1-2. а) Со поможинела аменге те икљова ко крајо е проблеменцар секова диве? Објаснин. б) Со ка дикха ки акаја статија?

ДАЛИ некогаш вакерѓан: „Кеда ка сетинав ман таро са со накхљум, џанава кај нашти сине те издржинав мле силаја“? Бут џене амендар вакерѓе акава. Шај вакерѓан акала лафија откеда размислинѓан сар иклиљан ко крајо несаве пхаре насвалипаја или откеда муло некој таро тле најпаше. Кеда сетинеа тут ко адава, хаљовеа кај шај сине те истрајне секова нево диве само адалеске со о Јехова, преку пло свети дух, дела тут сине „сила, која со накхавела и нормално“ (2. Кор. 4:7-9).

² Исто аѓаар, ваљани аменге помош таро свети дух те шај те спротивставина амен ко влијание таро акава лошно свето (1. Јов. 5:19). Освен адава, мора те борина амен против „о лошна духија“ (Еф. 6:12). Акана ка дикха дуј начинија сар о свети дух поможинела аменге те икљова ко крајо са адале проблеменцар. Пало адава ка дикха со шај те кера те шај те овел амен целосно помош таро свети дух.

3. Вакер јекх начин сар о Јехова поможинела аменге преку пло свети дух?

³ О Јехова поможинела аменге пле свети духоја аѓаар со дела амен сила те кера амаре одговорностија иако адава нане секогаш локхо. Е Павле сине ле доверба ки е „Христосескири сила“, адалеске сине свесно кај шај те служинел е Јеховаске иако сине ле пхарипа (2. Кор. 12:9). Џикоте сине ко пло дујто мисионерско патување, о Павле на само со денѓа пестар са те шај те проповединел, него керела сине бути да те шај те платинел пле трошакија. Кеда сине ко Коринт, ов живинела сине ко кхер е Акиласкоро  хем е Прискилакоро. Ола керена сине шаторија. Адалеске со сине ле о исто занати, несаве диве о Павле керела сине заедно ленцар бути (Дела 18:1-4). О свети дух дела ле сине сила те керел бути те шај те платинел пле трошакија хем те керел пли служба.

4. Спрема 2. Коринќаните 12:7б-9, саво проблеми сине е Павле?

⁴ Читин 2. Коринќаните 12:7б-9. Со мангља те вакерел о Павле кеда вакерѓа кај иси ле „каро ко тело“? Ако иси тут дословно каро ко тело, сигурно бут ка дукхал тут. Спрема акава, о Павле најверојатно керела сине лафи башо несаво лично проблеми со керела леске сине бари дукх. Ов вакерѓа кај акава проблеми сине сар „ангели е Сатанаскоро“ кова со цело време кхувела ле сине. Шај о Сатана или лескере демонија на предизвикујнѓе директно е Павлескере неволје. Ама, кеда адала лошна духија дикхле адава „каро“, шај пробинѓе те „гуринен“ ле са похор те шај те дукхавен ле панда повише. Со керѓа о Павле?

5. Сар одговоринѓа о Јехова ко е Павлескере молитве?

⁵ Ко почеток, о Павле мангља о Јехова те цидел лестар „о каро“. Ов признајнѓа: „Трин пути молинѓум е Господаре [е Јехова] те цидел мандар адава“. Иако о Павле молинѓа пе, ов понадари да осетинела сине о каро. Дали акава значинела кај о Јехова на одговоринѓа ко лескере молитве? Ни најхари. Ов шунѓа лескере молитве. О Јехова на цидинѓа лескоро проблеми, ама денѓа ле сила те шај те истрајнел. О Јехова вакерѓа леске: „Мли сила сикавела пе целосно кеда сиан слабо“ (2. Кор. 12:8, 9). Адалеске со о Јехова поможинѓа леске, о Павле ачхило бахтало хем икерѓа пло андруно мир (Фил. 4:4-7).

6. а) Сар шај о Јехова те одговоринел ко молитве? б) Кола ветувања таро денде стихија дена тут сила?

⁶ Дали ту да, исто сар о Павле, молинѓан е Јехова те цидел тутар несаво проблеми? Шај молинѓан тут искрено башо адава бут пути, ама о проблеми ачхило, чак шај уло побаро. Дали мислинѓан кај керѓан нешто со разочаринѓа е Јехова? Ако оја, тегани сетин тут ко Павле. Исто сар со одговоринѓа ко лескере молитве, о Јехова ка одговоринел ко тле да. Шај нане те цидел о проблеми, ама преку о свети дух ка дел тут и сила со ваљани туке те шај те издржине (Пс. 61:3, 4). Иако о проблемија шај ко несаво време те перавен тут, о Јехова нане те мукхел тут (2. Кор. 4:8, 9; Фил. 4:13).

7-8. а) Ки која смисла о свети дух тано сар бавлал? б) Сар о Петар опишинѓа о начин сар влијајнела о свети дух?

⁷ Ко саво јавер начин поможинела аменге о свети дух? О свети дух шај те споредина ле јекхе бавлалаја. Јекх броди шај те користинел и бавлал со пхудела ко исправно правцо те шај те ресел безбедно ки пли цел чак ако ко море иси бут бранија. Слично, о свети дух поможинела аменге понадари да те служина е Јеховаске иако иси амен неволје џикоте на ресаја ко нево свето со ветинѓа ле аменге о Девел.

⁸ Сар рибари, о Петар џанела сине бут башо пловибе. Шај адалеске, кеда опишинѓа о начин сар влијајнела о свети дух, ов користинѓа јекх лафи кова со веројатно тано поврзимо пловибаја. О Петар пишинѓа: „нијекх пророштво на сине вакердо сар со мангела о мануш, него о мануша вакерена сине о лафија со авена таро Девел аѓаар сар со водинела лен сине о свети дух“. О грчко лафи сој преведимо е глаголеа „водинела“ дословно значинела „ингарела“ (2. Пет. 1:21).

9. Сави слика мангља те керел аменге о Петар кеда вакерѓа кај о свети дух водинѓа е манушен со пишинѓе и Библија?

⁹ Сави слика мангља те керел аменге о Петар кеда вакерѓа кај о свети дух водинѓа е манушен со пишинѓе и Библија? Слично облик  таро грчко глагол користинѓа хем о Лука, кова со пишинѓа о лил Дела, кеда керѓа лафи башо јекх броди кова со сине ингардо тари бавлал (Дела 27:15). Јекх библиско изучувачи вакерела кај о Петар користинѓа јекх „интересно метафора таро морепловство“ кеда пишинѓа кај о свети дух водинѓа е библиска писателен. О Петар, уствари вакерѓа кај, сар со јекх броди тано ингардо тари бавлал џи ко крајо таро патујбе, исто аѓаар о библиска пророкија хем писателија сине ингарде таро свети дух те шај те керен пли задача. О исто изучувачи спорединѓа е Библијакере писателен е броденцар кола со „пхравена сине пумаре едрија“. О Јехова керѓа пло дело аѓаар со дела сине „бавлал“, јавере лафенцар, о свети дух, а ола дена сине пло дело аѓаар со сине послушна ко водство адале духоскоро.

10-11. Кола дуј буќа ваљани те кера те шај те водинел амен о свети дух? Вакер пример.

¹⁰ Џанѓола пе, авдиве о Јехова на користинела пло свети дух те водинел некас те пишинел библиска лила. Ама, ов понадари да користинела о свети дух те водинел пле народо. О Јехова панда керела пло дело. Ама, сар шај те овел амен корист таро е Девлескоро свети дух? Амен да мора понадари те кера амаро дело. Сар?

¹¹ Размислин башо акава пример. Те шај јекх морнари те искористинел и бавлал, мора те керел дуј буќа. Прво, мора те џал адари коте со иси бавлал. Уствари, лескоро чамцо нашти те џал англе ако ов ачховела ко пристаниште коте со нане бавлал. Дујто, мора те ваздел хем те пхравел о едрија. Сепак, чак ако пхудела бавлал, о чамцо шај те џал англе само ако астарела ле и бавлал. Сар со јекх чамцо нашти те движинел пе бизи бавлал, аѓаар амен да нашти истрајно те служина е Јеховаске бизо лескоро свети дух. Ама, амендар аџикерела пе те кера дуј буќа. Прво, мора те мукха о свети дух те влијајнел упри аменде аѓаар со ка џа пало лескоро водство хем ка ова зафатиме духовна активностенцар. Дујто, мора те „вазда“  хем целосно те „пхрава о едрија“ аѓаар со ка учествујна ко адала активностија најшукар со шај (Пс. 119:2). Кеда ка кера акала дуј буќа, о свети дух ка дел амен сила те шај понадари да те служина е Јеховаске верно џикоте ресаја ко е Девлескоро нево свето.

12. Со ка дикха акана?

¹² Дикхлем ко кола дуј начинија поможинела аменге о свети дух. Ов дела амен сила хем поможинела аменге те ачхова верна кеда иси амен неволје. Освен адава, о свети дух водинела амен те џа англал хем поможинела аменге те ачхова ко друмо кова со ингарела џи ко вечно живото. Акана ка дикха штар буќа со мора те кера те шај те овел амен целосно помош таро адава духо.

13. Спрема 2. Тимотеј 3:16, 17, сар шај и Библија те влијајнел упри аменде, ама со мора амен те кера?

¹³ Прво, ваљани те проучина е Девлескоро Лафи. (Читин 2. Тимотеј 3:16, 17.) О Девел користинѓа пло духо те шај те „чхивел“ пле мисле ки годи е библиска писателенге. Кеда читинаја и Библија хем размислинаја башо адава, е Девлескере советија кхувена ки амари годи хем ко амаро вило. Адала лафија со авена таро Девел поттикнинена амен те кера промене ко амаро живото те шај те кера е Јеховаскири волја (Евр. 4:12). Ама, те шај те овел амен целосно помош таро свети дух, мора те одвојна време редовно те проучина и Библија хем хор те размислина башо адава со читинаја. Тегани е Девлескоро Лафи ка влијајнел упро амаре лафија хем постапке.

14. а) Соске шај те вакера кај о свети дух тано присутно ко амаре состанокија? б) Сар шај те ова присутна ко состанокија „пхравде едренцар“?

¹⁴ Дујто, ваљани заедно те обожавина е Девле (Пс. 22:22). Е Јеховаскоро духо тано присутно ко амаре состанокија (Отк. 2:29). Соске шај те вакера акава? Адалеске со, кеда кхедаја амен амаре пхраленцар хем пхењенцар ко амаре дворане, амен молинаја амен башо свети дух, гиљаваја гиља кола со темелинена пе ко е Девлескоро лафи хем шунаја о библиска поуке со вакерена лен о пхраља именујме е свети духоја. О исто свети дух поможинела е пхењенге те спреминен хем те икерен пумаре задаче. Ама, те шај те овел амен целосно помош таро свети дух, мора те ава спремна ко состанок те шај те коментарина. Аѓаар, ки симболично смисла, сием присутна ко состанок „пхравде едренцар“.

15. Сар поможинела аменге о свети дух ки служба, хем со мора те кера амен?

¹⁵ Трито, ваљани те проповедина. Кеда користинаја и Библија џикоте проповединаја хем сикаваја е јаверен, мукхаја о свети дух те поможинел амен ки служба (Рим. 15:18, 19). Ама, те шај те овел амен целосно помош таро свети дух, мора редовно те проповедина хем те користина и Библија секогаш кеда шај. Шај те кера пошукар лафи ки служба ако користинаја о предлогија башо разговор таро Амаро живото хем служба — листија спремибаске.

16. Кова тано о најдиректно начин сар шај те добина о свети дух?

¹⁶ Штарто, ваљани те молина амен е Јеховаске (Мат. 7:7-11; Лука 11:13). Најдиректно начин сар шај те добина о свети дух тано аѓаар со ка молина е Јехова те дел ле аменге. Ништо нашти те чхинавел амаре молитве те ресен џи ко Јехова хем ништо нашти те чхинавел о свети дух со дела аменге о Јехова те ресел џи аменде — ни о затвор, па чак ни о Сатана (Јак. 1:17). Сар ваљани те молина амен те шај те овел амен целосно помош таро свети дух? Те шај те џана о одговор, те дикха нешто подетално баши молитва тари јекх споредба сој пишими ко е Лукаскоро евангелие. *

17. Со сикљоваја баши молитва тари е Исусескири споредба сој пишими ко Лука 11:5-9, 13?

¹⁷ Читин Лука 11:5-9, 13. Акале споредбаја о Исус сикавела ко саво начин ваљани те молина башо свети дух. О мануш тари споредба добинѓа адава со ваљани сине леске адалеске со сине упорно. Ов на дарандило те родел помош таро пло амал иако сине касно раќате. * Сар поврзинѓа о Исус акаја споредба е молитваја? Ов вакерѓа: „Молинен тумен, хем ка дел пе туменге! Роден, хем ка аракхен! Кхувен, хем ка пхравел пе туменге!“ Со сикљоваја таро акава? Те шај те добина помош таро свети дух, мора упорно те молина е Јехова те дел ле аменге.

18. Спрема е Исусескири споредба, соске шај те ова сигурна кај о Јехова ка дел амен пло свети дух?

¹⁸ Е Исусескири споредба исто аѓаар поможинела аменге те хаљова соске о Јехова ка дел амен свети дух. О мануш тари споредба мангља шукар те грижинел пе пле амалеске. Ов мангља те икалел леске хајбаске иако ало касно раќате, ама на сине ле со те дел ле. О Исус вакерѓа кај о комшија денѓа ле маро соске ов упорно родинѓа лестар адава. Со мангља те сикавел амен о Исус акалеа? Ако јекх несовршено мануш тано спремно те поможинел несаве комшијаске сој тано добором упорно, кобор повише амаро шукар Дад сој ко небо ка поможинел околенге со упорно молинена ле башо свети дух! Адалеске, шај те ова сигурна кај о Јехова ка одговоринел ко амаре молитве кеда таро вило ка рода свети дух (Пс. 10:17; 66:19).

19. Соске шај те ова сигурна кај ка победина?

¹⁹ Иако о Сатана никогаш на чхинавела те нападинел амен, шај те ова сигурна кај ка победина. Соске? Адалеске со о свети дух поможинела аменге ко дуј начинија. Прво, дела амен сила те шај те издржина о проблемија. Дујто, адаја тани сила која со водинела амен те џа англал хем поможинела аменге понадари да те служина е Јеховаске џикоте на ресаја ко лескоро нево свето. Те ова одлучна те овел амен целосно корист тари помош со дела амен о свети дух!