ИСКУСТВО
Адава со сиум глувонемо на чхинавѓа ман те сикавав е јаверен
Крстинѓум ман ко 1941 берш, кеда сине ман 12 берш. Ама, о чачипе тари Библија пошукар халиљум ле чак ко 1946 берш. Соске сине аѓаар? Те вакерав туменге мло искуство.
ОТПРИЛИКА ко 1910 берш, мле родителија селинѓе пе таро Тбилиси (Грузија) ки Канада. Ола живинена сине ко гав узо Пели (Саскачивен, западно Канада). Бијандиљум ко 1928 берш, хем сиум сине о најтикно таро шов чхаве. Мо дад муло шов масек англедер те бијанѓовав, а ми дај мули кеда сине ман јекх берш. Кратко пало адава, ми најбари пхен и Луси, мули кеда сине ла 17 берш. Адалеске мо вујко о Ник грижинела пе сине манге, ме пхраленге хем ме пхењенге.
Јекх диве, кеда сине ман дуј берш, ми фамилија дикхља сар цидава амаре грастескири порик. Ола дарандиле кај о грас ка кхувел ман пренцар, адалеске викинена сине манге те чхинавав. Сиум сине ирамо думеа хем нашти сине те шунав лен сар викинена. Ама, ништо на уло манге. Таро адава диве, ми фамилија халили кај нашти те шунав.
Јекх амал ме фамилијакоро вакерѓа кај ка овел манге пошукар те џав ки школа јавере глувонема чхавенцар. Адалеске мо вујко о Ник бичхалѓа ман ки школа башо глувонема, ко Саскатун (Саскачивен). Акаја школа сине бут дур тари ми фамилија хем адалеске со сине ман само 5 берш, дарава сине бут. Шај сине те џав кхере ме фамилијате само нилаеске хем празниконге. Пало несаво време сиклиљум и знаковно чхиб хем сине манге интересно те кхелав манге е јавере чхавенцар.
СИКЉОВАВА БАШО ЧАЧИПЕ
Ко 1939 берш, ми најпхури пхен, и Марион хем о Бил Даниелчак леле пе, хем ола почминѓе те грижинен пе манге хем ме пхењаке, и Франсес. Ола сине о прва тари фамилија со почминѓе те проучинен и Библија е Јеховаскере сведоконцар. Кеда сиум сине ко распуст, ола бут трудинена пе сине те сикавен ман адава со сиклиле тари Библија. На сине локхо те хаљова амен, соске ола на џанена сине и знаковно чхиб. Ама, шај сине те дикхен кај чаче мангава адава со сикљовава башо Јехова. Халиљум кај адава со керена мора те овел нешто со пишинела ки Библија, адалеске џава сине ленцар кеда проповединена сине. Кратко пало адава мангљум те крстинав ман хем ко 5 септември 1941 берш, о Бил крстинѓа ман ки састрнали копана пхерди пањеа таро бунари. О пани сине бут, бут шудро!
Јекхе глувонемо групаја ко конгрес ко Кливленд (Охајо) ко 1946 берш
Ко 1946 берш, кеда иранѓум ман кхере башо распуст, гелем ко јекх конгрес ко Кливленд (Охајо, Америка). О прво диве ме пхења пишинена манге сине белешке те шај те хаљовав башо со керела пе лафи ко конгрес. Ама о дујто диве, сиум сине бут бахтало кеда дикхљум кај ко конгрес иси група која сој глувонемо хем кај иси преведувачи ки знаковно чхиб. Акана, шај сине те уживинав ки програма хем пошукар те хаљовав о чачипе тари Библија.
СИКАВАВА БАШО ЧАЧИПЕ
Само со завршинѓа и Дујто светско војна о мануша мангена сине те сикавен кај тане верна пле пхувјаке. Кеда иранѓум ман таро конгрес хем гељум ки школа, сиум сине одлучно те ачховав верно е Јеховаске. Адалеске чхинавѓум те поздравинав о знаме, те гиљавав и химна ки знаковно чхиб хем те славинав празникија. Исто аѓаар чхинавѓум те џав ки црква е јавере чхавенцар тари школа. Околенге со керена сине бути ки школа на свиџинѓа пе мли одлука, адалеске трудинена пе сине те даравкерен ман хем те ховавен ман. Мле соученикија дикхена сине со случинела пе, а адава денѓа ман прилика те керав ленцар лафи башо Јехова. Несаве лендар, сар сој о Лари Андрософ, Норман Дитрик хем Емил Шнајдер, сар со накхела сине о време почминѓе те проучинен и Библија хем панда служинена е Јеховаске.
Кеда џава сине ко јавера дизја, секогаш трудинава ман сине те сведочинав адаленге со нашти те шунен. На пример, ко Монтреал гељум ко јекх тхан коте со кхедена пе о глувонема. Адари сведочинѓум јекхе терне манушеске, о Еди Тагер. Са џикоте на муло, ов служинела сине ко собрание ки знаковно чхиб ко Лавал (Квебек). Исто аѓаар запознајнѓум јекхе терне мануше, о Хуан Арданез. Исто сар о Веријција таро прво веко, ов истражинела сине те шај те дикхел дали адава со сикљовела тано тари Библија (Дела 17:10, 11). Ов да уло е Јеховаскоро сведоко хем служинѓа сар старешина ки Отава (Онтарио) џи ко крајо таро пло живото.
Сведочибе ки улица ко 1950 берша
Ко 1950 берш, селинѓум ман ко Ванкувер. Иако мангава те проповединав адаленге сој глувонема, никогаш нане те бистрав о искуство со сине ман кеда сведочинѓум ки улица јекхе манушњаке, и Крис Спајсер, која со на сине глувонемо. Ој мангља редовно те добинел списанија хем мангља те посетинав лакере роме, о Гари. Гељум ленде хем керѓем лафи аѓаар со пишинаја сине адава со мангаја те вакера. Пало адава на дикхлем амен некобор берш, сиум сине изненадимо кеда але
те поздравинен пе манцар ко јекх конгрес ко Торонто (Онтарио). Адава диве о Гари крстинѓа пе. Адава искуство сикавѓа манге кобор тано важно понадари да те проповедина, соске никогаш на џанаја дали некој со сведочинаја леске ка овел е Јеховаскоро сведоко.Пало несаво време, иранѓум ман ко Саскатун. Адатхе јекх ромни замолинѓа ман те проучинав и Библија лакере дује глувонема чхајенцар со сине близначке, и Џин хем и Џоан Ротенбергер. Ола учинена сине ки исто школа башо глувонема коте со учинѓум ме. Башо кратко време ола почминѓе те вакерен пле соучениконге адава со сикљовена сине тари Библија. Панџ џене таро ленгере соученикија уле е Јеховаскере сведокија. Јекх лендар сине и Јунис Колин. Ла прво пути дикхљум кеда учинѓум о последно берш ки адаја школа. Тегани, ој денѓа ман бонбони хем пучља ман дали шај те ова амала. Пало несаво време, ули мли ромни!
Е Јунисаја ко 1960 берш хем 1989 берш
Кеда лакири дај шунѓа кај проучинела и Библија, вакерѓа е директореске тари школа те убединел ла те чхинавел е проучибаја. Иако ов пробинѓа те керел адава, чак леља латар о лила коленцар со проучинела сине и Библија, и Јунис сине одлучно те ачхол верно е Јеховаске. Кеда мангља те крстинел пе, лакере родителија вакерѓе лаке: „Ако уљан е Јеховаскоро сведоко, тегани ваљани те икљове таро кхер!“ Адалеске ко 17 берш, и Јунис гели песке таро пло кхер хем селинѓа пе ки јекх фамилија со сине е Јеховаскере сведокија. Понадари да проучинела сине хем крстинѓа пе. Кеда лелем амен ко 1960 берш, лакере родителија на але ки амари венчавка. Ама, сар со накхена сине о берша, почминѓе те поштујнен адава со верујнаја хем сар воспитинаја амаре чхавен.
О ЈЕХОВА ГРИЖИНЕЛА ПЕ СИНЕ МАНГЕ
Мо чхаво о Николас хем лескири ромни и Дебора служинена ко Бетел ко Лондон
Сар глувонема родителија, сине аменге пхаро те воспитина амаре ефта
чхавен кола со на сине глувонема. Керѓем са со шај амаре чхаве те сикљовен и знаковно чхиб те шај ленцар те комуницирина хем те сикава лен башо чачипе. О пхраља хем о пхења таро собрание поможинѓе аменге бут. На пример, јекх родители пишинѓа аменге ко листо кај јекх таро амаре чхаве вакерѓа лошна лафија ки дворана. Адава поможинѓа аменге одма те решина о проблеми. Штар таро мле чхаве, о Џејмс, о Џери, о Николас хем о Стивен тане старешине хем служинена верно е Јеховаске заедно пумаре фамилиенцар. Исто аѓаар, о Николас хем лескири ромни и Дебора поможинена ки подружница ки Британија башо превод ки знаковно чхиб, а о Стивен хем лескири ромни и Шана тане дело таро преведувачко тими ки знаковно чхиб ки подружница ки Америка.Ме чхаве о Џејмс, о Џери, хем о Стивен пумаре ромњенцар проповединена ки знаковно чхиб ко различна начинија
Јекх масек англедер амари 40 годишница таро брако мули и Јунис таро рако. Џикоте сине насвали, лакири вера ко воскресение икерела ла сине те ачховел зорали. Едвај аџикерава о диве кеда палем ка дикхав ла.
И Феј хем о Џејмс, о Џери хем и Евелин, и Шана хем о Стивен
Ко февруари 2012 берш, пељум хем пхагљум мо куко. Тегани дикхљум кај ваљани манге помош, адалеске гељум Пс. 10:14). Благодарно сиум сариненге со сине спремна те пишинен манге белешке, те сикљовен знаковно чхиб хем те превединен манге и програма таро состанокија кобор со шај.
те живинав ко јекх таро мле чхаве. Акана џаја ко собрание ко Калгари ки знаковно чхиб хем понадари да служинава сар старешина. Акава манге прво пути те овав ко собрание ки знаковно чхиб! Сар шај сине са акала берша те икерав мло амалипе е Јеховаја зорало иако служинава сине ко собрание со керела лафи ки англиско чхиб? О Јехова поможинѓа манге. Ов икерѓа пе ко пло лафи кај ка грижинел пе е чхавеске бизо дад (Ки пионерско школа ки знаковно чхиб кеда сине ман 79 берш
Понекогаш сиум сине обесхрабримо адалеске со нашти сине те хаљовав со вакерела пе ко состанокија, или адалеске со мислинава сине кај никој на хаљовела сар те поможинел адаленге сој глувонема. Ко асавке ситуацие, кеда сиум сине разочаримо хем мангава сине те откажинав ман, тегани сетинава ман сине ко лафија е Петарескере: „Господаре, касте те џа? Ки туте тане о лафија башо вечно живото“ (Јован 6:66-68). Исто сар бут јавера глувонема пхраља хем пхења кола сој тане слуге е Јеховаскере бут време, ме да сиклиљум те овав стрпливо. Сиклиљум те овел ман доверба ко Јехова хем ки лескири организација, а адава анѓа шукар резултатија. Акана иси бут публикацие ки знаковно чхиб хем сиум бахтало со шај те џав ко состанокија хем ко конгресија ки американско знаковно чхиб. Чаче, сине ман бахтало хем шужо живото ки служба е Јеховаске, амаро баро Девел.