1, 2. а) Упри касте исполнинѓе пе прво пути е Исусескере лафија таро Матеј 24:12? б) Сар о извештај таро Дела сикавела кај бут христијања таро прво веко икерѓе пло мангипе зорало? (Дикх и слика ко почеток тари статија.)

КЕДА сине ки Пхув, о Исус објаснинѓа сар о мануша ка шај те џанен кај живинаја ко „крајо акале светоскоро“. Јекх бути со вакерѓа ла тани кај „буте џененгоро мангипе ка шудрол“ (Мат. 24:3, 12). Акала лафија прво пути исполнинѓе пе упро Евреија таро прво веко кола со вакерена сине кај тане е Девлескоро народо, ама мукхле ленгоро мангипе башо Девел те шудрол.

² Тари јавер страна, бут христијања таро прво веко сине лен различно стави. Ола ревно проповединена сине „о шукар хабери башо Христос“ хем мангена сине е Девле, е пхрален хем околен со панда на џанена сине о чачипе. Акала христијања икерѓе пло мангипе башо Девел зорало (Дела 2:44-47; 5:42). Ама, несаве христијања таро прво веко мукхле ленгоро мангипе башо Девел те шудрол. Котар џанаја акава?

3. Соске несаве христијања мукхле ленгоро мангипе те шудрол?

 ³ Е христијаненге таро прво веко со живинена сине ко Ефес, о Исус вакерѓа: „Нане тут о мангипе кова со сине тут ко почеток“ (Отк. 2:4). Упри ленде шај влијајнѓе о мануша таро адава тхан кола со повише мангена сине те угодинен песке (Еф. 2:2, 3). О Ефес сине барвали диз коте со е манушенге сине најважно о удобно хем луксузно живото. Исто аѓаар, бут џене ко Ефес сине неморална хем на поштујнена сине е Девлескере законија. Повише мангена сине те уживинен, него те сикавен мангипе башо Девел хем башо јавера.

4. а) Сар шудрола о мангипе авдиве? б) Со ка дикха ки акаја статија?

⁴ Е Исусескере лафија кај ка шудрол о мангипе исполнинена пе авдиве да. О мануша са похари мангена е Девле. Бут џене родена таро манушикане организацие, а на таро Девел, те решинен о проблемија со иси ко свето. Ленгоро мангипе понадари да шудрола. Акава, исто аѓаар, шај те случинел пе некаске со служинела е Јеховаске, сар со случинѓа пе ко собрание ко Ефес. Ки акаја статија ка дикха соске ваљани те икера зорало амаро мангипе 1) башо Јехова, 2) башо библиско чачипе, хем 3) башо амаре пхраља хем пхења.

5. Соске ваљани те манга е Девле?

⁵ Касте ваљани највише те манга? О Исус вакерѓа: „,Манг е Јехова, тле Девле, са тле вилеа, са тле душаја хем са тле гоѓаја‘. Акаја тани и најбари хем и прво заповед“ (Мат. 22:37, 38). Амаро мангипе башо Јехова ка поможинел амен те шуна лескере законија, те ачхова верна хем те мрзина о лошнипе. (Читин Псалм 97:10.) Ама, о Сатана хем лескоро свето трудинена пе те тикњарен хем те уништинен амаро мангипе башо Девел.

6. Со овела кеда о мануша нашавена пло мангипе башо Девел?

⁶ О мануша ко свето авдиве на дикхена исправно ко мангипе. Наместо те манген е Девле, бут мануша „мангена коркори пес“ (2. Тим. 3:2). Ленге тани најважно „и желба е телоскири хем и желба е јакхенгири хем те фалинен пе е буќенцар со иси лен“ (1. Јов. 2:16). О апостол Павле предупрединѓа со шај те овел ако мангаја прво аменге те угодина. Ов вакерѓа: „Кеда размислинела пе башо желбе е телоскере адава анела мерибе“. Адала со постапинена аѓаар овена душмања е Девлеа (Рим. 8:6, 7). О мануша сој ленге најважна ко живото о паре или те задоволинен пумаре сексуална желбе ко крајо тане бут разочариме (1. Кор. 6:18; 1. Тим. 6:9, 10).

7. Кова опасно стави шај те влијајнел упри аменде авдиве?

⁷ Бут атеистија, агностикија, хем еволуционистија трудинена пе те убединен е јаверен те на манген е Девле или чак те верујнен кај на постојнела. Ола керена те дикхјол кај само адала со нане разумна или нане школујме верујнена ко Девел. Исто аѓаар, бут мануша повише поштујнена е научникон него е Створителе (Рим. 1:25). Ако мукхаја акава стави те влијајнел упри аменде, адава шај те цидел амен таро Јехова хем шај те шудрарел амаро мангипе (Евр. 3:12).

8. а) Саве ситуацие шај те обесхрабринен е Јеховаскере слуген? б) Сар шај о лафија таро Псалм 136 поглавје те утешинен амен?

 ⁸ Адалеске со живинаја ко лошно свето е Сатанаскоро, иси бут буќа со шај понекогаш те обесхрабринен амен (1. Јов. 5:19). Ама, ако дозволинаја те ова бут обесхрабриме, амари вера шај те тикњол хем амаро мангипе башо Девел шај те шудрол. На пример, шај те овен амен проблемија е пхурипаја, е састипаја, или те овен амен финансиска проблемија. Или, шај ка разочарина амен адалеске со мислинаја кај на кераја о буќа доволно шукар или адалеске со на иклиле о буќа ко живото сар со манглем. Бизи разлика саве проблемија ка овен амен, никогаш на ваљани те мислина кај о Јехова мукхља амен. Те размислина башо акала утешна лафија со аракхљовена ко Псалм 136:23: „Сетинѓа пе ки аменде кеда сием сине понижиме, соске лескоро верно мангипе ачхола вечно“. Шај те ова сигурна кај о Јехова шунела кеда родаја лестар помош хем одговоринела (Пс. 116:1; 136:24-26).

9. Со поможинѓа е Павле те икерел пло мангипе башо Девел зорало?

⁹ О апостол Павле хор размислинела сине башо адава сар поможинѓа ле о Јехова, хем адава поможинела ле сине те ачхол зорало. Ов пишинѓа: „О Јехова тано мло помошнико, нане те дарав. Со шај о мануш те керел манге?“ (Евр. 13:6). О Павле шај сине те издржинел о проблемија со сине ле ко живото соске сине ле доверба ко Јехова. Кеда аракхљовела сине ко пхаре ситуацие, ов на нашавѓа пли доверба ко Јехова. Чак кеда сине ко затвор, ов поможинѓа е пхраленге аѓаар со пишинѓа писмија џи ко собранија те охрабринел лен (Еф. 4:1; Фил. 1:7; Филим. 1). Бизи разлика саве проблемија сине е Павле, ов икерѓа зорало пло мангипе башо Јехова. Сине ле доверба ко „Девел секоле утехакоро, со утешинела амен ки секоја амари неволја“ (2. Кор. 1:3, 4). Сар шај те ова сар о Павле?

10. Сар шај те икера амаро мангипе башо Јехова зорало?

 ¹⁰ О Павле вакерѓа јекх начин сар шај те икера амаро мангипе зорало башо Јехова, ов вакерѓа: „Молинен тумен секогаш“. Ов исто аѓаар пишинѓа: „Истрајнен ки молитва“ (1. Сол. 5:17; Рим. 12:12). Соске и молитва керела амен те ова попаше е Девлеа? Кеда молинаја амен тегани кераја лафи е Јеховаја. Адава керела те ова леа паше амала (Пс. 86:3). Кеда вакераја амаре Дадеске сој ко небо са со иси амен хор ко вило, тегани оваја леа попаше (Пс. 65:2). Исто аѓаар, амаро мангипе башо Јехова бајрола кеда дикхаја сар одговоринела аменге ко молитве. Амен сием увериме кај „о Јехова тано паше узо сариненде со родена ле“ (Пс. 145:18). Кеда иси амен доверба кај о Јехова мангела амен хем поддржинела амен адава ка поможинел аменге те икљова ко крајо е проблеменцар со иси амен акана хем со шај ка овен амен ки иднина.

11, 12. Сар шај те бајрара амаро мангипе башо библиско чачипе?

¹¹ Сар христијања, амен мангаја о чачипе. О чачипе аракхаја ко е Девлескоро Лафи. О Исус вакерѓа пле Дадеске: „Тло лафи тано чачипе“ (Јован 17:17). Те шај те манга о библиско чачипе, амен мора те џана со пишинела ки Библија (Кол. 1:10). Ама ваљани нешто повише те кера. Адава со пишинела ко Псалм 119 поглавје поможинела амен те хаљова со ваљани те кера. (Читин Псалм 119:97-100.) Секова диве ваљани хор те размислина башо адава со читинаја тари Библија. Кеда размислинаја сар поможинела амен ко амаро живото о библиско чачипе, тегани амаро мангипе башо чачипе бајрола повише.

¹² О псалмисти исто аѓаар пишинѓа: „Кобор тане гудле тле лафија мле чхибјаке, погудле таро авгин!“ (Пс. 119:103). О библиска публикацие со спреминела лен е Девлескири организација тане сар вкусно хајбе. Кеда хаја нешто со мангаја, тегани на сиѓараја соске мангаја те уживина ко хајбе. Слично аѓаар, кеда проучинаја на ваљани те сиѓара, него ваљани те одвојна аменге време башо адава. Тегани ка уживина ко шуже лафија таро чачипе хем ка овел аменге полокхо те памтина со читинѓем хем те користина адава кеда поможинаја е јаверенге (Проп. 12:10).

13. Со поможинѓа е Еремија те мангел е Девлескере лафија? Сар адава влијајнѓа упри лесте?

¹³ О пророко о Еремија мангела сине е Девлескере лафија. Ов вакерѓа: „Кеда але манге тле лафија, ме чхивѓум лен ко вило, хем тло лафи керѓа ман бахтало хем радујнкерѓа мло вило, соске ме пхиравава тло анав, Јехова, Девла со сиан заповеднико е ангеленгоро“ (Ерем. 15:16). О Еремија размислинела сине хор башо е Девлескере скапоцена лафија хем мангела лен сине. Ов ценинела сине со шај те керел е Јеховаске ко анав лафи хем те објавинел лескири порака. Ако мангаја о библиско чачипе, ка хаљова кобор бари предност иси амен со сием е Јеховаскере сведокија хем со проповединаја башо Царство ко акала последна диве.

14. Со јавер ка поможинел амен те бајрара амаро мангипе башо библиско чачипе?

¹⁴ Со јавер ка поможинел амен те  бајрара амаро мангипе башо библиско чачипе? Ваљани те ова редовна ко амаре состанокија, коте со сикљоваја таро Јехова. О проучибе и Библија преку и Стражарско кула секова курко тано јекх таро главна начинија сар сикљоваја лестар. Ако мангаја те овел амен побари корист таро акава состанок, ваљани англедер шукар те спремина амен. На пример, шај те читина секова библиско стихо сој дендо ки статија. Авдиве, бут мануша шај локхе те читинен или те перавен и Стражарско кула ко пло електронско уред адалеске сој тани достапно ко бут чхибја ки jw.org хем ки апликација JW Library. Иси електронска форматија коте со шај сигате те аракха о библиска стихија тари статија проучибаске. Бизи разлика со користинаја кеда спреминаја амен, ако читинаја шукар о библиска стихија хем хор размислинаја баши ленде, амаро мангипе башо библиско чачипе ка бајрол. (Читин Псалм 1:2.)

15, 16. а) Сави заповед денѓа амен о Исус ко Јован 13:34, 35? б) Сар амаро мангипе башо Девел хем баши Библија тано поврзимо адалеа те манга амаре пхрален?

¹⁵ Ки пли последно рат ки Пхув, о Исус вакерѓа пле учениконге: „Дава тумен неви заповед: манген тумен јекх јекхеа! Сар ме со мангљум тумен, аѓаар тумен да манген тумен јекх јекхеа. Таро адава сарине ка џанен кај сиен мле ученикија, ако иси тумен мангипе машкар туменде“ (Јован 13:34, 35).

¹⁶ О мангипе башо амаре пхраља хем пхења тано поврзимо е мангипаја башо Јехова. Ако на мангаја е Девле, нашти те манга амаре пхрален. Исто аѓаар ако на мангаја амаре пхрален, нашти те манга е Девле. О апостол Јован пишинѓа: „Кој на мангела пле пхрале, касте со дикхела, нашти те мангел е Девле, касте со на дикхела“ (1. Јов. 4:20). Амаро мангипе башо Јехова хем амаре пхраља исто аѓаар тано поврзимо адалеа те манга и Библија. Соске? Ако мангаја  адава со сикљоваја тари Библија, ка манга те шуна о заповедија те манга е Девле хем амаре пхрален (1. Пет. 1:22; 1. Јов. 4:21).

17. Ко саве начинија шај те сикава мангипе?

¹⁷ Читин 1. Солуњаните 4:9, 10. Ко кола начинија шај те сикава мангипе амаре пхраленге ко собрание? Шај несаве попхуре пхралеске или пхењаке ваљани помош те џал хем те иранел пе таро состанокија. Несаве удовицаке шај ваљани помош те поправинел пе нешто ко лакоро кхер (Јак. 1:27). Е пхраленге хем е пхењенге сој тане обесхрабриме, сој ки депресија, или иси лен проблемија ваљани ленге амари поддршка, охрабрување хем утеха (Изр. 12:25; Кол. 4:11). Амаре лафенцар хем постапкенцар сикаваја кај мангаја амаре пхрален хем пхењен (Гал. 6:10).

18. Со ка поможинел амен кеда ка овен тикне проблемија машкар аменде?

¹⁸ И Библија вакерела кај „ко последна диве“ таро акава лошно свето, бут мануша ка овен себична хем ка манген о паре (2. Тим. 3:1, 2). Сар слуге е Девлескере, ваљани те трудина амен те бајрара амаро мангипе башо Јехова, башо лескоро Лафи хем башо амаре пхраља. Адалеске со сием несовршена, шај понекогаш те овен тикне проблемија машкар аменде. Ама, адалеске со мангаја амен, ка трудина амен те решина било саво проблеми ко јекх шукар начин хем со шај посигате (Еф. 4:32; Кол. 3:14). Никогаш те на мукха амаро мангипе те шудрол! Наместо адава, понадари да те овел амен зорало мангипе башо Јехова, башо лескоро Лафи хем башо амаре пхраља.