БИЈАМИ сиум 1923 берш ко Хемсворт, јекх диз ко Јоркшир (Англија). Иси ман јекх попхуро пхрал, о Боб. Кеда сине ман ења берш, ме даде денѓе ле несаве лила кола со керена сине лафи башо адава сар и ховавни религија ховавела е манушен. Леске бут свиџинѓа пе адава со читинѓа. Ов на мангела сине со о верска водачија на керена адава со сикавена е манушен. Пало некозом берш, аменде ало о Боб Аткинсон хем мукхља те шуна јекх говор таро пхрал Ратерфорд. Халилем кај акава говор тано тари исто група мануша со керѓа о лила кола со читинѓа лен мо дад. Ме родителија канинѓе е пхрале Аткинсон секова диве те авел аменде ки вечера хем те одговоринел аменге ко амаре библиска пучиба. Ов канинѓа амен те џа ко состанокија со икерена пе сине ко кхер јекхе пхралескоро кова со сине дур некобор километре амендар. Почминѓем редовно те џа ко состанокија хем ко Хемсворт сине кердо јекх тикно собрание. Несаво време пало адава, ко амаро кхер авена сине те совен зонска слуге (акана тане пенџарде сар покраинска надгледникија). Исто аѓаар, канинаја сине ко ручко пионерен таро јавера собранија. Акала пхраља хем пхења бут шукар влијајнѓе упри манде.

Ко адава време амари фамилија почминѓа те керел хем те бикинел мебел. Ама, мо дад вакерѓа ме пхралеске: „Ако мангеа те ове пионери, ка чхинава акале буќаја“. Мо пхрал сложинѓа пе, хем кеда сине ле 21 берш гело песке кхерал те шај те служинел сар пионери. Пало дуј берш, кеда пхерѓум 16 берш, ме да уљум пионерка. Ко викендија џава сине ки служба јаверенцар, ама о јавера диве повише џава сине коркори. Ки служба користинава сине грамофони хем картичка сведочибаске, адаја сине јекх картичка колате со сине пишими јекх кратко хем едноставно библиско порака. О Јехова денѓа ман берекети аѓаар со почминѓум те проучинав јекхе манушњаја која со напредујнела сине бут шукар хем крстинѓа пе. Сар накхела сине о време, бут џене тари лакири фамилија прифатинѓе о чачипе. Јекх берш пало адава, почминѓум те служинав сар специјално пионери заедно јекхе пхењаја, и Мери Хеншал. Бичхалѓе амен те служина ко подрачје со на сине обработимо ки област Чешир.

Џикоте трајнела сине и Дујто светско војна, о џувља ваљани сине те керен бути колаја со ка поддржинен и војна. Таро јавера верска проповедникија на родела пе сине те џан ки војна, адалеске  мислинѓем кај адава ка важинел аменге да сар специјална пионерија. Ама о судо на сложинѓа пе адалеа, адалеске сиум сине осудими те овав ко затвор 31 диве. Јекх берш пало адава, кеда пхерѓум 19 берш, ваљани сине дуј пути те џав ко судо соске ми совест на мукхела ман сине те поддржинав и војна. Ама, солдуј пути ослободинѓе ман. Са адава време, џанава сине кај о свети дух поможинела манге хем кај о Јехова керела ман сине те овав зорали (Иса. 41:10, 13).

Ме хем о Артур Метјуз запознајнѓем амен 1946 берш. О Артур само со накхља трин масек ко затвор соске одбинѓа те џал ки војска. Само со иклило таро затвор, ов гело ко Хемсворт пле пхралесте кова со служинела сине сар специјално пионери. Ленгоро дад сикавела лен сине башо Јехова панда таро тикнипе, хем ола крстинѓе пе кеда сине тинејџерија. Кратко време пало адава, о Дениси сине бичхалдо те служинел ки Ирска. Адалеске о Артур ачхило бизо партнери службаке. Мле родителија сине бут воодушевиме таро адава сар понашинела пе сине о Артур. Адалеске викинѓе ле те живинел ленцар. Кеда џава сине кхере ко мле родителија, бут пути пало хајбе ме хем о Артур тховаја сине заедно о чаре. Пало несаво време, почминѓем те пишина јекх јекхеске. Ко 1948 берш, о Артур ваљани сине палем те џал ко затвор трин масек. Лелем амен јануари 1949 берш, хем амари цел сине те ачхова ки полновремено служба кобор со шај повише време. Бут пазинаја сине сар трошинаја о паре хем користинаја сине амаро одмор те кхеда овошје хем аѓаар те овел амен паре те шај те продолжина е пионерско службаја. О Јехова поможинѓа амен, адалеске шај сине те продолжина е пионерско службаја.

Пало јекх берш хем нешто, сием сине бичхалде те служина ки Северно Ирска, прво ко Армаг а пало адава ко Њури, дизја коте со повише џене тане католикија. Ко адала тхана е манушен сине лен баре предрасуде башо јавера религие, адалеске ваљани сине бут те пазина џикоте проповединаја сине е манушенге. Икераја сине состанокија ко кхер јекхе пхраленгоро кова со сине 16 километрија дур таро тхан коте со живинаја. Отприлика офто џене авена сине ко состанокија. Понекогаш ачховаја сине адари те сова теле ко поди хем сабајле ка ха сине заедно сабалуко. Бут радујнава ман со ко адава тхан акана иси бут Сведокија.

Мо пхрал хем лескири ромни, и Лоти, служинена сине сар специјална пионерија ки Северно Ирска хем ко 1952 берш соштар гелем ко областно конгрес ко Белфаст. Јекх пхрал приминѓа амен пле кхересте, хем соштар амен сием сине ко адава кхер заедно е пхралеа Прајс Хјуз, кова со служинела сине сар слуга е подружницакоро ки Британија. Јекх рат кераја сине лафи баши неви брошура Е Девлескоро друмо тано мангипе, која со сине керди посебно е манушенге со живинена ки Ирска. О пхрал Хјуз објаснинѓа аменге кај тано пхаро те проповединел пе е манушенге сој католикија ки Република Ирска. О пхраља ваљани сине те нашен таро тхана коте со живинена сине, хем о свештеникија чхивена сине е манушен те нападинен е пхрален. Ов вакерѓа: „Ваљани аменге брачна парија врдаја кола со ка џан ки јекх посебно акција те дел пе и брошура ки цело пхув“. * (Дикх и фуснота.) Тегани амен вакерѓем: „Ка кера адава!“

 Јекх тхан коте со о пионерија секогаш шај сине те џан ко Даблин сине о кхер јекхе пхењакоро, „и дај“ Рутланд, верно пхен која со бут берша служинѓа е Јеховаске. * (Дикх и фуснота.) Амен да гелем лате несаво време хем бикинѓем несаве буќа со сине амен. Тегани, ме, о Артур, мо пхрал хем лескири ромни лелем ме пхралескоро мотори со сине ле панда јекх седиште ки страна хем гелем те кина врда. Аракхлем јекх со сине ки шукар состојба, хем пучлем е мануше дали ка шај те анел ле аменге соске нијекх амендар на џанела сине те возинел. О Артур цело палоручко бешела сине ко кревети хем вежбинела сине сар менинена пе брзине ко врда. О јавер диве, кеда пробинела сине те икалел о врда тари гаража, али јекх мисионерка со викинела пе Милдред Вилет (ој пало адава леља пе е пхралеа Џон Бар). Ој џанела сине те возинел! Поможинѓа аменге те вежбина те возина, хем пало адава сием сине спремна те џа.

Пало адава ваљани сине те аракха тхан коте со ка живина. О пхраља вакерѓе аменге те на живина ки камп-приколка соске о противникија шај те тхарен ла. Адалеске родаја сине кхер, ама нашти аракхлем. Адаја рат соштар џене совѓем ко врда. О тајсутно диве аракхлем само јекх рачно керди камп-приколка јекхе креветеа ко спрати. Акаја приколка ули аменге кхер. Паркиринаја ла сине ко имот несаве земјоделцонгоро кола со сине шукар аменцар. Проповединаја сине ко тхана со сине 16 џи ко 24 километре дур тари приколка. Откеда ка џа сине те проповедина ко јавер тхан, ка ирана амен сине те проповедина е манушенге коте со англедер паркиринѓем и приколка.

Посетинѓем са о кхера ко југоисточно дело тари Република Ирска бизо несаво побаро противибе. Денѓем повише таро 20.000 брошуре хем бичхалѓем о анава е манушенгере со интересинѓе пе ки подружница ки Британија. Чаче тано баро берекети со ко адава дело тари Ирска акана иси бут Сведокија!

Некобор берша пало адава, сием сине бичхалде те служина ко јужно Лондон. Пало некобор курке, о пхраља тари подружница ки Британија јавинѓе пе ко Артур хем пучле ле дали шај таро тајсутно диве те почминел те служинел сар покраинско надгледнико! Јекх курко добинѓем обука хем пало адава гелем ки амари покраина ки Шкотска, адалеске е Артуре на сине ле бут време те спреминел пле говорија. Ама, ов сине спремно те керел секоја задача ки служба е Јеховаске, бизи разлика кобор сине пхари. Лескоро пример бут охрабринела ман сине. Уживинаја сине ки адаја служба. Англедер, некобор берша служинаја сине ко подрачје со на сине обработимо, адалеске сине аменге баро берекети со ки покраинско служба шај сине те ова заедно буте пхраленцар хем пхењенцар.

Ко 1962 берш, о Артур сине канимо те џал ки Школа Гилеад која со трајнела сине деш масек. Ме нашти сине те џав леа соске на сиум сине каними. Адалеске ваљани сине шукар те размислина сави одлука ка ана. Одлучинѓем кај ка овел шукар о Артур те прифатинел и покана. Ко адава периоди нане те овел ман сине партнери службаке, адалеске и подружница иранѓа ман ко Хемсворт те служинав сар специјално пионери. Кеда о Артур иранѓа пе пало јекх берш, добинѓа задача те служинел сар областно надгледнико. Амаро подрачје  сине и Шкотска, и северно Англија хем и Северно Ирска.

Ко 1964 берш, о Артур добинѓа неви задача те служинел сар слуга е подружницакоро ки Република Ирска. Ко почеток, сиум сине загрижими со ка џав ко Бетел соске чаче уживинава сине ки патувачко служба. Акана сиум бут благодарно баши чест те служинав ко Бетел. Уверими сиум кај ако прифатинаја несави задача која со на свиџинела пе аменге, о Јехова ка наградинел амен. Ко Бетел керава сине бути ки канцеларија, пакујнава сине литература, керава сине хајбаске хем чистинава сине. Исто аѓаар, о Артур понекогаш служинела сине сар областно надгледнико ко покраинска конгресија хем аѓаар сине амен прилика те запознајна амен пхраленцар тари цело Ирска. Акаја служба хем адава со шај сине те дикха сар напредујнена о мануша коленцар со проучинаја сине и Библија, поможинѓа амен те ова бут паше амаре пхраленцар хем пхењенцар. Адава тано чаче баро берекети!

О прво меѓународно конгрес ки Ирска икерѓа пе ко Даблин ко 1965 берш. * (Дикх и фуснота.) Иако сине баро противибе, о конгрес сине бут успешно. Сине присутна 3.948 џене, хем 65 џене крстинѓе пе. Сине 3.500 делегатија таро јавера пхувја кола со совѓе ко кхера е манушенгере таро Даблин. Секој таро домакинија добинѓе благодарно писмо тари подружница. А о домакинија фалинѓе е пхрален башо ленгоро шукар понашибе. Акава настан позитивно влијајнѓа ко проповедибе ки Ирска.

Ко 1966 берш, и подружница ко Даблин почминѓа те надглединел о дело ко северно хем јужно дело тари Ирска. Акава јекхипе сине бут појавер таро адава со случинела пе сине ки Ирска, соске е манушен делинела лен сине и политика хем и религија. Сием сине бут бахтале со дикхаја сине кај бут католикија прифатинена сине о чачипе хем служинена е Јеховаске заедно пле пхраленцар кола со англедер сине протестантија.

Ко 2011 берш, амаре животија целосно менинѓе пе кеда сием сине бичхалде те служина ко Бетел ко Лондон соске сине спојме о подружнице тари Британија хем Ирска. Ко адава време сиум сине загрижими башо састипе е Артурескоро. О докторија вакерѓе кај иси ле Паркинсоново насвалипе. Ко 20 мај 2015 берш, пало 66 берш брако, мло брачно партнери муло.

Ко последна некобор берша, осетинава бари дукх хем жал. О Артур сине секогаш узи манде. Бут фалинела манге! Ама, кеда накхеа таро асавке ситуацие, овеа панда попаше е Јеховаја. Бут сиум бахтали кеда дикхава кај о јавера мангена сине е Артуре. Добинѓум писмија таро пхраља хем пхења тари Ирска, тари Британија, чак тари Америка. О писмија хем адава со охрабринѓе ман мо деверо о Дениси, лескири ромни и Мавис, хем мле унуке и Рут хем и Џуди, поможинела манге повише него со шај те вакерав лафенцар.

Јекх стихо кова со бут охрабринѓа ман тано Исаија 30:18. Адари пишинела: „О Јехова стрпливо аџикерела те сикавел туменге милост хем адалеске ов ка уштел те сикавел туменге милост. Соске, о Јехова тано Девел со дела правда. Бахтале тане сарине со аџикерена ле“. Бут дела ман утеха адава со џанава кај о Јехова стрпливо аџикерела те решинел са амаре проблемија хем те дел амен интересна задаче ко нево свето.

Кеда размислинава башо време со накхља, хаљовава сар о Јехова водинела сине хем дела сине берекети ко проповедибе ки Ирска! Манге тани бари чест со сиум сине јекх таро бут пхраља хем пхења со поможинѓе ко акава дело. Уверими сиум кај о Јехова секогаш ка дел берекети кеда кераја адава со родела амендар.