1, 2. а) Сар влијајнена упри аменде о промене со на аџикераја лен? (Дикх и слика ко почеток тари статија.) б) Спрема о Псалм 131, со шај те поможинел аменге те овел амен андруно мир?

ОТКЕДА о Лојд хем и Александра служинѓе повише таро 25 берш ко Бетел, ола добинѓе неви задача те служинен сар пионерија. Ко почеток ола сине тажна. О Лојд вакерела: „И бетелско служба ули дело мандар. Иако хаљовава сине о причине баши промена, ама ко курке хем масекија пало адава бут пути боринава ман сине негативна чувствонцар. Мле емоцие менинена пе сине сигате — јекх моменти сиум сине позитивно, а јавер моменти осетинава ман сине разочаримо“.

² Понекогаш ко амаро живото шај те овен амен промене со на аџикерѓем лен, а адава шај те керел те ова бут секириме хем те овел амен стрес (Изр. 12:25). Со ка поможинел аменге те ачхова смириме кеда аменге пхаро те прифатина о промене? (Читин Псалм 131:1-3.) Те дикха  сар несаве Девлескере слуге таро пурано време хем авдиве успејнѓе те овел лен андруно мир кеда ленгоро живото менинѓа пе таро јекх пути.

3. Сар менинѓа пе е Јосифескоро живото таро јекх пути?

³ Размислин башо Јосиф. Таро са е Јаковескере чхаве, ов сине леске најмангло. Адалеске, лескере пхраља сине бут љубоморна. Кеда е Јосифе сине ле 17 берш, ола бикинѓе ле сар робо (1. Мој. 37:2-4, 23-28). Околу 13 берш о Јосиф мучинела пе сине ко Египет, прво сар робо, а пало адава сар затворенико. О Јосиф сине дур таро пло дад, о Јаков, касте со бут мангела сине. Со поможинѓа леске те на нашавел пли надеж хем те на овел хољамо?

4. а) Со керѓа о Јосиф кеда сине ко затвор? б) Сар одговоринѓа о Јехова ко молитве е Јосифескере?

⁴ Џикоте сине ко затвор, о Јосиф сигурно размислинела сине башо адава сар о Јехова поможинѓа леске (1. Мој. 39:21; Пс. 105:17-19). Шај размислинела сине хем башо пророчка суне со сине ле џикоте сине потерно. Акава уверинѓа ле кај о Јехова тано леа (1. Мој. 37:5-11). Ов веројатно бут пути пхравела сине пло вило е Јеховаске ки молитва (Пс. 145:18). О Јехова одговоринѓа леске ко молитве аѓаар со уверинѓа ле кај ка овел леа бизи разлика со ка случинел пе (Дела 7:9, 10). * (Дикх и фуснота.)

5. Сар шај „о мир таро Девел“ те влијајнел упри аменде?

⁵ Бизи разлика ки кобор пхари ситуација аракхљоваја, амен да шај те овел амен „о мир таро Девел“ кова со ка аракхел амари годи хем ка керел те ова смириме. (Читин Филипјаните 4:6, 7.) Адалеске, кеда сием секириме или иси амен стрес, „о мир таро Девел“ ка дел амен сила понадари да те служина леске хем те на откажина амен. Те дикха несаве примерија таро амаре пхраља хем пхења кола со доживинѓе акава.

6, 7. Сар шај о молитве те поможинен аменге палем те овел амен андруно мир? Вакер пример.

⁶ Кеда о Рајан хем и Џулиет шунѓе кај нане више те служинен сар привремена специјална пионерија, бут обесхрабринѓе пе. О Рајан вакерела: „Одма молинѓем амен е Јеховаске. Џанаја сине кај акана тано о време кеда ваљани те сикава доверба ки лесте. Ко амаро собрание сине бут неве објавителија хем адалеске молинаја амен сине те сикава вера хем те ова шукар пример“.

⁷ Сар о Јехова одговоринѓа ки ленгири молитва? О Рајан вакерела: „Одма пали молитва, о негативна чувствија хем о гриже нашавдиле. Е Девлескоро мир аракхља амаре виле хем амари годи. Халилем кај о Јехова понадари да шај те користинел амен само ако иси амен исправно стави“.

8-10. а) Сар шај те поможинел аменге е Девлескоро духо кеда иси амен муке хем проблемија? б) Сар шај о Јехова те поможинел аменге ако чхиваја о духовна буќа ко прво тхан?

⁸ Е Девлескоро духо шај те смиринел амен хем исто аѓаар шај те водинел  амен ко несаве библиска стихија кола со ка поможинен аменге те на бистра сој тано чаче најважно ко живото. (Читин Јован 14:26, 27.) Размислин башо Филип хем и Мери, брачно пари кова со служинела сине ко Бетел скоро 25 берш. Штаре масеконге муле е солдујенгере даја, а е Филипестар муло панда јекх џено тари лескири фамилија, исто аѓаар мора сине те грижинен пе е Мерискере дадеске коле со сине ле деменција.

⁹ О Филип вакерела: „Мислинава сине кај шукар икљовава ко крајо е ситуацијаја, ама нешто фалинела сине. Тегани ки јекх статија проучибаске тари Стражарско кула дикхљум о стихо таро Колошаните 1:11. Сиум сине истрајно, ама на ки целосно смисла е лафескири. Мора сине целосно те истрајнав стрпливо хем бахтало. Акава стихо сетинкерела ман кај мло бахталипе на зависинела таро мле околностија, него таро адава кобор мукхава е Девлескоро духо те влијајнел ко мло живото“.

¹⁰ Адалеске со о Филип хем и Мери чхивѓе о духовна буќа ко прво тхан, о Јехова денѓа лен берекети ко бут начинија. Кратко време откеда иклиле таро Бетел, о солдуј џене почминѓе те проучинен и Библија интересентенцар со шукар напредујнена сине хем кола со мангле те проучинен повише пути ко курко. И Мери вакерела: „Ола керена сине те осетина амен бахтале. Преку ленде о Јехова сар те пхене мангела сине те вакерел аменге кај са ка овел шукар“.

11, 12. а) Сар о Јосиф денѓа прилика е Јеховаске те дел ле берекети? б) Сар наградинѓа о Јехова е Јосифе?

¹¹ Кеда ка менинел пе о живото таро јекх пути, шај те ова добором бут секириме со ка мислина само ко амаре проблемија. Акава шај сине те случинел пе е Јосифеске да. Ама, наместо адава, ов одлучинѓа те керел са со шај ко пле околностија хем аѓаар те дел прилика е Јеховаске те дел ле берекети. О Јосиф денѓа пестар са те шај шукар те керел секоја задача со добинела ла сине таро затворско чувари, исто сар со керела сине пли бути ко Петефри (1. Мој. 39:21-23).

¹² Јекх диве, о Јосиф добинѓа задача те грижинел пе дује затворениконге кола со англедер служинена сине ки палата е фараонескири. Адалеске со о Јосиф сине ленцар шукар, о солдуј џене осетинена пе сине слободна те вакерен леске со мучинела лен. Ола вакерѓе леске о чудна суне со сине лен и  рат англедер (1. Мој. 40:5-8). Ко адава моменти о Јосиф на џанела сине кај акава разговор ка керел ов те овел ослободимо. Дуј берш пало адава, ов сине мукхло таро затвор хем уло моќно владетели — дујто мануш ко Египет, одма пало фараони! (1. Мој. 41:1, 14-16, 39-41).

13. Сар шај те да прилика е Јеховаске те дел амен берекети бизи разлика саве тане амаре околностија?

¹³ Слично сар о Јосиф, амен да шај те аракхљова ки ситуација упри која со нане амен нисави контрола. Ама, ако сием стрплива хем кераја са со шај ки адаја ситуација, ка да е Јеховаске прилика те дел амен берекети (Пс. 37:5). Шај понекогаш сием буниме хем секириме, ама никогаш нане те ова бизи надеж (2. Кор. 4:8). О Јехова ка овел аменцар, посебно ако трудинаја амен и служба те ачховел аменге ко прво тхан.

14-16. Сар о проповеднико о Филип чхивѓа и служба ко прво тхан иако менинѓе пе лескере околностија?

¹⁴ О проповеднико о Филип тано бут шукар пример адалеске со и служба ачхили леске ко прво тхан бизи разлика саве промене сине ле ко живото. Ов уживинела сине ки пли неви задача ко Ерусалим (Дела 6:1-6). Ама, таро јекх пути, са менинѓа пе. Откеда о Стефан сине мудардо, почминѓа сурово прогонство против о христијања хем адалеске ола нашле таро Ерусалим. О Филип мангела сине те ачховел зафатимо ки служба башо Јехова, адалеске гело ки Самарија, коте со о мануша ваљани сине те шунен о шукар хабери (Мат. 10:5; Дела 8:1, 5).

¹⁵ О Филип сине спремно те џал сегде кај со водинѓа ле е Девлескоро духо. Адалеске о Јехова шај сине те користинел ле те проповединел ко тхана коте со о мануша панда на шунѓе о шукар хабери. Е Филипе на сине ле предрасуде, а адава бут значинела сине е Самарјаненге соске бут Евреија дикхена сине ки ленде сар потеле хем понашинена пе сине ленцар лошно. Адалеске на изненадинела амен со сарине шунена ле сине (Дела 8:6-8).

¹⁶ Пало адава, е Девлескоро духо ингарѓа е Филипе ко Азот хем ки Цезареја, дуј дизја ко кола со сине бут мануша со на сине Евреија (Дела 8:39, 40). Тегани лескоро живото палем менинѓа пе. Уло ле фамилија хем понадари да живинела сине ко подрачје коте со ало те проповединел. Ама, иако о околностија лескере менинѓе пе, ов понадари да чхивела сине и служба ко прво тхан, адалеске о Јехова денѓа  леске хем лескере фамилијаке баре берекетија (Дела 21:8, 9).

17, 18. Сар адава со ка ова концентририме ки служба ка поможинел аменге ако иси амен несаве промене ко живото?

¹⁷ Бут џене со служинена сар полновремена слуге вакерена кај адава со чхивена и служба ко прво тхан поможинела ленге те ачховен бахтале хем позитивна иако понекогаш ленгере околностија менинена пе. Кеда о Озборн хем и Полајт, брачно пари тари Јужноафриканско Република, иклиле таро Бетел, мислинѓе кај ка овел ленге локхо те аракхен тхан живибаске хем те аракхен бути похари саатенцар. О Озборн вакерела: „Жално тано адава со нашти сине те аракха бути добором сигате сар со мислинѓем“. И Полајт вакерела: „Трин масек на аракхлем бути, а на сине амен ништо ки страна. На сине ни хари локхо“.

¹⁸ Сар успејнѓе те икљовен ко крајо акале пхаре ситуацијаја? О Озборн вакерела: „Адава со проповединаја сине е пхраленцар таро собрание поможинѓа аменге те ачхова позитивна хем те концентририна амен ко адава сој најважно. Наместо само те беша хем те ова загрижиме, одлучинѓем те ова зафатиме ки служба хем адава керѓа амен бут бахтале. Понадари да родаја сине сегде бути хем ко крајо успејнѓем те аракха“.

19-21. а) Со ка поможинел аменге те аракха амаро андруно мир? б) Сави корист шај те овел амен ако прилагодинаја амен ко неве околностија?

¹⁹ Акала примерија јасно сикавена кај ако користинаја амаре околностија најшукар со шај хем ако иси амен доверба ко Јехова, ка аракха амаро андруно мир бизи разлика со ка овел. (Читин Михеј 7:7.) Сар со ка накхел о време, шај ка хаљова кај адалеа со прилагодинѓем амен ко неве околностија улем панда попаше е Јеховаја. И Полајт вакерела кај откеда иклили таро Бетел, халили со значинела те овел тут доверба ко Јехова чак кеда туке најпхаро.  Ој вакерела: „Мло амалипе леа уло панда позорало“.

²⁰ И Мери, кола со спомнинѓем ла англедер, панда грижинела пе башо пло дад хем служинела сар пионери. Ој вакерела: „Сиклиљум кај кеда сиум секирими, ваљани те ачховав, те молинав ман хем те опуштинав ман. Веројатно најважно нешто со сиклиљум тано те мукхав о буќа ко е Јеховаскере васта, а адава ка овел панда поважно ко време со авела“.

²¹ О Лојд хем и Александра, колен со спомнинѓем ко почеток тари статија, признајнена кај адава со менинѓе пе ленгере околностија испитинѓа ленгири вера ко начин со на аџикерѓе ле. Ама ола вакерена: „О испитија сикавена дали иси амен чачутни вера хем дали тани доволно зорали те шај те дел амен сила хем утеха ко пхаре времија. Ола поможинена аменге те ова пошукар мануша“.

22. Ко со шај те ова увериме ако кераја са со шај ки амари ситуација?

²² Ко акава свето, амаро живото шај сигате те менинел пе. Шај те добина јавер задача ки служба башо Јехова, шај те овен амен проблемија састипаја или неве фамилијарна одговорностија. Ама, бизи разлика со ка овел, ов уверимо кај о Јехова грижинела пе туке хем ка поможинел тут ко право време (Евр. 4:16; 1. Пет. 5:6, 7). Џи тегани, кер са со шај ки тли ситуација. Молин тут тле Дадеске, е Јеховаске, хем сикљов те овел тут целосно доверба ки лесте. Аѓаар, бизи разлика саве ка овен тле околностија, секогаш ка овел тут андруно мир кова со авела таро Јехова.