1. Кова тано о најбаро мангипе хем сар ка објаснине ле? (Дикх и слика ко почеток тари статија.)

ТАРО Јехова авела о мангипе (1. Јов. 4:7). О најбаро мангипе темелинела пе ко праведна начелија. Ки Библија, башо асавко мангипе користинела пе о грчко лафи агапе. Ко акава мангипе шај те овел наклоност хем амаликане чувствија некаске, ама исто аѓаар тане вклучиме јавера да буќа, а на само чувствија. Сикаваја асавко мангипе кеда постапинаја несебично те шај те кера шукарипе е јаверенге. Асавко мангипе анела аменге бахталипе хем смисла ко живото.

2, 3. Сар о Јехова сикавѓа несебично мангипе е манушенге?

² О Јехова сикавѓа мангипе е манушенге панда англедер те створинел е Адаме хем е Ева. Ов керѓа и Пхув сар јекх кхер коте со иси са со ваљани аменге те шај те преживина хем те уживина ко живото. О Јехова на керѓа акава песке него аменге. Откеда амаро кхер сине спремно живибаске, ов створинѓа е  манушен хем денѓа ленге прилика те живинен вечно ко рај ки Пхув.

³ Пало несаво време, о Јехова несебично сикавѓа пло најбаро мангипе е манушенге. Иако о Адам хем и Ева бунинѓе пе против о Јехова, ов сине добором сигурно кај несаве таро ленгере чхаве ка манген ле, адалеске ов денѓа и откупно жртва пле Чхавескири те шај те спасинел лен (1. Мој. 3:15; 1. Јов. 4:10). Панда таро моменти кеда вакерѓа о пророштво башо Месија, англо е Јеховаскере јакхја сар те пхене и откупнина веќе сине денди. Околу 4.000 берша пало адава, о Јехова денѓа пле единствено бијаме Чхаве сар жртва е манушенге (Јован 3:16). Бут сием благодарна со о Јехова сикавѓа асавко мангипе.

4. Котар џанаја кај о мануша шај те сикавен несебично мангипе иако нане совршена?

⁴ Шај ли амен да те сикава несебично мангипе иако на сием совршена? Оја шај. О Јехова керѓа амен спрема пло лико, адава значинела кај иси амен способност те постапина сар лесте. Нане аменге секогаш локхо те сикава несебично мангипе, ама шај те кера адава. О Авел сикавѓа кај мангела е Девле несебично кеда денѓа жртва о најшукар со сине ле (1. Мој. 4:3, 4). О Ное сикавѓа несебично мангипе аѓаар со бершенцар проповединела сине иако о мануша на шунена ле сине (2. Пет. 2:5). О Авраам сикавѓа кај мангела е Девле највише таро са адалеа со сине спремно те дел жртва пле мангле чхаве е Исако (Јак. 2:21). Слично сар акала верна слуге е Девлескере амен да мангаја те сикава мангипе чак кеда адава нане локхо.

5. Сар шај те сикава искрено мангипе?

⁵ И Библија вакерела кај сикаваја искрено мангипе кеда мангаја амен на „само лафенцар хем мујеа, него искрено е буќенцар со кераја лен“ (1. Јов. 3:18). Дали акава значинела кај на ваљани те сикава мангипе лафенцар? На. (1. Сол. 4:18). Акава значинела кај нане секогаш доволно само те вакера: „Мангава тут“. Ваљани те сикава кај чаче мислинаја адава. На пример, ако амаре пхрален или пхењен нане лен доволно хајбаске или урајбаске, ваљани ленге повише него само некобор шукар лафија (Јак. 2:15, 16). Слично, адалеске со мангаја е Јехова хем е манушен, на само со молинаја амен те овен повише мануша со ка проповединен него амен да ревно проповединаја о шукар хабери (Мат. 9:38).

6, 7. а) Со значинела амаро мангипе те на овел лицемерно? б) Кола тане несаве примерија башо ховавно мангипе?

⁶ О апостол Јован вакерѓа кај мора те манга амен „искрено е буќенцар со кераја лен“. Спрема акава, амаро мангипе на ваљани те  овел лицемерно (Рим. 12:9; 2. Кор. 6:6). Понекогаш некој шај те керел пе кај сикавела мангипе. Ама, дали лескоро мангипе тано чачутно хем искрено? Саве тане лескере мотивија? Ако некој тано лицемерно, нане ле мангипе. Лескоро мангипе тано ховавно хем на врединела ништо.

⁷ Те дикха несаве примерија башо ховавно мангипе. Кеда о Сатана керѓа лафи е Еваја ки рајско градина, шај дикхјола сине кај мислинела лаке о најшукар. Ама, лескере постапке сикавѓе кај на сине аѓаар (1. Мој. 3:4, 5). Кеда о Давид сине цари, сине ле амал со викинела пе сине Ахитофел. Ов издајнѓа е Давиде баши пли корист. Адалеа сикавѓа кај нане леске чачутно амал (2. Сам. 15:31). Авдиве, о отпадникија хем о јавера со керена поделбе ко собрание вакерена привлечна лафија те шај те ховавен е јаверен (Рим. 16:17, 18). Ола шај керена те дикхјол кај грижинена пе е јаверенге, ама адава нане чаче соске ола тане себична.

8. Сој тано шукар те пуча амен?

⁸ О лицемерно мангипе тано бут лошно соске користинела пе те ховавен пе о мануша. Амен шај те ховава е манушен, ама нашти ховаваја е Јехова. О Исус вакерѓа кај о лицемерна мануша ка овен најстрого казниме (Мат. 24:51). Адалеске со сием е Јеховаскере слуге, никогаш на мангаја те ова лицемерна. Шукар тано те пуча амен: „Дали мло мангипе тано секогаш искрено, или сиум себично хем на сиум поштено?“ Те дикха ења начинија сар шај те сикава мангипе со нане лицемерно.

9. Со охрабринела амен о искрено мангипе те кера?

⁹ Ов спремно те служине чак кеда никој на дикхела о буќа со кереа лен. Ваљани те ова спремна те кера шукар буќа е јаверенге чак кеда никој нане те џанел башо адава. (Читин Матеј 6:1-4.) О Ананија хем и Сапфира сине лен јавер стави кеда денѓе доброволно прилог. Ола мангле о јавера те џанен кај денѓе доброволно прилог, ховавѓе кобор паре денѓе хем адалеске сине казниме башо ленгоро лицемерство (Дела 5:1-10). Ама, ако чаче мангаја амаре пхрален, ка ова спремна те кера шукар буќа ленге бизо те манга о јавера те џанен башо адава. Шај те сикљова таро пхраља со поможинена е Водечко тело те спреминел и духовно храна. Ола на мангена те привлечинен внимание ки песте хем на вакерена е јаверенге ко кола проектија керѓе бути.

10. Сар шај те сикава кај поштујнаја е јаверен?

 ¹⁰ Поштујн е јаверен. (Читин Римјаните 12:10.) О Исус сикавѓа кај поштујнела е апостолен адалеа со тховѓа ленгере пре (Јован 13:3-5, 12-15). Ваљани бут те трудина амен те ова понизна сар о Исус хем те служина е јаверенге. О апостолија целосно халиле со керѓа о Исус чак кеда добинѓе о свети дух (Јован 13:7). Сикаваја кај поштујнаја е јаверен аѓаар со на мислинаја кај сием пошукар лендар адалеске со иси амен побари школа, сием побарвале хем иси амен повише одговорностија (Рим. 12:3). На сием љубоморна кеда фалинена е јаверен, него радујнаја амен ленцар чак кеда мислинаја кај амен да заслужинаја те фалинен амен баши адаја бути.

11. Соске ваљани искрено те фалина е јаверен?

¹¹ Искрено фалин е јаверен. Роде прилике те фалине е јаверен. Сарине џанаја кај адава „изградинела“ (Еф. 4:29). Ама, ваљани те фалина лен искрено, а на само те вакера нешто со ка керел ленгоро ќефи. На ваљани те вакера нешто со на мислинаја или те избегина те да совет кеда ваљани (Изр. 29:5). Лицемерно тано те фалина е јаверен, а пало адава те критикујна лен пало ленгоро думо. О апостол Павле сикавела сине искрено мангипе. Кеда пишинѓа е христијаненге таро Коринт, ов фалинѓа лен башо шукар буќа со керена сине (1. Кор. 11:2). Ама, кеда ваљани сине те дел ленге совет, ов љубезно хем јасно објаснинѓа ленге и причина (1. Кор. 11:20-22).

12. Сар шај те сикава искрено мангипе кеда сием гостопримлива?

¹² Ов гостопримливо. О Јехова денѓа аменге заповед те ова дарежлива амаре пхраленцар хем пхењенцар. (Читин 1. Јованово 3:17.) Ама, ваљани те овел амен исправна мотивија кеда сием гостопримлива. Шај те пуча амен: „Дали канинава ко гостија само мле паше амален или околен со дикхава лен сар важна ко собрание? Дали канинава само околен со мислинава кај шај те добинав лендар нешто? Сиум ли дарежливо е пхраленцар хем е пхењенцар со на пенџарава лен шукар хем колендар со нашти те добинав нешто?“ (Лука 14:12-14). Замислин туке акала ситуацие: Со ако јекхе пхралеске ваљани помош адалеске со анѓа несави одлука со нане мудро? Или, со ако некој касте со канинѓем ле ко гостија никогаш на  заблагодаринѓа пе аменге? О Јехова вакерела аменге: „Овен гостопримлива јекх јекхеа бизо те бунинен тумен“ (1. Пет. 4:9). Ако даја е јаверенге таро исправно мотиви, тегани ка ова бахтале (Дела 20:35).

13. а) Кеда ка ваљани те ова повише стрплива? б) Сар шај те поможина околенге сој тане духовно слаба?

¹³ Поможин околенге сој тане духовно слаба. И заповед тари Библија те поможина околенге сој тане слаба хем те ова сариненцар стрплива шај те испитинел дали амаро мангипе тано искрено (1. Сол. 5:14). Бут пхраља со сине духовно слаба, пало несаво време ленгири вера ули силно. Ама е јаверенге понадари да ваљани амари стрпливост хем амари помош. Сар шај те поможина асавкенге? Шај те користина и Библија те охрабрина лен, шај заедно те џа ки служба или шај само те шуна лен. Исто аѓаар, на ваљани те делина е пхрален хем е пхењен сар „јака“ хем „слаба“. Наместо адава, ваљани те признајна кај саринен иси амен јака хем слаба стране. Чак о апостол Павле признајнѓа кај иси ле слабостија (2. Кор. 12:9, 10). Секаске ваљани помош хем охрабрување.

14. Со ваљани те кера те шај те ова ко мир амаре пхраленцар?

¹⁴ Ов ко мир е јаверенцар. О мир амаре пхраленцар тано бут скапоцено. Чак кеда мислинаја кај некој погрешно халило амен или кај постапинѓа неправедно аменцар, ваљани те кера са со шај те ова ко мир. (Читин Римјаните 12:17, 18.) Ако поврединѓем некас, ваљани те извинина амен. Ама, ваљани те ова искрена. На пример, наместо те вакера: „Жал манге со осетинеа тут аѓаар“, пошукар ка овел те признајна амари грешка аѓаар со ка вакера:  „Жал манге со поврединѓум тут ме лафенцар“. Ко брако тано бут важно те овел амен мир. О ром хем и ромни на ваљани англо јавера те керен пе кај бут мангена пе, а кеда тане коркори те на керен лафи машкар песте, те поврединен пе, чак те овен насилна.

15. Сар шај те сикава кај искрено простинаја?

¹⁵ Спремно простин. Ако некој вреџинѓа амен, простинаја леске хем на икераја холи. Акава ваљани те кера чак ако ов нане свесно кај вреџинѓа амен. Спремно простинаја аѓаар со мангипаја трпинаја амен јекх јекхеа хем искрено трудинаја амен те икера о јекхипе ко духо, ко мир кова со поврзинела амен (Еф. 4:2, 3). Те шај искрено те простина некаске, мора те чхинава те размислина башо адава со керѓа аменге. О мангипе на „памтинела о лошнипе“ (1. Кор. 13:4, 5). Ако икераја холи, шај те румина амаро амалипе е пхралеа или е пхењаја, а исто аѓаар е Јехова (Мат. 6:14, 15). Сикаваја кај искрено простинѓем околеске со вреџинѓа амен кеда молинаја амен баши леске (Лука 6:27, 28).

16. Сар ваљани те дикха ко задаче со добинаја лен ки служба башо Јехова?

¹⁶ Кер жртве башо јавера. Кеда ка добина несави задача ки служба башо Јехова, ка сикава кај амаро мангипе тано искрено аѓаар со нане те рода „амари корист, него и корист е јаверескири“ (1. Кор. 10:24). На пример, ко амаре конгресија, о редарија кхувена ко објекти англедер те авен о јавера. Адава шај те чхивел лен ко искушение те астарен о најшукар тхана песке хем пумаре фамилијаке. Наместо адава, бут џене лендар биринена те бешен ко тхана кола со на свиџинена пе ленге добором бут ко дело коте со служинена сар редарија. Адалеа, сикавена мангипе со нане себично. Сар шај те џа пало ленгоро шукар пример?

17. Ако некој керела сериозно грево, ко со ка поттикнинел ле о искрено мангипе?

¹⁷ Признајн о гаравде гревија хем чхинав те кере лен. Несаве слуге е Девлескере керѓе сериозно грево хем пробинѓе те гаравен ле. Ола керена адава соске шај лаџана или на мангена те разочаринен е јаверен (Изр. 28:13). Ама, адалеа на сикавена мангипе соске керена штета песке хем е јаверенге. Сар? О Јехова шај те чхинавел те дел пло свети дух ко собрание хем аѓаар нане те овел мир ки лесте (Еф. 4:30). Ако некој керела сериозно грево, о искрено мангипе ка поттикнинел ле те керел лафи е старешиненцар хем те родел и помош со ваљани леске (Јак. 5:14, 15).

18. Кобор тано важно те сикава искрено мангипе?

¹⁸ О мангипе тано и најбари особина (1. Кор. 13:13). Ој поможинела е манушенге те дикхен кој тане о чачутне следбеникија е Исусескере хем те дикхен кој трудинена пе те постапинен сар о Јехова, кастар со авела о мангипе (Еф. 5:1, 2). О Павле вакерѓа кај ако нане ле мангипе, нане те врединел ништо (1. Кор. 13:2). Адалеске, те сикава амаро искрено мангипе на само лафенцар, него е буќенцар со кераја лен.