1. Сар шај те постапина сар амаро Дад о Јехова?

О ЈЕХОВА бут мангела амен (Јован 3:16). Амен да мангаја те ова сар лесте. Адалеске трудинаја амен те ова „сочувствителна, пхерде пхраликане мангипаја [хем] милостива“ сариненцар, посебно амаре пхраленцар ки вера (1. Пет. 3:8; Гал. 6:10). Кеда некој таро амаре духовна пхраља хем пхења тане ки пхари ситуација, амен мангаја те поможина лен.

2. Со ка дикха ки акаја статија?

² Секој со мангела те овел дело тари е Јеховаскири фамилија ка доживинел стресна ситуацие (Мар. 10:29, 30). Сар со авела о крајо акале светоскоро, веројатно ка овен амен панда повише проблемија. Сар шај те поможина јекх јекхеске? Те дикха со шај те сикљова таро библиска извештаија башо Лот, Јов хем Ноемина. Исто аѓаар, ка дикха саво пхарипе иси несаве пхрален хем пхењен авдиве, хем сар шај те поможина ленге те икљовен ко крајо е проблеменцар.

3. Сар со дикхаја таро 2. Петрово 2:7, 8, сави лошно одлука анѓа о Лот хем саве сине о последице?

³ О Лот анѓа лошно одлука кеда одлучинѓа те живинел ко Содом коте со о мануша сине ептен неморална. (Читин 2. Петрово 2:7, 8.) Цело адава подрачје сине бут барвало, ама о Лот доживинѓа бут пхарипа адалеске со селинѓа пе ко Содом (1. Мој. 13:8-13; 14:12). Лескири ромни бут замангља и диз, или ули паше несаве манушенцар со живинена сине адатхе, хем адалеске  на шунѓа е Јехова. Ој нашавѓа пло живото кеда о Девел мукхља јаг хем сулфур упро адава подрачје. Исто аѓаар размислин башо е Лотескере дуј чхаја. Ола сине вериме муршенцар кола со муле ко Содом. О Лот нашавѓа пло кхер, пло имот хем, сој најжално таро са, ачхило бизи пли ромни (1. Мој. 19:12-14, 17, 26). Дали ко акава пхаро периоди о Јехова нашавѓа пли стрпливост е Лотеа? На.

4. Сар о Јехова сине стрпливо е Лотеа? (Дикх и слика тари насловно страна.)

⁴ Иако коркори о Лот одлучинѓа те живинел ко Содом, о Јехова сикавѓа сочувство адалеа со бичхалѓа ангелија те спасинен ле хем лескере фамилија. Ама, наместо одма те шунел и заповед е ангеленгири те икљол таро Содом, о Лот почминѓа те задржинел пе. О ангелија мора сине те астарен ле таро вас хем те поможинен леске хем лескере фамилијаке те икљон тари диз (1. Мој. 19:15, 16). Тегани, о ангелија вакерѓе леске те нашел ко планине. Ама, наместо те шунел е Јехова, о Лот замолинѓа ле те џал ки јекх диз со сине паше (1. Мој. 19:17-20). О Јехова стрпливо шунѓа ле хем дозволинѓа леске те нашел адари. Пало несаво време, о Лот дарандило те живинел ки адаја диз, хем селинѓа пе ко планине — баш адари кај со вакерѓа леске о Јехова англедер (1. Мој. 19:30). О Јехова чаче сикавѓа бари стрпливост! Сар шај амен да те џа пало лескоро пример?

5-6. Сар шај те џа пало е Девлескоро пример џикоте трудинаја амен те применина о лафија таро 1. Солуњаните 5:14?

⁵ Исто сар о Лот, шај несаво пхрал или пхен ка анен несави лошно одлука со ка анел ленге баре проблемија. Ако случинела пе нешто асавко, со ка кера амен? Шај ка авел аменге те пхена ленге кај кхедена адава со сејнѓе, хем веројатно тано аѓаар ко ленгоро случај (Гал. 6:7). Ама, ка овел пошукар ако поможинаја ленге исто сар о Јехова со поможинѓа е Лотеске. Те дикха сар шај те кера адава.

⁶ О Јехова на бичхалѓа е ангелен само те предупрединен е Лоте него хем те поможинен леске те нашел тари катастрофа со ваљанѓа те овел ко Содом. Слично аѓаар, амен да шај ка ваљани те предупредина амаре пхрале ако дикхаја кај керела нешто со ки иднина ка анел леске проблемија. Ама шај ка ова ки можност хем те поможина леске. Чак ако ваљани леске повише време те применинел о библиско совет, ваљани те ова стрплива. Шукар тано те џа пало пример е дује ангеленгоро. Наместо те вазда амаре васта таро амаро пхрал хем те цида амен лестар, ваљани те размислина сар шај практично те поможина леске (1. Јов. 3:18). Шај ка ваљанел, симболично вакердо „те астара ле таро вас“, или јавере лафенцар те поможина леске те применинел о библиско совет. (Читин 1. Солуњаните 5:14.)

7. Сар шај те дикха ко јавера исто сар о Јехова со дикхља ко Лот?

⁷ О Јехова шај сине те концентриринел пе ко слабостија е Лотескере. Наместо адава, покасно ов водинѓа е Петаре те пишинел кај о Лот сине праведно мануш. Чаче сием бут бахтале со о Јехова простинела амаре грешке! (Пс. 130:3). Дали шај те дикха ко јавера исто сар о Јехова со дикхља ко Лот? Ако концентриринаја амен ко шукар особине амаре пхраленгере хем пхењенгере, ка ова пострплива ленцар. А адалеа шај ка кера те овел ленге полокхо те прифатинен амари помош.

8. Ко со ка поттикнинел амен о сочувство?

⁸ Различно таро Лот, о Јов на анѓа лошна одлуке, ама сепак цидинѓа муке. Е Јове сине ле пхаре неволје — нашавѓа пло имот, пли положба ко тхан коте со живинела сине хем пло састипе. А сој најлошно, муле са  лескере чхаве. Исто аѓаар, сине обвинимо таро трин ховавне амала. Соске акала мануша на сикавѓе сочувство е Јовеске? Јекх причина тани адаја со на трудинѓе пе те хаљовен со чаче случинѓа пе леске. Адалеске ола анѓе песке погрешна заклучокија хем строго осудинѓе е Јове. Со ка поможинел аменге те на кера слично грешка кеда несаво пхрал или пхен тане ки пхари ситуација? Секогаш нека овел тут ки годи кај само о Јехова џанела са о деталија баши ситуација амаре пхралескири или пхењакири. Шун шукар џикоте вакерела туке пле мукхе. Наместо само те шуне лескере или лакере лафија, трудин тут те хаљове и дукх со осетинела. Само тегани шај те сикаве сочувство тле пхралеске или пхењаке.

9. Со нане те кера ако иси амен сочувство, хем соске?

⁹ Ако иси амен сочувство амаре пхраленге хем пхењенге, тегани нане те вакера е јаверенге башо проблемија со иси лен. Окова со оговоринела на керела те овел зорало о собрание, него рушинела ле (Изр. 20:19; Рим. 14:19). Ов на сикавела мангипе хем нане ле сочувство. Лескере лафија шај те поврединен околен со цидена муке (Изр. 12:18; Еф. 4:31, 32). Бут пошукар тано те концентририна амен ко шукар особине со иси е јаверен хем те размислина сар шај те поможина ленге кеда накхена тари пхари ситуација.

10. Со сикљоваја таро лафија сој пишиме ко Јов 6:2, 3?

¹⁰ Читин Јов 6:2, 3. Понекогаш о Јов керела сине лафи бизо те размислинел. Сепак, покасно ов вакерѓа кај леске жал башо адава (Јов 42:6). Слично сар о Јов, авдиве да кеда некас иси баро проблеми шај те вакерел нешто бизо те мислинел хем покасно те овел леске жал башо адава. Сар ваљани те реагирина ки асавки ситуација? Наместо  те критикујна е пхрале или е пхења, ваљани те сикава ленге сочувство. Ма бистре кај е Јеховаскири намера на сине е манушен те овен лен проблемија хем стресна ситуацие. Адалеске, на ваљани те изненадина амен ако несаво верно слуга е Девлескоро вакерела нешто бизо те размислинел кеда иси ле баро стрес. Чак ако вакерела несаве буќа башо Јехова или баши аменде со нане точна, на ваљани одма те хољана леске или те судина ле башо адава со пхенѓа (Изр. 19:11).

11. Сар шај о старешине те постапинен сар о Елиу кеда ваљани те ден совет?

¹¹ Понекогаш, некаске со иси ле баро проблеми шај исто аѓаар ка ваљанел совет или исправка (Гал. 6:1). Сар шај о старешине те керен адава? Ола ваљани те постапинен сар о Елиу, кова со сочувствително шунѓа е Јове (Јов 33:6, 7). О Елиу денѓа леске совет чак откеда халило сар размислинела о Јов. О старешине постапинена сар о Елиу кеда шукар шунена хем пробинена те хаљовен е пхралескири или е пхењакири ситуација. Адава поможинела ленге полокхе те ресен џи ко лескоро или лакоро вило кеда ваљани те ден совет.

12. Сар влијајнѓа упри Ноемина адава со муло лакоро ром хем лакере солдуј чхаве?

¹² И Ноемина верно служинела сине е Јеховаске хем мангела ле сине. Ама откеда муло лакоро ром хем лакере солдуј чхаве, ој мангља те менинел пло анав тари Ноемина ки „Мара“, со значинела „керкипе“ (Рут 1:3, 5, 20, фус., 21). Лакири бори и Рут ачхили лаја ко акава пхаро периоди. Освен со практично поможинѓа е Ноеминаке, и Рут исто аѓаар утешинела ла сине пле лафенцар. Ој едноставна хем искрена лафенцар сикавѓа кај мангела хем поддржинела е Ноемина (Рут 1:16, 17).

13. Соске ваљани поддршка околенге со муло ленгоро брачно партнери?

¹³ Кеда некастар таро собрание ка мерел лескоро брачно партнери, ваљани леске поддршка. О брачна партнерија тане сар дуј кашта кола со бајровена јекх узо јекх. Сар со накхена о берша, ленгере коренија плеткинена пе. Кеда јекх таро кашта ка мерел хем ка овел откорнимо, адава шај бут лошно те влијајнел упро јавер каш. Слично, кеда некастар ка мерел лескоро брачно партнери, ле шај бут време те овен ле силна чувствија. И Паула, * каскоро ром таро јекх пути муло, вакерела: „Мло живото целосно менинѓа пе хем на сине ман сила башо ништо. Нашавѓум мле најшукар амале. Леа керава сине лафи башо са. Ов сине узи манде хем ко шукар хем ко лошно. Ов секогаш шунела ман сине кеда вакерава сине леске мле муке. Осетинава ман сине сар те пхене муло јекх дело мандар“.

14-15. Сар шај те утешина некас со муло лескоро брачно партнери?

¹⁴ Сар шај те утешине некас со муло лескоро брачно партнери? Прво бути тани те кере леа лафи, иако шај осетинеа тут незгодно или на сиан сигурно со те вакере. И Паула, кола со спомнинѓем ла англедер, вакерѓа: „Хаљовава кај кеда некој ка мерел, е јаверенге тано незгодно соске дарана те на вакерен нешто погрешно. Ама полошно таро адава тано те на вакерен туке ништо“. Јекх мануш со жалинела веројатно нане те аџикерел те вакера нешто мудро. И Паула вакерела: „Бут сиум сине благодарно кеда о амала едноставно ка вакерен сине: ’Бут манге жал‘“.

¹⁵ О Вилијам, каскири ромни мули англедер некобор берш, вакерела: „Бут ценинава кеда о јавера ка вакерен манге о шукар буќа со памтинена тари ми ромни. Адава  сикавела манге кај мангле ла хем ценинѓе ла. Асавки поддршка бут поможинела манге. Ленгере лафија бут утешинена ман, соске ми ромни сине манге бут скапоцено хем лаја накхљум баро дело таро живото“. Јекх удовица со викинела пе Бјанка вакерела: „Бут утешинела ман кеда о јавера молинена пе манцар хем читинена манге несаво стихо тари Библија. Поможинела манге кеда керена лафи башо мо ром хем кеда шунена ман џикоте ме керава лафи баши лесте“.

16. а) Соске ваљани секогаш те поможина околенге со муло лендар некој? б) Спрема Јаков 1:27, сави одговорност иси амен?

¹⁶ Исто сар и Рут со ачхили е Ноеминаја, која со сине удовица, амен да ваљани секогаш те поможина околенге со муло лендар некој. И Паула, кола со спомнинѓем ла англедер, вакерела: „Кеда муло мо ром, добинѓум бари поддршка таро јавера. Ама, сар со накхела сине о време, сарине иранѓе пе ко пле обврске. А мло живото целосно менинѓа пе. Бут поможинела кеда о јавера хаљовена кај јекхе манушеске со жалинела ваљани поддршка масеконцар — па чак бершенцар — откеда ка мерел лестар некој“. Џанѓола пе, секова мануш тано различно. Изгледа некој релативно сигате прилагодинела пе ко неве околностија. Ама јаверенге, секогаш кеда керена нешто со англедер керена сине заедно пле брачно партнереа сетинкерела лен кај нашавѓе ле. Секова мануш жалинела ко различно начин. Те на бистра кај о Јехова денѓа аменге и чест хем и одговорност те грижина амен околенге со муло ленгоро брачно партнери. (Читин Јаков 1:27.)

17. Соске ваљани те поддржина околен со мукхља лен ленгоро брачно партнери?

 ¹⁷ Несаве мора те боринен пе против и бари дукх хем о стрес со осетинена адалеске со мукхља лен ленгоро брачно партнери. И Џесика, кола со мукхља ла о ром баши јавер ромни, вакерела: „И дукх со осетинава сине башо развод сине бут бари. Мислинава кај нане те дукхал ман сине добором бут мо ром те мерел сине ки несави несреќа или таро несаво насвалипе, соске адава нане те овел сине лескири одлука. Ама, ко акава случај, ов одлучинѓа те мукхел ман. Адалеске осетинава ман сине понижими“.

18. Сар шај те поможина околенге со ачхиле бизо пло брачно партнери?

¹⁸ Кеда кераја шукарипе околенге со ачхиле бизо пло брачно партнери, сикаваја ленге кај чаче мангаја лен. Ки асавки ситуација, повише таро било кеда англедер ваљанена ленге шукар амала (Изр. 17:17). Сар шај те сикаве ленге кај сиан ленгоро амал? Шај те викине лен ко едноставно ручко. Или палем, шај те викине лен те дружинен тумен или те џан ки служба. Исто аѓаар, понекогаш шај те викине лен ки тумари Фамилијарно рат. Аѓаар ка кере бахтало е Јехова соске ов тано „паше узо адала сој пхаге вилеа“ хем грижинела пе е удовиценге (Пс. 34:18; 68:5).

19. Ко со поттикнинена амен о лафија таро 1. Петрово 3:8?

¹⁹ Панда хари, кеда е Девлескоро Царство ка владинел упри Пхув, са „о неволје ка овен бистерде“. Едвај аџикераја о време кеда нане те сетина амен ко адава со сине англедер (Иса. 65:16, 17). Са џикоте на авела адава диве, те поможина јекх јекхеске хем те сикава лафенцар хем постапкенцар кај мангаја са амаре пхрален хем пхењен. (Читин 1. Петрово 3:8.)