1, 2. а) Сој аменге најскапоцено ко живото? б) Кола чачипа ценинаја лен, хем соске? (Дикх о слике ко почеток тари статија.)

СОЈ туке најскапоцено ко живото? Сар слуге е Јеховаскере, о најскапоцено нешто со иси амен тано амаро амалипе леа. Никогаш нане те менина ле башо нешто јавер. Исто аѓаар, бут ценинаја о чачипе тари Библија соске адава поможинела аменге те ова е Јеховаскере амала (Кол. 1:9, 10).

² О Јехова тано амаро Најбаро Учители кова со сикавела амен башо бут скапоцена чачипа преку пло Лафи, и Библија. Ов сикавела амен башо пле бут шуже особине хем башо адава кобор тано важно лескоро анав. Ов вакерела кај мангела амен добором бут со чак денѓа пле Чхаве сар жртва аменге. О Јехова сикавела амен башо месијанско Царство. Ов дела надеж е помазаниконге те живинен ко небо, а е јавере бакхренге надеж те живинен ко рај ки Пхув (Јован 10:16). Ов исто аѓаар сикавела  амен сар ваљани те живина. Амен бут ценинаја акала чачипа соске ола поможинена аменге те ова паше амаре Створителеа хем дена амен смисла ко живото.

3. Дали о Јехова родела те платина леске паренцар башо чачипе?

³ О Јехова тано дарежливо Девел. Ов тано добором бут дарежливо со жртвујнѓа пле Чхаве аменге. Кеда о Јехова дикхела кај некој родела о чачипе, ов поможинела леске те аракхел ле. О Јехова никогаш нане те родел амендар те платина леске паренцар те шај те сикљова о чачипе. Јекх пути, јекх мануш со викинела пе сине Симон нудинѓа паре е Петареске те шај те овел ле моќ те дел свети дух е јаверенге. О Петар вакерѓа леске: „Тло сребро нека пропадинел туја, соске мислинѓан кај паренцар шај те добине о поклон таро Девел“ (Дела 8:18-20). Тегани, со значинела те кина о чачипе?

4. Со ка сикљова башо чачипе ки акаја статија?

⁴ Читин Изреки 23:23. Ваљани те трудина амен те шај те сикљова о чачипе тари Библија. Исто аѓаар, ваљани те жртвујна јавера буќа башо адава. А откеда „ка кина“, или јавере лафенцар ка сикљова башо чачипе, ваљани те пазина никогаш те на „бикина ле“, или јавере лафенцар те мукха ле. Сар кинаја о чачипе тари Библија? Кобор коштинела? О одговорија таро акала пучиба ка поможинен аменге панда повише те ценина о чачипе хем ка ова панда поодлучна никогаш те на мукха ле. Исто аѓаар, ка хаљова соске о чачипе тано поскапоцено таро било со јавер.

5, 6. а) Сар шај те кина о чачипе бизо паре? Објаснин. б) Сар користинела аменге о чачипе?

⁵ Ако нешто тано бизо паре, адава на значинела кај на ваљани те трудина амен те шај те добина ле. О хебрејско лафи со ко Изреки 23:23 тано преведимо сар „кин“ шај те значинел хем „стекнин“. Солдуј лафија сикавена кај јекх мануш трудинела пе или откажинела пе тари несави бути те шај те добинел нешто сој леске вредно. Те шај те хаљова сар шај те кина о чачипе, те замислина аменге јекх пазари коте со дена пе банане бизо паре. Шај ли те аџикера кај адала банане коркори ка појавинен пе ко амаро астали? На, него ваљани те џа ко пазари хем те ана лен кхере. Значи, иако о банане тане бизо паре, мора те кера нешто те шај те добина лен. Слично, на ваљанена аменге паре те кина о чачипе, ама ваљани те трудина амен хем те кера несаве жртве.

⁶ Читин Исаија 55:1-3. Адава со вакерѓа о Јехова поможинела аменге те хаљова со значинела те кина о чачипе. О Јехова спорединѓа пле лафија пањеа, тхудеа хем мољаја. Исто сар о шудро пани со освежинела јекхе жедно мануше, аѓаар о чачипе освежинела амен. Хем исто сар о тхуд со керела те бајровен о чхаве, о чачипе керела амаро амалипе е Јеховаја позорало хем поможинела аменге духовно те бајрова. О Јехова исто аѓаар спорединѓа пло лафи мољаја. Соске? Ки Библија пишинела кај и мол керела е манушен бахтале (Пс. 104:15). Адалеске кеда о Јехова вакерела „кинен мол“, ов уверинела амен кај ка ова бахтале ако живинаја сар ов со родела (Пс. 19:8). О Јехова користинела акала споредбе те поможинел аменге те хаљова сави корист  иси амен кеда сикљоваја башо чачипе хем живинаја спрема лесте. Акана те дикха панџ буќа колендар со шај ка ваљани те откажина амен те шај те кина о чачипе.

7, 8. а) Соске ваљани време те шај те сикљова о чачипе? б) Саве жртве керѓа и Марико, хем саво сине о резултати?

⁷ Време. Ваљани време те шај некој те шунел о хабери башо Царство, те читинел и Библија хем о библиска публикацие, те проучинел и Библија е Јеховаскере сведоконцар, те спреминел пе башо состанокија хем те џал ки ленде. Те шај те керен пе са акала буќа, мора те користинел пе о време кова со шај англедер користинела пе сине башо јавера буќа со нане добором важна. (Читин Ефешаните 5:15, 16.) Кобор време ваљани те шај некој те сикљовел о основна чачипа тари Библија? Акава зависинела таро околностија. Џанѓола пе, нане крајо башо адава кобор шај те сикљова баши е Јеховаскири мудрост, башо лескере друмија хем башо буќа со керѓа лен (Рим. 11:33). Ко прво број тари Стражарско кула о чачипа тари Библија сине споредиме тикне лулуѓенцар. Ки лесте пишинела сине кај на ваљани те ова задоволна само јекхе лулуѓаја, или јавере лафенцар само јекхе чачипаја тари Библија, него ваљани те рода хем те кхеда кобор со шај повише. Адалеске шај те пуча амен: „Кобор тано баро мло духовно ’букети‘?“ Чак ки цели вечност ка шај те сикљова неве буќа башо Јехова. Ама, авдиве тано бут важно те користина амаро време те шај те сикљова кобор со шај повише баши лесте. Те дикха јекх пример сар некој керѓа акава.

⁸ Јекх терни Јапонка со викинела пе Марико селинѓа пе ко Њујорк (САД) те шај те џал ки школа. * (Дикх и фуснота.) Јекх диве, ко лакоро удар али јекх пионерка те проповединел лаке. Е Марико сине ла више пли религија, ама почминѓа те проучинел и Библија акале пхењаја. Лаке бут свиџинѓа пе адава со сикљовела сине хем пучља е пхења те проучинен дуј пути ко курко. Иако сине бут зафатими е школаја хем керела сине бути похари саатенцар, и Марико одма почминѓа те џал ко состанокија. Исто аѓаар, трошинела сине похари време баши рекреација те шај те овел ла повише време те сикљовел о чачипе. Акала жртве поможинѓе лаке те овел са попаше е Јеховаја хем крстинѓа пе башо похари таро јекх берш. Пало шов масек, ко 2006 берш, ој почминѓа е пионерско службаја хем панда служинела сар пионери.

9, 10. а) Сар влијајнела о чачипе тари Библија упро амаро стави башо материјална буќа? б) Таро со откажинѓа пе и Марија, хем со вакерела башо адава?

⁹ Материјална буќа. Те шај те сикљова о чачипе, шај ка ваљани те  откажина амен тари несави шукар платими бути или успешно кариера. На пример, о Петар хем о Андреј сине рибарија, ама кеда о Исус викинѓа лен те овен лескере ученикија, ола мукхле пли бути (Мат. 4:18-20). Акава на значинела кај ваљани те мукхе тли бути кеда ка сикљове о чачипе. Секоле христијане иси ле одговорност те керел бути хем те грижинел пе пле фамилијаке (1. Тим. 5:8). Ама, кеда сикљовеа о чачипе, менинела пе тло стави башо материјална буќа. Тегани хаљовеа сој тано чаче најважно ко живото. О Исус вакерѓа: „Чхинавен те кхеден туменге барвалипе ки пхув... Него кхеден туменге барвалипе ко небо“ (Мат. 6:19, 20). Акава керѓа јекх чхај со викинела пе Марија.

¹⁰ И Марија панда сар тикни уживинела сине те кхелел голф. Кеда сине ки средно школа, ој овела сине са пошукар ко адава. Адалеске, добинѓа стипендија башо факултети. Лакири цел ко живото сине те кхелел професионално голф хем те заработинел бут паре. Тегани, ој почминѓа те проучинел и Библија. И Марија замангља о чачипе тари Библија хем почминѓа те живинел спрема лесте. Ој вакерела: „Кобор повише размислинава сине хем постапинава сине спрема о библиска начелија, добором побахтали овава сине“. И Марија халили кај ка овел лаке пхаро ко исто време те концентриринел пе ко пло амалипе е Јеховаја хем ки пли спортско кариера (Мат. 6:24). Адалеске одлучинѓа те откажинел пе тари пли цел те кхелел професионално голф. Авдиве и Марија служинела сар пионерка хем вакерела кај тани бут бахтали хем иси ла смисла ко живото.

11. Саве шај те овен амаре односија несаве амаленцар хем фамилијаја кеда ка сикљова о чачипе?

¹¹ Односија е јавере манушенцар. Кеда ка почмина те кера адава со сикљоваја тари Библија, амаре односија е амаленцар хем е фамилијаја шај ка менинен пе. О Исус поможинѓа аменге те хаљова и причина башо акава кеда молинѓа пе башо пле следбеникија: „Тле лафеа кер лен света, соске тло лафи тано чачипе“ (Јован 17:17). О лафија „кер лен света“ шај те превединен пе хем сар „одвојн лен“. Кеда почминѓем те живина спрема о чачипе, одвојнѓем амен таро свето адалеске со икераја амен ко библиска мерилија. Иако трудинаја амен те ачхова ко шукар односија амаре амаленцар хем фамилијаја, несаве шај нане те манген амен сар англедер или чак ка противинен пе аменге. Акава на изненадинела амен. О Исус вакерѓа: „Чаче, е манушескере душмања ка овен лескере кхерутне“ (Мат. 10:36). Ама, ов исто аѓаар ветинѓа кај бизи разлика кобор жртве кераја башо чачипе, ка добина бут повише него со нашавѓем! (Читин Марко 10:28-30.)

12. Со доживинѓа о Арон башо чачипе?

¹² Јекх Евреи со викинела пе Арон  цело пло живото верујнела сине кај тано погрешно те вакерел е Девлескоро анав. Ама, ов бут мангела сине те џанел о чачипе башо Девел. Јекх диве, јекх Сведоко објаснинѓа леске кај ако чхивела самогласке ко штар хебрејска согласке таро е Девлескоро анав, шај те изговоринел ле „Јехова“. О Арон сине добором бахтало со шунѓа акава со чак гело ки синагога те вакерел е рабиненге. Ов мислинѓа кај ола да ка овен бахтале ако шунена о чачипе башо е Девлескоро анав, ама на сине аѓаар. Наместо адава, ола почминѓе те чхунгарен ле хем палдинѓе ле. Исто аѓаар, лескири фамилија ули против лесте. Ама, о Арон на мукхља акава те чхинавел ле те сикљовел повише башо Јехова. Ов уло е Јеховаскоро сведоко хем верно служинѓа е Девлеске џи ко крајо таро пло живото. Кеда ка прифатина о чачипе, амен да ваљани те аџикера кај шај те менинен пе о односија амаре фамилијаја хем амаленцар.

13, 14. Саве промене мора те кера ко начин сар размислинаја хем постапинаја кеда сикљоваја о чачипе? Вакер пример.

¹³ Мисле хем постапке со нане чиста. Кеда сикљоваја о чачипе хем почминаја те живина спрема о библиска мерилија, мора те ова спремна те кера промене ко начин сар размислинаја хем постапинаја. О апостол Петар вакерѓа: „Тумен акана сиен е Девлескере послушна чхаве. Адалеске чхинавен те постапинен спрема о погрешна желбе со сине тумен кеда на пенџарена ле сине, него... овен света ко са со керена“ (1. Пет. 1:14, 15). Ки пурани диз Коринт, бут мануша сине неморална. Окола со живинена сине адари ваљани сине те керен баре промене те шај те овен чиста англо е Јеховаскере јакхја (1. Кор. 6:9-11). Авдиве, бут џене керена слична промене кеда сикљовена о чачипе. О Петар сикавѓа акава кеда пишинѓа: „Доста сине со англедер керена сине и волја е манушенгири таро свето кеда постапинена сине бизи нисави лаџ, на контролиринена сине тумари страст, претерано пиена сине, керена сине распуштена забаве, натпреварија пијбаске хем одвратно идолопоклонство“ (1. Пет. 4:3).

¹⁴ О Девин хем и Џасмин бершенцар сине пијанице. Иако о Девин сине искусно книговодители, ов бут пути нашавела сине пли бути адалеске со сине ле проблеми пијбаја. И Џасмин сине пенџарди сар агресивно хем насилно личност. Јекх диве, џикоте пхирела сине мати ки улица, аракхља јекх брачно пари Сведокија со сине мисионерија. Ола нудинѓе лаке библиско курси. Ама кеда о јавер курко геле ки ленде, о Девин хем и Џасмин сине мате. Ола на мислинѓе кај о мисионерија чаче ка авен. Ама, кеда о мисионерија але јавер пути, и ситуација сине појавер. И Џасмин хем о Девин едвај аџикерена сине те проучинен и Библија хем сигате почминѓе те керен адава со сикљовена. Башо похари таро трин масек чхинавѓе те пиен хем пало адава венчинѓе пе. Бут мануша таро ленгоро гав дикхле саве промене керѓе и Џасмин хем о Девин хем адава поттикнинѓа лен ола да те проучинен и Библија.

15. Која шај те овел јекх најпхари промена со ваљани те кера ла те шај те кина о чачипе хем соске?

¹⁵ Адетија хем традицие со на мангела о Јехова. Јекх таро најпхаре промене со ваљани те керел пе тани те чхинава те кера адетија со на мангела  о Јехова. Чак откеда ка сикљовен сар дикхела о Јехова ко адала адетија, несавенге понадари да тано пхаро те чхинавен те керен лен. Ола дарана сар ка реагиринел ленгири фамилија, колеге хем амала. Ола џанена кај е манушенге обично тане бут важна несаве адетија, сар на пример адетија со керена пе башо муле (5. Мој. 14:1). Тегани, со ка поможинел аменге те кера о промене со ваљани? Шај те сикљова таро шукар примерија околенгере со живинена сине ко пурано време кола со керѓе промене кеда сиклиле башо чачипе, сар сој о христијања таро прво веко ко Ефес.

16. Саве жртве керѓе несаве мануша со живинена сине ко Ефес?

¹⁶ Ки пурани диз Ефес, буте манушенге сине нормално те керен магие. Со керѓе несаве лендар кеда уле христијања? И Библија објаснинела: „Бут џене со керена сине магие, кхединѓе пумаре лила хем тхарѓе лен англо сариненде. Хем рачунинѓе кај врединена пинда милје сребреникија. Аѓаар, е Јеховаскере силаја лескоро лафи бајровела сине хем овела сине са посилно“ (Дела 19:19, 20). Акала верна христијања сине спремна те откажинен пе таро пле скупа лила хем о Јехова денѓа лен берекети.

17. а) Кола буќа шај жртвујнѓем те шај те кина о чачипе? б) Башо кола пучиба ка добина одговор ки јавер статија?

¹⁷ Со жртвујнѓан ту те шај те кине о чачипе? Сарине амен жртвујнѓем амаро време. Несаве амендар жртвујнѓе прилике те барваљовен, а несавенгере односија е јаверенцар шај руминдиле. Бут џене мора сине те менинен пло начин сар размислинена хем постапинена или мора сине те откажинен пе таро адетија хем традицие со на мангела о Јехова. Ама, увериме сием кај о чачипе тари Библија тано бут повредно таро са о жртве со керѓем лен. Ов дела амен прилика те ова паше амала е Јеховаја, а нане ништо поскапоцено таро адава. Кеда размислинаја башо са о берекетија со анела аменге о чачипе, пхаро тано те хаљова соске некој би мангела те „бикинел“ ле. Сар шај те случинел пе адава? Со ка поможинел аменге те на кера асавки сериозно грешка? О одговорија таро акала пучиба ка дикха лен ки јавер статија.