Освен адава, акале Версајско договореа сине керди неви организација со викинела пе сине Лига е народонгири. Лакири цел сине „те керел пошукар меѓународно соработка хем те анел ко свето мир хем сигурност“. Бут христијанска религие поддржинена сине акаја неви организација. О Федерално совет таро е Христосескере цркве тари Америка вакерѓа кај и Лига е народонгири тани „политичко организација која со застапинела е Девлескере Царство ки Пхув“. Акава Совет поддржинѓа акале Лига аѓаар со бичхалѓа пле делегатија ки Париско мировно конференција. Јекх таро адала делегатија вакерѓа кај и конференција сине „о почеток тари неви ера ки светско историја“.

Чаче почминѓа јекх неви ера, ама башо адава на сине причина о мануша кола со учествујнѓе ки акаја мировно конференција. Ко 1919 берш почминѓа неви ера башо проповедибе. Адава берш о Јехова денѓа сила пле народоске те шај те проповединел о шукар хабери сар никогаш англедер. Ама прво о Истражувачија е Библијакере ваљани сине те доживинен јекх важно промена.

Е бершескоро избор башо членија ко управно одбор е корпорацијакоро Watch Tower Bible and Tract Society сине закажимо баши сабота, 4 јануари 1919 берш. Ко адава време, о Џозеф Ратерфорд, кова со предводинела сине е Јеховаскере народо, заедно панда ефта јавере пхраленцар, сине неправедно осудимо хем пханло ки Атланта (Џорџија, САД). О пучибе сине: Дали о членија таро управно одбор кола со сине ко затвор ваљани те овен палем бириме или те овен мениме?

Ки пли затворско ќелија, о пхрал о Ратерфорд сине секиримо башо адава со ка овел е организацијаја. Ов џанља кај несаве пхраља мислинена кај тано најшукар те биринел пе нево претседатели. Адалеске, о Ратерфорд пишинѓа писмо околенге со сине ко адава состанок, коте со предложинѓа е пхрале Ивандер Кауард те овел претседатели. Баши лесте о Ратерфорд пишинѓа кај тано смиримо, разборито хем верно е Господареске. Ама, бут пхраља мангле о избор те икерел пе пало шов масек. Адалеа согласинена пе сине о адвокатија да кола со застапинена сине е  пхрален со сине пханле. Џикоте керена сине лафи со те керен, несаве пхраља почминѓе те вознемиринен пе.

Тегани случинѓа пе нешто со о пхрал Ричард Барбер покасно опишинѓа ле сар чхорибе пани ки јаг. Јекх таро пхраља со сине адатхе уштило хем вакерѓа: „Ме на сиум експерти башо адава со родела о закони, ама џанава со родела о Девел. Ов родела те ова леске верна. А најшукар начин сар шај те сикава амари верност спрема о Девел тано аѓаар со ка гласина хем башо претседатели палем ка бирина е пхрале Ратерфорд“ (Пс. 18:25).

О пхрал о Мекмилан, кова со сине ки ќелија одма узо Ратерфорд, покасно вакерѓа кај о јавер диве о пхрал Ратерфорд кхувѓа ко ѕидо тари ќелија хем вакерѓа леске: „Пружин тло вас“. Тегани денѓа ле јекх телеграма таро пхраља башо резултати таро гласибе. О Мекмилан дикхља и кратко порака хем одма халило со значинела. Ки лате пишинела сине: „РАТЕРФОРД ВАЈЗ ВАН БАРБЕР АНДЕРСОН БУЛИ ХЕМ СПИЛ ПРЕТСЕДАТЕЛИ ПРВА ТРИН СО КЕРЕНА О ДОЛЖНОСТИЈА МАНГАЈА ТУМЕН“. Акава значинела сине кај са о членија таро управно одбор сине палем бириме хем кај о Џозеф Ратерфорд хем о Вилијам ван Амбург ачхиле те керен пли должност. Спрема адава, о пхрал о Ратерфорд ачхило претседатели.

Џикоте о офто пхраља сине ко затвор, јавера Истражувачија е Библијакере почминѓе те кхеден потписија те шај те овен ослободиме о пхраља. Акала храбра пхраља хем пхења кхединѓе повише таро 700.000 потписија. Среда, 26 март 1919 берш, англедер те овен денде о потписија, о Ратерфорд хем јавера одговорна пхраља сине ослободиме.

Ко јекх говор со икерѓа ле околенге со аџикерѓе ле кеда иранѓа пе таро затвор, о пхрал о Ратерфорд вакерѓа: „Уверимо сиум кај акава искуство таро кова со накхлем сарине амен само спреминела амен башо побаре пхарипа сој англи аменде... Тумаре борба на сине ла цел те ослободинел е пхрален таро затвор. Адаја на сине и главно бути... Тумен боринѓен тумен те шај те сведочинен башо Чачипе, хем адалеске добинѓен бут шужо берекети“.

Таро адава со случинѓа пе ко судибе амаре пхраленгоро шај те дикха кај о Јехова водинѓа о буќа. Ко 14 мај 1919 берш, о апелационо судо анѓа акаја одлука: „Е обвинименге ко акава случај на сине... фер судимо сар со ваљани сине те овел, хем адалеске и пресуда на важинела“. Акаја одлука е судоскири бут користинѓа е пхраленге. Соске? О пхраља сине обвиниме кај керѓе пхаре кривична делија. Ако сине само помилујме или ако само намалинела пе сине ленгири казна, олен понадари да ка овел лен сине кривично досие. Ама, адалеске со и пресуда сине поништими хем на сине обвиниме баши јавер бути, ленгоро кривично досие сине бришимо. Адалеске о пхрал о Ратерфорд * шај сине те ачховел адвокати хем те бранинел е Јеховаскере народо англо  Врховно судо ко САД. Адава керѓа ле бут пути откеда сине ослободимо таро затвор.

Ки јекх прилика о пхрал о Мекмилан вакерѓа: „На сине амен намера те беша пханле вастенцар хем те аџикера о Господари те лел амен ко небо. Халилем кај ваљани те кера нешто те шај те дикха која тани чаче е Господарескири волја“.

Ама о пхраља таро главно седиште нашти сине добором локхе понадари да те керен и бути со керена ла сине бершенцар. Соске? Адалеске со, џикоте сине ко затвор, сине уништиме са о плоче коленцар со печатинела пе сине литература. Акава обесхрабринѓа е пхрален хем несаве пучена пе сине дали ало о крајо е проповедибаскоро.

Дали панда сине мануша со интересинена пе сине башо шукар хабери кова со проповединена сине о Истражувачија е Библијакере? Те шај те одговоринел ко адава пучибе, о пхрал о Ратерфорд одлучинѓа те икерел јекх говор колесте со о пхраља мангле те канинен со шај повише манушен. „Ако никој на авела сине ко адава состанок“, вакерѓа о пхрал Мекмилан, „адава ка значинел сине кај о проповедибе тано завршимо“.

Недела, 4 мај 1919 берш, ко Лос Анџелес (Калифорнија, САД), о пхрал о Ратерфорд, иако сине бут насвало, икерѓа о предавање „Надеж башо мануша со мучинена пе“. Ко предавање сине 3.500 присутна, а буте џененге сине вакердо те авен о тајсутно диве соске на сине доволно тхан. О тајсутно диве але панда 1.500 мануша. О пхраља добинѓе одговор ко ленгоро пучибе — о мануша интересинена пе сине башо шукар хабери.

Адава со о пхраља керѓе пало адава, влијајнѓа упро начин сар е Јеховаскере сведокија керена пли проповедничко активност џи авдиве.

Ки Стражарско кула таро 1 август 1919 берш, сине објавимо кај ко почеток таро септември ка икерел пе конгрес ко Седар Поинт (Охајо, САД). О Кларенс Бити, јекх терно Истражувачи е Библијакоро таро Мисури (САД), вакерѓа: „Сарине  сине одлучна те џан“. Адатхе сине присутна повише таро 6.000 пхраља хем пхења, бут повише него со очекујнѓа пе. Нешто со керѓа о конгрес панда поинтересно сине адава со крстинѓе пе 200 џене ко езеро Ири со сине паше.

Ко 5 септември 1919 берш, ко панџто диве таро конгрес, ко пло говор е насловеа „Говор е соработниконге“, о пхрал о Ратерфорд вакерѓа кај ка икљол јекх нево списание е насловеа Златно веко. * Ов вакерѓа кај акава списание „ка керел лафи башо важна настанија со случинена пе хем ка дел објаснување кова со темелинела пе ки Библија башо адава соске [случинѓе пе] адала баре настанија“.

Са о Истражувачија е Библијакере сине поттикниме храбро те проповединен акале неве публикацијаја. Ко јекх писмо коте со сине опишимо сар ваљани те проповединел пе, пишинела сине: „Секова јекх крстимо објавители на ваљани те бистрел кај иси ле бари чест те служинел хем кај акана ваљани те користинел адаја прилика аѓаар со ка учествујнел ко проповедибе кобор со шај повише“. Бут мануша прифатинѓе и покана те проповединен! Џи ко декември о исто берш, о ревна објавителија добинѓе повише таро 50.000 претплате башо нево списание!

Џи ко крајо таро 1919 берш, е Јеховаскоро народо палем сине организиримо хем охрабримо башо адава со аџикерела ле сине. Освен адава, исполнинѓе пе некобор важна пророштвија башо последна диве. Завршинѓе о испитија хем о чистибе е Девлескере народоскоро со сине пророкујмо ко Малахија 3:1-4. Е Јеховаскоро народо сине ослободимо таро симболично ропство таро Баро Вавилон, а о Исус поставинѓа е „верно хем разборито робо“ * (Отк. 18:2, 4; Мат. 24:45). Аѓаар о Истражувачија е Библијакере сине спремна те керен и бути која со о Јехова мангела сине те керен ла.