1-2. а) Со ка објавинен панда хари о светска водачија? б) Башо кола пучиба ваљани те џана о одговор?

ЗАМИСЛИН туке кај о светска водачија само со денѓе и објава башо „мир хем сигурност“ која со бут време аџикераја ла. Шај ка фалинен пе кај о свето никогаш англедер на сине добором безбедно тхан. О светска водачија ка манген те мислина кај ола шај те решинен са о проблемија ко свето. Ама, ола ко нисаво начин ка нашти те чхинавен о буќа со ка случинен пе пало адава. Соске? Адалеске со и Библија пророкујнѓа кај ола „изненадено ка овен уништиме“ хем кај нашти те нашен (1. Сол. 5:3).

² Ваљани те џана о одговор таро некобор важна пучиба: Со ка случинел пе ки „бари неволја“? Со ка аџикерел амендар о Јехова те кера ко адава време? Хем сар шај те спремина амен панда акана те шај те ачхова леске верна ки бари неволја? (Мат. 24:21).

3. Спрема Откровение 17:5, 15-18, сар о Девел ка уништинел „о Баро Вавилон“?

³ Читин Откровение 17:5, 15-18. „О Баро Вавилон“ ка овел уништимо! Сар со вакерѓем англедер, о народија ко нисаво начин ка нашти те чхинавен о буќа со ка случинен пе тегани. Соске? Адалеске со о Девел ка чхивел „ко ленгере виле те керен адава со ов мангела“.  Со мангела о Девел? Те уништинен о светско царство е ховавне религијакоро, ки која сој вклучимо хем о христијанско свето. * О Девел ка чхивел ко вило е деше шингенге е лоле ѕвероскере те керен адава со ов мангела. О „деш шинга“ преставинена са е политичка силен кола со поддржинена „е лоле ѕверо“ — о Обединета нацие (Отк. 17:3, 11-13; 18:8). Кеда адала светска владе ка иранен пе против и ховавни религија, адава ка овел знако кај почминѓа и бари неволја. Адава ка овел страшно настан кова со ка влијајнел упро секова јекх ки Пхув!

4. а) Сар о светска водачија шај те пробинен те оправдинен пло напад упри ховавни религија? б) Со веројатно ка керен о мануша со сине англедер членија ко адала религие?

⁴ На џанаја кола причине ка вакерен о светска водачија те шај те оправдинен пло напад упро Баро Вавилон. Шај ка вакерен кај о религие ко свето тане причина соске нане мир машкар о народо хем кај секогаш мешинена пе ки политика. Или шај ка вакерен кај адала религие кхединѓе песке бут баро барвалипе хем имот (Отк. 18:3, 7). Кеда о светска водачија ка нападинен е ховавне религија веројатно нане те уништинен саринен сој членија ко адала религие. Наместо адава, изгледа ола ка нападинен о религие. Откеда ка овен уништиме, окола со англедер сине ленгере членија ка хаљовен кај о верска водачија ховавѓе лен хем веројатно ка вакерен кај нане лен ништо адале религиенцар.

5. Со ветинѓа о Јехова баши бари неволја, хем соске?

⁵ И Библија на откринела аменге кобор време ка трајнел о уништибе е Баре Вавилонескоро. Ама џанаја кај са адава нане те трајнел бут време (Отк. 18:10, 21). О Јехова ветинѓа кај ка чхинавел о диве адале неволјакере те шај те на овен уништиме окола сој „бириме“ хем и чачутни религија (Мар. 13:19, 20). Ама, со ка аџикерел о Јехова те кера откеда ка почминел и бари неволја па са џи ки војна Армагедон?

6. Освен со ваљани те цида амен тари ховавни религија, со јавер ваљани те кера?

⁶ Сар со дикхлем ки англуни статија, о Јехова аџикерела лескере слуге те циден пе таро Баро Вавилон. Ама, нане доволно само те чхинава са е буќенцар со поврзинена амен е ховавне религијаја. Мора те ова одлучна понадари да верно те служина е Јеховаске, е чачутне Девлеске. Те дикха ко саве дуј начинија шај те кера адава.

7. а) Сар шај цврсто те икера амен ко е Јеховаскере праведна морална мерилија? б) Сар о совет таро Евреите 10:24, 25 поможинела аменге те хаљова кобор тане важна о состанокија, хем соске адава тано важно посебно акана?

⁷ Прво, мора понадари да цврсто те икера амен ко е Јеховаскере праведна морална мерилија. На смејнаја те прифатина о неморално понашибе е манушенгоро таро свето. На пример, на одобринаја нисаво неморал, сар сој брако машкар мануша таро исто пол хем јавера хомосексуална врске (Мат. 19:4, 5; Рим. 1:26, 27). Дујто, мора понадари да те обожавина е Јехова заедно амаре пхраленцар хем пхењенцар. Акава кераја секогаш кеда шај ко амаре дворане, ама ако нашти, тегани кхедаја амен ко амаре пхраленгере кхера или ко јавера тхана, чак хем гаравиндор. Бизи разлика со ка случинел пе, на смејнаја те чхинава те џа редовно ко амаре состанокија. Уствари, кобор со дикхаја кај авела „попаше о диве“, ваљани те ова панда поодлучна те на мукха амаре состанокија. (Читин Евреите 10:24, 25.)

8. Ко саво начин веројатно ка менинел пе амаро хабери ки иднина?

⁸ Џикоте трајнела и бари неволја, о хабери со проповединаја ле веројатно ка менинел пе. Авдиве амен проповединаја о шукар хабери башо Царство хем трудинаја амен те сикава е манушен баши Библија. Ама, тегани најверојатно храбро хем директно ка вакера о хабери кова со и Библија спорединела ле баре кукудикаја (Отк. 16:21). Шај ка вакера кај е Сатанаскоро свето панда хари ка овел уништимо. Кеда ка авел време башо адава, о Јехова ка откринел аменге со точно ка овел амаро хабери хем ко саво начин ка вакера ле. Дали ка користина о иста методе кола со користинаја лен ки служба повише таро 100 берш или ка користина несаве јавера методе? Мора те аџикера хем те дикха. Сар хем те овел, веројатно ка овел амен чест храбро те вакера е Јеховаскоро хабери баши осуда! (Езек. 2:3-5).

9. Сар о мануша најверојатно ка реагиринен ко амаро хабери, ама ко со шај те ова сигурна?

⁹ Најверојатно амаро хабери ка чхивел е манушен те пробинен јекх пути засекогаш те чхинавен амаро проповедибе. Исто сар авдиве со иси амен доверба кај о Јехова ка поможинел амен ки амари служба, аѓаар тегани да ка ваљани аменге лескири помош. Шај те ова сигурна кај амаро Девел ка дел амен сила те шај те кера лескири волја (Мих. 3:8).

10. Сар сој пророкујмо ко Лука 21:25-28, сар ка реагиринен повише мануша ко адава со ка случинел пе ки бари неволја?

¹⁰ Читин Лука 21:25-28. Џикоте трајнела и бари неволја, о мануша ка овен шокириме кеда ка дикхен сар рушинела пе са адава со мислинѓе кај тано трајно хем стабилно. Ка овен ки „мука“ хем ка даран башо пло живото џикоте трајнела о најпхаро периоди ки манушикани историја (Соф. 1:14, 15). Ко адава време, о живото веројатно ка овел попхаро чак е Јеховаскере народоске. Адалеске со понадари да нане те ова дело таро свето, шај ка овен амен пхарипа. Шај те на овен амен ни о најосновна буќа башо живото.

11. а) Соске е Јеховаскере сведокија ка овен е народонгири главно цел? б) Соске на ваљани те дара тари бари неволја?

 ¹¹ Ко јекх моменти, кеда о мануша коленгере религие сине уништиме ка хаљовен кај е Јеховаскере сведокија понадари да служинена е Девлеске, најверојатно бут ка хољанен. Шај те замислина аменге кобор бари прашина ка вазден башо адава хем саво хаос шај ка керен ко социјална мреже! О народија хем ленгоро владетели о Сатана ка мрзинен амен соске само амари религија на сине уништими. Адава ка значинел кај на успејнѓе ки пли цел те уништинен са о религие тари Пхув. Тегани амен ка ова ленгири главно цел. Ко адава моменти, са о народија ка овен јекх коалиција која со ки Библија викинела пе „Гог таро Магог“. * Ленгири цел ка овел са пле силенцар те нападинен е Јеховаскере народо (Езек. 38:2, 14-16). Адалеске со панда на џанаја точно са о деталија, нормално тано џинегде те ова секириме кеда размислинаја башо акава. Ама, јекх бути тани сигурно: На ваљани те дара тари бари неволја. О Јехова ка дел амен упатствија те шај те преживина (Пс. 34:19). Шај те испрајна амен хем те вазда амаре шере соске ка џана кај паше тано о време кеда о Девел ка спасинел амен. *

12. Сар „о верно хем разборито робо“ спреминела амен башо адава со аџикерела амен ки иднина?

¹² „О верно хем разборито робо“ спреминела амен те ачхова верна е Јеховаске ки бари неволја (Мат. 24:45). Акава керела ле ко бут начинија. Јекх пример тани и програма ко амаре конгресија таро 2016-2018 берш. О говорија со сине икерде ко акала конгресија поттикнинѓе амен ки панда побари мера те развина хем те сикава о особине кола со ваљани те овен амен џикоте е Јеховаскоро диве авела са попаше. Те дикха кратко адала особине.

13. а) Со ваљани те кера те шај те ачхова верна е Јеховаске? б) Соске ваљани панда акана те ова верна е Јеховаске?

¹³ Верност: И тема е конгресескири башо 2016 берш сине „Ачхов верно е Јеховаске“. Таро акава конгрес сиклилем кај ако иси амен зорало хем паше амалипе е Јеховаја, ка ачхова леске верна. Сетинкерѓа амен кај шај те ова панда попаше е Јеховаја ако молинаја амен леске искрено таро вило, хем ако хор проучинаја лескоро Лафи. Адава ка дел аменге сила те накхава чак о најпхаре проблемија. Џикоте о крајо е Сатанаскере светоскоро тано са попаше, амари верност спрема о Девел хем лескоро Царство сигурно ка овел чхивди ко панда побаре испитија. Најверојатно о мануша понадари да ка асан аменге (2. Пет. 3:3, 4). Јекх таро причине соске ка керен адава тано адалеске со ка манга те ачхова неутрална иако ка ова чхивде ко са побаро притисок. Мора панда акана те да амендар са те кера позорали амари вера те шај те ачхова верна ки бари неволја.

14. а) Сави промена ка овел поврзими е пхраленцар со предводинена ки Пхув? б) Соске ка ваљани те ачхова верна ко адава време?

¹⁴ Џикоте трајнела и бари неволја, ка овел промена поврзими е пхраленцар со предводинена ки Пхув. Ко одредимо моменти, са о помазаникија кола со панда тане ки Пхув ка овен кхедиме ко небо те шај те учествујнен ки војна Армагедон (Мат. 24:31; Отк.  2:26, 27). Акава значинела кај о Водечко тело нане више те овел аменцар ки Пхув. Сепак, о баро мноштво понадари да ка овел организиримо. Обучиме пхраља таро јавера бакхре ка предводинен. Ка ваљани те сикава кај сием верна е Јеховаске аѓаар со ка поддржина акале пхрален хем ка ова послушна ко водство со ка дел лен о Девел. Таро адава ка зависинел дали ка преживина!

15. а) Со ваљани те кера те шај те истрајна ко испитија? б) Соске панда акана мора те истрајна?

¹⁵ Истрајност: И тема е конгресескири башо 2017 берш сине „Ма откажин тут!“ Таро акава конгрес сиклилем сар те истрајна панда повише те шај те издржина о неволје. Дикхлем кај амари истрајност на зависинела таро адава дали амаре околностија ка овен пошукар. Ка успејна те истрајна само ако иси амен доверба ко Јехова (Рим. 12:12). Никогаш ма те бистра со ветинѓа о Исус: „Кој ка истрајнел џи ко крајо, ка овел спасимо“ (Мат. 24:13). Акава значинела кај ваљани те ачхова верна бизи разлика кобор пхарипа ка овен амен. Ако панда акана истрајнаја ко секова испит, амари вера ка овел панда позорали англедер те почминел и бари неволја.

16. Таро со зависинела амари храброст, хем сар шај те ова похрабра панда авдиве?

¹⁶ Храброст: И тема е конгресескири башо 2018 берш сине „Ов храбро!“ Акава конгрес сетинкерѓа амен кај и храброст на зависинела таро амаре способностија. Исто сар и истрајност, и чачутни храброст авела тари доверба ко Јехова. Сар шај те бајрара амари доверба ко Јехова? Аѓаар со секова диве ка читина лескоро Лафи хем хор ка размислина башо адава сар спасинѓа пле народо ко пурано време (Пс. 68:20; 2. Пет. 2:9). Кеда о народија ка нападинен амен ки бари неволја, ка ваљани те овел амен храброст хем доверба ко Јехова сар никогаш англедер (Пс. 112:7, 8; Евр. 13:6). Ако панда акана иси амен доверба ки лесте ка ова храбра кеда ка нападинел амен о Гог. *

17. Соске на ваљани те дара таро Армагедон? (Дикх и слика тари насловно страна.)

¹⁷ Сар со сине вакердо ки англуни статија, повише џене амендар цело време живинена ко последна диве. Ама, исто аѓаар иси амен  прилика те преживина и бари неволја. И војна Армагедон ка овел о крајо акале светоскоро. Сепак, амен нане состар те дара. Соске? Адалеске со адаја ка овел е Девлескири војна (Изр. 1:33; Езек. 38:18-20; Зах. 14:3). Кеда о Јехова ка дел заповед, о Исус Христос ка водинел е Девлескере војска ки војна. Узи лесте ка овен о воскресниме помазаникија хем милионија ангелија. Ола заедно ка боринен пе против о Сатана, лескере демонија хем ленгере војске ки Пхув (Дан. 12:1; Отк. 6:2; 17:14).

18. а) Ко со уверинела амен о Јехова? б) Соске о Откровение 7:9, 13-17 дела тут надеж баши иднина?

¹⁸ О Јехова уверинела амен акале лафенцар: „Нисаво оружје сој кердо против туте нане те успејнел“ (Иса. 54:17). Јекх „баро мноштво“ верна слуге е Јеховаскере ка преживинен и бари неволја хем понадари да ка служинен леске. (Читин Откровение 7:9, 13-17.) И Библија дела амен бут причине те овел амен надеж баши иднина! Џанаја кај „о Јехова аракхела адален сој леске верна“ (Пс. 31:23). Сарине со мангена хем фалинена е Јехова ка овен бахтале кеда ка дикхен сар ов ка чистинел пло свето анав тари секоја лаџ (Езек. 38:23).

19. Сави шужи иднина аџикерела амен?

¹⁹ Замислин сар ка овен сине опишиме о мануша тари 2. Тимотеј 3:2-5 кеда би керела пе сине лафи башо окола со ка живинен ко нево свето коте со е Сатана нане те овел ле нисаво влијание. (Дикх и рамка „ Саве ка овен о мануша тегани“.) О пхрал Џорџ Гангас, * кова со служинѓа сар члени ко Водечко тело, опишинѓа адава време аѓаар: „Кобор шукар ка овел о свето кеда са о мануша ка овен пхраља хем пхења! Панда хари ка овел тут чест те живине ко нево свето. Ка живине кобор со живинела о Јехова. Ка живина засекогаш“. Кобор шужи иднина аџикерела амен!