Нека овел тут доверба ко Јехова хем ка живине вечно!
Нека овел тут доверба ко Јехова цело вилеа хем те на овел тут доверба ко тло хаљојбе (ИЗР. 3:5)
1. Соске сариненге ваљанела утеха?
САРИНЕНГЕ ваљани утеха. Шај амаро живото тано пхердо секирацие, разочарување хем муке. Несаве амендар мучинена пе соске тане насвале, пхуре, или муло лендар некој со мангена ле. А несаве амендар шај тане малтретириме таро јавера. Освен адава, о мануша околу аменде овена са понасилна. Акава „пхаро време“ сикавела кај живинаја ко „последна диве“ хем кај секова диве аваја са попаше џи ко нево свето (2. Тим. 3:1). Ама, шај бут време више аџикераја те исполнинен пе е Јеховаскере ветувања хем шај трпинаја са повише неволје. Тегани, коте шај те аракха утеха?
2, 3. а) Со џанаја башо Авакум? б) Соске ка кера лафи башо лил Авакум?
2 Те шај те аракха о одговор ко акава пучибе те Авак. 2:2).
дикха о библиско лил Авакум. Иако ки Библија нане бут информацие башо е Авакумескоро живото, лескоро лил шај бут те охрабринел амен. О анав Авакум веројатно значинела „гушибе таро вило“. Акава шај сикавела е Јеховаскоро начин сар дела амен утеха. Кеда о Јехова утешинела амен, адава тано исто сар те пхене гушинела амен, или јавере лафенцар лела амен ки ангали. Или исто аѓаар шај сикавела о начин сар е Јеховаскере слуге цврсто икерена пе ки лесте. О Авакум керѓа лафи е Девлеа хем пучља ле некобор пучиба. О Јехова пле свети духоја водинѓа е Авакуме те пишинел адава разговор соске џанља кај ка користинел аменге (3 Акава разговор машкар о Авакум хем о Јехова тано са со џанаја тари Библија башо акава секиримо пророко. Ама, лескоро лил тано дело таро са адава со сине некогаш пишимо ко е Девлескоро Лафи кова со дела амен надеж, сила хем поможинела аменге те издржина (Рим. 15:4). Сар шај о лил Авакум те поможинел секоле јекхеске амендар? Шај те поможинел аменге те хаљова со значинела те овел амен доверба ко Јехова. Исто аѓаар, о пророштво таро Авакум уверинела амен кај шај те овел амен андруно мир бизи разлика саве проблемија или пхарипа иси амен.
МОЛИН ТУТ Е ЈЕХОВАСКЕ
4. Соске сине вознемиримо о Авакум?
4 Читин Авакум 1:2, 3. О Авакум живинела сине ко бут пхаро време. Живинела сине машкар о мануша со сине бут лошна хем насилна, адалеске сине леске превише пхаро. О Израелција понашинена пе сине грубо хем неправедно јекх јекхеа. О Авакум пучела пе сине кеда ка авел крајо акале лошнипаске хем соске о Јехова аџикерела добором бут време те шај те керел нешто. На сине ле сила понадари те боринел пе. Адалеске молинѓа е Јехова те керел нешто. О Авакум шај почминѓа те мислинел кај о Јехова на грижинела пе више башо пло народо хем кај нане те керел нешто. Дали ту да осетинѓан тут некогаш аѓаар?
На ваљани те дара те вакера е Јеховаске амаре муке или сумње
5. Со шај те сикљова таро лил Авакум? (Дикх и слика ко почеток тари статија.)
5 Дали о Авакум пучља акала пучиба е Јехова адалеске со нашавѓа пли доверба ки лесте хем ко лескере ветувања? На, на сине аѓаар! Адава со о Авакум родинѓа помош таро Јехова башо пле проблемија хем со вакерѓа леске ко со сумнинела пе, сикавела кај сине ле доверба ки лесте. Ама, дикхјола кај сине секиримо хем бунимо. Ов на халило соске о Јехова мукхела добором те цидел хем соске панда ништо на керела. О Јехова денѓа аменге јекх важно поука адалеа со водинѓа е Авакуме те пишинел пле муке. На ваљани те дара те вакера е Јеховаске амаре муке хем сумње. Уствари, о Јехова мангипаја поттикнинела амен те молина амен хем те вакера леске со чаче осетинаја (Пс. 50:15; 62:8). О лафија таро Изреки 3:5 охрабринена секоле јекхе амендар: „Нека овел тут доверба ко Јехова цело вилеа хем те на овел тут доверба ко тло хаљојбе“. О Авакум применинѓа акала лафија.
6. Соске тано важно те молина амен?
6 Е Авакуме сине ле доверба ко пло амал хем Дад, о Јехова, хем керѓа нешто те шај те овел леа попаше. Наместо само те секиринел пе баши пли ситуација хем те пробинел коркори те решинел ла, ов ки молитва вакерѓа е Јеховаске сар осетинела пе хем со секиринела ле. Адалеа мукхља аменге шукар пример. О Јехова, кова со шунела о молитве, поттикнинела амен те сикава доверба аѓаар со ки молитва ка вакера леске амаре муке (Пс. 65:2). Ако кераја акава, ка дикха сар о Јехова одговоринела ко амаре молитве хем ка осетина сар мангипаја гушинела амен џикоте водинела амен хем утешинела амен (Пс. 73:23, 24). Бизи разлика саве проблемија иси амен, о Јехова ка поможинел аменге те хаљова сар дикхела ки амари ситуација. Јекх таро најшукар начинија сар шај те сикава доверба ко Јехова тано аѓаар со ка молина амен леске таро вило.
ШУН Е ЈЕХОВА
7. Сар реагиринѓа о Јехова кеда о Авакум вакерѓа леске пле муке?
7 Читин Авакум 1:5-7. Откеда о Авакум вакерѓа пле муке е Јеховаске, шај пучела пе сине сар ка реагиринел о Јехова. Сар јекх Дад пхердо мангипаја, о Јехова халило сар осетинела пе о Авакум. Ов џанља кај о Авакум мучинела пе сине хем кај бут ваљанела леске сине помош. Адалеске о Јехова на укоринѓа е Авакуме, него вакерѓа леске со ка керел панда хари е Евреенцар со на сине верна. Уствари, о Авакум шај сине о прво мануш каске со о Јехова вакерѓа кај панда хари ка казнинел лен.
8. Соске о Авакум сине изненадимо таро е Јеховаскоро одговор?
8 О Јехова вакерѓа е Авакумеске кај панда хари ка керел нешто. Ов пхенѓа кај ка казнинел е насилна хем е лошна манушен тари Јуда. Адалеа со вакерѓа леске кај адава ка случинел пе „ко тумаре диве“, о Јехова сикавѓа кај акаја осуда ка авел џикоте о Авакум хем о Израелција околу лесте тане панда џивде. О Авакум на аџикерѓа асавко одговор таро Јехова. О Халдејција, или о Вавилонција, сине бут сурова. Ола сине понасилна таро Израелција, кола со барем џанена сине е Јеховаскере мерилија. Тегани, соске о Јехова одлучинѓа те користинел акале паганско народо те казнинел пле слуген? Акава ка керел сине те овел само попхаро е манушенге тари Јуда. Сар ка осетине тут сине те ове ко тхан е Авакумескоро?
9. Кола јавера пучиба пучља о Авакум?
9 Читин Авакум 1:12-14, 17. Иако о Авакум халило кај о Јехова преку о Вавилонција ка казнинел е лошна манушен околу лесте, ов понадари да сине бунимо. Ама ов сине понизно хем одлучно понадари да те овел ле доверба ко Јехова. Уствари, ов вакерѓа кај о Јехова понадари да ка овел лескири „Карпа“ (5. Мој. 32:4; Иса. 26:4). О Авакум сине уверимо ко е Јеховаскоро мангипе хем шукарипе, адалеске на дарандило те пучел ле панда несаве пучиба, сар сој: Соске о Јехова би мукхела и ситуација ки Јуда те овел панда полошно хем лескоро народо те мучинел пе панда повише? Соске одма на керела нешто? Соске о Семоќно „трајнела“ џикоте о лошнипе са повише бајровела? Акала пучиба мучинена ле сине соске ов џанела сине кај о Јехова тано свето хем лескере јакхја тане превише чиста те шај те дикхен лошнипе.
10. Соске понекогаш шај те осетина амен сар о Авакум?
10 Исто сар о Авакум, амен да шунаја е Јехова, иси амен доверба ки лесте, читинаја хем проучинаја лескоро Лафи. Са акава дела амен надеж. Исто аѓаар, о Јехова преку пли организација сетинкерела амен ко пле бут шуже ветувања. Ама, шај амен да сар о Авакум те пуча амен: „Кеда ка авел крајо амаре мукенге?“ Те дикха со шај те сикљова таро адава со керѓа о Авакум.
АЏИКЕР КО ЈЕХОВА
11. Со сине одлучно о Авакум те керел?
11 Читин Авакум 2:1. Е Авакуме сине ле андруно мир адалеске со керѓа лафи е Јеховаја. Адава керѓа ле те овел одлучно те аџикерел ко Јехова. О Авакум повторинѓа пли одлучност кеда вакерѓа: „Мирно ка аџикерав о диве е неволјакоро“ (Авак. 3:16). Јавера да верна слуге е Девлескере стрпливо аџикерѓе ко Јехова. Ленгоро пример охрабринела амен соске сикавела кај амен да шај те кера адава (Мих. 7:7; Јак. 5:7, 8).
Ваљани стрпливо те аџикера ко Јехова хем те овел амен доверба кај ка цидел амаре неволје ко пло време
12. Со шај те сикљова таро Авакум?
12 Со шај те сикљова тари одлучност е Авакумескири? Прво, никогаш на ваљани те чхинава те молина амен е Јеховаске, бизи разлика саве проблемија иси амен. Дујто, ваљани те шуна со вакерела аменге о Јехова преку пло Лафи хем пли организација. Хем трито, ваљани стрпливо те аџикера ко Јехова хем те овел амен доверба кај ка цидел амаре неволје ко пло време. Ако џаја пало пример е Авакумескоро, ка овел амен андруно мир хем ка шај те истрајна. Амари надеж ка поможинел аменге те ова стрплива хем бахтале, бизи разлика саве проблемија иси амен. Увериме сием кај амаро Дад сој ко небо ка керел нешто (Рим. 12:12).
13. Сар о Јехова утешинѓа е Авакуме?
13 Читин Авакум 2:3. Шај те ова сигурна кај о Јехова сине бахтало адалеске со о Авакум одлучинѓа те аџикерел ки лесте. О Семоќно бут шукар џанела сине кобор пхаро сине е Авакумеске, адалеске ов утешинѓа пле пророко хем љубезно уверинѓа ле кај ка одговоринел ко лескере искрена пучиба. Панда хари ка авел сине крајо се е Авакумескере мукенге. Адава сине исто сар те пхене о Девел вакерѓа леске: „Ов стрпливо хем нека овел тут доверба ки манде. Ка одговоринав ки тли молитва, иако дикхјола пе туке кај аџикереа бут време!“ О Јехова сетинкерѓа е Авакуме кај ов више одлучинѓа кеда ка исполнинел пле ветувања. Адалеске поттикнинѓа е Авакуме понадари да те аџикерел. Ко крајо, о пророко нане те овел сине разочаримо.
Соске сием одлучна те служина е Јеховаске најшукар со шај? (Дикх о пасус 14)
14. Ко со ваљани те ова одлучна кеда сием ко пхаре ситуацие?
14 Амен да ваљани стрпливо те аџикера о Јехова те керел нешто. Исто аѓаар, амен да ваљани шукар те шуна са со пхенела аменге. Тегани ка овел амен доверба ки лесте хем ка овел амен андруно мир бизи разлика саве проблемија иси амен. О Исус поттикнинѓа амен те на ова преокупириме адалеа кеда ка исполнинен пе е Јеховаскере ветувања (Дела 1:7). Ваљани те овел амен доверба ко Јехова кај ов најшукар џанела кеда тано о исправно време те керел нешто. Адалеске те на откажина амен, него те ова понизна хем стрплива хем те сикава вера ко Девел. А џикоте аџикераја, ваљани мудро те користина амаро време хем те служина е Јеховаске најшукар со шај (Мар. 13:35-37; Гал. 6:9).
О ЈЕХОВА ДЕЛА ВЕЧНО ЖИВОТО ОКОЛЕНГЕ СО ИСИ ЛЕН ДОВЕРБА КИ ЛЕСТЕ
15, 16. а) Кола ветувања тане пишиме ко лил Авакум? б) Ко со уверинена амен акала ветувања?
15 О Јехова ветинѓа: „О праведнико ка ачховел џивдо баши пли верност“ хем „и пхув ка овел пхерди пенџарибаја баши е Јеховаскири слава“ (Авак. 2:4, 14). Акава сикавела кај о Јехова ка дел вечно живото околенге сој тане стрплива хем иси лен доверба ки лесте.
Авакум 2:4 тано добором важно со о Павле цитиринѓа ле трин пути ко пле писмија (Рим. 1:17; Гал. 3:11; Евр. 10:38). Шај те ова сигурна кај бизи разлика саве пхарипа иси амен ко живото, ако иси амен доверба ко Јехова, ка дикха сар исполнинена пе лескере ветувања. О Јехова мангела те мислина ки амари надеж.
16 О ветување сој пишимо ко17. Ко со уверинела амен о Јехова ако иси амен доверба ки лесте?
17 Ко лил Авакум иси бут силно поука аменге со живинаја ко последна диве. О Јехова ветинела вечно живото са е праведна манушенге со иси лен доверба ки лесте. Адалеске, понадари да те бајрара амари доверба ко Девел, бизи разлика саве проблемија или муке иси амен. Адава со вакерѓа о Јехова е Авакумеске уверинела амен кај ов кај ка поддржинел амен хем ка спасинел амен. Ов љубезно поттикнинела амен те сикава доверба ки лесте хем стрпливо те аџикера ко време со ов одрединѓа ле кеда лескоро Царство ка владинел ки Пхув. Тегани, цели Пхув ка овел пхерди лескере бахтале хем кротка слугенцар (Мат. 5:5; Евр. 10:36-39).
НЕКА ОВЕЛ ТУТ ДОВЕРБА КО ЈЕХОВА ХЕМ ОВ БАХТАЛО
18. Сар влијајнѓе упро Авакум е Јеховаскере лафија?
18 Читин Авакум 3:16-19. Е Јеховаскере лафија влијајнѓе бут упро Авакум. Ов хор размислинела сине башо бут шуже буќа со керѓа о Јехова пле слугенге ко пурано време. Адава поможинѓа леске те бајрарел пли доверба ко Јехова хем уверинѓа ле кај панда хари ка керел нешто! Адава утешинѓа е пророко, иако џанља кај лескере муке шај те трајнен панда несаво време. Е Авакуме на сине ле више сумње. Наместо адава, ов сине целосно уверимо кај о Јехова ка спасинел ле. Уствари, лескере лафија сој тане пишиме ко 18 стихо, шај тане јекх таро најсилна лафија баши доверба сој пишиме ки Библија. Несаве изучувачија мислинена кај о 18 стихо значинела: „Ка рупинав таро бахталипе башо мло Господари, ка кхелав таро бахталипе башо Девел“. Адава тано чаче бари поука аменге! О Јехова на само со денѓа амен бут шуже ветувања баши иднина, него хем уверинѓа амен кај панда хари ка исполнинел адала ветувања.
19. Сар шај те ова утешиме таро Јехова сар со сине о Авакум?
19 И главно поука со сикљоваја ла таро лил Авакум тани те овел амен доверба ко Јехова (Авак. 2:4). Те шај понадари да те овел амен асавки доверба, ваљани те кера позорало амаро амалипе леа. Адалеске ваљани 1) понадари да ки молитва те вакера е Јеховаске са амаре муке, 2) шукар те шуна со вакерела аменге ко пло Лафи хем те шуна о водство со дела амен преку пли организација хем 3) верно хем стрпливо те аџикера ки лесте. Баш адава керѓа о Авакум. Иако ко почеток кеда почминѓа те керел лафи е Јеховаја сине секиримо, ко крајо ов сине охрабримо хем бахтало! Ако џаја пало пример е Авакумескоро, амен да ка ова утешиме кеда ка осетина сар амаро Дад сој ко небо, о Јехова, мангипаја гушинела амен. Нане побари утеха која со шај некој те дел амен ко акава лошно свето!