1. Со шај те керел о Јехова те шај те исполнинел пли намера?

О ЈЕХОВА шај те овел са со ваљани те шај те исполнинел пли намера. На пример, ов тано учители, Дад кова со утешинела хем проповеднико (Иса. 48:17; 2. Кор. 7:6; Гал. 3:8). Акала тане само несаве таро улоге со иси е Јехова. Сепак, ов бут пути користинела манушен те шај те исполнинел пли намера (Мат. 24:14; 28:19, 20; 2. Кор. 1:3, 4). Исто аѓаар, о Јехова шај секоле јекхеске амендар те дел мудрост хем сила те ова са со ваљани те шај те керел пе лескири волја. Са акава тано поврзимо е Јеховаскере анавеа, сар со објаснинена несаве библиска изучувачија.

2. а) Соске шај понекогаш те сумнина амен ко адава дали о Јехова мангела те користинел амен? б) Со ка дикха ки акаја статија?

² Сарине мангаја те ова корисна е Јеховаске, ама несаве амендар шај те сумнинен пе дали о Јехова чаче мангела те користинел лен. Соске? Адалеске со мислинена кај нашти те керен добором кобор со мангена. Ола мислинена кај ограничинена лен о берша, о околностија или о способностија. Тари јавер страна, несаве шај мислинена кај керена доволно хем кај нане потреба те керен повише. Ки акаја статија ка дикха сар о Јехова шај те дел амен адава со ваљани аменге те шај те исполнинел пе лескири намера. Пало адава ка дикха библиска извештаија башо адава сар о Јехова денѓа желба хем сила несаве пле слугенге те служинен леске. Ко крајо ка дикха сар шај те мукха о Јехова те користинел амен.

3. Сар со ветинѓа ко Филипјаните 2:13, со шај те керел о Јехова ако дикхела кај размислинаја ко саве начинија те служина леске?

³ Читин Филипјаните 2:13. * О Јехова шај те дел амен желба те служина леске. Сар? Шај шунѓем кај несаве пхралеске ваљани помош или кај ваљани те керел пе нешто јавер ко собрание. Шај о старешине ка читинен писмо тари подружница колесте со пишинела кај ваљани помош ко јавер тхан, на пример, ко несаво градежно проекти или те проповединел пе. Адалеске, шај ка пуча амен: „Сар шај ме те поможинав?“ Шај нудинела пе аменге несави пхари задача баши која со на сием сигурна дали ка шај те кера ла. Или палем, откеда читинѓем несаве стихија тари Библија, шај пучлем амен: „Сар шај те применинав акала библиска стихија те шај те поможинав е јаверенге?“ О Јехова никогаш нане те чхивел амен силаја те кера нешто. Ама кеда ка дикхел кај размислинаја башо адава со шај те кера, о Јехова шај те поможинел аменге те овел амен желба те кера адава башо со размислинѓем.

4. Сар шај о Јехова те дел амен сила те служина леске?

⁴ О Јехова, исто аѓаар, шај те дел амен сила те служина леске (Иса. 40:29). Ов шај те дел амен пло свети дух те шај те поможинел аменге те развина о способностија со више иси амен (2. Мој. 35:30-35). Преку пли организација, о Јехова шај те сикавел амен сар те кера несаве задаче. Ако на осетинеа тут некогаш сигурно хем мислинеа кај нашти те кере несави задача, роде помош. Исто аѓаар, шај ко секова време те роде таро амаро дарежливо Дад сој ко небо те дел туке „сила, која со накхавела и нормално“ (2. Кор. 4:7; Лука 11:13). Тари Библија џанаја кај о Јехова поможинѓа пле слугенге, хем муршенге хем џувленге, адалеа со денѓа лен желба хем сила те керен несаве задаче. Џикоте дикхаја несаве таро адала извештаија, размислин ко саве слична начинија шај о Јехова те користинел тут.

5. Со сикљоваја таро адава кеда о Јехова почминѓа те користинел е Мојсее те шај те ослободинел е Израелцон?

⁵ О Јехова поможинѓа е Мојсееске те ослободинел е Израелцон. Ама, кеда почминѓа о Јехова те користинел ле баши адаја цел? Дали кеда о Мојсеј осетинела пе сине доволно способно откеда „сине сикавдо баши са и египетско мудрост“? (Дела 7:22-25). На, о Јехова користинѓа е Мојсее чак откеда поможинѓа леске те овел понизно, кротко мануш (Дела 7:30, 34-36). О Јехова денѓа е Мојсееске храброст те керел лафи е најмоќно владетелеа ко Египет (2. Мој. 9:13-19). Со сикљоваја таро адава кеда о Јехова почминѓа те користинел е Мојсее? О Јехова користинела околен со трудинена пе те сикавен лескере особине хем кола со иси лен доверба ки лескири сила (Фил. 4:13).

6. Со сикљоваја таро начин сар о Јехова користинѓа е Варзелаје те шај те поможинел е Давидеске?

⁶ Веконцар пало адава, те шај те поможинел е Давидеске, о Јехова користинѓа е Варзелаје. О Давид хем о народо бокхалиле, уморинѓе пе хем сине жедна џикоте нашена сине таро Авесалом, е Давидескоро чхаво. О Варзелај, кова со ко адава време сине више пхуро, заедно јаверенцар чхивѓа пло живото ки опасност те шај те поможинел е Давидеске хем околенге со сине леа. О Варзелај на мислинѓа песке кај адалеске сој тано пхуро, нане више корисно е Јеховаске. Наместо адава, ов дарежливо керѓа са со шај те поможинел е Девлескере слугенге коленге со ваљанела  сине помош (2. Сам. 17:27-29). Со сикљоваја таро адава? Бизи разлика кобор берш иси амен, о Јехова шај те користинел амен те поможина амаре пхраленге хем пхењенге коленге со ваљанена о основна буќа, сајекх дали тане ки амари пхув или ки јавер (Изр. 3:27, 28; 19:17). Чак ако нашти директно те поможина ленге, шај те да доброволно прилог. Адала средствија шај те користинен пе те поможинел пе е пхраленге хем е пхењенге кеда ка ваљани ленге (2. Кор. 8:14, 15; 9:11).

7. Сар о Јехова користинѓа е Симеоне, хем соске лескоро пример охрабринела амен?

⁷ О Јехова ветинѓа е Симеонеске, јекх попхуро верно слуга е Девлескоро ко Ерусалим, кај нане те мерел англедер те дикхел е Месија. Адава ветување сигурно бут охрабринѓа е Симеоне, соске бут берша аџикерела сине е Месија. О Јехова наградинѓа ле баши лескири вера хем истрајност. Јекх диве, „водимо таро свети дух“, ало ко храми хем адатхе дикхља е тикне Исусе. Тегани о Јехова користинѓа е Симеоне те дел јекх пророштво башо акава тикно чхаво кова со ваљанѓа те овел о Христос (Лука 2:25-35). Иако о Симеон веројатно муло англедер о Исус те почминел пле службаја ки Пхув, ов сине благодарно баши чест со сикавѓа леске о Јехова. Освен адава, аџикерена ле панда бут шуже буќа ко време со авела! Ко нево свето, адава верно мануш ка дикхел сар ка добинен берекетија са о народија ки Пхув преку е Исусескоро владибе (1. Мој. 22:18). Амен да шај те ова благодарна баши чест со дела амен о Јехова адалеа со користинела амен ко разна начинија ки служба.

8. Сар о Јехова користинѓа е Варнава, хем сар шај те користинел амен?

⁸ Ко прво веко а.е., јекх дарежливо мануш со викинела пе сине Јосиф дозволинѓа е Јеховаске те користинел ле (Дела 4:36, 37). О апостолија викинена ле сине Варнава, со значинела „чхаво е утехакоро“, веројатно адалеске со утешинела сине е јаверен. На пример, откеда о Савле уло христијани, бут пхраља дарана сине те дикхен пе леа адалеске со џанена сине кај прогонинѓа адален со верујнена сине ко Христос. Ама, о Варнава утешинѓа ле хем поможинѓа леске, а о Савле сигурно сине бут благодарно башо адава (Дела 9:21, 26-28). Покасно, о старешине ко Ерусалим мангле те охрабринен е пхрален кола со живинена сине дур лендар, ки сириско Антиохија. Кас бичхалѓе башо адава? Е Варнава! Ола чаче биринѓе шукар. Башо Варнава ки Библија пишинела: „Саринен охрабринела сине те ачховен верна е Господареске одлучно вилеа“ (Дела 11:22-24). О Јехова шај авдиве да те поможинел секоле јекхеске амендар те овел „чхаво е утехакоро“ башо пхраља хем пхења. На пример, шај те користинел амен те утешина околен со муло лендар некој таро мангле. Или шај те поттикнинел амен те посетина некас или те јавина амен некаске сој тано насвало или обесхрабримо те шај те вакера леске нешто со ка охрабринел или утешинел ле. Дали ка дозволине е Јеховаске те користинел тут сар со користинѓа е Варнава? (1. Сол. 5:14).

9. Со сикљоваја таро начин сар о Јехова поможинѓа јекхе пхралеске те овел шукар старешина?

⁹ О Јехова поможинѓа јекхе пхралеске со викинела пе Василиј те овен ле духовна особине те шај шукар те грижинел пе е собраниеске сар пастири. О Василиј сине именујмо те служинел сар старешина кеда сине ле 26 берш. Ов мислинела сине кај нане ле доволно искуство те шај те поможинел е пхраленге хем е пхењенге, посебно околенге со сине лен проблемија. Ама, добинѓа корисно обука таро некобор искусна старешине хем сине ки Школа башо именујме пхраља. О Василиј бут трудинѓа пе те овел пошукар. На пример, керѓа јекх списако колесте со чхивѓа песке потикне целија. Сар со исполнинела сине акала целија, добором посигурно осетинела пе сине. Ов акана вакерела:  „Адава со англедер даравкерела ман сине, акана керела ман бут бахтало. Кеда о Јехова поможинела манге те аракхав о исправно библиско стихо те шај те утешинав несаве пхрале или пхења таро собрание, осетинава ман бут задоволно“. Пхраљален, ако тумен да сар о Василиј мукхена о Јехова те користинел тумен, ов шај те дел тумен способност те грижинен тумен башо побаре задаче ко собрание.

10. Со керѓа и Авигеја, хем со сикљоваја таро лакоро пример?

¹⁰ Е Давидеске хем лескере манушенге ваљани сине помош адалеске со о цари о Саул прогонинела лен сине. Е Давидескере мануша замолинѓе јекхе барвале Израелцо со викинела пе сине Навал, те дел лен хари хајбаске. Ола мислинѓе кај шај те роден лестар адава соске заштитинена сине лескере бакхрен. Ама о себично Навал на мангља ништо те дел лен. О Давид хољанѓа бут хем мангља те мударел ле хем секоле мурше таро лескоро кхер (1. Сам. 25:3-13, 22). Ама, е Навалескири ромни и Авигеја, освен со сине шужи, сине исто аѓаар бут разумно. Ој сикавѓа бари храброст адалеа со али ко Давид хем замолинѓа ле ма те мударел е Навале хем аѓаар те овел криво башо рат. И Авигеја тактично вакерѓа леске те мукхел о буќа е Јеховаске ко васта. Е Авигејакири понизност хем разумност ковљарѓа е Давидескоро вило. Ов халило кај о Јехова бичхалѓа ла ки лесте (1. Сам. 25:23-28, 32-34). О Јехова шај сине те користинел е Авигеја соске сине ла шуже особине. Ко слично начин, о Јехова шај авдиве да те користинел љубезна хем разумна пхењен те шај те керен позорале пумаре фамилиен хем е јаверен ко собрание (Изр. 24:3; Тит 2:3-5).

11. Со керѓе е Салумескере чхаја, хем кој авдиве џала пало ленгоро пример?

¹¹ Бут векија пало адава, о чхаја е Салумескере сине машкар окола со користинѓа лен о Јехова те шај палем те градинел пе о ѕидо таро Ерусалим (Неем. 2:20; 3:12). Иако ленгоро дад сине кнези, лескере чхаја сине спремна те керен акаја пхари хем опасно бути (Неем. 4:15-18). Ола сине бут поразлична таро о угледна мануша тари Текоја кола со на мангена сине те учествујнен ко градибе о ѕидо (Неем. 3:5). Замислин туке кобор сине бахтале е Салумескере чхаја откеда завршинѓа пе о ѕидо башо само 52 диве! (Неем. 6:15). Ко амаро време, о пхења кола сој тане спремна те поможинен иси лен прилика те служинен ко посебно начин е Девлеске — ко градибе хем ко одржибе објектија кола сој посветиме е Јеховаске. Ваљанена аменге акала способна, ревна хем верна пхења те шај успешно те керел пе акаја задача.

12. Сар шај о Јехова те користинел амен сар со користинѓа е Тавита?

¹² О Јехова поттикнинѓа е Тавита секогаш те керел шукар буќа хем те поможинел е чороленге, посебно е удовиценге (Дела 9:36). Адалеске со сине бут дарежливо хем мангела сине е јаверен, бут џене жалинена сине кеда ој мули. Ама сине бут бахтале кеда о апостол Петар воскреснинѓа ла (Дела 9:39-41). Со сикљоваја тари Тавита? Бизи разлика дали сием терне или пхуре, мурша или џувља, сарине шај ко несаво начин те поможина е пхраленге хем е пхењенге (Евр. 13:16).

13. Сар о Јехова користинѓа е пхења Рут, хем со вакерѓа ој?

¹³ Јекх лаџутни пхен со викинела пе Рут мангља те овел мисионерка. Кеда сине тикни, ој џала сине таро кхер ко кхер кобор со шај посигате те шај те дел со повише трактатија. И Рут вакерѓа: „Чаче уживинава сине ки акаја служба“. Ама, сине лаке бут пхаро те керел е јаверенцар лафи башо е Девлескоро Царство. Иако сине лаџутни, и Рут ули општо пионери кеда сине ла 18 берш.  Ко 1946 берш, сине ки библиско школа Гилеад, а покасно служинѓа ко Хаваи хем ки Јапонија. О Јехова бут користинѓа ла те шај те проповединел о шукар хабери ко адала пхувја. Откеда накхља скоро 80 берш ки адаја служба, и Рут вакерѓа: „О Јехова секогаш дела ман сине сила. Ов поможинела сине манге те на овав лаџутни. Уверими сиум кај о Јехова шај те користинел секоле јекхе со иси ле доверба ки лесте“.

14. Спрема Колошаните 1:29, со мора те кера ако мангаја о Јехова те користинел амен?

¹⁴ Ки цело историја, о Јехова користинела сине пле слуген ко разна начинија. Сар ка користинел тут? Бут зависинела таро адава кобор сиан спремно те трудине тут ки служба башо Јехова. (Читин Колошаните 1:29.) Ако мукхеа те користинел тут о Јехова, ов шај те дел тут способност ревно те проповедине, шукар те сикаве, те џане сар те утешине е јаверен, те ове вешто работнико, те ове шукар амал или те ове са со ваљани те шај те исполнинел пе лескири намера.

15. Спрема 1. Тимотеј 4:12, 15, башо со ваљани о терне пхраља те молинен е Јехова?

¹⁵ А со шај те керен о терне пхраља кола со панда хари ка овен полнолетна? Иси бари потреба таро терне енергична пхраља со шај те поможинен ко собрание. Ко бут собранија иси повише старешине него слуга-помошникија. Дали некој тумендар, со сиен терне пхраља, сиен спремна те керен нешто повише ко собрание? Понекогаш несаве пхраља вакерена: „Доволно манге те служинав само сар објавители“. Ако ту да мислинеа аѓаар, молин е Јехова те поможинел туке те манге те ове слуга-помошнико хем те дел тут и сила те кере са со шај те служине леске (Проп. 12:1). Ваљани аменге тли помош! (Читин 1. Тимотеј 4:12, 15.)

16. Башо со ваљани те молина е Јехова хем соске?

¹⁶ О Јехова шај те поможинел туке те ове са со ваљани те шај те исполнинел пе лескири намера. Адалеске молин ле те дел тут желба те служине леске, хем пало адава роде лестар те дел тут и сила со ваљани туке. Бизи разлика дали сиан терно или пхуро, користин тло време, сила хем средствија те шај те фалине е Јехова (Проп. 9:10). Ако дела пе туке несави прилика те кере нешто повише ки служба башо Јехова, ма мукх адаја скапоцено прилика само адалеске со дараја кај на сиан доволно способно башо асавко нешто. Иси амен бари чест те кера са со шај те фалина амаре Даде со грижинела пе аменге. Ов чаче заслужинела адава!