1. Саве проблемија сине е христијанен ко прво веко?

НЕГДЕ машкар о 62 хем о 64 берш а.е., о апостол Петар пишинѓа е христијаненге со живинена сине ко Понт, ки Галатија, Кападокија, Азија хем Витинија (1. Пет. 1:1). Адале пхрален хем пхењен сине лен различно потекло хем култура. Сине лен прогонствија, хем адалеске ваљани сине ленге охрабрување хем водство. Исто аѓаар, ола живинена сине ко бут опасно време. О Петар пишинѓа: „Паше тано о крајо башо са“. Башо похари таро деш берш, о Ерусалим ваљани сине те овел уништимо. Со шај сине те поможинел е христијаненге ко адава пхаро време, бизи разлика коте живинена сине? (1. Пет. 4:4, 7, 12).

2, 3. Соске о Петар охрабринѓа е пхрален те овен гостопримлива? (Дикх и слика ко почеток тари статија.)

² Јекх бути со охрабринѓа о Петар е пхрален те керен тани те овен гостопримлива (1. Пет. 4:9). О грчко лафи баши „гостопримливост“ буквално значинела „мангипе башо јабанџие“. Ама, о Петар охрабринѓа е пхрален хем е пхењен те овен гостопримлива јекх јекхеа иако пенџарена пе сине хем соработинена сине. Сар ка поможинел  сине ленге адава со ка овен гостопримлива?

³ Адава ка керел сине те овен попаше. А сар тано туја? Дали сетинеа тут кобор шукар накхљан туке кеда некој канинѓа тут песте кхере? Хем кеда ту да канинѓан некас туте кхере, на керѓа ли тумен адава панда попаше јекх јекхеа? Јекх шукар начин сар шај панда пошукар те пенџара е пхрален хем е пхењен тано кеда сием гостопримлива. О христијања таро време е Петарескоро ваљани сине те овен панда попаше јекх јекхеа соске живинена сине ко време со овела сине са попхаро. Исто важинела аменге да соске живинаја ко „последна диве“ (2. Тим. 3:1).

4. Башо кола пучиба ка кера лафи ки акаја статија?

⁴ Ко кола прилике шај те ова гостопримлива? Со шај те чхинавел амен те ова гостопримлива, хем сар шај те ова пошукар ко адава? Со шај те поможинел аменге те ова шукар гостија?

5. Сар шај те ова гостопримлива ко состанокија?

⁵ Ко состанокија: О Јехова хем лескири организација канинена амен ко состанокија. Амен мангаја сарине со авена ко амаре состанокија те осетинен пе шукар, посебно о неве (Рим. 15:7). Ола исто аѓаар тане е Јеховаскере гостија, адалеске ваљани те осетинен пе шукар, бизи разлика сар изглединена или сар тане уравде (Јак. 2:1-4). Ако дикхеа кај некој ало коркори, шај ли те викине ле те бешел туја? Ов ка овел туке благодарно ако поможинеа леске те хаљовел со ка керел пе ко состанок хем те аракхел о стихија кола со читинена пе. Акава тано јекх шукар начин сар шај те ова гостопримлива (Рим. 12:13).

6. Спрема касте највише ваљани те ова гостопримлива?

⁶ Кеда викинаја некас ко бешибе или ко хајбе: О мануша таро библиско време бут пути сикавена сине кај тане гостопримлива аѓаар со канинена сине гостија ко хајбе, хем адалеа сикавена сине кај мангена те овен ленцар амала хем те овен ко мир (1. Мој. 18:1-8; Суд. 13:15; Лука 24:28-30). Спрема касте највише ваљани те ова гостопримлива? Спрема амаре пхраља хем пхења таро собрание. Сар со џала ко полошно акава свето, аменге ка ваљанел и помош хем о амалипе таро амаре пхрала хем пхења. Ко 2011 берш, о Водечко тело менинѓа о време кеда и бетелско фамилија ки Америка икерела о Проучибе и Стражарско кула таро 6:45 палоручко ко 6:15 палоручко. Соске керѓа адава? Ко известување сине вакердо кај веројатно ка овел полокхо е бетелитенге те овен гостопримлива јекх јекхеа ако о состанок завршинела порано. Јавера да подружнице керѓе акава. Акава денѓа шукар прилика сариненге тари бетелско фамилија пошукар те пенџарен пе јекх јекхеа.

7, 8. Сар шај те ова гостопримлива е пхраленцар со авена те икерен говорија ко амаро собрание?

⁷ Понекогаш о пхраља таро јавер собрание, о покраинско надгледнико или о претставнико тари подружница икерена говорија ко амаро собрание. Шај ли те користина адаја прилика те ова гостопримлива адале пхраленцар? (Читин 3. Јованово 5-8.) Јекх начин сар шај те кера адава тано ако канинаја лен аменде кхере ко бешибе или ко хајбе.

 ⁸ Јекх пхен тари Америка сетинела пе: „Ко берша со накхле, ме роме хем ман сине амен прилика те канина аменде кхере буте говорникон ленгере ромњенцар. Секова пути амари вера овела сине позорали хем исто аѓаар сине аменге шукар. Никогаш на пелем пишмани башо адава“.

9, 10. а) Кој шај ка ваљани те ачховел аменде повише време? б) Шај ли те поможинен адала со иси лен потикне кхера? Вакер пример.

⁹ Гостија со ачховена повише време: Ко библиско време сине нормално те спреминел пе несаве гостонге тхан сојбаске (Јов 31:32; Филим. 22). Авдиве, амен да шај ка ваљани те кера адава. Е покраинско надгледниконге бут пути ваљани тхан сојбаске кеда посетинена о собранија. Акава шај исто ка ваљани околенге со џана ко теократска школе или околенге сој доброволција градибаске. А сар тано адаленцар со ачхиле бизо кхер пали несави природно катастрофа? Ленге шај ка ваљанел тхан живибаске џикоте на керела пе ленгоро кхер. На ваљани те мислина кај шај те поможинен само окола со иси лен баре кхера. Ола шај џи акана бут пути керѓе адава. Дали ту шај те нудине некаске тхан сојбаске, чак кеда тло кхер тано потикно?

¹⁰ Јекх пхрал тари Јужно Кореја сетинела пе кеда лесте але пхраља хем пхења кола со учествујнѓе ко теократска школе. Ов пишинѓа: „Амен живинаја сине ко тикно кхер хем сием сине нево брачно пари, адалеске ко почеток мислинава ман сине. Ама, адава со але о пхраља хем о пхења аменде керѓа амен бут бахтале. Сар нево брачно пари, ме хем ми ромни шај сине те дикха кобор шај те овел бахтало јекх брачно пари кеда заедно служинела е Јеховаске хем исполнинела пле духовна целија“.

11. Соске ваљани те ова гостопримлива е невенцар ко собрание?

¹¹ Неве пхраља хем пхења ко собрание: Несаве пхраља хем пхења или фамилие шај те селинен пе ко тло тхан таро јавера собранија. Ола шај але те поможинен ко тло собрание. Или шај тане пионерија кола сој тане бичхалде ко тло собрание. Адаја тани бари промена ленге. Ка ваљани те прилагодинен пе ко нево тхан, нево собрание, шај чак ки неви чхиб или култура. Шај ли те канине лен ко бешибе, ко хајбе или те џан негде заедно? Адава ка поможинел ленге те овел лен неве амала хем те прилагодинен пе ко неве околностија.

12. Кова искуство сикавела кај на ваљани бут те шај те ова гостопримлива?

¹² На ваљани те спремине бут буќа те шај те ове гостопримливо. (Читин Лука 10:41, 42.) Јекх пхрал сетинела пе ко нешто со случинѓа пе кеда ов хем лескири ромни уле мисионерија. Ов вакерела: „Сием сине терне, на сием сине искусна хем фалинела сине аменге амаро кхер хем и фамилија. Јекх диве, ме ромњаке сине бут пхаро хем ме пробинѓум те поможинав лаке, ама на успејнѓум. Тегани, ко 7:30 палоручко, некој кхувѓа ко удар. Адаја сине јекх интересентка  која со анѓа трин помаранџе. Ој али те поздравинел амен. Викинѓем ла андре хем денѓем ла чаша пани. Исто аѓаар, керѓем чај хем топло чоколадо. Панда на џанаја сине и чхиб свахили, а ој на џанела сине англиски.“ О пхрал вакерѓа кај акава искуство поможинѓа ленге те почминен те овен амала е пхраленцар таро адава тхан хем те овен побахтале.

13. Сар поможинела аменге адава со сием гостопримлива?

¹³ Дали сине прилике кеда мислинѓан тут дали те сикаве гостопримливост? Ако оја, тегани шај пропуштинѓан прилика те накхе туке шукар хем те овен тут вечна амала. Те овел пе гостопримливо тано јекх таро најшукар начинија сар шај те на осетина амен коркори. Тегани, соске некој шај те мислинел пе дали те овел гостопримливо? Акана ка дикха некобор причине.

14. Со шај те кера ако нане амен доволно време хем сила те сикава хем те прифатина гостопримство?

¹⁴ Време хем сила: Е Јеховаскоро народо тано бут зафатимо хем иси ле бут одговорностија. Несаве шај те мислинен кај нане лен доволно време или сила те овен гостопримлива. Ако осетинеа тут аѓаар, шај ваљани те менине тло распоред те шај те сикаве хем те прифатине гостопримство. Акава тано важно соске и Библија поттикнинела амен те ова гостопримлива (Евр. 13:2). Значи, исправно тано те ова гостопримлива. Ама, те шај те сикава гостопримливост шај ка ваљани те накхава похари време ко буќа со нане добором важна.

15. Соске несаве мислинена кај нашти те овен гостопримлива?

¹⁵ Адава сар дикхеа ки туте: Дали некогаш мангљан те ове гостопримливо ама мислинѓан кај нашти те кере адава? Или шај сиан лаџутно или мислинеа кај тле гостонге ка овел досадно. Шај нане тут бут паре хем мислинеа кај нашти те нудине тле гостонге адава со о јавера пхраља хем пхења шај. Ама ма бистре кај тло кхер на ваљани те овел бут шукар средимо. Тле гостија ка овен бахтале ако тло кхер тано чисто хем уредно, хем ако ту понашинеа тут ленцар љубезно.

16, 17. Со шај те кере ако иси тут стрес кеда ваљани те овен тут гостија?

¹⁶ Ако иси тут стрес кеда ваљани те овен тут гостија, на сиан коркори. Јекх старешина тари Британија вакерела: „О спремибе е гостонге шај те анел стрес. Ама, адава тано поврзимо е службаја башо Јехова, а са сој поврзимо адалеа анела задоволство хем берекетија сој бут побаре таро стрес хем секирацие. Накхава сине манге шукар е гостонцар чак кеда само пијаја сине кафа хем кераја сине аменге лафи“. Секогаш тано шукар те сикава интерес е гостонге (Фил. 2:4). Бут мануша уживинена те вакерен пле искуствија. Шај те шуна ленгере искуствија само ако дружинаја амен ленцар. Јекх јавер старешина вакерела: „Кеда манде кхере авена о пхраља хем о пхења таро собрание, адава поможинела манге те хаљовав лен хем те пенџарав лен пошукар, посебно те џанав сар ола але ко чачипе“. Ако сикавеа интерес тле гостонге, шај те ове сигурно кај сарине ка осетинен пе шукар.

¹⁷ Јекх пионерка ки која со бут пути авена сине те совен пхраља хем пхења со учествујнѓе ко различна теократска  школе вакерѓа: „Ко почеток секиринава ман сине соске мло кхер тано скромно хем иси ман пурано мебел. И ромни јекхе инструкторескири тари школа поможинѓа манге те на секиринав ман добором. Ој вакерѓа кај кеда пле ромеа служинена ки патувачко служба, најшукар накхена песке кеда тане гостија ко пхраља кола со шај нане лен бут материјална средствија ама иси лен иста духовна целија сар ленде — те служинен е Јеховаске хем те живинен едноставно живото. Акава сетинѓа ман ко адава со вакерела сине аменге ми дај кеда сием сине тикне: ’Пошукар тано те хал пе јекх чинија зеленчук адатхе коте со иси мангипе‘“ (Изр. 15:17). Значи, на ваљани те секирина амен соске најважно таро са тано те сикава кај мангаја амаре гостон.

18, 19. Сар адава со ка ова гостопримлива ка поможинел аменге те победина о негативна чувствија башо јавера?

¹⁸ Сар дикхеа ко јавера: Со ако некој таро тло собрание нервиринела тут? Ако на трудинеа тут те победине акала негативна чувствија, нане те менинел пе коркори пестар. Шај нане те манге те канине некас туте кхере ако на свиџинела пе туке лескоро карактер. Или шај некој поврединѓа тут англедер хем пхаро туке те бистре адава.

¹⁹ И Библија вакерела кај шај те ова ко пошукар односија е јаверенцар, чак амаре душманенцар, ако сием гостопримлива. (Читин Изреки 25:21, 22.) Ако канинеа некас туте, шај те успејне те победине о негативна чувствија хем те ове ко мир леа. Шај ка почмине те дикхе несаве шукар особине  со иси ле кола со о Јехова дикхља лен ки лесте кеда анѓа ле ко чачипе (Јован 6:44). Кеда о мангипе поттикнинела тут те канине некас со на аџикерела те канине ле, адава шај те овел почеток јекхе шукар амалипаске. Со ваљани те кера те шај те овел амен мангипе со ка поттикнинел амен ко адава? Јекх бути тани те шуна о совет таро Филипјаните 2:3, коте со пишинела: „Понизно дикхен е јаверен сар побаре тумендар“. Ваљани те размислина ко кола начинија амаре пхраља хем пхења тане пошукар амендар. Веројатно шај те сикљова тари ленгири вера, истрајност, или јавера христијанска особине. Ако размислинаја башо ленгере шукар особине адава ка бајрарел амаро мангипе спрема ленде хем ка овел аменге полокхо те ова гостопримлива.

20. Соске ваљани те ачхова амаре лафесте кеда прифатинаја несави покана, хем сар шај те кера адава?

²⁰ О Давид пучља: „О Јехова, кој ка овел госто ко тло шатори?“ (Пс. 15:1). Пало адава, о Давид керѓа лафи башо адава саве мануша мангела о Јехова те овен лескере гостија. Јекх бути со ваљани те керен тани те ачховен пле лафесте. Ко Псалм 15:4 пишинела: „Ов на менинела пло ветување, чак кеда адава тано леске ки штета“. Ако прифатинаја несави покана, на ваљани те откажина ла освен ако чаче мора те кера адава. Адава со викинѓа амен ко госто шај више спреминѓа нешто, хем ако откажинаја, тегани са со керѓа тано џабе (Мат. 5:37). Несаве мануша откажинена јекх покана те шај те прифатинен јавер соске мислинена кај тани пошукар. Дали адалеа сикавена љубезност хем поштовање? Ваљани те ова благодарна башо са со ка нудинел аменге адава со викинѓа амен ко госто (Лука 10:7). Ако мора те откажина, тегани ка овел љубезно хем обѕирно кобор со шај англедер те вакера леске адава.

21. Сар адава со ка поштујна о обичаија ко тхан коте со живинаја поможинела аменге те ова шукар гостија?

²¹ Исто аѓаар, важно тано те поштујна о обичаија ко тхан коте со живинаја. Ко несаве културе, нормално тано те џа ко гостија бизо те ове канимо. А ко јавера културе, пошукар тано те договорине тут англедер те џа госто некасте. Ко несаве тхана, о домаќини прво дела о најшукар хајбе со иси ле е гостонге. А ко јавера тхана, хем о домаќинија хем о гостија хана таро исто хајбе. Ко несаве тхана, о гостија анена нешто хајбаске. Ко јавера, о домаќинија мангена ленгере гостија ма те анен ништо. Ко несаве културе, о гостија шај ко јекх љубезно начин те одбинен и прво или и дујто покана. Ама ко јавера, нане културно те одбинел пе и прво покана. Секогаш ваљани те трудина амен о домаќинија касте со сием ко гостија те овен бахтале со канинѓе амен.

22. Соске тано важно те ова „гостопримлива јекх јекхеа“?

²² О апостол Петар вакерѓа: „Паше тано о крајо башо са“ (1. Пет. 4:7). Панда хари, ка овел амен и најбари неволја со ка овел ко свето џи акана. Сар со џала ко полошно акава свето, ка ваљанел те овел амен баро мангипе амаре пхраленге хем пхењенге. Е Петарескоро совет акана важинела повише него било кеда англедер: „Овен гостопримлива јекх јекхеа“ (1. Пет. 4:9). Оја, о гостопримство тано важно хем анела аменге задоволство акана хем ки цело вечност.