1. Со вакерѓа о Јехова башо амаро душмани откеда о Адам хем и Ева грешинѓе?

О АДАМ џанља кај о сапа нашти те керен лафи. Адалеске, кеда дознајнѓа кај јекх сап керѓа лафи е Еваја, шај халило кај адава уствари сине несаво духовно суштество (1. Мој. 3:1-6). О Адам хем и Ева на џанле кој сине акава духовно суштество. Ама, о Адам одлучинѓа те овел тари страна адале јабанџијаскири хем те бунинел пе против пло Дад кова со мангела ле (1. Тим. 2:14). О Јехова почминѓа одма те вакерел повише информацие башо акава лошно душмани хем ветинѓа кај ко крајо ка овел уништимо. Ама о Јехова предупрединѓа кај џи тегани, акава духовно суштество кова со керѓа лафи преку о сап, ка противинел пе сариненге со мангена е Девле (1. Мој. 3:15).

2, 3. Која шај тани и причина соске о Јехова вакерѓа хари буќа башо Сатана англедер те авел о Месија?

² О Јехова никогаш на вакерѓа аменге о анав е ангелескоро со бунинѓа пе против лесте. * (Дикх и фуснота.) Чак пало 2.500 берша откеда бунинѓе пе против лесте ки  еденско градина, о Јехова вакерѓа кој тано адава душмани (Јов 1:6). Ов тано пенџардо сар „Сатана“, со значинела „противнико“. О лафи Сатана спомнинела пе само ко трин лила ко Хебрејска списија — 1. Летописи, Јов хем Захарија. Соске башо акава душмани тано вакердо добором хари англедер те авел о Месија?

³ Ко Хебрејска списија о Јехова на денѓа бут информацие башо Сатана хем башо адава со керела сине ов. И главно цел таро акава дело е Библијакоро тано те поможинел е манушенге те пенџарен е Месија хем те слединен ле (Лука 24:44; Гал. 3:24). Кеда ало о Месија, о Јехова преку лесте хем лескере ученикија вакерѓа повише информацие башо Сатана хем башо ангелија кола со геле тари лескири страна. * (Дикх и фуснота.) Акава тано соодветно соске о Јехова ка користинел е Исусе хем е помазаникон те уништинел е Сатана хем лескере следбеникон (Рим. 16:20; Отк. 17:14; 20:10).

4. Соске на ваљани претерано те дара таро Бенг?

⁴ О апостол Петар башо Сатана вакерѓа кај тано сар „лави со викинела кеда тано бокхало“, а о Јован вакерѓа кај тано „сап“ хем „аждери“ (1. Пет. 5:8; Отк. 12:9). Ама, амен на ваљани претерано те дара таро Бенг. Лескири моќ тани ограничими. (Читин Јаков 4:7.) Заштитинена амен о Јехова, о Исус хем о верна ангелија. Шај те борина амен против амаро душмани адалеске со ола поможинена аменге. Ама, ваљани те џана о одговорија башо трин важна пучиба: Кобор бари моќ иси е Сатана? Сар пробинела о Сатана те влијајнел упро јавера? Хем кола буќа нашти те керел лен? Те одговорина ко акала пучиба хем те дикха со шај те сикљова.

5, 6. Соске о манушикане владе нашти те керен о промене кола со највише ваљанена е манушенге?

⁵ Бут ангелија геле тари е Сатанаскири страна хем бунинѓе пе против о Девел. Англедер о Потоп, несаве лендар пеле ко искушение е Сатанаскоро те овен лен сексуална односија џувленцар. И Библија опишинела акава ко симболично начин кеда вакерела кај о аждери леља пеа јекх третина таро ѕвезде (1. Мој. 6:1-4; Јуда 6; Отк. 12:3, 4). Кеда мукхле е Девлескере фамилија, ола биринѓе о Сатана те контролиринел лен. На ваљани те мислина кај акала бунтовникија тане група со нане организирими. Ко невидливо духовно свето, о Сатана керѓа песке влада која со имитиринела е Девлескоро Царство. Ов коркори пес керѓа пе цари хем организиринѓа е демонен, денѓа ленге моќ хем керѓа лен светска владетелија (Еф. 6:12).

⁶ О Сатана користинела пли организација те контролиринел о манушикане владе. Акава џанаја таро адава  со сикавѓа е Исусеске „са о царствија е светоскере“ хем вакерѓа леске: „Ка дав тут са акаја власт хем ленгири слава, адалеске сој манге денди, хем ме дава ла каске со ме мангава“ (Лука 4:5, 6). Иако бут владе керена шукар буќа башо пле граѓанија хем несаве владетелија искрено мангена те поможинен е народоске, нијекх манушикано владетели нашти те керел о промене кола со највише ваљанена е манушенге (Пс. 146:3, 4; Отк. 12:12).

7. Освен со користинела о владе, сар о Сатана користинела и ховавни религија хем о трговско систем? (Дикх и слика ко почеток тари статија.)

⁷ О Сатана хем о демонија исто аѓаар користинена и ховавни религија хем о трговско систем те шај те ховавен „цело свето“ (Отк. 12:9). Преку и ховавни религија, о Сатана вакерела ховајба башо Јехова, па чак пробинѓа те гаравел е Девлескоро анав (Ерем. 23:26, 27). Адалеске, несаве искрена мануша со мислинена кај служинена е Девлеске, уствари служинена е демоненге (1. Кор. 10:20; 2. Кор. 11:13-15). Исто аѓаар, о Сатана користинела о трговско систем те ховавел е манушен. Јекх ховајбе тано кај о паре хем о материјална буќа керена е манушен бахтале (Изр. 18:11). Окола со верујнена ко акава ховајбе цело пло живото тане робија е барвалипаске наместо те служинен е Девлеске (Мат. 6:24). Чак ако некогаш мангена сине е Девле, ленгоро мангипе башо материјална буќа уло добором силно со ленгоро мангипе башо Девел нашавдило (Мат. 13:22; 1. Јов. 2:15, 16).

8, 9. а) Кола дуј поуке шај те сикљова таро постапке е Адамескере, е Евакере хем е бунтовна ангеленгере? б) Соске користинела аменге адава со џанаја кај о Сатана владинела е светоја?

⁸ Таро постапке е Адамескере, е Евакере хем е бунтовна ангеленгере шај те сикљова дуј важна поуке. Прво, сикљоваја кај иси само дуј стране хем кај мора те бирина само јекх. Или ка ачхова верна е Јеховаске или ка џа тари е Сатанаскири страна (Мат. 7:13). Дујто, сикљоваја кај окола со џана тари е Сатанаскири страна добинена само привремено корист. На пример, о Адам хем и Ева добинѓе прилика коркори те одлучинен сој тано исправно, а сој погрешно. О демонија добинѓе одредено моќ упро манушикане владе (1. Мој. 3:22). Ама, кеда некој биринела те овел тари е Сатанаскири страна, секогаш иси ле лошна последице. Нане трајна користија! (Јов 21:7-17; Гал. 6:7, 8).

⁹ Соске користинела аменге адава со џанаја кај о Сатана владинела е светоја? Адава поможинела аменге те дикха исправно ко светска владе хем поттикнинела амен те проповедина о шукар хабери. Џанаја кај о Јехова мангела те поштујна е властен (1. Пет. 2:17). Ов аџикерела амендар те поштујна ленгере законија са џикоте адала законија на џана против лескере мерилија (Рим. 13:1-4). Ама, исто аѓаар џанаја кај на ваљани те мешина амен ки политика хем никогаш на ваљани те поддржина несави политичко партија или несаве манушикане владетеле (Јован  17:15, 16; 18:36). Адалеске со хаљоваја кај о Сатана пробинела те гаравел е Девлескоро анав хем те мељарел лескоро углед, кераја са те шај те поможина е манушенге те шунен о чачипе башо Јехова. Амен сием горда со пхираваја е Девлескоро анав хем со користинаја ле. О мангипе башо Девел тано бут поскапоцено него о мангипе башо паре или о материјална буќа (Иса. 43:10; 1. Тим. 6:6-10).

10-12. а) Саве мамке шај користинѓа о Сатана те искушинел несаве ангелен? б) Со сикљоваја таро лошно пример е бунтовна ангеленгоро?

¹⁰ О Сатана користинела делотворна методе те шај те влијајнел упро јавера. Те шај те чхивел лен те керен ов со мангела, понекогаш користинела мамке те искушинел лен, а понекогаш пробинела те даравкерел лен.

¹¹ Те дикха кобор делотворно користинѓа мамке о Сатана те шај те ховавел буте ангелен. Ов веројатно дикхела лен сине бут време те шај те џанел солеа шај те искушинел лен. Несаве ангелија астарѓе пе ки мамка хем сине лен сексуална односија џувленцар. Ленгере чхаве сине насилна џинија кола со постапинена сине сурово е манушенцар (1. Мој. 6:1-4). Освен о неморал, о Сатана шај пробинѓа те искушинел адале ангелен адалеа со ветинѓа ленге кај ка дел ленге власт упро са о мануша. Ко акава начин, о Сатана шај мангља те чхинавел те авел о потомство е џувљакоро (1. Мој. 3:15). Ама, о Јехова на мукхља адава. Ов керѓа те овел Потоп хем адалеа руминѓа о планија е Сатанаскере хем е демоненгере.

¹² Со шај те сикљова таро акава? О неморал хем и гордост тане бут делотворна мамке. О ангелија кола со геле тари е Сатанаскири страна, англедер адава ола бут берша служинѓе е Јеховаске. Ама, бут џене лендар мукхле ки ленде те бајровен погрешна желбе кола со уле бут силна. Амен да авдиве на ваљани те бистра кај бизи разлика кобор време служинаја е Јеховаске, о погрешна желбе шај те мукхен корења ко амаро вило (1. Кор. 10:12). Адалеске ваљани секогаш те проверина со иси ко амаро вило хем те отфрлина  о неморална мисле хем и гордост! (Гал. 5:26; читин Колошаните 3:5.)

13. Која тани јавер мамка со користинела ла о Сатана хем сар шај те избегина ла?

¹³ Панда јекх мамка со користинела о Сатана тано те манга те интересина амен башо натприродна силе. Авдиве ов пробинела те чхивел е манушен те интересинен пе башо демонија преку и ховавни религија хем преку и забава. О филмија, о компјутерска игре хем јавера врсте забава шај те керен о спиритизам те дикхјол привлечно. Сар шај те избегина акаја мамка? На ваљани те аџикера е Девлескири организација те дел амен списако која забава тани шукар, а која лошно. Мора те вежбина амари совест те шај те ана шукар одлуке кола со темелинена пе ко е Јеховаскере начелија (Евр. 5:14). Ако амаро мангипе башо Девел нане лицемерно, ка ана мудра одлуке (Рим. 12:9). О лицемерно мануш вакерела јекх, а керела јавер. Адалеске кеда биринаја забава, шај те пуча амен: „Дали икерава ман ко начелија башо кола со сикавава е јаверен? Со ка мислинен о мануша касаја со проучинава или о мануша со посетинава лен кеда би дикхена сине сави забава биринава?“ Ако икераја амен ко начелија коленге со сикаваја е јаверен, полокхе ка отфрлина е Сатанаскере мамке (1. Јов. 3:18).

14. Сар шај о Сатана те пробинел те даравкерел амен хем со ка поможинел аменге те ачхова зорале?

¹⁴ О Сатана исто аѓаар пробинела те даравкерел амен те шај те на ачхова верна е Јеховаске. На пример, шај ка влијајнел упро властија те забранинен амаро проповедибе. Ов шај те влијајнел упро амаре колеге или соученикија те асан аменге адалеске со икераја амен ко библиска начелија (1. Пет. 4:4). О Сатана шај те влијајнел чак упри амари фамилија со нане Сведокија. Ола шај таро шукар намере ка пробинен те чхинавен амен те џа ко амаре состанокија (Мат. 10:36). Сар шај те ачхова зорале кеда противинела пе аменге о Сатана? На ваљани те изненадина амен кеда о Сатана нападинела амен, соске ов тано ки војна аменцар (Отк. 2:10; 12:17). Исто аѓаар, на ваљани те бистра која тани и најважно бути: О Сатана вакерела кај  служинаја е Јеховаске само кеда аменге локхо хем кај ка ирана думо е Девлеске кеда ка овел аменге пхаро (Јов 1:9-11; 2:4, 5). Исто аѓаар, мора секогаш те молина е Јехова те дел аменге сила. Те на бистра кај о Јехова никогаш нане те мукхел амен (Евр. 13:5).

15. Дали шај о Сатана силаја те чхивел амен те кера нешто со на мангаја? Објаснин.

¹⁵ О Сатана нашти силаја те чхивел е манушен те керен нешто со на мангена (Јак. 1:14). Бут џене ко свето ни на џанена кај тане тари е Сатанаскири страна. Ама, кеда некој ка шунел башо чачипе ваљани те биринел дали ка овел тари е Јеховаскири или тари е Сатанаскири страна (Дела 3:17; 17:30). Ако сием одлучна те ова послушна е Јеховаске, о Сатана нашти те керел те на ова верна е Јеховаске (Јов 2:3; 27:5).

16, 17. а) Со јавер нашти те керен о Сатана хем лескере демонија? б) Соске на ваљани те дара те молина амен ко гласо е Јеховаске?

¹⁶ Иси јавера да буќа кола со о Сатана хем о демонија нашти те керен. На пример, и Библија никогаш на вакерела кај ола шај те читинен амаре мисле хем амаро вило. Адава шај те керен само о Јехова хем о Исус (1. Сам. 16:7; Мар. 2:8). Значи, ваљани ли те дара кај ако кераја лафи или молинаја амен ко гласо о Сатана хем о демонија ка шунен амен хем ка користинен адала информацие против аменде? На. Соске вакераја аѓаар? Размислин баши акаја споредба: На дараја те кера шукар буќа ки служба башо Јехова само адалеске со о Бенг шај те дикхел амен. Слично, на ваљани те дара те молина амен ко гласо само адалеске со о Бенг шај те шунел амен. Исто аѓаар, ки Библија иси бут примерија таро е Девлескере слуге кола со молинѓе пе ко гласо, а нигде на пишинела кај ола дарандиле кај о Бенг шај те шунел лен (1. Цар. 8:22, 23; Јован 11:41, 42; Дела 4:23, 24). Ако даја амендар са те кера лафи хем те постапина сар со мангела о Јехова, шај те ова сигурна кај о Јехова нане те мукхел о Бенг те керел аменге трајно штета. (Читин Псалм 34:7.)

¹⁷ Ваљани те пенџара амаре душмане, ама на ваљани претерано те дара лестар. Иако сием несовршена, шај те победина е Сатана адалеске со поможинела аменге о Јехова! (1. Јов. 2:14). Ако противинаја амен леске, ов ка нашел амендар (Јак. 4:7; 1. Пет. 5:9). Изгледа авдиве о Сатана посебно нападинела е тернен. Сар шај ола те ачховен зорале? Башо акава пучибе ка кера лафи ки јавер статија.