1. Соске о Јехова заслужинела те служина само леске?

О ЈЕХОВА заслужинела те служина само леске соске ов керѓа са хем денѓа амен живото (Отк. 4:11). Ама, ваљани те пазина ки јекх важно бути. Иако мангаја хем поштујнаја е Јехова, сепак, несаве јавера буќа шај те овен аменге добором важна, со чак ка овен аменге поважна таро Јехова. Ваљани те хаљова сар шај те случинел пе адава. Прво, те дикха со значинела те служина само е Јеховаске.

2. Спрема 2. Мојсеева 34:14, со значинела те служина само е Јеховаске?

² Спрема и Библија, те служинел пе само е Јеховаске значинела те овел амен хор мангипе спрема лесте хем те обожавина само ле. Амен нане те мукха никој хем ништо те лел лескоро тхан ко амаро вило. (Читин 2. Мојсеева 34:14.)

3. Соске иси амен шукар причине те служина само е Јеховаске?

³ Иси амен шукар причине те служина само е Јеховаске. Соске? Адалеске со амари вера темелинела пе ко фактија со сиклилем лен баши лесте. Воодушевиме сием таро лескере бут шуже особине. Џанаја со мангела а со мрзинела, хем трудинаја амен те дикха ко буќа исто сар лесте. Амен хаљоваја кај о Јехова мангела те служина леске хем те ова бахтале ки цело вечност. Адалеске прифатинаја лескере мерилија. Аменге тани бари чест со дозволинела те ова лескере амала (Пс. 25:14). Са со сикљоваја башо амаро Створители поможинела аменге те ова панда попаше леа (Јак. 4:8).

4. а) Со користинела о Сатана те шај те чхивел амен похари те манга е Јехова? б) Со ка дикха ки акаја статија?

 ⁴ О Бенг владинела акале светоја. Ов користинела о свето те шај те теринел амен ко прво тхан те чхива амаре природна желбе хем те овел аменге пхаро те борина амен е неисправна желбенцар (Еф. 2:1-3; 1. Јов. 5:19). Лескири цел тани те манга јавера да буќа, а на само е Јехова. Те дикха дуј начинија сар шај те пробинел те керел адава. Прво, ов пробинела те чхивел амен те манга о паре, а дујто пробинела те чхивел амен те бирина лошно забава.

5. Соске мора те пазина те на манга о паре?

⁵ Сарине мангаја те овел амен доволно хајбаске, шукар шеја, хем пристојно тхан живибаске. Ама мора те пазина те на почмина те манга о паре. Бут мануша авдиве мангена о паре хем мангена о буќа со шај те кинен пе паренцар (2. Тим. 3:2). О Исус џанља кај лескере следбениконге да шај те случинел пе о исто. Адалеске вакерѓа: „Нијекх нашти те служинел дује господаренге соске или ка мрзинел е јекхе а ка мангел е јавере, или ка овел пханло е јекхеа а е јавере нане те мангел. Нашти те служинен хем е Девлеске хем е барвалипаске“ (Мат. 6:24). Ако некој со служинела е Јеховаске трошинела бут време хем трудо те шај те барваљовел, уствари, ов пробинела те служинел дује господаренге. Тегани, ов на служинела само е Јеховаске.

6. Со сикљоваја таро лафија кола со о Исус вакерѓа лен е собраниеске ки Лаодикија?

⁶ Ко крајо таро прво веко а.е., несаве членија таро собрание ки Лаодикија фалинена пе сине: „Барвало сиум, барвалиљум хем ништо повише на ваљани манге“. Ама англо Јехова хем англо Исус ола уствари сине жалибаске, чороле, короле хем нанѓе.  О Исус на укоринѓа лен адалеске со сине барвале, него башо адава со бут мангена сине о барвалипе со чак анѓе ки опасност пло амалипе е Јеховаја (Отк. 3:14-17). Ако дикхаја кај почминаја те манга о паре, мора сигате те испрајна амаро размислибе (1. Тим. 6:7, 8). Ако на кераја адава, ка почмина те манга јавера да буќа хем о Јехова нане те прифатинел амари служба. Ов „родела те служинел пе само леске“ (5. Мој. 4:24). Сар шај те авел џи ко адава те манга о паре?

7-9. Со сикљоваја таро искуство јекхе старешинаскоро со викинела пе Дејвид?

⁷ Те дикха о пример е Дејвидескоро, јекх вредно старешина кова со живинела ко САД. Ов вакерела кај сине бут вредно работнико ки фирма колате со керела сине бути. И фирма денѓа ле пошужи бути хем повише паре, хем и држава ки лесте дикхела сине сар јекх таро најстручна мануша ки адаја бути. О Дејвид вакерела: „Ко адава време мислинава сине кај мло успех сикавела кај о Јехова дела ман берекети“. Ама дали адава успех чаче сине таро Јехова?

⁸ Сар со накхела сине о време, о Дејвид халило кај лескири бути почминѓа негативно те влијајнел упро лескоро амалипе е Јеховаја. Ов вакерела: „Ко состанокија, па чак ки служба, размислинава сине башо проблемија ки бути. Заработинава сине бут паре, ама сине ман са побаро стрес хем почминѓе те овен ман проблемија ко брако“.

⁹ О Дејвид халило кај ваљани те размислинел сој леске најважно ко живото. Ов вакерела: „Одлучинѓум те променинав мли ситуација“. О Дејвид мангља те менинел пло работно време хем денѓа јекх предлог е  шефеске. Саво сине о резултати? О Дејвид нашавѓа пли бути! Со керѓа ов? Ов вакерела: „Одма о јавер диве денѓум молба те служинав сар помошно пионери повише масекија“. Те шај те издржинен пе финансиски, о Дејвид хем лескири ромни почминѓе те чистинен ко баре објектија. Пало несаво време ов почминѓа те служинел сар општо пионери, а покасно лескири ромни да. Ола биринѓе бути која со бут џене на би керена ла сине, ама ленге на сине најважно сави бути керена. Иако акана заработинена деш пути похари него англедер, секова масек иси лен добором кобор со ваљани ленге те шај те платинен пле трошакија. Ола мангена те чхивен е Јехова ко прво тхан, хем ки пли кожа осетинѓе кај ов грижинела пе околенге каске со е Девлескоро Царство тано најважно ко живото (Мат. 6:31-33).

10. Сар шај те аракха амаро вило?

¹⁰ Ваљани те аракха амаро вило бизи разлика дали иси амен хари или бут материјална буќа. Сар шај те аракха амаро вило? Аѓаар со нане те манга о паре хем нане те мука и световно бути те овел аменге поважно тари служба башо Јехова. Сар шај те џане дали адава случинела пе туке? Пуч тут акала пучиба: „Дали често размислинава баши бути џикоте сиум ко состанокија или ки служба? Дали стално секиринава ман башо адава дали ка овел ман доволно паре ки иднина? Дали башо паре хем о материјална буќа иси ман проблемија ко брако? Ако несави световно бути дозволинела манге ки побари мера те служинав е Јеховаске, дали ка овав спремно те прифатинав ла чак ако е јаверенге тано лаџаво те керен адаја бути?“ (1. Тим. 6:9-12). Џикоте размислинаја башо акала пучиба те на бистра кај о Јехова бут мангела амен хем кај околенге со служинена само леске ветинела: „Никогаш нане те мукхав тут хем нане те иранав туке мло думо“. Адалеске о апостол Павле пишинѓа: „Ко тумаро живото те на овел тумен мангипе спрема о паре“ (Евр. 13:5, 6).

11. Соске и забава таро акава свето шај лошно те влијајнел упри аменде?

¹¹ О Јехова мангела те уживина ко живото, а и забава шај те поможинел аменге ко адава. Уствари, е Девлескоро Лафи вакерела кај „нане ништо пошукар таро адава о мануш те хал хем те пиел хем те уживинел ко шукар буќа таро пло трудо“ (Проп. 2:24). Ама, побаро дело тари забава  таро акава свето шај лошно те влијајнел упри аменде. Соске? Адалеске со руминела е манушенгере морална мерилија аѓаар со поттикнинела лен те одобринен — па чак хем те манген — буќа кола со е Девлескоро Лафи осудинела лен.

12. Спрема 1. Коринќаните 10:21, 22, соске ваљани шукар те пазина сави забава биринаја?

¹² Амен мангаја те служина само е Јеховаске хем адалеске нашти те ха тари „е Јеховаскири софра“ хем тари „е демоненгири софра“. (Читин 1. Коринќаните 10:21, 22.) Кеда хаја некасаја заедно, адава обично сикавела кај сием амала. Ако биринаја забава коте со иси насилство, спиритизам, неморал или јавера телесна желбе хем ставија тегани сар те пхене хаја заедно е Девлескере душманенцар, хем адава о хајбе кова со ола спреминѓе ле. Сар резултати, на само со ка кера аменге штета него исто аѓаар, ка румина амаро амалипе е Јеховаја.

13-14. а) Ки која смисла шај и забава те споредина ла хајбаја? б) Спрема Јаков 1:14, 15, соске ваљани шукар те бирина амари забава?

¹³ Ки која смисла шај и забава те споредина ла хајбаја? Џикоте хаја, амен биринаја со ка чхива ко муј. Ама откеда ка глтина о хајбе, нашти те бирина сар о хајбе ка влијајнел упро амаро тело. О шукар хајбе шукар влијајнела упро амаро састипе, а о лошно хајбе руминела амаро састипе. Шај нане одма те приметина о последице, ама сар со ка накхел о време адава ка дикхел пе.

¹⁴ Слично, кеда биринаја амари забава, уствари, биринаја со ка чхива ки амари годи. Пало адава, и забава со биринѓем ла ка влијајнел упри амари годи хем ко амаро вило. И исправно забава шај те освежинел амен, а и неисправно забава ка анел аменге штета. (Читин Јаков 1:14, 15.) О последице тари лошно забава шај нане одма те приметинен пе, ама пало несаво време ка дикха лен. Баш адалеске и Библија предупрединела амен: „Ма ховавѓовен: е Девлеа нане кхелибе! О мануш со ка сејнел, адава ка кхедел. Кој сејнела ко тело, таро тело ка кхедел пропаст“ (Гал. 6:7, 8). Бут тано важно те отфрлина секоја забава која со ширинела буќа кола со о Јехова мрзинела лен! (Пс. 97:10).

15. Саво шужо поклон денѓа амен о Јехова?

¹⁵ Бут таро е Јеховаскере слуге уживинена џикоте дикхена амари интернет-телевизија JW Broadcasting^®. Јекх пхен со викинела пе Мерилин вакерела: „Амари интернет-телевизија поможинела манге те овав попозитивно. Освен адава, на ваљани те пазинав со ка дикхав ки лате, соске нане ништо со шај те керел манге штета. Кеда осетинава ман осамено или обесхрабрими, мукхава несаво охрабрувачко говор или несави сабалутни библиско програма. Адава керела ман попаше е Јеховаја хем лескере организацијаја. И телевизија JW Broadcasting целосно менинѓа мло живото“. Дали ту да користинеа акава поклон со денѓа ле о Јехова? Освен о неве емисие кола со икљона секова масек, ки амари интернет-телевизија иси бут аудио хем видео содржине хем охрабрувачка гиља кола со шај те дикха лен хем те шуна лен ко секова време.

16-17. а) Соске мора те пазина кобор време накхаваја ки забава? б) Сар шај те овел амен контрола упро време со трошинаја ле ки забава?

¹⁶ Мора шукар те пазина на само сави забава биринаја него хем кобор време трошинаја ки лате. Ако на пазинаја, шај те трошина повише време ки забава него ки служба башо Јехова. Буте џененге тано пхаро те ограничинен о време со користинена ле баши забава. Јекх 18 бершенгири  пхен, која со викинела пе Абигејл, вакерела: „О дикхибе телевизија опуштинела ман ко крајо таро јекх пхаро диве. Ама, ако на пазинава локхе шај те случинел пе манге саатенцар те бешав англи телевизија“. Јекх пхрал со викинела пе Семјуел, коле со иси 21 берш, вакерела: „Понекогаш случинела пе манге те дикхав бут видеоклипија ко интернет. Ка почминав те дикхав само јекх видеоклипи хем англедер те овав свесно, више накхле трин или штар саатија“.

¹⁷ Сар шај те овел тут контрола упро време со трошинеа ле ки забава? Прво бути тани те дикхе кобор време трошинеа ки забава. Шај башо јекх курко те пишине туке ко календари кобор саатија накхавеа ко дикхибе телевизија, ко интернет или ко кхелибе игре ко тло електронско уред. Ако мислинеа кај накхавеа бут време ко асавке буќа, пробин те кере туке распоред. Ко прво тхан чхив о поважна буќа, а пало адава одвојн туке време баши забава. Освен адава, молин е Јехова те поможинел туке те икере тут ко адава распоред. Аѓаар ка овел тут време хем сила те проучине и Библија, те икере и Фамилијарно рат, те џа ко состанокија хем ки служба. Исто аѓаар, повише ка уживине ки забава соске о духовна активностија чхивѓан ко прво тхан.

18-19. Сар шај те сикава кај сием одлучна те служина само е Јеховаске?

¹⁸ Откеда пишинѓа башо крајо е Сатанаскере светоскоро хем башо нево свето со ка овел ки иднина, о апостол Петар вакерѓа: „Мангле пхраљален хем пхењален, адалеске со аџикерена акала буќа, ден тумендар са те шај англо Девел те овен чиста, бизо лошна особине, хем ко мир“ (2. Пет. 3:14). Кеда шунаја акава совет хем кеда даја са амендар те ачхова морално хем духовно чиста, сикаваја кај служинаја само е Јеховаске.

¹⁹ О Сатана хем лескоро свето понадари да ка пробинен те теринен амен те чхива о јавера буќа ко прво тхан ко амаро живото наместо е Јехова (Лука 4:13). Ама, нане те мукха никој хем ништо те лел о тхан е Јеховаскоро ко амаро вило. О Јехова заслужинела те овел аменге ко прво тхан, хем адалеске одлучна сием те служина само леске!