1. Саво совет денѓа о апостол Павле е христијаненге таро Колоси? (Дикх и слика ко почеток тари статија.)

О АПОСТОЛ Павле пишинѓа е христијаненге таро Колоси џикоте сине пханло ко Рим отприлика ко 60 или 61 берш а.е. Ов објаснинѓа ленге соске ваљани те овел лен „способност башо хаљојбе со дела о духо“, или јавере лафенцар способност те дикхен ко буќа сар со дикхела о Јехова (Кол. 1:9). О Павле вакерѓа: „Адава вакерава ле те нашти никој те ховавел тумен ховавне лафенцар. Пазинен некој те на заробинел тумен преку и филозофија хем о ховавне хем чуче лафија кола со авена таро манушикане традицие, таро размислување акале светоскоро, а на таро Христос“ (Кол. 2:4, 8). Пало адава о Павле објаснинѓа соске несаве погрешна размислувања таро свето свиџинена пе буте манушенге. На пример, несаве таро акала размислувања поттикнинена е манушен те мислинен кај тане попаметна хем пошукар таро јавера. Адалеске о Павле пишинѓа писмо е пхраленге те шај те поможинел ленге те на размислинен  сар о мануша таро свето хем те на постапинен погрешно (Кол. 2:16, 17, 23).

2. Соске ка кера лафи башо несаве ставија со иси е манушен ко свето?

² Е манушен со иси лен акале светоскоро размислување на мангена те шунен е Девлескере мерилија. Ако на пазинаја, асавко размислување шај хари похари те тикњарел амари вера. Сарине аваја ко контакт акале светоскере размислибаја преку и телевизија, о Интернет, ки бути хем ки школа. Сар шај те заштитина амен таро асавко лошно влијание? Ки акаја статија ка дикха панџ ставија со иси е манушен ко свето хем ка дикха сар шај амен да те на размислина аѓаар.

3. Саво стави иси буте манушен авдиве хем соске?

³ „Шај те овав шукар мануш бизо те верујнав ко Девел.“ Аѓаар вакерена авдиве бут мануша ко свето. Окола со вакерена аѓаар шај на размислинѓе хор дали постојнела Девел, ама свиџинела пе ленге адава со шај те керен са со мангена. (Читин Псалм 10:4.) Јавера мислинена кај тане попаметна кеда вакерена: „Шај те овав шукар мануш бизо те верујнав ко Девел“.

4. Сар шај те поможине некаске со на верујнела кај иси Створители?

⁴ Дали тано логично те верујна кај нане Створители? Несаве мануша бунинена пе кеда о одговор башо акава пучибе родена ле ки наука, соске ој дела различна информацие башо акава. Ама, о чачипе тано едноставно. Ако јекх обично кхер ваљани сине некој те керел ле, кобор повише важинела адава башо џивде организмија. Чак о наједноставна џивде клетке тане посложена таро било кова кхер, соске иси лен способност те керен нешто со о кхер нашти те керел — те множинен пе. Акава значинела кај о клетке шај те кхеден информацие хем те пренесинен лен ко неве клетке те шај ола да те множинен пе. Кој створинѓа е џивде клеткен хем денѓа лен асавки способност? И Библија дела амен о одговор: „Секова кхер некој керѓа ле, а окова со керѓа са тано о Девел“ (Евр. 3:4).

5. Со шај те вакера башо стави кај на ваљани те верујна ко Девел те шај те џана сој тано шукар, а сој лошно?

⁵ Со шај те вакера башо стави кај на ваљани те верујна ко Девел те шај те џана сој тано шукар, а сој лошно? Ки Библија пишинела кај чак е манушен со на верујнена ко Девел шај те овен лен шукар мерилија (Рим. 2:14, 15). На пример, некој шај поштујнела хем мангела пле родителен. Ама ако на поштујнела е Јеховаскере мерилија, ов шај те анел бут лошна одлуке (Иса. 33:22). Бут паметна мануша тане увериме кај ваљани аменге помош таро Девел те шај те решина о најбаре проблемија ко свето. (Читин Еремија 10:23.) Адалеске никогаш на ваљани те мислина кај амен шај те џана сој тано шукар бизо те верујна ко Девел хем бизо те поштујна лескере мерилија (Пс. 146:3).

6. Со мислинена бут мануша баши религија?

⁶ „Шај те ове бахтало бизи религија.“ Бут мануша мислинена кај и религија тани досадно хем нане корисно. Исто аѓаар, бут религие вакерена кај иси пекол, теринена е манушен те ден паре хем те поддржинен е политичарен. Адалеске, на ваљани те изненадинел амен адава со са повише мануша вакерена кај тане бахтале бизи религија! Ола шај вакерена: „Ме верујнава ко Девел, ама на мангава те овав ки несави религија“.

7. Сар шај и чачутни религија те керел тут бахтало?

 ⁷ Дали чаче шај те ова бахтале бизи религија? Точно тано адава кај о мануш шај те овел бахтало бизи ховавни религија. Ама, никој нашти те овел чаче бахтало ако нане амал е Јеховаја, „о бахтало Девел“ (1. Тим. 1:11). Са со керела о Јехова тано ки корист е јаверенге. Сар лескере слуге, амен да сием бахтале соске трудинаја амен те поможина е јаверенге (Дела 20:35). На пример, размислин сар и чачутни религија поможинела јекхе фамилијаке те овел бахтали. Тари Библија сикљоваја сар те ова верна амаре брачно партнереске хем те поштујна ле, шукар те воспитина амаре чхавен хем те сикава чачутно мангипе амаре фамилијаке. И чачутни религија поможинела е Јеховаскере слугенге те овен ко мир јекх јекхеа ко собрание хем те сикавен мангипе пумаре пхраленге. (Читин Исаија 65:13, 14.)

8. Сар о лафија таро Матеј 5:3 шај те поможинен аменге те хаљова со чаче керела е манушен бахтале?

⁸ Значи, шај ли некој те овел чаче бахтало бизо те служинел е Девлеске? Размислин со керела е манушен бахтале. Несаве уживинена ки пли кариера, ко спорт или ко несаво хоби. Јавера осетинена пе шукар кеда шај те поможинен пле фамилијаке хем пле амаленге. Иако акала буќа керена те осетина амен шукар, ола нане са ко живото. Амен разликујнаја амен таро животне, адалеске шај те пенџара амаре Створителе хем те служина леске. Бахтале сием кеда кераја адава соске аѓаар сием створиме. (Читин Матеј 5:3.) На пример, сием бахтале хем охрабриме кеда амаре пхраленцар хем пхењенцар служинаја е Јеховаске (Пс. 133:1). Исто аѓаар, бахтале сием со иси амен пхралипе ко цело свето хем со сием дело лестар, со водинаја морално чисто живото хем со иси амен бут шужи надеж.

9. а) Саво стави иси буте манушен башо сексуална односија? б) Соске е Девлескоро Лафи забранинела о сексуална односија аври таро брако?

⁹ „Со иси погрешно ко адава те овел тут секс аври таро брако?“ О мануша шај ка вакерен аменге: „Соске сиен добором строга? Уживинен ко живото“. Ама, е Девлескоро Лафи забранинела о сексуално неморал. * (Дикх и фуснота.) (Читин 1. Солуњаните 4:3-8.) Е Јехова иси ле право те дел законија соске ов керѓа амен. Ов вакерела аменге кај само е роме хем ромња сој ко брако шај те овен лен сексуална односија. О Јехова дела аменге законија адалеске со мангела амен. Ов џанела кај амаро живото ка овен пошукар ако шунаја адала законија. Кеда јекх фамилија шунела е Девлескере законија, тегани ка овел ла мангипе, поштовање хем сарине ка осетинен пе сигурна. О Девел ка казнинел адален со намерно пхагена лескере законија (Евр. 13:4).

10. Сар шај јекх Девлескоро слуга те аракхел пе таро сексуално неморал?

¹⁰ И Библија сикавела амен сар те аракха амен таро сексуално неморал. Ваљани те пазина со дикхаја. О Исус вакерѓа: „Секова јекх со дикхела ки џувли хем мислинела песке те пашљол лаја,  ов више керѓа лаја прељуба пле вилесте. Адалеске, ако тли десно јакх чхивела тут те грешине, икал ла хем фрде ла тутар“ (Мат. 5:28, 29). Значи, на ваљани те дикха порнографија или те шуна гиља со иси лен неморално тексти. О Павле пишинѓа: „Целосно циден тумендар о желбе кола со авена таро тело: о сексуално неморал, о мелалипе, и неконтролирано сексуално страст“ (Кол. 3:5). Исто аѓаар, ваљани те пазина башо со размислинаја хем башо со кераја лафи (Еф. 5:3-5).

11. Соске шај те манга те овел амен успешно кариера?

¹¹ „Те шај те овел тут бахтало живото, ваљани туке успешно кариера.“ О мануша шај вакерена кај ваљани те овел амен успешно кариера ко свето која со шај те поможинел аменге те ова позната, влијателна хем барвале. Бут џене мислинена кај нашти те овен бахтале ако нане лен успешно кариера, адалеске шај амен да те почмина те размислина сар ленде.

12. Дали и успешно кариера ка керел тут бахтало?

¹² Дали тано точно адава кај и кариера која со поможинела туке те ове влијателно или познато шај те керел тут бахтало? На. Ма бистре кај о Сатана мангља те овел влијателно хем познато. Ки несави смисла ов добинѓа адава со мангља. Ама, ов нане бахтало, него хољамо (Мат. 4:8, 9; Отк. 12:12). Тари јавер страна, размислин кобор сием бахтале амен кеда сикаваја е јаверен башо Девел хем баши бут шужи иднина која со ветинела ла аменге. Нијекх кариера ко свето нашти те керел тут добором бахтало. Исто аѓаар, те шај те овел лен шукар кариера, о мануша бут пути натпреваринена пе, овена агресивна хем љубоморна. Ама, ко крајо палем на осетинена пе шукар. И Библија вакерела кај адава тано „прастајбе пали бавлал“ (Проп. 4:4).

13. а) Сар ваљани те дикха ки амари бути? б) Со керѓа е Павле чаче бахтало?

¹³ Џанѓола пе, ваљани те кера бути те шај те преживина хем нане погрешно те бирина бути која со мангаја ла. Ама, амари бути на ваљани те овел аменге најважно ко живото. О Исус вакерѓа: „Нијекх нашти те служинел дује господаренге, соске или ка мрзинел е јекхе, а ка мангел е јавере, или ка овел пханло е јекхеа, а е јавере нане те мангел. Нашти те служинен е Девлеске хем е барвалипаске“ (Мат. 6:24). Ако аменге тано најважно те служина е Јеховаске хем те сикава е јаверен баши Библија, адава ка керел амен бут бахтале. О апостол  Павле осетинѓа пе аѓаар. Кеда сине терно, најважно сине леске те овел ле успешно кариера. Пало несаво време, ов уло чаче бахтало кеда дикхела сине сар е Девлескири порака менинела е манушенгоро живото коленге со проповединела сине. (Читин 1. Солуњаните 2:13, 19, 20.) Нијекх кариера ко свето нашти те керел амен добором бахтале.

14. Соске бут мануша мангена те мислинен кај шај коркори те решинен пле проблемија?

¹⁴ „О мануша шај коркори те решинен пле проблемија.“ Бут џене мангена те мислинен аѓаар. Соске? Соске ако акава тано точно, адава ка значинел кај на ваљани аменге о Девел хем кај шај те кера са со мангаја. Шај шунѓан сар о мануша вакерена кај иси са похари војне, криминал, насвалипа хем чоролипе. Ко јекх извештај пишинела: „О мануша џана ко пошукар соске одлучинѓе те керен о свето пошукар тхан живибаске“. Дали акава тано чаче? Дали о мануша конечно халиле сар те решинен о проблемија ко свето? Те дикха сави тани и ситуација.

15. Соске шај те вакера кај о проблемија ко свето тане бут баре?

¹⁵ Војне: Ко солдуј светска војне, муле повише таро 60 милионија мануша. Ко 2015 берш, 12,4 милионија мануша ваљани сине те нашен таро пле кхера адалеске со сине војна или прогонство. Аѓаар, о број е манушенгоро со мора сине те нашен таро пумаре кхера барило ко  65 милионија. Криминал: Ко несаве тхана, несаве врсте криминал похари керена пе. Ама, јавера врсте криминал, сар сој о компјутерско криминал, о насилство ки фамилија, о тероризам хем и корупција, са повише керена пе. Насвалипа: Чаче тано адава кај о мануша аракхле иљачи башо несаве насвалипа. Ама, ко 2013 берш, јекх извештај вакерѓа кај секова берш ења милионија мануша потерне таро 60 берша мерена таро насвалипа ко срце, мозочен удар, рако, проблемија дишибаја хем дијабетес. Чоролипе: И Светско банка вакерѓа кај ко 1990 берш, само ки Африка сине 280 милионија мануша со сине бут чороле. А ко 2012 берш адава број барило хем сине 330 милионија.

16. а) Соске само е Девлескоро Царство шај те решинел о проблемија ко свето? б) Со вакерѓе о Исаија хем јекх псалмисти кај ка керел е Девлескоро Царство?

¹⁶ Са акала проблемија на ваљани те изненадинен амен. Авдиве, о економска хем о политичка организацие водинена лен себична мануша. Ола нашти те чхинавен о војне, о криминал, о насвалипа хем о чоролипе. Само е Девлескоро Царство шај те керел адава. Размислин башо са о буќа со ка керел о Јехова е манушенге. Војне: Е Девлескоро Царство ка цидел са о причине башо војне, сар сој и себичност, и корупција, о патриотизам, и ховавни религија хем о Сатана (Пс. 46:8, 9). Криминал: Панда авдиве, е Девлескоро Царство сикавела милионија манушен те манген пе хем те овел лен доверба машкар песте. Нане нијекх јавер влада со шај те керел акава (Иса. 11:9). Насвалипа: О Јехова панда хари ка дел пле народоске совршено састипе (Иса. 35:5, 6). Чоролипе: О Јехова ка чхинавел о чоролипе хем ка керел са лескере слуге те овен бахтале хем те овен паше амала леа. Акава тано нешто со нашти те кинел пе паренцар (Пс. 72:12, 13).

17. Со ваљани те кера те шај те на размислина сар о мануша таро свето?

¹⁷ Ако шунеа несаво стави сој појавер таро адава ко со верујнеа, дикх со вакерела и Библија баши адаја тема. Кер лафи башо адава несаве зрело пхралеа или пхењаја. Размислин соске е манушен иси лен асавко стави, соске адава тано погрешно хем сар шај ма те размислине ту да аѓаар. Шај те заштитина амен те на размислина сар о мануша таро свето аѓаар со ка кера адава со вакерѓа о Павле: „Понашинен тумен мудро адаленцар сој аври таро собрание... те џанен секаске сар те одговоринен“ (Кол. 4:5, 6).