1, 2. Со сиклило о Петар?

ЕФТА ученикија е Исусескере ачхиле цело рат ко Галилејско Море те астарен мачхе. Ама, на астарѓе нијекх мачхо. Кеда пхравдило о диве, о Исус, кова со сине воскреснимо, терѓола сине ки плажа хем дикхела лен сине. Тегани ов вакерѓа ленге: „,Фрден тумари мрежа тари десно страна е чамцоскири хем ка аракхен!‘ Фрдинѓе ла, хем нашти сине те икален ла соске сине пхерди бут мачхе“ (Јован 21:1-6).

² Пало адава, о Исус денѓа пле учениконге те хан маро хем мачхе. Кеда завршинѓе е хајбаја, о Исус пучља е Петаре: „Симон... мангеа ман ли повише таро акала?“ О Исус џанља кај о Петар мангела сине те астарел мачхе. Шај адалеске пучља е Петаре кас мангела повише — ле хем адава со сиклило лестар или о астарибе мачхе. О Петар одговоринѓа е Исусеске: „Оја, Господаре, ту џанеа кај мангава тут“ (Јован 21:15). О Петар сиклило кај лескоро мангипе башо Исус ваљани те овел леске поважно  таро било со јавер. Таро адава диве, ов сикавѓа кај мангела е Исусе адалеа со проповединела сине ревно хем сине ле одговорна задаче ко собрание.

3. Таро со ваљани те пазинен пе е Девлескере слуге?

³ Со шај те сикљова таро лафија со вакерѓа о Исус е Петареске? Ваљани те пазина те на мукха амаро мангипе башо Исус те тикњол. О Исус џанља кај о живото ко акава свето ка овел бут пхаро хем кај ка овен амен муке хем проблемија. Ки пли споредба башо сејачи, о Исус вакерѓа кај несаве мануша ка прифатинен е Девлескоро Лафи хем ко почеток ка овен ревносна. Ама, пало несаво време „о секирацие таро живото ко акава свето“ хем „о ховавно барвалипе“ ка „задушинен о Лафи“ хем адала мануша ка нашавен пли ревност (Мат. 13:19-22; Мар. 4:19). Ако на пазинаја, о секирацие со иси амен секова диве шај те керен те овел аменге пхаро те служина е Јеховаске. Адалеске о Исус предупрединѓа пле ученикон: „Пазинен тумаре виле те на овен оптовариме буте хајбаја, пијбаја хем е секирациенцар таро живото“ (Лука 21:34).

4. Со шај те поможинел амен те џана дали амаро мангипе башо Исус тано зорало? (Дикх и слика ко почеток тари статија.)

⁴ Исто сар о Петар, амен да шај те сикава кај мангаја е Исусе аѓаар со ка чхива о проповедибе ко прво тхан ко амаро живото. Со ка поможинел амен понадари да те кера акава? Шај те пуча амен: „Со мангава највише ко живото? Дали сиум порадосно кеда служинава е Јеховаске или кеда керава нешто јавер?“ Те шај одговоринаја ко акала пучиба, те дикха трин подрачја таро амаро живото со шај те тикњарен амаро мангипе башо Исус. Адала тане, и световно бути, и рекреација хем о материјална буќа.

5. Сави одговорност иси е поглаварен ки фамилија?

⁵ О Петар на астарела сине мачхе само адалеске со уживинела сине те керел адава. Адаја сине лескири бути колаја со грижинела пе сине пле фамилијаке. Авдиве да о Јехова аџикерела таро поглаварија те грижинен пе башо материјална потребе пле фамилијакере (1. Тим. 5:8). Ола мора бут те трудинен пе те шај те керен адава. Ко акала последна диве и световно бути шај те овел причина башо бут секирацие.

6. Соске шај и световно бути те овел стресно?

⁶ Авдиве иси повише мануша со родена бути, а похари слободна тхана буќаќе. Адалеске о мануша мучинена пе те аракхен бути хем спремна тане те керен повише саатија бути похари паренге, само те задржинен пло тхан. О фирме трудинена пе те керен повише бути похари работниконцар. Адалеске о работникија шај те овел лен стрес, те овен бут уморна хем чак те насваљовен. Бут џене дарана кај ка нашавен пли бути ако на керена са со родела лендар о газда.

7, 8. a) Каске ваљани те ова верна? б) Сави важно поука сиклило јекх пхрал таро Тајланд?

⁷ Сар е Девлескере слуге, аменге тано  најважно те ова верна е Јеховаске, а на е манушеске касте со кераја бути (Лука 10:27). И световно бути поможинела аменге те овен амен о основна буќа со ваљанена аменге хем те кера амари служба башо Јехова. Ама, ако на пазинаја, и световно бути шај те чхинавел амен те чхива и служба е Јеховаске ко прво тхан ко амаро живото. Шај те сикљова таро искуство јекхе пхралескоро таро Тајланд. Ов вакерѓа: „Ки бути попрајнава сине компјутерија хем сине манге бут интересно, ама ваљани сине те керав бут саатија бути. Адалеске, на сине ман време башо духовна буќа. Пало несаво време халиљум кај ако мангава те чхивав о Царство ко прво тхан, ваљани те аракхав јавер бути“. Со керѓа акава пхрал?

⁸ Ов вакерела: „Кеда штединѓум паре скоро јекх берш хем шукар размислинѓум со те керав, одлучинѓум те бикинав сладоледи ки улица. Ко почеток, сине манге пхаро финансиски хем сиум сине обесхрабримо. Кеда ка дикхен ман сине ме пуране колеге, асана сине манге хем пучена ма сине соске мислинава кај тано пошукар те бикинав сладоледи таро адава те керав бути компјутеренцар ки канцеларија коте со иси клима. Молинава ман сине е Јеховаске те поможинел ман те издржинав хем те успејнав ки мли цел те овел ман повише време башо духовна буќа. Пало несаво време, о буќа почминѓе те овен пошукар. Сиклиљум саво сладоледи мангена о муштерие хем почминѓум панда пошукар те керав ле. Башо кратко време, о сладоледи со ка керав ле сине адале дивеске бикинава ле сине са. Заработинава сине повише паре него кеда керава сине бути компјутеренцар. Сиум сине побахтало соске на сине ман стрес сар англедер хем сој најважно акана сиум попаше е Јеховаја“. (Читин Матеј 5:3, 6.)

9. Сар шај понадари да те дикха урамнотежено ки световно бути?

⁹ О Јехова ценинела околен сој тане буќарне хем корисно тано кеда некој трудинела пе те керел бути (Изр. 12:14). Ама, ваљани те пазина и световно бути те на овел аменге поважно тари служба е Јеховаске. О Исус башо амаре основна потребе вакерѓа: „Адалеске, најангле роден о царство хем е Девлескири праведност, а са акала јавера буќа ка овен туменге денде“ (Мат. 6:33). Сар шај те џана дали дикхаја урамнотежено ки световно бути? Шај те пуча амен: „Дали дикхава ки световно бути сар нешто сој интересно, а ки служба сар нешто со нане добором интересно па чак досадно?“ Ако размислинаја башо акава пучибе, адава ка поможинел амен те дикха сој аменге најважно ко живото.

10. Која важно бути сикавѓа о Исус?

¹⁰ О Исус вакерѓа со ваљани те овел аменге најважно ко живото. Јекх пути, ов гело те посетинел е дује пхењен, и Марта хем и Марија. И Марта одма почминѓа те спреминел леске хајбе, а и Марија бешља узо Исус хем шунела ле сине џикоте керела сине лафи. И Марта жалинѓа пе со на поможинела ла и Марија. О Исус вакерѓа е Мартаке: „И Марија биринѓа о пошукар дело кова со нане те лел пе латар“ (Лука  10:38-42). Акалеа о Исус сикавѓа јекх важно бути. Те шај о основна потребе те на лен амаро внимание хем те шај сикаваја мангипе башо Исус, мора те бирина „о пошукар дело“. Акава значинела кај амаро амалипе е Јеховаја ваљани секогаш те овел аменге најважно ко живото.

11. Со вакерела аменге и Библија башо одмор?

¹¹ Адалеске со иси амен секова диве бут обврске, понекогаш ваљани те одморина амен хем те опуштина амен. Ки Библија пишинела: „Нане ништо пошукар таро адава о мануш те хал хем те пиел хем те уживинел ко шукар буќа таро пло трудо“ (Проп. 2:24). О Исус џанела сине кај лескере учениконге ваљани одмор. На пример, кеда сине цело диве ки служба, пало адава ов вакерѓа ленге: „Авен манцар ко јекх тхан коте со нане никој хем одморинен тумен хари“ (Мар. 6:31, 32).

12. Соске ваљани те пазина саво стави иси амен баши рекреација хем забава? Вакер пример.

¹² И рекреација хем и забава шај те поможинен аменге те одморина амен хем те опуштина амен. Ама, мора те пазина адава те на овел аменге најважно бути ко амаро живото. Ко прво веко буте џенен сине лен акава стави: „Те ха хем те пија, соске тајса ка мера“ (1. Кор. 15:32). Исто стави иси буте манушен авдиве да. На пример, јекх терно мануш тари Европа почминѓа те џал ко состанокија. Ама, добором бут мангела сине и световно забава со чхинавѓа те дружинел пе е Јеховаскере сведоконцар. Пало несаво време, ов халило кај адава со дозволинѓа о забаве те лен лескоро внимание анѓа леске бут проблемија. Ов почминѓа палем те проучинел хем пало несаво време почминѓа те џал ки служба. Кеда крстинѓа пе, вакерѓа: „Жал манге со нашавѓум бут време џикоте халиљум кај о служибе е Јеховаске анела побаро бахталипе него и забава со нудинела акава свето“.

13. а) Вакер пример кова со сикавела соске тано опасно те накхава бут време ки рекреација хем ки забава? б) Со шај те поможинел амен те дикха урамнотежено ки рекреација хем ки забава?

¹³ И рекреација ваљани те поможинел амен те опуштина амен хем те кхеда сила. Кобор време ваљани те накхава ки рекреација? Те шај аракхаја о одговор, те размислина башо акава пример. Бут мануша мангена те хан гудло. Ама, амен џанаја кај ако хаја само гудло цело време, нане те овел шукар амаре састипаске. Ако мангаја те ова састе, мора те ха храна која сој шукар башо амаро састипе. Слично, ако накхаваја побаро дело таро амаро време ки рекреација хем ки забава, адава лошно ка влијајнел упро амаро амалипе е Јеховаја. Сар шај те џана дали дикхаја урамнотежено ки рекреација или на? Јекх бути со шај те поможинел амен тани, те пишина о саатија со накхавѓем лен јекхе куркеске башо духовна активностија, сар сој о состанокија, о проповедибе, проучибе хем и Фамилијарно рат. Пало адава, шај те пишина кобор саатија накхавѓем адава курко баши рекреација, сар сој спорт, телевизија или видеоигре. Кеда ка споредина о бројке, со шај те дикха? Дали ваљани те кера несаве промене? (Читин Ефешаните 5:15, 16.)

14. Со шај те поможинел аменге те бирина шукар рекреација хем забава?

 ¹⁴ О Јехова мукхела секој амендар те биринел сави рекреација ка овел ле. Исто аѓаар, о поглаварија ваљани те биринен сави рекреација ка овел ленгере фамилија. Ки Библија, о Јехова дела амен начелија кола со сикавена сар ов размислинела. Акала начелија поможинена амен те ана шукар одлуке. * (Дикх и фуснота.) И шукар рекреација тани „поклон таро Девел“ (Проп. 3:12, 13). Адалеске со сием различна, секој мангела различно рекреација (Гал. 6:4, 5). Бизи разлика сави рекреација хем забава ка бирина, ваљани те чхива ла ко исправно тхан ко амаро живото. О Исус вакерѓа: „Коте тано тло барвалипе, адари ка овел тло вило“ (Мат. 6:21). Амаро мангипе башо Исус поттикнинела амен те размислина, те кера лафи хем те постапина ко начин со сикавела кај о Царство аменге најважно таро било со јавер (Фил. 1:9, 10).

15, 16. а) Сар шај о материјализам те овел аменге стапица? б) Саво мудро совет денѓа о Исус башо материјална буќа?

¹⁵ Бут џене авдиве мангена те овел лен о најмодерна шеја, најневе телефонија, компјутерија хем јавера буќа. Упри ленде влијајнела о материјализам, најважна ленге ко живото о материјална буќа хем о паре него било со  јавер. Сар слуга е Девлескоро, сој туке најважно? Пуч тут: „Дали повише време накхавава те размислинав башо најневе врдија хем баши мода, или те спреминав ман башо состанокија? Дали трошинава добором бут време башо јавера буќа, со пало адава ачхола ман хари време те молинав ман хем те читинав и Библија?“ Ако на пазинаја, о материјална буќа шај те овен аменге поважна таро амаро мангипе башо Исус. Ваљани те размислина башо адава со вакерѓа о Исус: „Аракхен тумен те на овен бичале јакхјакере“ (Лука 12:15). Соске вакерѓа о Исус акава?

¹⁶ О Исус вакерѓа кај „нијекх нашти те служинел дује господаренге“. Исто аѓаар пхенѓа: „Нашти те служинен е Девлеске хем е барвалипаске“. Нашти те да е Јеховаске амаро најшукар хем ко исто време те манга о материјална буќа. О Исус објаснинѓа кај ка мрзина јекхе господаре, а ка манга е јавере (Мат. 6:24). Адалеске со сием несовршена, мора понадари да те борина амен против „о желбе е телоскере“, а јекх таро адала тано о материјализам (Еф. 2:3).

17. а) Соске некаске тано пхаро те дикхел урамнотежено ко материјална буќа? б) Со ка поможинел амен те борина амен против о материјализам?

¹⁷ Бут мануша добором бут мангена те задоволинен пле желбе со овела ленге пхаро те дикхен урамнотежено ко материјална буќа. (Читин 1. Коринќаните 2:14.) Адалеске со нашти те размислинен шукар, шај те овел ленге пхаро те разликујнен о исправно таро погрешно (Евр. 5:11-14). Ленгири желба башо материјална буќа шај те овел са посилно. Хем кобор повише иси лен, добором повише мангена (Проп. 5:10). Ама, иси нешто со шај те кера те шај те борина амен против асавко размислибе. Ако читинаја редовно и Библија амари вера ка овел позорали хем тегани ка шај те борина амен против о материјализам (1. Пет. 2:2). О Исус размислинела сине башо поуке со добинела лен таро Јехова хем адава поможинѓа леске те спротивставинел пе е Бенгеске кеда искушинѓа ле (Мат. 4:8-10). Авдиве да, ако мангаја те борина амен против о материјализам, ваљани те применина о советија со дела амен о Јехова. Аѓаар ка сикава е Исусеске кај мангаја ле повише таро материјална буќа.

18. Со сиан решимо те кере?

¹⁸ Кеда о Исус пучља е Петаре: „Мангеа ман ли повише таро акала?“, ов сикавѓа ле кај и служба башо Јехова ваљани те овел леске најважно ко живото. Интересно тано адава со о анав Петар значинела „карпа“. О шукар особине со сине е Петаре шај те спорединен пе сар карпа (Дела 4:5-20). Авдиве, амен да мангаја амаро мангипе башо Исус те овел зорало. Адалеске кераја са со шај и световно бути, и рекреација хем о материјална буќа те овен ко исправно тхан ко амаро живото. Тегани шај амен да те вакера исто сар о Петар: „Господаре, ту џанеа кај мангава тут“.