1. Со сикаваја кеда гиљаваја амаре теократска гиља?

ЈЕКХ пенџардо композитори вакерѓа: „Кеда шунеа лафија, почминеа те размислине. Кеда шунеа музика, ки туте бајровена чувствија. Ама, кеда гиљавеа, о лафија кхувена туке андре ко вило“. Кеда гиљаваја амаре теократска гиља амен фалинаја амаре Даде е Јехова хем сикаваја кај мангаја ле. Ола керена те ова попаше леа. Адалеске, о гиљајбе тано бут важно ко чачутно обожавање, бизи разлика дали гиљаваја коркори или амаре пхраленцар хем пхењенцар.

2, 3. а) Сар осетинела пе некој кеда ваљани те гиљавел заедно е јаверенцар ко собрание? б) Башо кола пучиба ка кера лафи?

² Дали мангеа те гиљаве е јаверенцар ко собрание или лаџаја те кере адава? Ко несаве културе, е муршенге тано незгодно те гиљавен англо јавера. Акава стави шај негативно те влијајнел ко цело собрание, посебно ако о старешине на гиљавена таро вило или ако тане зафатиме јавере буќенцар џикоте гиљавела пе (Пс. 30:12).

 ³ О гиљајбе тано дело таро амаро обожавање. Адалеске, сигурно на мангаја те икљова џикоте гиљавела пе или те пропуштина адава дело таро состанокија. Секој амендар ваљани те пучел пе: „Саво стави иси ман башо гиљајбе ко состанокија? Со шај те керав ако манге незгодно те гиљавав англо јавера? Хем, сар шај те гиљавав таро вило?“

4, 5. Сар сине организиримо о гиљајбе ко храми ко пурано Израел?

⁴ О верна слуге е Јеховаскере отсекогаш користинена сине и музика те шај те фалинен ле. Интересно тано адава со, кеда о Израелција сине верна е Јеховаске, о гиљајбе сине важно дело таро ленгоро обожавање. На пример, кеда о Давид керела сине подготовке башо храми, ов организиринѓа 4.000 левитија те фалинен е Јехова музикаја. Лендар, 288 џене сине „вежбиме хем вешта ко гиљајбе гиља“ (1. Лет. 23:5; 25:7).

⁵ И музика хем о гиљајбе исто аѓаар сине важно дело кеда сине свечено пхравдо о храми. Ки Библија пишинела: „Џикоте о трубачија хем о пеачија фалинена сине е Јехова хем благодаринена сине леске сложно сар јекх хем џикоте шунѓола сине о звуко таро трубе, таро чинеле хем таро јавера инструментија џикоте гиљаја фалинена сине е Јехова... и слава е Јеховаскири, е чачутне Девлескири, пхерѓа лескоро кхер“. Замислин туке кобор ули позорали и вера е Израелцонгири ки акаја прилика! (2. Лет. 5:13, 14; 7:6).

6. Сар о Неемија организиринѓа о гиљајбе џикоте сине управители ко Ерусалим?

⁶ О Неемија, кова со организиринѓа палем те градинен пе о ѕидија ко Ерусалим, исто аѓаар организиринѓа е левитен те гиљавен хем те башален ко инструментија. Ленгоро башалибе хем гиљајбе керѓа и свеченост башо ѕидија е дизјакере те овел панда побахтали. О Неемија чхивѓа „дуј баре хорија те гиљавен благодарна гиља“. О солдуј хорија пхирена сине таро спротивна правција упро е дизјакере ѕидија џикоте на аракхле пе ко тхан кова со сине најпаше џи ко храми. Ленгоро гиљајбе сине добором гласно со шај сине те шунел пе бут дур (Неем. 12:27, 28, 31, 38, 40, 43). Шај те ова сигурна кај о Јехова сине бахтало кеда шунѓа сар лескере слуге цело вилеа фалинена ле гиљаја.

7. Сар о Исус сикавѓа кај о христијања ваљани гиљаја те фалинен е Јехова?

⁷ Ко време е Исусескоро да, и музика сине важно дело таро обожавање е Јеховаскоро. Размислин башо адава со случинѓа пе ки најважно рат џи акана. Откеда икерѓа е Господарескири вечера, о Исус хем лескере ученикија гиљавѓе фалбена гиља е Јеховаске. (Читин Матеј 26:30.)

8. Саво пример денѓе о прва христијања башо адава сар ваљани те фалина е Девле гиленцар?

⁸ О прва христијања денѓе шукар пример башо адава сар ваљани те фалина е Девле гиленцар. Ола на џана сине ко храми те обожавинен е Јехова сар со керена сине о Израелција, него кхедена пе сине ко кхера. Иако адала кхера на сине добором шуже хем величествена сар о храми, о пхраља понадари да гиљавена  сине таро вило. О апостол Павле вакерѓа е пхраленге: „Сикавен хем охрабринен јекх јекхе псалменцар, фалбена гиленцар башо Девел, гиљавен гиља обожавибаске ко начин со сикавела благодарност, гиљавен таро вило е Јеховаске“ (Кол. 3:16). О гиља тари амари песнарка ваљани те гиљава лен таро вило хем „ко начин со сикавела благодарност“. Ола тане дело тари духовно храна со добинаја ла таро „верно хем разборито робо“ (Мат. 24:45).

9. а) Соске шај некаске тано незгодно те гиљавел таро вило ко амаре состанокија хем конгресија? б) Сар ваљани те гиљава фалбена гиља е Јеховаске хем кој ваљани те предводинел ко адава? (Дикх и слика ко почеток тари статија.)

⁹ Таро кола причине шај те овел туке незгодно те гиљаве? Шај ки тли фамилија или култура обично на гиљавела пе. Или шај шунеа е професионална пеачен ко радио или ки телевизија хем кеда ка споредине тут ленцар, лаџаја па чак разочаринеа тут таро тло гласо. Ама, саринен иси амен одговорност те фалина е Јехова гиленцар. Адалеске, ле и песнарка ко васта, ваздела ла поупре, вазде то шеро хем гиљав таро вило! (Езра 3:11; читин Псалм 147:1.) Ко бут дворане авдиве иси екранија коте со сикавела пе о тексти таро амаре гиља, адава поможинела полокхе те гиљава. Интересно тано адава со о гиљајбе теократска гиља уло дело тари Школа башо именујме пхраља. Акава сикавела кобор тано важно о старешине те предводинен ко гиљајбе ко состанокија.

10. Со на ваљани те бистра ако дараја те гиљава цело гласоја?

¹⁰ Бут џене дарана те гиљавен цело  гласоја адалеске со мислинена кај ка овен бут гласна или нане те гиљавен шукар. На ваљани те бистра кај „сарине амен бут пути грешинаја“ кеда кераја лафи, ама адава на чхинавела амен те кера лафи (Јак. 3:2). Адалеске, на ваљани те мукха амаре несовршена гласија те чхинавен амен гиљаја те фалина е Јехова.

11, 12. Сар шај пошукар те гиљава?

¹¹ Шај дараја те гиљава адалеске со на џанаја сар те гиљава. Ама, шај те гиљава пошукар ако применинаја несаве предлогија. * (Дикх и фуснота.)

¹² Шај те гиљаве цело гласоја аѓаар со ка сикљове исправно те дишине. Слично сар со и електрично енергија дела сила е сијалицаке, аѓаар о воздух дела сила тле гласоске кеда кереа лафи или кеда гиљавеа. Ваљани те гиљаве гласно кобор со кереа лафи, па чак погласно таро адава. * (Дикх и фуснота.) И Библија понекогаш е Јеховаскере слугенге вакерела кај ваљани бахтале те викинен кеда гиљавена фалбена гиља (Пс. 33:1-3).

13. Објаснин сар шај те овел амен побари доверба кеда гиљаваја.

¹³ Џикоте икереа и Фамилијарно рат или ки јавер прилика пробин те кере акава: Бирин јекх таро тле омилена гиља тари амари песнарка. Читин о тексти цело гласоја. Пало адава, таро јекх пути исто гласоја вакер некобор лафија со керена јекх мисла. Тегани, гиљав адала лафија цело гласоја (Иса. 24:14). Аѓаар тло гласо ка овел посилно, а адава тано шукар. На ваљани те дара или те лаџа со гиљавеа асавке гласоја.

14. а) Со ка поможинел туке те овел тут посилно гласо? (Дикх и рамка „ Сар шај те гиљаве пошукар“.) б) Кола предлогија поможинѓе туке те овел тут пошукар гласо?

¹⁴ Ако мангеа те гиљаве цело гласоја, ваљани те пхраве то муј повише него кеда кереа лафи. А со ваљани те кере ако мислинеа кај иси тут слабо гласо или кај то гласо тано бут учо? Шај те аракхе корисна предлогија ки рамка „Да се совладаат специфични проблеми“ која со аракхљола ко лил Извлечи корист од Теократската школа за служба, ки 184 страна.

15. а) Саво известување сине дендо ко годишно состанок ко 2016 берш? б) Таро кола причине сине ревидирими и песнарка?

¹⁵ Сарине со сине ко годишно состанок ко 2016 берш сине бахтале кеда о пхрал Стивен Лет таро Водечко тело објавинѓа и неви песнарка е насловеа Гиљав таро вило е Јеховаске. * (Дикх и фуснота.) Ов објаснинѓа кај јекх причина соске ваљани аменге неви песнарка тани адаја со сине ревидиримо о Превод Нов свет ки англиско чхиб. Таро е гиленгере текстија сине цидиме или сине промениме несаве лафија кола со на аракхљовена повише ко Превод Нов свет. Исто аѓаар, сине чхивде неве гиља башо проповедибе хем баши откупнина. Адалеске со о гиљајбе тано важно дело таро амаро обожавање, о Водечко тело мангља и песнарка те овел бут квалитетно. Адалеске, и корица тани слично сар ко ревидиримо Превод Нов свет.

16, 17. Кола тане несаве промене ки неви песнарка?

¹⁶ Те шај те овел аменге полокхе те користина и песнарка, о гиља тане групириме ко теме. На пример, о прва 12 гиља тане башо Јехова, о јавера  8 тане башо Исус хем и откупнина. Ко почеток тари песнарка иси индекс таро теме кова со шај бут те поможинел, на пример, кеда о пхраља биринена гили башо јавно говор.

¹⁷ Те шај сарине те гиљавен таро вило, несаве текстија таро гиља сине мениме те шај ленгири порака те овел појасно. Сине мениме о лафија со на користинена пе често. Исто аѓаар, сине мениме о насловија таро несаве гиља. На пример, и гили е насловеа „Аракх то вило“ шај те хаљовел пе сар заповед, адалеске сине меними хем акана викинела пе „Аракхаја амаро вило“. Соске? Кеда некој гиљавела сине адаја гили, ов вакерела сине е јаверенге со ваљани те керен. Акава керела сине те овел незгодно ко состанокија хем ко конгресија е невенге, е интересентенге, е терненге хем е пхењенге. Адалеске, сине менимо о тексти хем о наслов е гиљакоро.

18. Соске ваљани те сикљова о гиља тари неви песнарка? (Дикх и фуснота.)

¹⁸ Бут гиља тари песнарка Гиљав таро вило е Јеховаске тане сар молитве. Ола шај те поможинен туке те вакере е Јеховаске сар осетинеа тут. Јавера гиља ка поможинен аменге те охрабрина амен те сикава мангипе хем те кера шукарипе (Евр. 10:24). Амен мангаја те сикљова о мелодие, о ритам хем о текстија таро амаре гиља. Кеда вежбинаја кхере о гиља, тегани ка шај те гиљава лен побаре довербаја хем таро вило. * (Дикх и фуснота.)

19. Сар шај сарине ко собрание те обожавинен е Јехова?

¹⁹ Никогаш на ваљани те бистра кај о гиљајбе тано важно дело таро амаро обожавање. Аѓаар шај ко јекх бут шукар начин те сикава е Јеховаске кај мангаја ле хем кај сием благодарна башо са со керѓа аменге. (Читин Исаија 12:5.) Кеда гиљаваја таро вило, поттикнинаја е јаверен да те керен адава. Сарине ко собрание, бизи разлика дали тане терне, пхуре или неве, шај те обожавинен е Јехова ко акава начин. Адалеске, ма те овел аменге незгодно те гиљава таро вило. Те шуна адава со пишинѓа о псалмисти: „Гиљавен е Јеховаске!“ Оја, те гиљава таро вило е Јеховаске! (Пс. 96:1).