СЕТИНАВА МАН, ко јекх шудро сабај англедер бут берша ко Брукингс (Јужно Дакота, САД). Осетинела пе сине кај ка почминел о евенд. Заедно некоборе џененцар, сием сине ки јекх штала хем тресинаја сине таро шудро. Узи аменде сине бари састрнали копана пхерди шудре пањеа. Англедер те објаснинав туменге соске сием сине адатхе, ка вакерав туменге нешто башо мло живото.

Бијандиљум 7 март 1936 берш. Сием сине штар чхаве хем ме сиум сине о најтикно. Живинаја сине ки јекх тикни фарма ко источно дело тари Јужно Дакота. Иако и бути ки фарма сине важно дело таро амаро живото, адава на сине аменге најважно. Мле родителија крстинѓе пе хем уле е Јеховаскере сведокија ко 1934 берш. Ола денѓе лафи кај ка служинен е Јеховаске, адалеске сине ленге најважно те керен лескири волја. Мо дад, о Кларенс, а пало несаво време мо како да, о Алфред, служинена сине сар слуга ко друштво (авдиве пенџардо сар координатор ко старешинство) ко амаро тикно собрание ко Конди (Јужно Дакота).

Сар фамилија редовно џаја сине ко амаре состанокија хем ки служба таро кхер ко кхер те шај те вакера е јаверенге баши шужи библиско надеж. О пример мле родителенгоро хем ленгири поука бут поможинѓе амен те манга е Јехова. Ме хем мли пхен и Дороти улем објавителија башо Царство кеда сине амен шов берш. Ко 1943 берш, почминѓум те учествујнав ки Теократско школа баши служба која со почминѓа тегани те одржинел пе.

О конгресија сине важно дело таро амаро живото. Сетинава ман ко јекх конгрес со икерѓа пе ко 1949 берш, ко Сијукс Фолс  (Јужно Дакота). О пхрал Грант Сјутер икерѓа о говор „О крајо тано попаше него со мислинеа!“ Ов истакнинѓа кај са е Девлескере слуге ваљани те користинен пло живото те проповединен о шукар хабери башо е Девлескоро Царство. Адава поттикнинѓа ман те дав лафи е Јеховаске кај ка служинав леске. Крстинѓум ман ко конгрес со икерѓа пе ко Брукингс ко 12 ноември 1949 берш. Адалеске сиум сине ки шудри штала со спомнинѓум ла ко почеток. Ме хем јавера трин џене аџикераја сине те ова крстиме ки састрнали копана.

Тегани чхивѓум манге цел те служинав сар пионери. Почминѓум е пионерско службаја ко 1 јануари 1952 берш, кеда сине ман 15 берш. Ки Библија пишинела: „Кој џала мудро манушенцар, мудро ка овел“, а бут џене тари мли фамилија суне мудра хем поддржинена ман сине ки мли одлука те овав пионери (Изр. 13:20). Бут пути проповединава сине заедно ме какоја, о Џулиус, кова со сине ле 60 берш. Иако сине бут попхуро мандар, бут шукар накхаја сине ки служба. Чаче бут сиклиљум лестар хем таро лескоро искуство со сине ле ко живото. Пало несаво време, и Дороти да ули пионерка.

Кеда сиум сине терно, мле родителија канинена сине буте покраинско надгледникон хем ленгере ромњен те авен аменде. Јекх брачно пари, о Џеси хем и Лин Кантвел, бут поможинѓе манге. Ола грижинена пе сине манге хем охрабринена ман сине. Кеда служинена сине ко собранија паше узи аменде, понекогаш лена ман сине пеа ки служба. Чаче уживинава сине ленцар! Мангљум те овав зафатимо ко проповедибе сар со сине ола хем те овав пионери.

Јавер покраинско надгледнико сине о Бад Милер. Сине ман 18 берш кеда ов хем лескири ромни и Џоана, посетинѓе амаро собрание. Ко адава време ваљани сине те пријавинав ман ки регрутно комисија која со одлучинела сине кој ваљани те џал ки војска. Ола мангле те керав буќа коленге со мислинава сине кај тане против и заповед со денѓа ла о Исус баши неутралност ки политика. Ама, ме мангава сине те проповединав о шукар хабери башо Царство (Јован 15:19). Адалеске родинѓум те запишинен ман сар верско проповеднико.

 Бут радујнѓум ман кеда о пхрал Милер вакерѓа манге кај ка авел манцар ко адава состанок е регрутно комисијаја. Ов на сине лаџутно мануш хем на дарала сине таро мануша. Исто аѓаар, ов џанела сине бут шукар и Библија. Адава со сине манцар денѓа ман бари храброст. Англедер те завршинел о нилај ко 1954 берш, и регрутно комисија прифатинѓа адава со родинѓум те овав запишимо сар верско проповеднико. Акана сиум сине слободно те керав повише башо Јехова.

Кратко пало адава, сиум сине викимо те служинав ко Бетел, ки фарма е Јеховаскере сведоконгири, ко Стејтен Ајленд (Њујорк). Адари служинѓум трин берш. Сине ман бут шуже искуствија соске запознајнѓум буте мудра пхрален хем пхењен.

Ки фарма ко Стејтен Ајленд сине и радиостаница WBBR, која со користинена ла сине е Јеховаскере сведокија таро 1924 џи ко 1957 берш. Само 15 џи ко 20 џене тари бетелско фамилија служинена сине ки фарма. Повише џене амендар сине терне хем бизо искуство. Ама, аменцар керела сине бути јекх попхуро пхрал кова со сине помазанико, о Елдон Вудворт. Ов сине аменге сар дад хем сикавѓа амен бут буќа. Понекогаш кеда ка икљон сине проблемија машкар аменде, о пхрал Вудворт ка вакерел сине: „Чаче тано баро чудо са со постигнинѓа о Господари, иако адала со користинела лен тане несовршена“.

Аменцар исто аѓаар сине о пхрал Фредерик Франц хем поможинела амен сине. Ов сине мудро хем бут шукар пенџарела сине и Библија. Хем ов грижинела пе сине секоле јекхеске амендар. Амаро готвачи сине о Хари Петерсон. Сине аменге полокхе те користина акава презиме него лескоро чачутно, Папаргиропулос. Ов да сине помазанико хем бут мангела сине те проповединел. О пхрал Петерсон шукар керела сине пли служба ко Бетел, ама никогаш на ачхола сине тари служба те проповединел. Секова масек дела сине бут списанија. Исто аѓаар бут шукар пенџарела сине и Библија хем одговоринела сине аменге ко бут амаре пучиба.

О овошје хем о зеленчук со кхедаја сине ки фарма чхиваја ле сине ко конзерве. Секова берш спреминаја сине паше 45.000 конзерве пхерде овошје хем зеленчук е бетелско  фамилијаке. Керава сине бути јекхе мудро пхењаја и Ета Хат. Ој керѓа рецепте со користинаја лен сине те спремина о овошје хем о зеленчук. Јавера да пхења со живинена сине паше авена сине те керен аменцар бути, а и Ета поможинела сине те организиринел пе и бути. Иако џанела сине бут шукар сар те конзервиринел о буќа, ој секогаш сикавела сине поштовајне спрема о пхраља кола со сине надгледникија ки фарма. Адалеа денѓа аменге бут шукар пример сариненге.

Јекх таро потерне пхења со авена сине те керен бути ки фарма сине и Анџела Романо. И Ета поможинѓа ла кеда ули Сведоко. И Анџела хем ме лелем амен април 1958 берш, хем уживинаја заедно ки служба 58 берша. Са акала берша, лакири верност спрема о Јехова поможинѓа те овел амаро брако зорало. Ој тани мудро хем шај те овел ман целосно доверба ки лате бизи разлика саво пхарипе иси амен.

Кеда ко 1957 берш, о пхраља бикинѓе о објектија ко Стејтен Ајленд, кратко време служинѓум ко Бетел ко Бруклин. Тегани ме хем и Анџела венчинѓем амен хем чхинавѓум е бетелско службаја. Трин берш служинѓем сар пионерија ко Стејтен Ајленд. Несаво време керава сине бути е неве газденге ки радиостаница, со добинѓа нево анав WPOW.

Е Анџелаја сине амен едноставно живото те шај те служина сегде коте со ка овел потреба. Адалеске, ко 1961 берш, прифатинѓем и покана те служина сар специјална пионерија ко Фолс Сити (Небраска, САД). Ама, само со реслем адари, пало кратко време канинѓе амен те ова ки Школа башо именујме пхраља која со трајнела сине јекх масек, ко Саут Ленсинг (Њујорк). Уживинѓем ки обука со добинѓем ла хем мислинѓем кај пали Школа ка ирана амен ки Небраска. Сием сине изненадиме кеда добинѓем неви задача, те служина сар мисионерија ки Камбоџа. Ки акаја бут шужи пхув со аракхљола ки југоисточно Азија, дикхлем, шунѓем хем пробинѓем буќа кола со сине неве аменге. Бут мангаја сине те вакера е манушенге башо шукар хабери.

Ама, и политичко ситуација ки Камбоџа менинѓа пе хем мора сине те селина амен ко Јужно Виетнам. Пало дуј берш бут насвалиљум хем ваљани сине те ирана амен ки Америка. Пало несаво време кеда уљум пошукар, палем почминѓем е пионерско службаја.

Ко март 1965 берш, почминѓем те служина ки патувачко служба. Џикоте служинѓум 33 берш сар покраинско хем областно надгледнико, ме хем и Анџела поможинаја сине ко конгресија. Уживинаја сине ки адаја бути, соске о конгресија секогаш сине манге нешто посебно. Некобор берша посетинаја сине о собранија со сине ко Њујорк Сити хем паше узи лесте. Бут конгресија икерена пе сине ко стадиони Јенки.

Ко са адала берша, ме хем и Анџела керѓем бут неве хем пхаре задаче. Ко 1995 берш, замолинѓе ман те служинав сар инструктори ки Школа башо организациско  оспособување. Трин берш пало адава сием сине викиме ко Бетел. Сиум сине бут бахтало со шај сине пало 40 берш палем те иранав ман ко Бетел, о тхан коте со почминѓум е специјално полновремено службаја. Насаво време сиум сине ко Одделение баши служба хем сиум сине инструктори ко бут школе. Ко 2007 берш, о Водечко тело формиринѓа о Оддел башо теократска школе, кова со надглединела са о школе со икерена пе ко Бетел, хем некобор берш служинѓум сар надгледнико ко адава Оддел.

Ко последна берша сине бут промене ко теократска школе. И Школа башо собраниска старешине почминѓа те икерел пе таро 2008 берш. Хем дује бершенге повише таро 12.000 старешине добинѓе обука ко Патерсон хем ко Бетел ко Бруклин. Адаја школа акана икерела пе ко бут јавера тхана. Ко 2010 берш, о анав е Школакоро башо организациско оспособување сине менимо хем викинела пе сине Библиско школа башо бижениме пхраља, а исто аѓаар сине формирими неви школа која со викинела пе сине Библиско школа башо брачна парија.

Почминдор таро септември 2014 берш, акала дуј школе сине спојме ки јекх хем викинела пе Школа башо полновремена објавителија. Ки акаја школа шај те џан брачна парија, а исто аѓаар пхраља хем пхења со нане ко брако. Бут џене таро цело свето сине бут бахтале кеда шунѓе кај акаја школа ка икерел пе хем ки ленгири пхув. Чаче тано бут шукар со ка овел прилика буте џенен те овен ко акала теократска школе. Бут сиум благодарно со запознајнѓум буте пхрален хем пхењен кола со керѓе промене ко пло живото те шај те добинен асавки обука.

Кеда размислинава башо мло живото, благодаринава е Јеховаске со денѓа ман прилика те керав бути мудра манушенцар. Ола поможинѓе ман те запознајнав е Јехова хем пошукар те служинав леске. Несаве сине потерне мандар, а несаве попхуре. Бут џене лендар авена сине таро јавера културе. Ама, таро ленгере постапке хем ставија дикхљум кај бут мангена е Јехова. Таро вило сиум благодарно со ки лескири организација иси ман бут мудра амала колендар со шај бут те сикљовав.