1, 2. а) Со сине најважно е Исусеске ко живото хем соске? б) Со ваљани те кера те шај те ова успешна „Девлескере соработникија“?

О ИСУС ХРИСТОС сине столари хем пало адава учители (Мар. 6:3; Јован 13:13). Ов совршено керела сине солдуј буќа. Сар столари сиклило сар те користинел о алатија те шај те керел корисна предметија таро каш. А сар учители, ов користинѓа адава со шукар пенџарела сине о света списија те шај те поможинел е обично народоске те хаљовел о чачипе таро е Девлескоро Лафи (Мат. 7:28; Лука 24:32, 45). Кеда е Исусе сине ле 30 берш, ов чхинавѓа те овел столари хем уло учители соске џанља кај адава тано најважно. Ов вакерѓа кај јекх таро причине соске о Девел бичхалѓа ле ки Пхув сине те проповединел о шукар хабери башо е Девлескоро Царство (Мат. 20:28; Лука 3:23; 4:43). Ов чхивѓа и служба башо Јехова ко прво тхан ко пло живото хем мангела сине о јавера да те керен адава (Мат. 9:35-38).

² Иако повише џене амендар нане столарија, сарине амен сикаваја е јаверен башо шукар хабери. Акаја задача тани добором важно со о Девел да тано вклучимо ки лате. Уствари, баши аменде вакерела пе кај сием „е Девлескере соработникија“ (1. Кор. 3:9; 2. Кор. 6:4). Сложинаја амен  е псалмистеа кова со вакерѓа е Јеховаске: „Цело тло лафи тано чачипе“ (Пс. 119:159, 160). Адалеске мангаја исправно те користина „о лафи е чачипаскоро“ ки служба. (Читин 2. Тимотеј 2:15.) Адалеске трудинаја амен пошукар те користина и Библија, соске ој тани амари најглавно публикација колаја со сикаваја е јаверен башо Јехова, башо Исус хем башо Царство. Ама, те шај те ова успешна ки амари служба, е Јеховаскири организација денѓа амен панда некобор главна публикацие кола со ваљани те џана шукар те користина лен.

3. Со ваљани те овел аменге најважно ко акава кратко време со ачхило хем сар о лафија таро Дела 13:48 ка поможинен аменге ко адава?

³ О главна публикацие службаке тане керде те шај те сикава е манушен. Кеда некој проповединела, објавинела о хабери. Ама, кеда сикавела, трудинела пе те објаснинел адава хабери те шај о мануш те хаљовел хем те овел поттикнимо те керел адава со сикљовела. Ко акава кратко време со ачхило, најважно бути мора те овел аменге те почмина библиска курсија е манушенцар хем те сикава лен башо чачипа. Акава значинела ревно те рода околен со исправно дикхена ко вечно живото хем те поможина ленге те служинен е Јеховаске. (Читин Дела 13:44-48.)

4. Сар шај те аракха околен со исправно дикхена ко вечно живото?

⁴ Сар шај те аракха околен со исправно дикхена ко вечно живото? Е христијаненге таро прво веко единствено начин те аракхен лен сине аѓаар со ка проповединен. О Исус вакерѓа пле учениконге: „Кеда ка кхувен ки несави диз или гав, роден околе сој тано достојно“ (Мат. 10:11). Амен да ваљани исто те кера. Џанѓола пе, окола со нане искрена, сој горда или на интересинела лен башо Девел, нане те манген те шунен башо шукар хабери. Амен родаја околен сој искрена, понизна хем околен со чаче мангена те џанен о чачипе. Акава шај те споредина ле адалеа со о Исус керела сине сар столари. Ов најангле ваљани сине те аракхел каш таро кова со шај сине те керел мебел, удара, јарем или нешто јавер. Откеда ка аракхел о исправно каш, шај сине те користинел пле алатија хем пле вештине те шај те керел о предмети со мангела сине. Амен да ваљани те постапина слично џикоте трудинаја амен те сикава е искрена манушен те овен ученикија (Мат. 28:19, 20).

5. Со ваљани те џана башо главна публикацие со користинаја лен ки служба? Вакер пример. (Дикх о слике ко почеток тари статија.)

⁵ Секова алати иси ле пли функција. На пример, размислин башо алатија со користинела лен сине о Исус. * (Дикх и фуснота.) Ваљани леске сине алатија те меринел хем те бележинел о греде, те чхинел, те керел дупке хем те обликујнел о каш, исто аѓаар ваљани сине леске алатија те рамнонел хем те спојнел о разна делија. Слично, секоја таро амаре главна публикацие службаке иси ла пли цел. Те дикха сар шај те користина акала важна публикацие.

6, 7. а) Сар користинеа о визит-картичке? б) Соске користинаја о покане башо состанокија?

⁶ Визит-картичке. Иако тане тикне, ола тане бут делотворна, соске поможинена е манушенге те џанен кој сием  хем ингарена лен ки jw.org. Кеда некој ка пхравел амари интернет-страница, шај те џанел нешто повише баши аменге хем чак те родел библиско курси. Џи акана преку амари интернет-страница повише таро 400.000 мануша родинѓе те проучинен и Библија хем бут џене секова диве понадари да родена! Шукар тано те пхираве туја некобор визит-картичке те шај те користине лен кеда ка овел тут прилика те кере некасаја лафи ко теко е дивескоро.

⁷ Покане. Ки покана башо амаре состанокија пишинела: „Канинаја ту те сикљове тари Библија е Јеховаскере сведоконцар“. Пало адава, денде тане дуј начинија сар шај те керел пе адава — „ко амаре состанокија“ или „некој те сикавел ту“. Аѓаар, преку и покана о мануша шај те џанен кој сием амен, а исто аѓаар дела пе прилика околенге „сој свесна кај ваљани ленге о Девел“ те проучинен и Библија аменцар (Мат. 5:3). Џанѓола пе, сарине шај слободно те авен ко амаре состанокија бизи разлика дали мангена те проучинен или на. Ако авена ко амаре состанокија, ка дикхен кај бут шај те сикљовен тари Библија.

8. Соске тано важно о мануша барем јекх пути те авен ко амаре состанокија? Вакер пример.

⁸ Важно тано понадари да те канина е манушен те авен ко состанокија барем јекх пути. Соске? Ако авена, ка дикхен кај е Јеховаскере сведокија сикавена о чачипе тари Библија хем поможинена е манушенге те пенџарен е Девле, а и ховавни религија на керела адава (Иса. 65:13). На пример, јекх брачно пари таро САД, о Реј хем и Линда, халиле акава англедер некобор берша. Ола верујнена сине ко Девел хем мангена сине те џанен нешто повише баши лесте. Адалеске одлучинѓе те посетинен са о цркве ки пумари диз хем те дикхен која црква ка пхерел ленгере дуј условија. О прво услов сине те сикљовен нешто ки адаја црква, а о дујто о мануша тари адаја црква те уравен пе аѓаар сар со личинела е Девлескере слугенге. Ваљани сине ленге некобор берша соске сине бут цркве. Ама, откеда геле ко са о цркве, сине бут разочариме. На сиклиле ништо, а о верникија таро адала цркве на уравена пе сине ко начин сар со личинела е Девлескере слугенге. Кеда иклиле тари последно црква таро пумаро списако, и Линда гели ки бути, а о Реј цидинѓа те џал песке кхере. Џикоте џала песке сине, накхља тари дворана е Јеховаскере сведоконгири. Ов вакерѓа песке: „Соске те на кхував хем те дикхав со иси акате?“ Адава со дикхља хем шунѓа, мукхља леске баро впечаток! Сарине ки дворана сине љубезна леа хем сине уравде пристојно. О Реј бешља ко прво редо хем бут свиџинѓа пе леске адава со сиклило. Акава сетинкерела амен ко адава сар о Павле опишинѓа некас кова со прво пути авела ко состанок хем вакерела: „Чаче о Девел тано машкар туменде!“ (1. Кор. 14:23-25). Пало адава, о Реј џала сине ко секова состанок недела, а пало несаво време хем ко секова состанок ко работна диве. И Линда исто аѓаар почминѓа те џал леа ко состанокија хем иако сине лен повише таро 70 берш, ола проучинѓе и Библија хем крстинѓе пе.

9, 10. а) Соске о трактатија тане локхе користибаске? б) Сар ваљани те користина о трактати Со и е Девлескоро Царство?

⁹ Трактатија. Иси амен офто трактатија кола со поможинена аменге  локхесте те почмина разговор е манушенцар. Ола почминѓе те икљовен ко 2013 берш хем џи акана сине печатиме околу панџ милијарде примерокија! Акала трактатија тане керде ко исто начин, адалеске кеда ка сикљове те користине јекх лендар, ка џане те користине лен са. Сар шај те користине акала трактатија те шај те почмине разговор некасаја?

¹⁰ На пример, ако мангеа те користине о трактати Со и е Девлескоро Царство?, сикав е манушеске о пучибе тари прво страна хем пуч ле: „Дали некогаш пучљан тут сој тано е Девлескоро Царство? Со ка вакере ту...“ Тегани сикав леске о трин одговорија хем мукх ов те биринел јекх. Бизо те вакере дали лескоро одговор тано точно или на, пхрав о трактати ко дело „Со вакерела и Библија“ хем читин о стихија сој денде, Даниел 2:44 хем Даниел 7:14. Ко крајо, пуч ле о пучибе тари последно страна сој ко дело „Размислин“: „Саво ка овел о џивдипе кеда ка владинел е Девлескоро Царство?“. Шај те одговорине леске ко акава пучибе кеда ка џа лесте јавер пути. Тегани, шај те сикаве леске и 7 лекција тари брошура Шукар хабери таро Девел!, која сој тани јекх таро главна публикацие коленцар со шај те почмина библиско курси некасаја.

11. Која тани и цел амаре списаниенгири хем со ваљани те џана баши ленде?

¹¹ Списанија. И Стражарско кула хем о Разбудете се! тане најпечатиме хем најпреведиме списанија ко свето! Адалеске со о мануша таро бут пхувја читинена акала списанија, о теме тари насловно страна тане керде те овен интересна е манушенге ко цело свето. Ваљани те користина акала списанија те шај те поможина е манушенге те размислинен башо адава сој тано чаче важно ко живото. Ама, прво ваљани те џана кова списание коле манушеске одговоринела.

12. а) Каске тано кердо о Разбудете се! хем која тани лескири цел? б) Кола шуже искуствија сине тут ко последно време кеда денѓан акава списание?

¹² О списание Разбудете се! тано кердо манушенге кола со на џанена скоро ништо баши Библија. Шај на џанена ништо башо христијанска сикљојба, нане лен доверба ки религија, или на халиле кај и Библија шај те поможинел ленге ко живото. И главно цел акале списаниескири тани те уверинел околен со читинена кај иси Девел хем кај и Библија тани чаче е Девлескоро Лафи (Рим. 1:20; Евр. 11:6; 1. Сол. 2:13). О трин теме баши 2018 берш тане: „Кој е патот до среќата?“, „12 тајни за среќно семејство“ хем „Помош за ужалените“.

13. а) Каске тано кердо о списание Стражарско кула со даја ле ки служба? б) Кола шуже искуствија сине тут ко последно време кеда денѓан акава списание?

¹³ И главно цел е списаниескири Стражарско кула со даја ле ки служба тано те објаснинел о библиска сикљојба манушенге со више иси лен несаво ценење башо Девел хем баши Библија. Ола шај џанена нешто баши Библија, ама на хаљовена шукар адава со пишинела ки лате (Рим. 10:2; 1. Тим. 2:3, 4). О трин теме башо 2018 берш одговоринена ко акала пучиба: „Библијата — застарена или корисна?“, „Што ни носи иднината?“ хем „Дали Бог се грижи за тебе?“

14. а) Соске тане керде о главна штар видеоклипија? б) Кола шуже искуствија сине тут кеда сикавѓан акала видеоклипија?

¹⁴ Видеоклипија. Ко време е Исусескоро, о столарија користинена сине само рачно алати. Ама, авдиве користинена различна електрична алатија хем машине џикоте керена предметија таро каш. Кеда авдиве проповединаја, освен о печатиме публикацие, шај те сикава е манушенге хем шуже видеоклипија. О главна видеоклипија со ваљани те користина лен ки служба тане: Соске те сикљове тари Библија?, Сар шај те сикљове тари Библија?, Со керела пе ки е Јеховаскере сведоконгири дворана? хем Е Јеховаскере сведокија — кој сием амен? О видеоклипија сој потикне таро дуј минутија шај те користина лен ко прво разговор. О побаре видеоклипија шај те користина лен ко повторна посете хем ко окола со иси лен повише време. Акала бут шуже видеоклипија шај те поттикнинен е манушен те проучинен и Библија хем те авен ко амаре состанокија.

15. Со вакерѓе несаве откеда дикхле амаре видеоклипија ки пумари чхиб? Вакер примерија.

¹⁵ На пример, јекх пхен аракхља јекхе манушња која со селинѓа пе тари Микронезија хем керела сине ки јапско чхиб лафи. Амари пхен сикавѓа лаке о клипи Соске те сикљове тари Библија? ки јапско чхиб. Само со почминѓа о видеоклипи, и манушни вакерѓа „Акава тано ки мли чхиб. Нашти те верујнав! Таро начин сар керела лафи шај те дикхав кај тано таро мло остров. Керела лафи ки мли чхиб!“ Пало адава вакерѓа кај ка пхравел амари интернет-страница те шај те читинел хем те дикхел са со иси ки лакири чхиб. (Споредин Дела 2:8, 11.) Размислин башо јавер искуство. Јекх пхен таро САД бичхалѓа пле унукоске, кова со живинела ко јавер континенти, линк таро исто видеоклипи ки лескири чхиб. Откеда дикхља о видеоклипи, ов бичхалѓа лаке имејл коте со пишинѓа: „Посебно сине манге интересно адава со сине вакердо баши злобно духовно личност која со владинела е светоја. Родинѓум библиско курси.“ Акава тано посебно интересно соске живинела ки пхув коте со амаре активностија тане ограничиме.

16. Објаснин башо со тане керде секоја јекх таро акала брошуре: а) Шун е Девле хем живин вечно. б) Шукар хабери таро Девел! в) Кој керела е Јеховаскири волја авдиве?

¹⁶ Брошуре. Сар шај те сикаве башо чачипе некас со на џанела шукар те читинел или кеда ки лескири чхиб нане амен библиска публикацие? Шај те користина и брошура Шун е Девле хем живин вечно. * (Дикх и фуснота.) Јавер бут шукар публикација колаја со шај те почмине библиско курси некасаја тани Шукар хабери таро Девел! Шај те сикаве леске о 14 теме ки палуни страна хем те пуче ле која таро адала теме интересинела ле. Пало адава почминен те проучинен адаја лекција. Дали пробинѓан акава ко тле повторна посете? И трито брошура со користинаја ла тани Кој керела е Јеховаскири волја авдиве? Ој тани керди те сикавел е интересентен баши амари организација. Те шај те сикљове сар те користине акаја брошура, дикх ко Амаро живото хем служба  сар христијања — листија спремибаске таро март 2017 берш.

17. а) Башо со конкретно тане керде о дуј лила проучибаске? б) Со ваљани те керен окола со крстинена пе хем соске?

¹⁷ Лила. Откеда ка почмине те проучине некасаја несави брошура, шај ко било кова време те почминен е лилеа Со сикавела амен и Библија? Акава лил шај те поможинел е интересентеске панда пошукар те пенџарел о основна библиска сикљојба. Ако завршинена акава лил, а о интересенти шукар напредујнела, ваљани те продолжинен е лилеа Зачувај ја Божјата љубов. * (Дикх и фуснота.) Акава лил ка поможинел леске те сикљовел сар те применинел о библиска начелија ко пло живото. Ма бистре, чак откеда ка крстинел пе, ваљани понадари да те проучинел са џикоте на завршинела о солдуј лила. Акава ка поможинел леске те овел ле зорали вера ко Јехова хем те ачховел леске верно. (Читин Колошаните 2:6, 7.)

18. а) Ко со поттикнинена амен о лафија таро 1. Тимотеј 4:16 хем саво ка овел о резултати таро адава? б) Која тани амари цел џикоте користинаја амаре главна публикацие службаке?

¹⁸ Сар Јеховаскере сведокија, иси амен задача те сикава е манушен башо чачипе, или јавере лафенцар башо шукар хабери кова со шај те ингарел лен џи ко вечно живото. (Кол. 1:5; читин 1. Тимотеј 4:16.) Те шај те кера адава, шај те користина о главна публикацие службаке. (Дикх и рамка „ Главна публикацие службаке“.) Адалеске, те сикљова те користина акала публикацие најшукар со шај. Секова јекх амендар шај те одлучинел која публикација ка користинел хем кеда. Ама, амен на мангаја само те делина литература хем те да литература е манушенге со нане лен интерес. Амари цел тани те кера ученикија таро мануша сој искрена, понизна хем чаче мангена те пенџарен е Девле — окола со „исправно дикхена ко вечно живото“ (Мат. 28:19, 20; Дела 13:48).