1, 2. Кој анѓа најбари штета е манушенге хем сар керѓа адава?

О МАНУША измислинѓе бут буќа коленцар со керѓе о живото те овел полокхо, сар сој на пример, о телефони, и сијалица, о врда хем о фрижидери. Тари јавер страна, измислинѓе буќа да кола со анена о живото ки опасност, сар сој о барути, о мине со користинена пе ко војне, о цигаре или и атомско бомба. Ама, иси нешто сој попурано таро акала буќа хем керѓа најбари штета е манушенге. Сој адава? Адава тано о ховајбе. Окова со ховавела вакерела нешто со џанела кај нане чаче те шај о јавер те верујнел леске. Кој вакерѓа о прво ховајбе? О Бенг, каске со о Исус Христос вакерѓа кај тано „дад е ховајбаскоро“. (Читин Јован 8:44.) Кеда вакерѓа о прво ховајбе?

² Ов керѓа адава англедер некобор милја берша ки рајско градина. О Адам хем и Ева уживинена сине ко бут шужо рај кова со о Јехова керѓа ле ленге. О Девел вакерѓа ленге кај ако хана „таро каш башо пенџарибе сој шукар хем сој лошно“, ка мерен. Иако о Сатана џанља акава, ов преку јекх сап вакерѓа е Еваке: „На, тумен нане  те мерен“. Адава сине о прво ховајбе. А пало адава вакерѓа: „О Девел џанела кај ко адава диве кеда ка хан лестар, ка пхравѓон тумаре јакхја, хем ка овен сар о Девел, ка џанен сој шукар, а сој лошно“ (1. Мој. 2:15-17; 3:1-5).

3. Соске шај те вакерел пе кај е Сатанаскоро ховајбе тано злобно хем саве тане о последице таро адава?

³ Акава ховајбе сине злобно, соске о Сатана шукар џанља кај и Ева ка мерел ако верујнела леске хем ако хала таро плоди. Баш адава уло. Прво и Ева, а пало адава о Адам да, на шунѓе е Јеховаскири заповед хем ко крајо муле (1. Мој. 3:6; 5:5). Сој панда пострашно, преку адава грево, о мерибе ширинѓа пе ко са о мануша. И Библија вакерела: „О мерибе владинела сине сар цари... чак упро окола со на керѓе грево слично сар е Адамескоро“ (Рим. 5:12, 14). Адалеске на сием совршена хем на живинаја вечно сар со мангља о Девел. Наместо адава, живинаја само 70 или шај 80 берша, а амаро живото тано пхердо „неволје хем пхарипа“ (Пс. 90:10). Са акава уло само адалеске со о Сатана ховавѓа!

4. а) Башо кола пучиба ка кера лафи? б) Спрема о Псалм 15:1, 2, кој само шај те овел амал е Јеховаја?

⁴ О Исус башо Сатана вакерѓа: „На ачхило ко чачипе, соске ов на мангела о чачипе“. О Сатана на менинѓа пе. Ов панда „завединела цело свето“ пле ховајбаја (Отк. 12:9). Ама никој амендар на мангела те овел заведимо таро Сатана. Адалеске, те дикха трин пучиба: Сар о Сатана завединела е манушен авдиве? Соске ховавена о мануша? Хем, со ка поможинел аменге секогаш те вакера о чачипе те шај те на нашава о амалипе е Јеховаја сар со нашавѓе ле о Адам хем и Ева? (Читин Псалм 15:1, 2.)

5. Сар о Сатана завединела е манушен авдиве?

⁵ Шај те избегина те ова заведиме таро Сатана. О апостол Павле вакерѓа: „Лескере намере нане аменге непозната“ (2. Кор. 2:11). Џанаја кај цело свето — машкар кова сој и ховавни религија, о румиме владе хем и алчно трговија — тано ко васта е Сатанаске (1. Јов. 5:19). Адалеске на сием изненадиме со ховавена о мануша со иси лен бари положба, соске упри ленде влијајнена о Сатана хем лескере демонија (1. Тим. 4:1, 2). На пример, несаве барвале бизнисменија ховавена е манушен те шај те лен ленгере паре, или вакерена ховајба ко рекламе те шај те бикинен пумаре производија кола сој штетна.

6, 7. а) Соске тано посебно лошно кеда о верска водачија вакерена ховајба? б) Саве ховајба ширинена о верска водачија?

⁶ Посебно тано лошно кеда о верска водачија вакерена ховајба. Соске? Ако некој верујнела ко ленгере ховавне сикљојба хем керела буќа кола со о Девел мрзинела лен, шај те нашавел и прилика те живинел вечно (Оси. 4:9). О Исус џанља кај о верска водачија ко лескоро време ховавена сине е манушен. Ов храбро вакерѓа ленге: „Тешко туменге, тумен о книжникија хем о фарисеија, лицемерна сиен! Патујнена преку море хем џана сегде те шај те убединен јекхе мануше те прифатинел и еврејско вера, а кеда ка прифатинел ла, керена ле асавко со заслужинела и геена“, или о вечно уништување (Мат. 23:15). О Исус вакерѓа  кај адала ховавне верска водачија сине иста сар пумаро дад о Бенг, кова со „мударела е манушен“ (Јован 8:44).

⁷ Авдиве да иси бут верска водачија. Ола шај викинена пе пасторија, свештеникија, рабинија или користинена песке јавера титуле. Исто сар о фарисеија, ола на сикавена о чачипе таро е Девлескоро Лафи, него „менинѓе о чачипе башо Девел ховајбаја“ (Рим. 1:18, 25). На пример, ширинена ховајба кај иси пекол, кај е манушескири душа на мерела, кај иси реинкарнација хем кај о Девел прифатинела о хомосексуална врске.

8. Саво ховајбе ка вакерен панда хари о политичка водачија, ама сар ваљани амен те реагирина?

⁸ О политичарија да завединена е манушен пле ховајбаја. Јекх таро најбаре ховајба со панда хари ола ка вакерен тано кај анѓе „мир хем сигурност“ ко свето. Ама, „тегани изненадено ка овен уништиме“. Адалеске на ваљани те верујна акале политичка водаченге кола со вакерена кај о буќа џана ко пошукар. Амен бут шукар џанаја кај „е Јеховаскоро диве ка авел сар чор со авела ки рат“ (1. Сол. 5:1-4).

9, 10. а) Соске ховавена о мануша хем кола тане о последице таро адава? б) Со на ваљани те бистра башо Јехова?

⁹ Авдиве на ховавена само о мануша сој ки бари положба. Ки статија „Соске ховаваја“ таро Ј. Батачарџи, пишинела кај „башо ховајбе мислинела пе кај тано јекх карактеристика сој хор андре ко мануш“. Јавере лафенцар, о мануша мислинена кај тано природно хем нормално те ховавен. О мануша најчесто ховавена те шај те заштитинен пе аѓаар со ка гаравен пле грешке или о криминал со керѓе. Ола исто аѓаар ховавена те шај те заработинен паре или те овел лен несави јавер корист. Ки исто статија пишинела кај о мануша бизо проблеми ховавена „јабанџиен, колеген, амален хем пле фамилија“.

¹⁰ Кола тане о последице таро са адала ховајба? О мануша на верујнена више јекх јекхеске хем о односија машкар ленде тане румиме. На пример, замислин туке кобор пхаро ка овел јекхе ромеске кеда ка дознајнел кај лескири ромни керѓа прељуба хем цело време ховавела ле те шај те гаравел со керѓа. Или замислин туке кобор тано страшно кеда јекх ром малтретиринела пле ромња хем пле чхавен кхере, а англо јавера керела пе кај мангела лен хем грижинела пе ленге. Асавке мануша шај те ховавен е јаверен, ама на ваљани те бистра кај ола нашти те ховавен е Јехова. И Библија вакерела кај англо лескере јакхја „са тано пучардо хем јасно дикхјола“ (Евр. 4:13).

11. Со сикљоваја таро лошно пример е Ананијаскоро хем е Сапфиракоро? (Дикх и слика ко почеток тари статија.)

¹¹ Ки Библија иси пример башо јекх  христијанско брачно пари кола со мангле те ховавен е Девле адалеске со о Сатана влијајнѓа упри ленде. О Ананија хем и Сапфира пробинѓе те ховавен е апостолен. Ола бикинѓе јекх дело таро пло имот хем денѓе само дело таро паре е апостоленге. О Ананија хем и Сапфира мангле те мукхен шукар впечаток е јаверенге ко собрание, адалеске вакерѓе е апостоленге кај денѓе са о паре. Ама о Јехова џанља со керѓе хем адалеске казнинѓа лен (Дела 5:1-10).

12. Со ка овел околенцар со злобно ховавена хем на каинена пе, хем соске?

¹² Сар дикхела о Јехова ко мануша со ховавена? Са о мануша со злобно ховавена хем на каинена пе ка овен фрдиме ко езеро тари јаг, исто сар о Сатана. Јавере лафенцар, ка овен уништиме засекогаш (Отк. 20:10; 21:8; Пс. 5:6). Соске? Адалеске со о Јехова ко акала ховавне мануша дикхела исто сар окола каскере постапке тане одвратна англо лескере јакхја (Отк. 22:15).

13. Со џанаја башо Јехова хем со поттикнинела амен адава те кера?

¹³ Џанаја кај о Јехова „нане мануш те ховавел“ хем кај „о Девел нашти те ховавел“ (4. Мој. 23:19; Евр. 6:18). О Јехова мрзинела „и чхиб со ховавела“ (Изр. 6:16, 17). Ако мангаја те кера е Девлескири волја, мора те вакера о чачипе. Адалеске, на ховаваја амен јекх јекхеа (Кол. 3:9).

14. а) Со керела амен појавера таро мануша сој ки ховавни религија? б) Објаснин о начело таро Лука 6:45.

¹⁴ Кова тано јекх начин сар о чачутне христијања тане појавера таро мануша сој ки ховавни религија? Амен вакераја о чачипе. (Читин Захарија 8:16, 17.) О Павле вакерѓа: „Сикаваја  кај сием е Девлескере слуге... чачутне лафенцар“ (2. Кор. 6:4, 7). О Исус вакерѓа кај о мануш „керела лафи башо адава солеа тано пхердо лескоро вило“ (Лука 6:45). Акава значинела кај о искрено мануш вакерела о чачипе. Ов вакерела о чачипе е јабанџиенге, пле коленге, пле амаленге хем пле фамилијаке. Те дикха несаве примерија башо адава сар шај те сикава кај трудинаја амен те ова чесна ко са.

15. а) Соске тано лошно те живинел пе дволично? б) Со ка поможинел е терненге те на перен ко притисок таро врсникија? (Дикх и фуснота.)

¹⁵ Ако сиан терно, шај мангеа те ове прифатимо таро тле врсникија. Ама, пазин никогаш те на почмине те живине дволично, сар со керена несаве терне. Ола керена пе кај тане чиста ко морално поглед кеда тане пле фамилијаја хем е пхраленцар таро собрание, ама тане бут појавер ко социјална мреже или кеда тане манушенцар со на служинена е Јеховаске. Шај вакерена безобразна лафија, на уравена пе скромно, шунена вулгарно музика, пиена, дрогиринена пе, иси лен тајна врске или керена јавера лошна буќа. Ола ховавена пумаре родителен, е пхрален, е пхењен хем е Јехова (Пс. 26:4, 5). Ама, о Јехова џанела кеда некој само вакерела кај служинела леске, а керела буќа кола со ов мрзинела лен (Мар. 7:6). Бут пошукар тано те шуна о совет таро Изреки 23:17: „Те на љубоморинел тло вило е грешниконге, него по цело диве нека овел тут дар таро Јехова“. * (Дикх и фуснота.)

16. Сар ваљани те одговорине ко пучиба сој ки молба баши несави полновремено служба?

¹⁶ Ако мангеа те ове општо пионери или те почмине е специјално полновремено службаја, на пример те служине ко Бетел, ваљани те пхере молба. Бут тано важно искрено те одговорине ко пучиба башо тло састипе, башо адава сави забава биринеа хем башо тло морал (Евр. 13:18). Ама, со ако керѓан нешто со мрзинела о Јехова или нешто башо со мучинела тут тли совест, а о старешине на џанена башо адава? Одма роде лендар помош те шај те овел тут чисто совест џикоте служинеа е Јеховаске (Рим. 9:1; Гал. 6:1).

17. Со ваљани те кера ако адала со прогонинена амен испрашинена амен башо амаре пхраља?

¹⁷ Со ваљани те кере ако о проповедибе тано забранимо ки тли пхув хем ако о властија астарена тут хем испрашинена тут башо тле пхраља? Ваљани ли те вакере ленге са со џанеа? Со  керѓа о Исус кеда јекх римско управители испрашинела ле сине? О Исус применинѓа о начело кај „иси време те трајнел пе хем време те керел пе лафи“, адалеске ко несаве пучиба ов на одговоринѓа леске ништо (Проп. 3:1, 7; Мат. 27:11-14). Ако аракхљоваја ки слично ситуација ваљани те пазина те на вакера нешто колеа со шај те ана ки опасност амаре пхрален (Изр. 10:19; 11:12).

18. Која тани амари одговорност ако о старешине пучена амен нешто башо амаре пхраља?

¹⁸ Со ако некој ко собрание керѓа сериозно грево хем ту џанеа башо адава? Адалеске со о старешине тане одговорна те икерен о собрание чисто ко морално поглед, шај ка пучен тут со џанеа башо адава. Со ка кере, посебно ако керела пе лафи некаске сој туке паше амал или некој тари тли фамилија? И Библија вакерела: „Окова со сведочинела верно ка вакерел о чачипе“ (Изр. 12:17; 21:28). Адалеске, иси тут одговорност те вакере е старешиненге са со џанеа хем на ваљани ништо те гараве. Е старешинен иси лен право те џанен са о точна информацие те шај ко најшукар начин те поможинен околеске со грешинѓа палем те овел паше е Јеховаја (Јак. 5:14, 15).

19. Со ка дикха ки јавер статија?

¹⁹ О Давид ки молитва вакерѓа е Јеховаске: „Ту сиан бахтало кеда о чачипе тано ко вило“ (Пс. 51:6). О Давид џанља кај тано најважно саве сием андрал ко вило. О чачутне христијања вакерена о чачипе јекх јекхеске ко секова време. Јавер начин сар е Девлескере слуге тане појавера е јаверендар тано адава со сикавена е манушен о чачипе тари Библија. Ки јавер статија ка дикха сар кераја адава ки служба.