ко бут пхувја, о ученикија на сикљовена само практична вештине него хем разна манушикане филозофие. О ученикија тане поттикниме те на поштујнен и Библија хем те сумнинен пе кај иси Девел. Ки школа сикљовена кај са о интелигентна мануша верујнена ки еволуција (Рим. 1:21-23). Асавке сикљојба тане спротивна тари мудрост е Девлескири (1. Кор. 1:19-21; 3:18-20).

14. Ко со поттикнинела и манушикани мудрост?

¹⁴ И манушикани мудрост џала против е Јеховаскере праведна мерилија. Ој на поттикнинела е манушен те развинен о особине со авена таро е Девлескоро свети дух него те постапинен спрема пло грешно тело (Гал. 5:19-23). Ој поттикнинела е манушен те овен горда хем арогантна, а адалеске о мануша мангена коркори пес (2. Тим. 3:2-4). Акала особине тане спротивна тари понизност, која со е Девлескере слуге тане поттикниме те сикавен ла (2. Сам. 22:28). Несаве Девлескере слуге со геле ко факултети мукхле упро ленгоро размислибе те влијајнел и манушикани мудрост, а на е Девлескири. Те дикха само јекх пример со шај те случинел пе ако на пазинаја ки акаја опасност.

15-16. Со сикљовеа таро искуство јекхе пхењакоро?

¹⁵ Јекх пхен која со повише таро 15 берш тани ки полновремено служба, вакерела: „Сар Јеховаскоро сведоко, читинѓум хем шунѓум баши опасност таро факултетско образование, ама на пазинѓум ко адала предупредувања. Мислинѓум кај адава совет нане  манге“. Саве проблемија анѓа лаке асавко стави? Ој вакерела: „Сиум сине добором бут зафатими е учибаја со чак на сине ман време те молинав ман е Јеховаске сар англедер. Сиум сине бут уморно, адалеске на уживинава сине ки служба хем на спреминава ман сине шукар башо состанокија. Откеда халиљум кај адава со посветинѓум ман ко факултетско образование лошно влијајнѓа ко мло однос е Јеховаја, одлучинѓум те чхинавав е факултетеа“.

¹⁶ Сар влијајнѓа о факултетско образование упри акаја пхен? Ој вакерела: „Лаџава те признајнав кај о факултетско образование бут лошно влијајнѓа ки манде. Почминѓум те критикујнав... е пхрален хем е пхењен, те аџикерав лендар повише него со ваљани хем те избегинав лен. Ваљанѓа манге бут време те шај те чхинавав адале размислибаја. Таро мло искуство сиклиљум кобор тано опасно те на шунен пе о предупредувања со дела лен амаро Дад сој ко небо преку пли организација. О Јехова пенџарела ман бут пошукар мандар. Ваљанѓа те шунав ле!“

17. а) Ко со ваљани те ова одлучна? б) Со ка дикха ки наредно статија?

¹⁷ Ов одлучно никогаш те на дозволине те завединел тут е Сатанаскоро свето „филозофијаја хем ховавне хем чуче лафенцар“. Аракх тут таро е Сатанаскере тактике (1. Кор. 3:18; 2. Кор. 2:11). Никогаш ма дозволин е Сатанаске те руминел о начин сар дикхеа ко Јехова. Живин спрема е Девлескере уче мерилија. Хем никогаш ма мукх о Сатана те завединел тут те на шуне о советија со дела лен туке о Јехова. Ама, со ваљани те кере ако хаљовеа кај о свето више влијајнѓа упро тло размислибе? Ки наредно статија ка дикха сар е Девлескоро Лафи шај те поможинел аменге те цида чак мисле хем навике со мукхле хор корено ки аменде (2. Кор. 10:4, 5).